Pasin Nogut Bilong Nau

MARÍA i gat 64 krismas na em i stap wanpis. Ol raskol i kam long haus bilong em na paitim em nogut tru. Ol i kisim waia na pasim nek bilong em na em i dai.

Ol man i kros na paitim 3-pela plisman. Ol i tok ol i bin stilim tupela mangi. Ol i kapsaitim petrol antap long tupela bilong dispela 3-pela plisman na kirapim paia. Paia i kukim tupela na ol i dai. Namba 3 plisman i painim rot na i ranawe.

Wanpela man i ring long polis na toksave long sampela bodi i stap we. Polis i digim graun long wanpela gaden na painim bodi bilong 4-pela man i bin kam limlimbur long dispela hap. Ol man nogut i bin pasim laplap long ai bilong ol na pasim han bilong ol. Taim polis i sekim bodi bilong ol, ol i kisim save olsem ol man nogut i bin planim ol taim ol i stap laip yet.

Ol dispela samting nogut tru i no stori nating bilong ol muvi, nogat. Em ol samting i bin kamap tru tru long wanpela kantri long Latin Amerika i no longtaim i go pinis. Tasol i no long dispela kantri tasol ol samting nogut tru i save kamap long nau, nogat.

Pasin bilong mekim nogut tru long narapela​—olsem tromoi bom, pasin teroris, kilim man i dai, paitim na bagarapim man, sutim man long gan, reip, em sampela tasol bilong ol pasin nogut i save kamap long olgeta de. Stori bilong ol dispela samting i save kamap planti taim long nius, na planti manmeri i no kirap nogut moa long lukim o harim kain stori olsem.

Ating yu laik save: ‘Wanem samting bai painim yumi ol man? Pasin bilong tingim ol narapela na rispektim laip bilong ol, dispela pasin i lus olgeta? Bilong wanem yumi stap long kain taim olsem?’

Orait nau tingim Harry, em i gat 69 krismas na i bin kisim sik kensa. Meri bilong em i gat sik multiple sclerosis, tasol ol neiba na ol pren ol i save amamas long helpim ol. Harry i tok: “Sapos i no gat ol dispela man bilong helpim mipela, mi no save mipela bai mekim wanem.” Long Kanada, em ples bilong Harry, planti manmeri i save lukautim ol lapun, na 50 pesen bilong ol i save helpim wanpela i no wanblut bilong ol. Ating yu yet i save long sampela manmeri em long olgeta de ol i save helpim na mekim gutpela pasin long narapela. Tru tumas, yumi ol man inap sori long ol narapela na mekim gutpela pasin long ol na i no olsem yumi mas mekim pasin nogut long ol, nogat.

Olsem na bilong wanem i gat pasin nogut? Wanem samting i kirapim ol man long mekim pasin nogut tru long narapela? Yu ting ol inap senisim pasin bilong ol? Yu ting pasin nogut bai pinis? Na sapos em bai pinis, em bai pinis olsem wanem na long wanem taim?

[Piksa Kredit Lain long pes 3]

Train: CORDON PRESS