Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w91 5/1 p. 15-24
  • Yu Mas Amamas Tru

No gat vidio bilong dispela seksen.

Sori, popaia kamap long lodim vidio.

  • Yu Mas Amamas Tru
  • Wastaua i Tokaut Long Kingdom Bilong Jehova—1991
  • Ol Liklik Het Tok
  • Wankain Infomesen
  • Wok i Go Bikpela long Olgeta Hap Bilong Graun
  • Ol i Skulim Gut Ol Man
  • Wok Bilong Lainim Ol Man long Baibel i Kamap Strong
  • Amamas i Pulap
  • Amamas Long Mekim Wok Bilong Jehova
    Wastaua i Tokaut Long Kingdom Bilong Jehova—1995
  • Amamas na Mekim Wok Bilong Jehova
    Wastaua i Tokaut Long Kingdom Bilong Jehova—1991
  • Yumi Mas Belgut na Mekim Wok Bilong Jehova
    Wastaua i Tokaut Long Kingdom Bilong Jehova—1983
  • “Long Olgeta Taim Mipela i Stap Laip Mipela i Ken Amamas na Belgut”
    Wastaua i Tokaut Long Kingdom Bilong Jehova—1983
Lukim Moa
Wastaua i Tokaut Long Kingdom Bilong Jehova—1991
w91 5/1 p. 15-24

Yu Mas Amamas Tru

“Tasol Holi Spirit i pulap long ol [disaipel], na ol i amamas tru.”​—⁠APOSEL 13⁠:52.

1. (a) Wanem samting i save kamapim pasin bilong amamas? (b) God i givim wanem gutpela samting long ol man na ol i mas litimapim nem bilong em?

AMAMAS! Em wanpela gutpela pasin Kristen. Pol i stori long ol gutpela pasin em spirit holi i save kamapim na Pol i kolim pasin sori em namba wan na pasin bilong amamas i namba 2. (Galesia 5⁠:​22-25) Wanem as bilong dispela amamas? Em dispela gutpela tok ensel bilong God i bin tokim ol wasman bilong sipsip long en winim 1,900 yia bipo, em ensel i tok: “Harim. Mi bringim gutnius i kam long yupela, em nius bilong mekim olgeta manmeri i amamas tru. Long dispela de long taun bilong Devit, wanpela meri i karim pikinini. Na dispela pikinini bai i kisim bek yupela olgeta.” Na bihain planti ensel moa i kam sanap wantaim dispela ensel na ol i tok, ‘Litimapim nem bilong God! Ol man God i belgut long ol, ol i ken i stap bel isi.’​—⁠Luk 2⁠:​10-14.

2, 3. (a) Olsem wanem na i stret God i bin salim namba wan Pikinini bilong em bilong baim bek ol man? (b) Jisas i mekim wanem ol narapela wok hia long graun bilong inapim laik bilong God?

2 Jehova i belgut long ol man, olsem na em i salim Bikpela Krais Jisas bilong kisim bek ol. Gutpela tingting na save i pulap long dispela namba wan Pikinini bilong God, olsem na Baibel i tok, taim em i lukim ol samting Papa bilong em i wokim, em i tok: “Long taim Bikpela i mekim ol dispela wok, mi stap wantaim em na em i makim mi olsem saveman i bosim wok. Olgeta de mi bin mekim em i amamas, long wanem, mi bin amamas tumas long lukim ol samting em i bin wokim. Mi bin amamas long lukim dispela graun na ol manmeri i stap long en, olsem na mi bin amamas i stap oltaim long ai bilong Bikpela.”​—⁠Sindaun 8⁠:​30, 31.

3 Olsem na i stret Jehova i bin salim dispela Pikinini i kam baim bek ol man, long wanem, em i save amamas tumas long ol manmeri. Tasol taim God i mekim olsem, dispela i litimapim nem bilong God olsem wanem? Dispela i opim rot na bai em inap kamapim laik bilong em, em i laik bai ol stretpela manmeri i laikim tumas pasin bilong i stap bel isi ol i ken pulap long graun. (Stat 1⁠:28) Na taim dispela Pikinini, em Jisas, i stap long graun em i kamapim long ples klia olsem man i nambawan tru em inap winim ol bikpela traim na i stap gut long Jehova, em Nambawan Bikpela King. Na long dispela rot Jisas i stretim bek nem bilong Papa bilong em, em i Bos tru bilong olgeta samting em i bin wokim. (Hibru 4⁠:15; 5⁠:⁠8, 9) Jisas i bin holimpas lo bilong God, olsem na em i stap olsem gutpela piksa bilong olgeta Kristen tru i ken bihainim gut lek bilong em.​—⁠1 Pita 2:21.

4. Jisas i karim hevi na sanap strong na em i kisim wanem bikpela amamas? Olsem wanem dispela inap strongim bel bilong yumi?

4 Jisas i amamas tru long bihainim laik bilong Papa bilong em, na em i tingting long kisim bikpela amamas moa long bihain, olsem aposel Pol i stori long Hibru 12⁠:​1, 2: “Ol dispela manmeri bilong bipo ol i sanap na raunim yumi i stap olsem bikpela klaut, na ol i soim yumi pasin bilong bilip. Olsem na yumi mas lusim olgeta kain samting i mekim yumi i no inap ran strong, na olgeta sin i save pas long yumi. Na yumi mas strongim bel na ran strong long dispela resis God i bin makim bilong yumi ran long en. Yumi mas lukluk i go long Jisas, em i as bilong bilip bilong yumi, na bihain em bai inapim tru bilip bilong yumi. Jisas i save, sapos em i bihainim tru tok bilong God, orait bihain em bai i stap gut na amamas moa yet. Na em i tingting long dispela na em i stap strong, na em i karim pen na i dai long diwai. . . . Na nau em i sindaun long han sut bilong sia king bilong God.” Wanem dispela amamas? Jisas i amamas long mekim nem bilong Papa bilong em i kamap holi, na em i amamas long baim bek ol man long i dai, na em i amamas moa yet long em bai inap i stap King na Hetpris na helpim ol man i bihainim tok bambai ol i ken i stap oltaim long paradais long graun.​—⁠Matyu 6⁠:9; 20⁠:28; Hibru 7⁠:​23-26.

5. Ol “brata” bilong Jisas ol i husat? Ol i kisim wanem amamas wantaim em na ol narapela man i no inap kisim?

5 Tru tumas, long olgeta taim Pikinini bilong God i save amamas long mekim wok bilong helpim ol man. Na em i amamas long wok wantaim Papa bilong em na makim wanpela lain i holimpas lo bilong God, em i kolim ol olsem ol “brata” bilong em, na taim ol i dai ol i kirap bek na kisim laip long heven. Dispela lain i kisim wanpela amamas wantaim Jisas, em ol narapela man i no inap kisim, em olsem: “God i makim ol bilong em yet na ol . . . bai i stap pris bilong God na bilong Krais. Na ol bai i stap king wantaim Krais long dispela 1,000 yia.”​—⁠Hibru 2⁠:11; Kamapim Tok Hait 14⁠:​1, 4; 20⁠:⁠6.

6. (a) King i givim wanem gutpela tok long ol “arapela sipsip” bilong em? (b) Planti bilong dispela lain i kisim wanem ol gutpela wok long nau?

6 Na i gat bikpela lain “arapela sipsip,” em King i putim ol i stap long han sut bilong em, olsem em i orait long ol, na em i tokim ol: “Yupela kam kisim kingdom Papa i bin redim na makim bilong yupela pinis, long taim graun i kamap nupela yet.” (Jon 10⁠:16; Matyu 25⁠:34) Ol bai kisim gutpela samting tru! Planti long dispela lain bilong kisim laip long graun aninit long Kingdom, long nau ol i kisim wok insait long kongrigesen na ol i wok wantaim lain God i makim bilong i stap king long heven. I olsem Jehova i tok profet pinis: “Ol man bilong ol arapela kantri bai i kam mekim wok bilong yupela. Bai ol i was long ol sipsip samting bilong yupela, na bai ol i brukim graun na planim kaikai. Na bai ol i lukautim tu ol gaden wain bilong yupela. Tasol yupela yet bai i stap olsem ol pris bilong Bikpela, na bai ol i kolim yupela ol wokman bilong God bilong yumi.” Olgeta i mekim tok wankain olsem profet bilong God i bin mekim, em i tok: “Bai mi singsing amamas long God, Bikpela bilong mi. Bai mi amamas moa yet, long wanem, em i bin kisim bek mi. Gutpela taim bilong en na stretpela pasin bilong en i karamapim mi olsem gutpela longpela klos.”​—⁠Aisaia 61⁠:​5, 6, 10.

7. “De” i kirap long yia 1914, olsem wanem em i bikpela “de” tru?

7 Yumi stap long wanpela bikpela “de” tru. Kirap long yia 1914 em i “de” o hap taim bilong Krais i mekim wok king long heven, olsem Buk Song 118⁠:​24, 25 i tok: “Bikpela i givim yumi dispela gutpela de. Yumi mas amamas na belgut long en. Bikpela, mipela i askim yu long kisim bek mipela. Yu helpim mipela na olgeta samting mipela i mekim bai i kamap gutpela.” Laspela bikpela samting bilong dispela “de” bai kamap taim Jehova i givim strafe long ol lotu giaman, em Babilon i as bilong en, na ol 144,000 brata bilong Krais, olsem “meri” bilong em, i bung wantaim dispela King bilong ol long heven. Taim dispela samting i kamap, olgeta manmeri bilong God bai “belgut na amamas moa yet.” Na ol bai amamas taim King bilong ol, em Krais, i mekim pait long Armagedon bilong helpim ol manmeri i stap gut long em, na bai ol inap i stap long nupela taim em i bosim. (Kamapim Tok Hait 19⁠:​1-7, 11-16) Lain bilong Jehova i wok long tokaut long ol dispela gutpela samting ol i wetim i kamap na olsem wanem? Jehova i mekim wok bilong ol i kamap gutpela? Orait, ripot hia bai kamapim dispela samting.

Wok i Go Bikpela long Olgeta Hap Bilong Graun

8. (a) Olsem wanem amamas na strong bilong spirit holi i kamap klia long ripot i stap long pes 18 bilong dispela nius? (b) Kolim sampela bikpela samting bilong dispela ripot.

8 Ol Witnes Bilong Jehova i kisim strong bilong spirit holi na ol i bilip na wetim ol gutpela samting God i bin tok promis long en. Dispela strong na bilip i “pulap tru” long ol long nau. (Rom 15⁠:13) Dispela samting i kamap ples klia long ripot i stap long pes 18 bilong dispela nius, em ripot bilong wok bilong Kingdom bilong yia 1990. Yumi amamas tru, long wanem, lain bilong autim tok i go bikpela inap olsem 4,017,213! Insait long 10-pela yia i go pinis, wok bilong bungim ol sipsip i kamap strong long 212 kantri, olsem na lain bilong autim tok i go bikpela inap 77 pesen. Inap 15 yia bipo, bikpela lain i bin kisim baptais, tasol long 1990 bikpela lain tru i bin kisim baptais, inap 301,518​—⁠dispela i winim olgeta taim bipo! Long planti kibung, olsem long ol kibung em ol Witnes bilong hap bilong is long Yurop ol i bin i go long en, bikpela lain moa yet i kisim baptais. Na planti ol i yangpela manmeri, olsem na yumi save i no stret ol komyunis i bin tok, taim ol lapun bilong ol dispela kantri i dai pinis, lotu tu bai pinis long en.

9. (a) Ol papamama i kirap skulim ol pikinini taim ol i liklik yet na wanem gutpela samting i kamap? (b) I gat wanem stori long kantri bilong yu o bilong narapela kantri i kamapim klia dispela samting?

9 Planti planti yangpela manmeri i bihainim tok bilong Buk Song 32⁠:​11, em i tok: “Yupela stretpela manmeri, yupela i mas belgut na amamas long olgeta gutpela samting Bikpela i mekim. Yupela olgeta lain manmeri i stretpela long ai bilong God, yupela i mas amamas na singaut.” Nau yumi save, planti papamama i bihainim tok bilong Baibel na ol i kirap long skulim ol pikinini taim ol i “stap liklik pikinini yet.” (2 Timoti 3⁠:15) Ol papamama i mekim gutpela wok long ol buk na kaset samting, em lain bilong Jehova i wokim bilong helpim ol pikinini. Olsem na taim ol dispela pikinini i kirap long go long skul, ol inap autim gut tok na kamapim bilip bilong ol. Wanpela liklik meri Japan em i gat 8-pela krismas, em i stori olsem: “Mipela malolo long skul long taim bilong gutpela san, na bihain, taim mi go bek long skul, mi askim tisa: ‘Long taim bilong malolo yu bin i go lukim matmat bilong papa bilong yu?’ Tisa i bekim tok olsem: ‘Mi bin i go. Mi save go long olgeta yia, long wanem papa em i gutpela man bilong sori.’ Mi tokim tisa: ‘Sapos yu stadi na lainim ol tok bilong Baibel na yu bihainim ol tok bilong God, bai yu inap lukim dispela gutpela papa bilong yu long paradais em bai kamap long graun long bihain.’ Mi givim buk Baibel Stori Buk Bilong Mi long em, na nau, long belo long olgeta wik, em i save kaunim wanpela stori bilong dispela buk long klas olgeta.”

10. Wanpela buk bilong helpim ol yangpela em i bin mekim wanem gutpela wok? Stori long sampela gutpela wok ol i bin mekim long en.

10 Na ol yangpela i gat 13-19 krismas, ol i bin mekim gutpela wok long wanpela buk bilong helpim ol (long tok Inglis ol i kolim Questions Young People Ask​—⁠Answers That Work). Ol yet i bin stadi na lainim ol tok bilong dispela buk, na ol i bin mekim wok long en bilong autim tok long ol narapela yangpela. Dispela buk i bin helpim ol papamama tu. Wanpela sista long Swiselan em i mekim wok painia haptaim na em i go lukim papamama bilong ol wanklas bilong pikinini bilong em. Dispela i opim rot long em na em inap toktok gut wantaim planti papamama, na em i tilim 20 buk (planti ol i dispela buk bilong helpim ol yangpela) na 27 magasin long ol. Wanpela yangpela meri long Trinidad i givim dispela buk long tisa bilong em long skul, na bihain mama bilong em i go long skul bilong lukim tisa, na em i tilim 25 bilong dispela buk namel long ol 36 tisa bilong dispela skul. Mama i wok long i go yet long namba 2 mun na em i go lukim ol papamama em i save long ol. Em i tilim 92 buk long ol papamama na em i kirapim ol nupela Baibel-stadi. Long Korea, wanpela tisa i mekim wok long dispela buk bilong helpim ol yangpela na em i mekim liklik stori long ol skulmanki long kain tok bilong buk olsem: “Olsem Wanem Mi Ken Winim Gutpela Mak long Skul?” “Olsem Wanem Mi Ken Wok Gut Wantaim Tisa?” Bihain em i tokim ol skulmanki long kisim dispela buk. Ol i kisim pinis 39 buk na nau sampela papamama i gat tok long dispela wok tisa i mekim. Tasol het-tisa i lukim wanpela buk olsem na em i skelim ol tok bilong en na em i tok, em i “gutpela buk tru,” na em i kisim wanpela bilong givim long pikinini meri bilong em.

Ol i Skulim Gut Ol Man

11, 12. Kolim sampela stori i kamapim klia olsem ol buk na nius bilong Sosaiti Was Taua i skulim gut ol man.

11 Ol nius o magasin yumi wokim i skulim gut ol man na planti man i pilim tru dispela samting. Olsem na wanpela skul long Amerika i putim oda bilong kisim 1,200 Kirap! (tok Inglis) bilong Julai 22, 1990 bilong mekim wok long en long skul. (Dispela Kirap! i tokaut long ol samting nogut i kamap long pasin bilong kisim wanpela kain drak ol i kolim “krak.”) Ol manmeri i save pilim tu gutpela pasin ol pikinini Witnes i mekim long skul. Ol skulmanki bilong wanpela klas long wanpela skul long Tailan, ol i pairap na singaut nabaut, na tisa i singautim wanpela manki i gat 11-pela krismas i kam sanap long ai bilong ol. Nem bilong dispela manki em Rasa, na tisa i amamas long gutpela pasin bilong em. Em i tokim ol wanklas bilong Rasa: “Gutpela sapos yupela olgeta i bihainim gutpela pasin bilong dispela manki​—⁠em i save givim bel long skul na em i sindaun gut.” Na bihain tisa i tok: “Tasol yupela olgeta i mas kamap Witnes Bilong Jehova pastaim wankain olsem Rasa na ating nau bai pasin bilong yupela i senis na i kamap gutpela.”​—⁠Lukim Sindaun 1⁠:8; 23⁠:​22, 23.

12 Wanpela yangpela sista long kantri Dominikan Ripablik em i raitim pas i kam na em i tok: “Taim mi gat 4-pela krismas mi winim skul long wanpela pri-skul bilong misin. Taim mi stap long dispela skul mi lain pinis long rit rait. Mi givim presen long sister Katolik em i tisa bilong mi. Mi givim buk Yu Inap i Stap Oltaim long Paradais long Graun long em, na mi putim liklik tok wantaim, olsem: ‘Mi laik tenkyu long yu, long wanem, yu bin lainim mi long rit rait. Mi laik bai yu inap save long bilip bilong mi, na bai yu tu yu bilip na wet long kisim laip i stap oltaim long graun.’ Mi mekim dispela samting na ol i rausim mi long dispela skul. Inap 8-pela yia bihain mi bungim gen dispela tisa na em i stori olsem pris i bin birua long em, tasol maski, em i bin kaunim dispela buk. Bihain em i bin lusim dispela skul na em i go i stap long nambawan biktaun, na nau rot i op long em bilong stadi wantaim wanpela Witnes na lainim ol tok bilong Baibel. Mi bungim em long ‘Gutpela Tok Ples’ Kibung Distrik na em i kisim baptais wantaim mi.” Tru tumas, olsem Baibel i tok profet, gutpela save inap kamap long maus bilong “ol liklik pikinini”!​—⁠Matyu 21⁠:16; Buk Song 8⁠:​1, 2.

13. Planti yangpela brata sista i mekim wanem olsem Solomon i tok? Olsem wanem dispela samting i kamap klia long ripot bilong wok long olgeta hap?

13 Solomon i bin givim tok long ol yangpela, olsem: “Yupela yangpela manmeri, yupela i mas amamas long taim yupela i yangpela yet. Yupela i ken bihainim tingting na laik bilong yupela yet.” (Saveman 11⁠:⁠9) Planti pikinini bilong ol Witnes Bilong Jehova long nau ol i gat gutpela tingting na laik, na taim ol i yangpela yet ol i redi na taim ol i bikpela pinis bai ol inap mekim wok bilong Jehova oltaim. Taim ol i skul yet ol i wok long redi na taim ol i winim skul pinis bai ol inap kirap long mekim wok painia oltaim, em dispela wok i gutpela wok tru na i winim ol narapela wok ol inap mekim. Lain painia i wok long i go bikpela hariap. Long yia 1990 inap olsem 821,108 painia i bin putim ripot. Na i gat 11,092 brata sista i wok long Betel. Sapos yumi bungim lain painia wantaim dispela lain i wok long Betel em bikpela lain tru, inap olsem 21 pesen bilong olgeta pablisa!

14. Ol sista i mekim wanem bikpela hap wok? Yumi amamas long wanem ol wok ol i mekim?

14 Na long planti kantri, olsem long Amerika, bikpela hap lain (inap 75 pesen) bilong olgeta painia ol i sista. Dispela i strongim tok bilong Buk Song 68⁠:11 i tok: “Bikpela i givim tok long ol manmeri bilong en, na planti meri i go autim dispela tok.” Yumi amamas long gutpela wok ol sista bilong yumi i mekim, em ol i mekim bikpela hap wok bilong autim tok. Ol i lainim gut ol manmeri long ol Baibel-stadi na dispela i helpim planti manmeri long kisim tok i tru. Na yumi amamas tu long ol sista i marit na ol i helpim gut man bilong ol, em man bilong ol i gat planti wok insait long kongrigesen.​—⁠Sindaun 31⁠:​10-12; Efesus 5⁠:​21-25, 33.

Wok Bilong Lainim Ol Man long Baibel i Kamap Strong

15. (a) Stori long sampela kantri long dispela ripot em ol i gat planti Baibel-stadi. (b) Stori long sampela Baibel-stadi i bin karim gutpela kaikai.

15 Wok bilong lainim ol man long ol tok bilong Baibel, dispela wok i kamap strong. Long olgeta hap bilong graun, long olgeta mun, ol brata sista i save mekim 3,624,091 Baibel-stadi. Tok i tru bilong Baibel inap kirapim man long senisim tru pasin bilong em, olsem wanpela stori i kam long Ostrelia i makim. Polis long Ostrelia i bin holim wanpela man bilong Nu Silan na kot i givim 25 mun kalabus long em, long wanem, em i bin stil na giaman. Em i save kisim drak long olgeta taim na inap 17 yia pinis em i bin wok hait long baim drak i go long ol man. Taim 25 mun kalabus bilong em i pinis, olsem long Janueri 1987, gavman i rausim em long Ostrelia na salim em i go bek long Nu Silan. Long yia antap, ol Witnes Bilong Jehova i kirap long lainim meri bilong em long ol tok bilong Baibel. Meri i wok long kisim save, na nau man bilong em i lukim pasin bilong meri i senis olgeta. Em i kamap gutpela meri na gutpela mama bilong ol pikinini. Meri bilong em i wok long kirapim em long i go long wanpela kibung sekit long Jun 1989 na em i go. Long dispela taim em i orait long ol Witnes i stadi wantaim em na lainim em tu long ol tok bilong Baibel. Em i kirap long senisim pasin bilong em na em i mekim gut skin. Em yet wantaim meri bilong em na ol 5-pela pikinini bilong em ol i kirap long i go long ol miting. Em i kisim baptais long Janueri 1990, na dispela i kamapim klia olsem em i bihainim tok bilong Pol long Efesus 4⁠:​17-24.

16. (a) Bilong wanem yumi amamas long ol ripot bilong Memorial bilong 1990? (b) Yumi lukim wanem bikpela wok i stap yet? Yumi mas mekim wanem bilong helpim dispela wok?

16 Narapela bikpela samting long ripot bilong dispela yia, em olsem: 9,950,058 manmeri i bin bung bilong mekim Memorial long Tunde, Epril 10, 1990. Em bikpela lain tru, winim olgeta taim bipo. Long ol 212 kantri i bin putim ripot, winim 70 kantri i tok, lain i kam long Memorial long kantri bilong ol i bikpela tru, winim lain pablisa long kantri bilong ol inap 3-pela taim! Long 7-pela kantri long Afrika i gat 62,712 pablisa na maski i gat tambu long ol dispela kantri, inap olsem 204,356 manmeri i bin bung long taim bilong Memorial. Long kantri Laibiria i gat pait, tasol ol 1,914 pablisa i amamas, long wanem, 7,811 manmeri i bin bung long taim bilong Memorial. Long kantri Haiti, long wanpela mun inap olsem 6,427 i autim tok; dispela i winim olgeta narapela mun, na long taim bilong Memorial inap olsem 36,551 ol i bung. Long ol ailan bilong Maikronisia i gat 886 pablisa, tasol long taim bilong Memorial inap olsem 3,958 manmeri i bin bung. Long Sri Lanka i gat 1,298 pablisa na 4,521 manmeri i bin bung long taim bilong Memorial. Na long kantri Sambia i gat 73,729 pablisa, tasol long Memorial 326,991 manmeri i kam bung​—⁠em bikpela hap lain tru bilong olgeta manmeri i stap long Sambia​—⁠inap olsem wanpela long olgeta 25 25 manmeri. Yumi lukim ripot bilong dispela yia na yumi save, planti milion manmeri i gat gutpela bel ol i stap yet na yumi gat bikpela wok long bringim ol i kam insait long banis sipsip. Tasol maski ol dispela manmeri i gat gutpela bel, dispela tasol i no inap. Yumi mas wok strong long stadi wantaim ol. Yumi mas mekim planti Baibel-stadi moa, na mekim gut ol dispela stadi. Olsem bai yumi inap helpim planti manmeri em ol i kam bung long taim bilong Memorial na bai ol i kisim strongpela bilip. Yumi laik bai ol i poromanim yumi long wok bilong litimapim nem bilong Jehova. Ol i mas mekim olsem bambai ol inap kisim laip!​—⁠Buk Song 148⁠:​12, 13; Jon 17⁠:3; 1 Jon 2⁠:​15-17.

Amamas i Pulap

17. Wanem ol stori bilong ol Kristen bilong pastaim i mas strongim yumi long holimpas amamas bilong yumi?

17 Maski wanem ol traim i laik painim yumi, yumi mas tingting strong long holimpas amamas bilong yumi. Bikpela traim tru i bin painim Stiven long bipo. Ating kain traim olsem i no inap painim yumi, tasol pasin bilong em inap strongim yumi. Ol man i sutim tok long em, tasol em i stap bel isi na amamas. Ol birua bilong em ol “i lukim pes bilong en i lait olsem pes bilong wanpela ensel.” God i sambai long em long dispela traim. Em i strong long autim tok na “Holi Spirit i pulap” long em i go inap long ol i kilim em i dai. Na Pol tupela Barnabas tu, ol i kirap long autim tok long ol narapela lain, na taim ol manmeri bilong ol narapela lain i harim dispela tok, “bel bilong ol i gutpela tru. Ol i amamas long tok bilong Bikpela.” Bihain pasin birua i kamap gen. Tasol dispela samting i no mekim ol disaipel i pret. Nogat. “Holi Spirit i pulap long ol manmeri . . . i bilip long Jisas, na ol i amamas tru.” (Aposel 6⁠:15; 7⁠:55; 13⁠:​48-52) Maski ol birua i mekim wanem wanem samting long yumi, na maski wanem kain traim i painim yumi long ol samting bilong olgeta de, yumi no ken larim dispela i daunim amamas bilong yumi em spirit holi i kirapim. Pol i tok: “Yupela i save bilip na wetim Bikpela i mekim gut long yupela, olsem na yupela i mas amamas. Sapos hevi i kamap long yupela, orait yupela i mas sanap strong. Na yupela i mas beten long olgeta taim.”​—⁠Rom 12⁠:12.

18. (a) Nupela Jerusalem em wanem samting? Bilong wanem lain bilong God i mas amamas wantaim nupela Jerusalem? (b) Olsem wanem “nupela skai na nupela graun” bai mekim gut long ol man?

18 Ol samting yumi bilip na wet long en em ol gutpela samting tru! Jehova i tokim lain bilong em: “Lukim, mi wokim nupela skai na nupela graun. Na ol man bai i no inap tingim moa ol samting i bin kamap bipo. Yupela i ken bel gut na amamas oltaim long nupela samting nau mi wokim.” Ol manmeri bai amamas tru long Bikpela Krais Jisas na “nupela Jerusalem” (nau em i nambawan biktaun bilong oganaisesen bilong God long heven, em “Jerusalem i stap long heven”) wantaim lain bilong nupela taim em ol i stap long graun. (Galesia 4⁠:26) Ol man i dai pinis bai ol i kirap bek, na olgeta man i bihainim tok bai ol i kamap gutpela olgeta na kisim laip i stap oltaim​—⁠inap long olgeta taim bihain bai skin bilong ol i stap gutpela na bai ol i gat strong bilong mekim ol wok long paradais long graun. Em ol gutpela samting tru yumi wet long en na yumi ken amamas tru long en! Jehova yet i “amamas long Jerusalem na bel gut long ol manmeri bilong [em],” olsem na profet bilong em i singaut long lain bilong God Jehova na i tok moa olsem: “Yupela ol lain i save laikim Jerusalem, yupela i ken amamas wantaim em. . . . nau yupela i mas amamas wantaim em.” (Aisaia 65⁠:​17-19; 66⁠:10; Kamapim Tok Hait 14⁠:1; 20⁠:​12, 13; 21⁠:​2-4) Long olgeta taim amamas na spirit holi i mas pulap long yumi. Oltaim yumi mas amamas, olsem aposel Pol i tok: “Oltaim yupela i mas amamas long Bikpela. Mi tok gen, yupela i mas amamas.”​—⁠Filipai 4⁠:⁠4.

Bilong Kamapim Gen Ol Bikpela Samting Yumi Amamas long En:

◻ Olsem wanem Jisas em i gutpela piksa bilong yumi long pasin bilong amamas na sanap strong?

◻ Tupela lain long nau i dediket long God ol i gat wanem ol samting bilong amamas long en?

◻ Olsem wanem ol yangpela na ol lapun long nau i amamas long tok i tru?

◻ Yumi skelim ripot bilong 1990 na olsem wanem yumi save, Jehova i bin ‘helpim yumi na olgeta samting yumi mekim i kamap gutpela’?

◻ Wanem taim bai amamas i pulap tru? Olsem wanem dispela samting bai kamap?

[Sat long pes 18-21]

RIPOT BILONG WOK BILONG OL WITNES BILONG JEHOVA LONG 1990

(Bilong save ol dispela rait i stap we long pes, lukim buk o magasin)

[Piksa long pes 16]

Ensel bilong Jehova i tokaut long mama i karim Krais, em i Bikpela, na em i tok, ‘Mi bringim gutnius bilong mekim olgeta manmeri i amamas tru’

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim