God i Save Harim Beten Bilong Yu?
WANPELA meri i stap long Hokaido long Japan, em i tok: “I no gat wanpela taim mi pilim olsem God i harim beten bilong mi.” Planti manmeri i pilim olsem. Ating yu tu yu tingting olsem: ‘God i save harim beten bilong mi o nogat?’
Planti milion manmeri i mekim planti planti beten long planti god moa yet. Orait, olsem wanem na planti ol i pilim olsem God i no save harim beten bilong ol? Bilong kisim save long dispela samting, pastaim yumi ken skelim ol kain beten ol man i save mekim.
Sampela i Beten Askim God long Wanem Samting?
Long taim bilong Nuyia, inap olsem 80 milion Japan ol i save go long ol ples holi bilong lotu Sinto na lotu Buda na mekim beten. Ol i save givim mani olsem ofa, na beten bai gutpela samting i ken painim ol na famili i no ken kisim bagarap.
Long Janueri na Februeri—paslain liklik long ol bikpela tes bilong skul—ol skulmanki i save go pulap long ol ples holi, olsem wanpela ples holi long Tokio i gat god bilong skul i stap long en. Ol i save raitim tok long ol liklik hap plang bilong beten na kamapim laik bilong ol na ol i hangamapim long ol hap diwai klostu long ples holi. Long taim bilong tes long 1990 inap olsem 100,000 liklik hap plang olsem i bilasim hap bilong wanpela ples holi long Tokio em i gat biknem.
Planti man i save beten bai ol i no gat sik. Long wanpela ples holi long Kawasaki, long Japan, ol manmeri i save beten bai sik AIDS i no ken kisim ol. Pris i tok, ‘I bikpela samting long ol i beten olsem, long wanem, dispela bai helpim ol long was gut long pasin bilong ol.’ Tasol yu ting dispela tasol i as bilong beten?
Long narapela tempel, wanpela lapun meri i beten bai em i ken “i dai wantu tasol.” Bilong wanem em i beten olsem? Em i no laik bai em i sik longtaim na putim hevi long famili bilong em.
Long wanpela kantri ol i kolim Kristen, kepten bilong wanpela tim bilong pilai kikbal i beten askim God long helpim tim long win na bai i no gat wanpela i kisim bagarap long pilai. Ol Katolik long kantri Polan i save beten askim God long helpim ol yet long i stap gutpela, na taim ol i pilim olsem God i harim beten bilong ol na helpim ol, ol i save bilasim piksa bilong Maria long bis samting bilong tenkyu long God. Planti manmeri i save go long ol haus lotu, olsem Guadalupe long Meksiko Siti na Lurts long Frans, na ol i beten bai i gat mirakel bilong pinisim sik bilong ol.
Long hap bilong sankamap na hap bilong san i go daun, ol manmeri i save mekim ol beten bilong helpim ol yet long kain kain samting. Ol i laik bai God i mas harim beten bilong ol na helpim ol. Tasol yu ting i stret yumi ken ting olsem God bai harim beten bilong olgeta man na helpim ol? Olsem wanem long yu? God i save harim beten bilong yu? O God i no save harim beten bilong ol man?