Ol Tok Piksa—Rot Bilong Putim Tok i Go Daun Long Bel

SOL i ranim Devit na i laik kilim em i dai, olsem na Devit i ranawe. God i bin makim Sol i stap king bilong lain Israel, tasol Sol i bel nogut tru long Devit na i laik kilim em i dai. King Sol i kisim 3,000 soldia i go wantaim em bilong painim Devit. Lain bilong Sol i winim tru lain i stap wantaim Devit, olsem na Devit wantaim lain bilong em i go hait insait tru long wanpela hul bilong maunten long ples nating.

Devit wantaim lain bilong em i hait i stap long ples tudak insait tru long dispela hul, na nau King Sol i go insait long dispela hul, long wanem em i laik pekpek. Devit i holim bainat na em i wokabaut isi tru i go klostu long birua bilong em Sol, em Sol i no holim bainat samting. Tasol lain bilong Devit i kirap nogut, long wanem Devit i no kilim i dai Sol. Em i katim tasol liklik hap long arere bilong longpela klos bilong Sol. Bihain Devit i pilim nogut long dispela samting em i bin mekim, na em i tok: “Bikpela i no ken larim mi i bagarapim king bilong mi, long wanem, Bikpela yet i bin makim em na putim em i stap king. Mi no ken mekim wanpela pasin nogut long dispela king Bikpela i bin makim.”​—⁠1 Samuel 24⁠:​1-6.

Dispela stori bilong Baibel i helpim yumi long save, yumi mas daun long ol man em God i givim namba long ol bilong bosim yumi. Sapos wanpela man i laik skulim yumi long dispela samting na em i kamapim dispela stori, ating bai yumi pilim tru tok bilong em na bihainim, winim tru sapos em i givim strongpela tok long yumi long dispela samting. Ol stori bilong Baibel i gat bikpela strong bilong skulim yumi.​—⁠Rom 15⁠:⁠4.

Olsem na taim ol Witnes Bilong Jehova i autim tok, o mekim Baibel-stadi, o kamapim ol tok bilong Baibel long bikpela lain manmeri, o autim tok long kain kain taim na ples, ol i no save kolim tasol ol tok​—⁠ol i save kamapim sampela stori o tok piksa bambai tok ol i mekim i go daun long bel bilong ol man i harim. Buk bilong lainim ol long autim tok, em Buk Bilong Skul Bilong Wok Autim Tok, i tok olsem: “Ol tok piksa i save kirapim tingting bilong ol man na ol inap kisim gut ol bikpela tok. . . . Sapos man i bihainim tingting kranki na yu kamapim wanpela gutpela tok piksa, ating yu inap stretim tingting bilong em.”a​—⁠Pes 42.

Wanpela man i raitim buk (Essentials of Public Speaking, bilong Warren DuBois) na em i tok: “Man i mekim tok, em i mas stori long sampela pasin o toktok bilong ol man bilong kamapim tingting bilong em. Long dispela rot, maski em i laik toktok long samting ol man i no tingim tumas, bai tok bilong em i gat strong na bai ol i laik long harim.” Tasol tok bilong Kristen i gat strong pinis na em inap givim laip long man, olsem na sapos ol i mekim sampela stori bilong kamapim gut dispela tok na bai ol man i laik harim, dispela bai helpim ol long putim tok i go daun long bel bilong ol man i harim.

Ol Tok Piksa i Save Lainim Gut Man

Wanem kain tok piksa inap lainim gut man? Em ol tok piksa i stori long ol samting ol man i save long en. Krais Jisas i mekim ol gutpela tok piksa olsem. Taim em i autim tok antap long maunten, em i stori long ol samting ol manmeri i save long en, olsem sol na lam na pisin. (Matyu 5⁠:1–7⁠:29) Ol manmeri long taim bilong Jisas i save long dispela kain lam ol i mas putim wel bilong oliv long en, na sampela taim ol i putim antap long tebol. Jisas i tokim ol disaipel: “Ol man i no save laitim lam na putim aninit long wanpela baket. Nogat. Ol i save putim antap long tebol, na em i givim lait long olgeta man i stap long haus. Olsem tasol, lait bilong yupela i mas lait long ai bilong ol manmeri, bai ol i lukim ol gutpela pasin yupela i mekim, na bai ol i litimapim nem bilong Papa bilong yupela i stap long heven.” Ol disaipel i harim dispela tok na ol i save ol i mas i stap olsem “lam” na givim lait bilong spirit long ol manmeri. (Matyu 5⁠:​15, 16) Taim ol Kristen i autim tok, sapos ol i mekim ol tok piksa i no hatwok long ol man i save long en na i stret long ol tok ol i laik mekim, dispela bai helpim ol long kamapim gut tingting ol i laik autim long ol man, na bai ol man inap kisim gut ol tok bilong Baibel ol i autim long ol.

Ol man i save kisim gut ol tok piksa bilong Jisas i stori long ol man na ol samting ol i mekim​—⁠ol dispela kain tok piksa i gat bikpela strong. Tingim ol tok piksa bilong Jisas i stap long Luk sapta 15 na 16. Ol saveman bilong lo na ol Farisi i sutim tok long Jisas, long wanem em i larim ol man bilong kisim takis na ol man bilong mekim sin ol i kam klostu long em. Bilong bekim tok long ol, Jisas i mekim ol dispela gutpela tok piksa, em ol man inap pilim tru. Em i stori long wanpela wasman bilong sipsip em i wok strong long painim sipsip i lus, na wanpela meri i painim pinis mani i lus, na pikinini i lusim papa na i kam bek gen, na bosboi nogut.

Ol gutpela tok piksa na stori bilong samting tru i bin kamap inap helpim tru Kristen long lainim gut ol man taim em i autim tok. Wanpela man, em Alexander H. Macmillan, em i bin raun long planti hap inap olsem 60 yia na mekim ol pablik-tok. Tingim ol tok em i bin mekim long ol samting tru i save painim man i dai pinis. Papa bilong em i bilip olsem yumi gat tewel, na tewel i no inap i dai, tasol paslain liklik long taim papa i dai, Macmillan i toktok wantaim papa. Em i stori olsem:

“Papa i givim askim long mi, olsem: ‘Taim mi stap long matmat na mi wet long kingdom i kirap mekim wok bilong en long stretim bek dispela graun, bai mi bel hevi na pilim olsem mi stap wanpis o olsem wanem?’

“Mi yangpela man na papa i lapun, olsem na i hatwok long bekim gut dispela askim long samting em i no bin tingim bipo.

“Mi askim em olsem: ‘Papa, asde long nait yu slip gut o olsem wanem?’

“Papa i tok, ‘Yes, pikinini, taim dokta i givim sampela marasin long mi, em nau, mi slip gut.’

“ ‘Taim yu slip, yu bel hevi long wanem yu stap wanpis o olsem wanem?’

“ ‘Nogat. Mi laik bai mi inap slip long olgeta taim, long wanem taim mi slip, mi no pilim pen liklik.’ ”

Nau Macmillan i kaunim tok bilong Jop 14⁠:​13-15 na 3⁠:​17-19 long papa. Kaunim pinis, orait Macmillan i tok: “Papa, nau yu save, taim man i dai, i olsem em i slip, na em i no save long wanpela samting, olsem na em i no inap bel hevi na pilim olsem em i stap wanpis, a?”

Em gutpela pasin bilong lainim man, a? Sapos yu wanpela Witnes Bilong Jehova, yu inap mekim gutpela wok olsem long ol tok bilong Baibel na ol gutpela tok piksa bilong helpim man long kisim gut ol tok na pilim tru long tingting na long bel.

Yu Ken Painim We Ol Tok Piksa?

Tasol yu ken painim we sampela gutpela tok piksa na sampela stori long samting i bin painim tru ol man? Yu ken tingim ol samting i bin painim yu yet na stori long dispela samting. Olsem wanem? Yu laik stori long ol gutpela samting i save painim man i bilip, o gutpela samting inap kamap taim man i beten, o gutpela amamas yu inap kisim taim yu autim tok? Sapos yu wanpela Kristen i dediket na baptais pinis, ating yu ken stori long ol gutpela samting i bin painim yu yet. O long miting o taim yu toktok wantaim ol narapela Kristen, ating yu harim sampela gutpela stori yu inap mekim wok long en. O sapos yu save long tok Inglis, yu ken kaunim ol gutpela stori i stap long Yearbook of Jehovah’s Witnesses. O yu ken lukim Indeks i stap long ol volyum bilong Wastaua na Kirap! na lukim sampela stori bilong ol Witnes i stap long narapela narapela hap bilong graun.

Olsem wanem yu inap kamapim gut wanpela stori? Wanpela samting yu mas mekim, em olsem: Yu mas mekim sampela tok pastaim bilong kirapim tingting bilong man na bai em i gat laik long harim dispela stori. Taim yu laik stori long ol samting i bin painim wanpela painia, ating pastaim yu ken tok: “Wanpela painia i pilim tru olsem Jehova i save mekim gut long ol man i bilip tru long em.” Dispela bai kirapim tingting bilong ol man na bai ol i laik harim dispela stori na save long ol gutpela samting i bin painim dispela painia. Orait nau yu mas stori long ol.

Taim yu laik stori long wanpela samting, yu mas kolim long toktok bilong yu yet. Sapos yu stori gut long ol samting i bin kamap, bai i no hatwok long kirapim ol man long bihainim ol tok yu kamapim. Tasol nogut yu stori planti tumas na ol i no pilim as tru bilong stori. Na yu no ken skruim sampela tok bilong helpim stori, tasol em i no hap tru bilong dispela stori, na bai ol man i no bilipim tok bilong yu. Na no ken kolim sampela stori yu bin harim, tasol yu no save dispela stori i tru o nogat.

Helpim Ol Man long Pilim Tru Tok Bilong Baibel

I gat planti gutpela stori bilong lainim yumi em ol i stap long Baibel yet. Olsem: Sapos yu laik helpim Baibel-stadi o ol narapela man long save olsem ol pikinini inap stap gut long God Jehova, ating yu ken stori long yangpela meri Israel i bin tokim meri bilong Naman long Elisa, em profet bilong Jehova. Orait pastaim yu ken kaunim dispela stori long ol, em i stap long 2 King 5⁠:​1-5. Na bihain yu ken mekim askim olsem: “Dispela liklik meri i stap longwe long as ples bilong em, na ol manmeri bilong dispela longwe hap ol i lotuim ol god giaman, olsem na yu ting i hatwok long em i stap gut long God o nogat? Em i mas strongim bel bambai em inap autim tok na kirapim ol long bilip long Jehova na profet bilong em Elisa, a?”

Sapos yu bin lukim sampela buk i stori moa long dispela samting, orait bai yu inap stori gut long en. Ating yu bin lukim Indeks i stap long Wastaua samting na yu bin kisim sampela save moa long Naman na kantri Siria na Elisa. Long sampela Baibel i gat liklik tok daunbilo i kolim narapela hap bilong Baibel i helpim stori, na long 2 King 5 ol i makim Buk Song 148⁠:​12, 13, em i tok: “Ol yangpela man na ol yangpela meri, na ol lapun na ol pikinini, yupela olgeta litimapim nem bilong Bikpela! Tru tumas, olgeta i mas litimapim nem bilong Bikpela. Biknem bilong em wanpela i winim tru biknem bilong olgeta manmeri. Biknem bilong en i antap tru, i winim heven na graun.” Dispela tok i strongim ol yangpela long autim tok bilong God na no ken pret!​—⁠Aposel 4⁠:​29-31.

Sapos yu wanpela Kristen i save autim tok, “yu mas was gut long ol pasin bilong yu yet na long wok yu mekim bilong skulim ol manmeri.” (1 Timoti 4⁠:16) Yu no ken kolim tasol ol tok i tru​—⁠yu mas kamapim ol tok piksa tu. Kamapim gut ol stori bilong Baibel bambai ol man inap kisim gut na pilim tru. Kamapim ol stori na tok piksa inap helpim tok bilong yu. Em rot bilong putim tok i tru i go daun long bel bilong ol man.

[Ol Futnot]

[Piksa long pes 29]

Ol Kristen long nau i ken bihainim pasin bilong Jisas na mekim ol tok piksa bilong putim tok i go daun long bel bilong man