Askim

◼ Olsem wanem? Esta i bin slip wantaim king bilong Persia taim tupela i no marit yet bambai king i ken amamas long em na em i ken kamap kwin?

Sampela man i lukim sampela stori bilong bipo na ol i ting olsem. Tasol Baibel i no stori long dispela yangpela meri Juda i bin mekim olsem.

Wanpela man bilong raitim stori bilong ol Juda long bipo, em Flavius Josifas, em i stori olsem king bilong Persia i singautim Kwin Vasti i kam na Vasti i no laik i kam. Dispela king bilong Persia, em King Serksis Namba 1 bilong yia 450 samting paslain long Krais. Taim Vasti i bikhet long king, orait king i kros nogut tru na em i rausim Vasti na em i no stap kwin moa. Nau king i orait long ol wokboi i go long olgeta provins em i bosim bilong painim wanpela senis bilong Vasti. Ol i bringim ol naispela yangpela meri i kam, em ol i no bin slip wantaim man, na ol i wok long welim na bilasim skin bilong ol.

Wanpela buk i stori olsem: ‘Taim man i save lukautim ol meri i ting skin bilong ol dispela yangpela meri i redi pinis, na ol inap long i go long bet bilong king, long olgeta de em i save salim wanpela meri i go slip wantaim king, na taim king i slip pinis wantaim dispela meri, king i salim em i go bek long dispela man bilong lukautim ol meri. Tasol taim Esta i go long king, king i laikim em tumas, na tupela i marit.’​—⁠Buk Jewish Antiquities, Buk 11, pes 184-202, em Ralph Marcus i tanim tok bilong en, (Buk 11, sapta 6, paragraf 1, 2, em William Whiston i tanim tok bilong en).

Dispela stori inap kirapim yumi long ting olsem ol dispela yangpela meri i bin pamuk wantaim king, na Esta tu i bin mekim, tasol bihain tupela i marit na Esta i kamap kwin. Tasol Baibel i kamapim stori tru bilong ol samting i bin kamap.

Baibel i stori long ol i welim na bilasim skin bilong ol yangpela meri, na Baibel i tok: “Taim wanpela meri i mas go long haus bilong king, em i ken putim bilas long laik bilong em yet na i go. Meri i save go long king long apinun tru na i stap inap long moningtaim. Na long moningtaim ol i kisim em i go long narapela haus meri na putim em long han bilong Sasgas, wanpela man i save bosim ol namba 2 lain meri bilong King. Na dispela meri i no inap i go long king gen. Sapos king i laikim em na i kolim nem bilong en na singautim em, orait em i ken i go. I no gat narapela rot.”​—⁠Esta 2⁠:​13, 14.

Baibel i tok “ol i bringim” Esta i go long “haus meri insait long banis bilong king” bilong bilasim skin bilong em. Na bihain “ol i bringim Esta i go long king. Na king i laikim em tumas. King i no laikim ol arapela meri olsem em i laikim Esta. Em i lukim Esta i winim ol arapela meri, na em i gutpela meri tru. I no gat narapela meri i bin katim lewa bilong king olsem Esta. Olsem na king i putim hat bilong kwin long het bilong en. Na Esta i senisim Vasti, na i kamap kwin.”​—⁠Esta 2⁠:​8, 9, 16, 17.

Tasol yu tingim stori bilong Baibel long ol narapela meri i slip wantaim king? Long moningtaim ol i kisim meri i go i stap we? Ol i kisim em i go i stap long ‘narapela haus meri na putim em long han bilong man i bosim ol namba 2 lain meri bilong King.’ Olsem na ol i kamap namba 2 meri bilong king. Mordekai, em man bilong raitim hap bilong Esta long Baibel, em i wanpela Hibru, na long taim bilong em, sapos wanpela Hibru i kisim wanpela meri, maski em i no maritim tru dispela meri, long ai bilong ol Hibru dispela meri i olsem namba 2 meri bilong em. Lo bilong God i tok, taim ol Israel i go pait na ol i kalabusim sampela meri bilong narapela lain, sapos wanpela Israel i laik kisim wanpela, em i ken mekim na dispela meri bai kamap olsem namba 2 meri bilong em. Lo i tok man i mas lukautim dispela meri olsem em i meri tru bilong em. (Lo 21⁠:​10-17; lukim tu Kisim Bek 21⁠:​7-11.) Sapos dispela meri i karim pikinini, orait pikinini em i pikinini tru bilong dispela man na lo i tok pikinini inap kisim hap graun samting bilong papa. Jekop i kamapim 12-pela pikinini man long ol meri tru bilong em na long ol meri em i bin kisim olsem ol namba 2 lain meri bilong em. Dispela 12-pela pikinini man i tumbuna bilong ol 12-pela lain bilong Israel.​—⁠Stat 30⁠:​3-13.

Olsem na taim Baibel i tok ol i kisim ol yangpela meri i bin slip wantaim king bilong Persia i go long haus bilong ol namba 2 lain meri, dispela i makim olsem ol i kamap ol namba 2 meri bilong king.

Tasol olsem wanem long Esta? Baibel i no tok em i bin slip wantaim king na long dispela rot king i amamas long em. Nogat. Baibel i no tok ol i kisim em i go long haus bilong ol namba 2 lain meri. Baibel i tok: “Ol i bringim Esta i go long king. Na king i laikim em tumas. King i no laikim ol arapela meri olsem em i laikim Esta.” Na pastaim tru, taim ol i kisim Esta i kam long Hegai, em man “i bosim ol meri,” Esta i no bin mekim wanpela samting bilong pulim man, tasol Hegai “i laikim em.” Na tu, olgeta man i lukim Esta “ol i gat laik tru long em.” (Esta 2⁠:​8, 9, 15-17) Ol i lukim Esta i gutpela meri na ol i laikim em. Na king tu i laikim em.

Yumi amamas tru long wanem Baibel i kamapim stori tru bilong ol samting i bin kamap! Ol dispela samting i bin kamap planti tausen yia bipo, tasol yumi inap save Esta i bin bihainim stretpela pasin olsem lo bilong God i makim.