Ol Samting Nogut—Wanem Rot Bilong God Long Stretim?

OLSEM wanem ol man i ken pasim ol samting nogut tru bilong bagarapim man? Wanem rot bilong stretim ol dispela hevi? Taim yumi skelim ol samting i bin kamap bipo, yumi save ol wok bilong man long stretim ol dispela hevi i lus nating. Na pasin bilong ol hetman bilong graun long stretim ol dispela hevi i pait wantaim ol narapela samting ol i mekim.

Yumi ken tingim yia 1995. Dispela yia i makim namba 50 yia na ol pasin nogut tru ol Natsi i bin mekim bilong bagarapim planti milion manmeri i pinis, na Namba Tu Pait i pinis, na bom atom i bin pairap. Long dispela yia, ol i wokim ol bung long planti kantri bilong tingim ol dispela samting, na ol bikman bilong ol gavman ol i bin go long ol dispela bung. Bilong wanem ol i wokim ol kain bung olsem? Bilong helpim ol man long pilim tru ol dispela samting nogut tru i bin kamap na ol i no ken kamap gen. Tasol sampela man i tok, ol samting ol i lukim long ol dispela bung i makim olsem ol samting ol i mekim ol i no stret wantaim​—⁠narapela tingting i pait wantaim narapela, na i olsem ol i man bilong tupela maus.

Pasin Bilong Tupela Maus

Long ol dispela bung em bikpela tok bilong en i kamap long ol nius samting, ol mausman bilong ol lotu na gavman i gat laik long ol man i mas ting ol i lain bilong helpim ol man; ol i no laik bai ol man i ting ol i lain nogut. Tasol ol kantri i tokaut olsem ol pasin nogut tru bilong bipo bilong bagarapim man em ol samting nogut nogut tru, ol yet i bin wokim na hipim i stap ol samting nogut bilong pait, na ol i makim bikpela hap mani bilong gavman bilong mekim olsem. Na ol dispela kantri i no bin stretim sampela bikpela hevi olsem pasin bilong i stap rabis, na pasin nogut, na pasin bilong bagarapim graun, win, na wara. Planti taim ol i tok ol i no gat mani bilong stretim ol dispela hevi.

Ol lotu i wok long kamapim sampela stori long ol samting i bin kamap bipo na ol dispela stori i save haitim pasin bilong ol long stap wanbel wantaim ol hatpela bos i mekim nogut long ol man, na ol lotu i bin pasim maus na i no gat tok long ol samting nogut tru ol dispela hatpela bos i bin mekim. Ol dispela lotu i no bin mekim wanpela samting bilong pasim narapela long kilim i dai narapela, maski ol birua i wanlotu bilong ol. Olsem: Long Namba Tu Pait, Katolik i kilim i dai Katolik na Talatala i kilim i dai Talatala, long wanem, ol i bilong narapela lain na ol i birua bilong ol. Na ol dispela lain i insait long pait ol i tok ol i Kristen, tasol pasin ol i bihainim i narapela kain long tok bilong Jisas. (Matyu 26:52; Jon 13:​34, 35; 1 Jon 3:​10-12; 4:​20, 21) Ol narapela lotu i bin mekim wankain samting. Long nau, long sampela hap bilong graun, ol dispela lotu i mekim yet ol pasin nogut tru bilong bagarapim man.

Long taim bilong Jisas, ol bikman bilong lotu i man bilong tupela maus. Jisas i kotim ol taim em i tok olsem: “Yupela saveman bilong lo na yupela Farisi, yupela lukaut. Yupela i man bilong tupela maus. Yupela i save wokim ol gutpela matmat bilong ol profet, na yupela i save bilasim ol matmat bilong ol stretpela man. Na yupela i save tok, ‘Sapos mipela i bin i stap long taim bilong ol tumbuna, orait mipela i no helpim ol long kilim i dai ol profet.’ Long dispela tok yupela yet i soim olsem, yupela i lain pikinini bilong ol man i bin kilim i dai ol profet.” (Matyu 23:​29-31) Ol dispela bikman bilong lotu i tok ol i man bilong God, tasol ol i man bilong tupela maus na ol i birua long Jisas na ol disaipel bilong em.

Ol Samting Baibel i Skulim Yumi Long En

Ol samting i bin kamap bipo inap skulim yumi, tasol Baibel em i nambawan rot bilong skulim gut yumi. Baibel i no givim wok long ol man long skelim insait bilong ol samting i bin kamap long graun, em sampela i gat tingting nogut long sampela lain, nogat. Baibel i kamapim tingting bilong God long ol samting i bin kamap bipo, na long ol samting bai kamap bihain.​—⁠Aisaia 55:​8, 9.

Baibel i stori long ol gutpela samting na ol samting nogut, na long ol gutpela man na ol man nogut. Planti taim, samting bilong skulim yumi na i stret wantaim laik bilong God, yumi inap kisim long ol dispela stori bilong Baibel. Aposel Pol i stori pinis long planti samting i bin painim lain Israel bilong bipo, na nau em i tok: “Dispela ol samting i bin kamap long ol, em i olsem piksa bilong ol arapela man i ken lukim. Ol man i bin raitim ol dispela stori long buk bilong God, bilong givim tingting long yumi ol man i stap long dispela taim nau.” (1 Korin 10:11) Jisas yet i kamapim tok long wanpela samting bilong bipo bilong skulim ol disaipel bilong em, em i tok: “Yupela i mas tingim samting i bin kamap long meri bilong Lot.”​—⁠Luk 17:⁠32.

Samting God i Tingim na Samting Em i No Tingim

Baibel i tokim yumi olsem, pasin bilong ol man i mekim na God i save tingim ol o em i lusim tingting long ol. Ol man i mekim rong tasol ol i tanim bel, God i save lusim rong bilong ol na “marimari moa yet” long ol. (Aisaia 55:⁠7) Sapos wanpela man nogut i tanim bel na “em i givim baksait long sin bilong en, na i wok long mekim stretpela pasin, . . . [God i] no ken tingim ol sin em i bin mekim bipo.”​—⁠Esekiel 33:​14-16.

Pol i tok “God em i no man nogut, na bai em i lusim tingting long ol gutpela wok yupela i bin mekim. Nogat.” (Hibru 6:10) Olsem na Jehova bai mekim gut long ol man em i amamas long tingim. Gutpela man Jop i beten olsem: “God, i gutpela sapos yu haitim mi long ples bilong ol man i dai pinis, . . . na yu ken makim wanpela taim bilong tingim mi gen.”​—⁠Jop 14:⁠13.

Tasol samting God bai mekim long man nogut i no tanim bel bai wankain olsem tok em i bin mekim long Moses: ‘Mi bai rausim nem bilong em.’ (Kisim Bek 32:33) Tru tumas, God bai lusim tingting olgeta long ol man nogut.

Nambawan Jas

God em i nambawan Jas long ol samting i bin kamap bipo bipo na i kam inap nau. (Stat 18:25; Aisaia 14:​24, 27; 46:​9-11; 55:11) Em i nambawan man bilong kotim ol man, olsem na em i no ken lusim tingting long ol planti planti samting nogut tru i bin painim ol man. Long de em bai kamapim belhat bilong em na i stret em i mekim olsem, em bai kotim ol man na ol lain i gat asua long ol dispela samting nogut.​—⁠Kamapim Tok Hait, sapta 18 na 19.

Olgeta lotu giaman bilong dispela graun em Baibel i kolim olsem ‘Bikpela Babilon,’ em wanpela bilong ol dispela lain. Baibel i stori long en olsem: “Em i hipim ol sin bilong en i kam antap inap long heven. Na God i tingim gut olgeta pasin nogut em i bin mekim.”​—⁠KTH 18:​2, 5.

Wok bilong ol dispela lotu em long skulim lain bilong ol long mekim stret ol samting, tasol ol i no mekim. Olsem na Baibel i stori long ol lotu giaman olsem: “God i lukim dispela taun i gat asua bilong kilim i dai ol profet na ol manmeri bilong en. Na olgeta man bilong graun ol birua i bin kilim ol i dai, asua bilong dispela tu em i stap long Babilon tasol.” (KTH 18:24) Ol dispela lotu i gat asua long blut bilong ol man, long wanem, ol i no skulim lain bilong ol long laikim ol narapela man na wanlotu bilong ol.

Nupela Taim i Klostu!

Bikpela de bilong pinisim ol samting nogut i klostu nau. (Sefanaia 2:​1-3; Matyu 24:​3, 7-14) Bihain long dispela de, ‘bel hevi, krai, na pen’ bai pinis na i no ken painim gen ol man i amamas long stap long graun. (KTH 21:​3-5) Ol pasin nogut tru bilong bagarapim man na kilim i dai nating bikpela lain man bai no ken tru kamap gen, long wanem, God bai tekewe strong bilong ol gavman long bosim ol man na givim long Kingdom bilong em long heven, em Krais Jisas i bosim, em “King bilong kamapim gutpela sindaun na bel isi.”​—⁠Aisaia 9:​6, 7; Daniel 2:44; Matyu 6:​9, 10.

Long dispela taim tok profet bilong Song 46:9 bai kamap tru: “[God] i save mekim i dai pait long olgeta hap graun.” Dispela pasin sekan bai stap inap oltaim, long wanem, Aisaia 2:4 i tok: “Olgeta lain manmeri bai i no ken pait moa, na bai ol i no skul moa long pait.” Olsem na Song 37:11 i tok: “Ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” Tru tumas, long dispela taim bai ol i tok, ‘olgeta hap graun i stap bel isi gen, na olgeta manmeri i singaut amamas.’​—⁠Aisaia 14:⁠7.

Em nau, ol dispela samting i makim olsem nupela taim i gat stretpela pasin long en i klostu. Na long dispela nupela taim aninit long Kingdom bilong God long heven, narapela gutpela samting tru bai kamap​—⁠ol man i dai pinis bai kirap bek! Baibel i tokaut klia long dispela samting, olsem: “God bai i kirapim bek ol man i dai pinis, em ol stretpela man na ol man nogut wantaim.”​—⁠Aposel 24:⁠15.

Taim em i stap long graun, Jisas i kamapim klia dispela samting taim em i kirapim bek ol man i dai pinis. Olsem: Em i kirapim bek wanpela yangpela meri na Baibel i tok: “Kwiktaim dispela liklik meri i kirap na i wokabaut. Na ol i lukim dispela, na ol i kirap nogut tru.” (Mak 5:42) Long taim bilong kirap bek, ol man i bin dai long han bilong ol birua na ol narapela man i bin dai inap longtaim pinis, ol bai kirap bek long indai na rot bai op bilong ol i ken stap oltaim long Paradais long graun. (Luk 23:​43, NW) Na bihain bai ol i no inap “tingim moa ol samting i bin kamap bipo.”​—⁠Aisaia 65:⁠17.

Yu bai bihainim gutpela tingting sapos yu kisim stretpela save long Baibel na mekim laik bilong God. Orait nau God bai amamas long tingim yu taim em i pinisim tru ol dispela pasin nogut tru bilong bagarapim man na em bai givim laip gen long ol man i bin kisim bagarap long ol dispela samting. Jisas i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”​—⁠Jon 17:⁠3.

[Ol Piksa long pes 8, 9]

God bai mekim dispela graun i kamap Paradais i gat bel isi long en

[Ol Piksa long pes 10]

God bai kirapim bek ol man i dai pinis na dispela bai tekewe ol hevi i bin kamap long ol pasin nogut tru ol man i bin mekim bipo