God Bai Isi Long Ol Man Inap Long Wanem Taim?
INAP 3,000 yia bipo wanpela saveman i tok: “Sampela bikman i wok long daunim ol arapela manmeri na mekim nogut long ol.” (Saveman 8:9) Na inap long nau, dispela pasin i stap. I gat ol bikman na ol gavman i bin kisim wok bilong bosim ol man na narapela i senisim narapela, na ol i bin mekim nogut long ol manmeri. God Jehova i no les kwik—em i larim ol i stap.
Ol gavman i bin salim ol man i go pait na planti milion ol i dai, na ol gavman i bin helpim sampela man tasol na larim ol narapela i stap rabis tru. Tasol Jehova i no les kwik—em i larim ol i stap yet. Long nau ol man i wok long bagarapim win na solwara, tasol Jehova i isi yet long ol. Taim em i lukim dispela gutpela graun i bagarap, na em i lukim ol man i pinisim nating ol bikbus na ol animal bilong bus, yumi save bel bilong em i mas pen tru!
Bilong Wanem God i Isi Long Ol Man?
I gat wanpela tok piksa inap bekim dispela askim. Olsem: Sapos long olgeta taim wanpela wokboi i kam bihaintaim long wok, dispela bai mekim wanem long kampani? Papa bilong kampani, olsem bos bilong em, i mas mekim wanem? I stret em i ken rausim dispela wokboi wantu tasol, a? Tasol ating em bai tingim wanpela tok bilong Baibel, olsem: “Man i no save belhat kwik, em i gat gutpela tingting.” (Sindaun 14:29) Ating gutpela tingting bai kirapim em long wet pastaim bambai ol i ken lainim senis bilong dispela wokboi. Nogut ol i rausim em kwik na bai wok bilong kampani i bagarap moa yet.
Na sapos bos hia i sori long em, ating dispela tu bai mekim na bai em i isi long em. Gutpela sapos em i givim tok lukaut long dispela wokboi nogut bilong kirapim em long senisim pasin bilong em, a? Ating em i ken toktok wantaim wokboi bambai em i ken save, i gat wanem as na long olgeta taim wokboi i kam bihaintaim. Ating wokboi i gat hevi na em inap stretim, o ating tingting bilong em i kranki olgeta na em i no inap stretim? Ating pastaim bai bos i isi long dispela wokboi, tasol em i no ken larim dispela pasin nogut i stap oltaim. Wokboi i mas stretim pasin bilong em, sapos nogat, bai bos i rausim em. Sapos bos i mekim olsem, dispela i stret bilong helpim kampani na bilong helpim ol wokboi i save bihainim ol lo bilong kampani.
Olsem tasol God Jehova i save isi long ol man. Em i larim pasin nogut i stap pastaim bambai i gat taim bilong stretim gut sampela samting. Na pasin isi bilong em i givim rot long ol man nogut bilong senisim pasin bilong ol, na bai ol inap kisim ol blesing bilong oltaim oltaim. Olsem na Baibel i tok, yumi no ken kros long pasin isi bilong God. Baibel i tok: “Bikpela i wet yet na em i isi long yumi. Yupela i mas save, em i mekim dispela pasin, long wanem, em i laik kisim bek yumi.”—2 Pita 3:15.
Wanpela Taim God i Bin Isi Long Ol Man
God Jehova i bin isi long ol man i stap paslain long taim bilong Bikpela Tait Wara long taim bilong Noa. Pasin pait i pulap long graun long dispela taim bipo na ol man i mekim pasin nogut tru. Baibel i tok: “Bikpela i lukim pasin bilong ol manmeri long olgeta hap i nogut tru. . . . Orait na em i tok, ‘Bai mi pinisim olgeta manmeri mi bin wokim, maski ol i stap long wanem hap.’ ” (Stat 6:5, 7) Em nau, Jehova i tingim pinis rot bilong pinisim tru pasin nogut i stap long dispela taim bipo: Em i laik pinisim ol man nogut. Tasol em i no mekim wantu tasol. Bilong wanem em i no mekim wantu tasol?
Long wanem sampela man i no man nogut. Noa wantaim lain bilong em ol i stretpela man long ai bilong God. Olsem na bilong helpim ol dispela stretpela man, God i wet pastaim bambai ol inap mekim ol samting bilong abrusim bagarap. Na taim God i wet yet, dispela i givim rot long Noa bilong kamap “man bilong tokaut long stretpela pasin,” na ol man nogut inap kirap senisim pasin bilong ol. Baibel i tok: “Long taim bilong Noa, . . . [God] i wet i go inap Noa i wokim pinis sip bilong en. Na liklik lain tasol, inap 8-pela manmeri, ol i bin i go antap long sip na . . . God i kisim bek ol na ol i stap gut.”—2 Pita 2:5; 1 Pita 3:20.
Bilong Wanem God i Isi Long Ol Man Long Nau
Long nau tu pasin pait na pasin nogut i pulap long graun. Na olsem long taim bilong Noa, God i skelim pinis dispela graun, na olsem Baibel i tok, dispela graun “i wetim de bilong bikpela kot i kamap, na ol man i bin givim baksait long God, ol bai i bagarap olgeta.” (2 Pita 3:7) Taim dispela samting i kamap, bai ol man i no bagarapim moa graun na win na wara, na bai ol i no daunim moa ol man i no gat strong, o mekim wok nogut long strong ol i holim bilong bosim ol narapela man.
Orait, bilong wanem God i no bagarapim ol man nogut longtaim bipo? Long wanem i gat sampela bikpela tok na sampela bikpela samting em i mas stretim pastaim. Tasol em i wok i go bilong pinisim tru pasin nogut inap oltaim, na i gat planti samting em i mas stretim rot bilong mekim. Wanpela em olsem: Em i mas stretim rot bilong kisim bek ol man i gat gutpela bel na bai sik na i dai i no inap kalabusim ol moa.
Bilong mekim olsem, Jehova i tok promis long kamapim wanpela Man bilong helpim yumi na em i mas mekim ofa bilong baim bek yumi long ol sin bilong yumi. Baibel i stori long dispela Man na i tok: “God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” (Jon 3:16) God i wok inap planti tausen yia bilong redim rot bambai Jisas i ken i kam na i dai bilong helpim ol manmeri. Long ol dispela planti tausen yia, God Jehova i bin mekim pasin sori na wet i stap. Ol man i bin wet longtaim long dispela samting bilong helpim ol, tasol em gutpela samting tru bilong wet long en, a?
Tasol Jisas i kam na baim bek ol man klostu 2,000 yia bipo. Orait, bilong wanem God i wet i stap yet? Wanpela as bilong dispela i olsem: Taim Jisas i dai, nau wanpela bikpela wok bilong skulim ol manmeri i kirap. Ol i mas kisim save long dispela gutpela samting bilong helpim ol bambai ol i ken bilip long en o sakim. I mas i gat bikpela hap taim liklik bilong mekim dispela bikpela wok, tasol dispela hap taim i no lus nating. Baibel i tok: “Bikpela i no save wok isi isi long kamapim samting em i bin promis long mekim, olsem sampela man i save tok. Nogat. Tasol em i no laik bai wanpela man i lus. Em i laik bai olgeta man i mas tanim bel, olsem na em i isi long yupela na em i wet i stap yet.”—2 Pita 3:9.
Bikpela Tok Long Wok Gavman
Narapela bikpela samting i mas i gat bikpela hap taim bilong stretim, em olsem: I stret husat i mas bosim ol man? Pastaim ol man i stap aninit long gavman bilong God. Tasol long gaden Iden, namba wan tumbuna papamama bilong yumi i bin givim baksait long dispela kain gavman. Ol i no laik bai God i bosim ol; ol i laik bosim ol yet. (Stat 3:1-5) Tasol God i no bin wokim ol man bai ol inap bosim ol yet. Profet Jeremaia i tok: “Bikpela, mi save, mipela man i no inap bosim wokabaut bilong mipela yet.”—Jeremaia 10:23; Sindaun 20:24.
Tasol kirap long taim bikpela tok long wok gavman i bin kamap long pastaim na i kam inap long nau, Jehova i bin isi long ol man na wet i stap, bambai i gat taim inap long stretim dispela bikpela tok. Em i givim bikpela hap taim long ol man bilong traim save bilong ol na kamapim kain kain gavman. Orait, wanem samting i bin kamap ples klia? Olsem: I no gat wanpela gavman bilong graun em inap pinisim pasin bilong daunim ol narapela lain, o pasin bilong helpim sampela lain tasol, o ol narapela pasin i save mekim na ol man i no i stap amamas.
Sapos yumi skelim ol wok ol man i bin mekim, orait taim God i tok em i laik pinisim olgeta gavman bilong dispela graun na kamapim wanpela gavman bilong em yet olsem senis bilong ol, yu ting i gat wanpela man inap sutim tok long God na tok God i laik mekim pasin i no stret? Nogat tru! Yumi laik tru bai God i truim tok profet bilong Baibel i tok: “Taim ol dispela king i stap yet God bai i kirapim wanpela kingdom . . . em bai i . . . bagarapim ol arapela king na kingdom bilong en bai i stap oltaim.”—Daniel 2:44.
King bilong dispela Kingdom long heven, em Jisas i kirap bek pinis. Bikpela hap taim i bin lus bilong redim em bilong kisim dispela wok, na bilong makim ol manmeri ol bai wok king wantaim em. Insait long dispela bikpela hap taim God i bin isi long ol man na wet i stap.
God i Isi Long Ol Man na Dispela i Helpim Yumi
God i bin isi long ol man na dispela gutpela pasin bilong em i bin helpim planti milion manmeri long 212 kantri long nau. Ol i kamap wanbel, long wanem ol i gat wanpela laik tasol, em ol i laik bihainim tok bilong God na mekim wok bilong gavman bilong em. Taim ol i bung wantaim long ol Haus Kingdom bilong ol, ol i lain olsem pasin bilong bihainim ol lo bilong Baibel inap helpim ol tru. Ol i no save insait long ol wok politik bilong dispela graun i save brukim ol man i stap narapela narapela lain. Tasol ol i save aninit long ol dispela gavman, na ol bai mekim olsem i go inap long taim God i no wet moa na em i pinisim ol dispela gavman.—Matyu 22:21; Rom 13:1-5.
Ol dispela planti manmeri i wok gut wantaim, na dispela samting i litimapim nem bilong Jehova, em inap kamapim pasin wanbel namel long ol manmeri em long laik bilong ol yet ol i lain long givim bel long em na ol i gat laik long mekim wok bilong em. Ating yu bin bungim ol dispela manmeri long taim ol i mekim wok em Jisas yet i bin kirapim, em wok bilong autim gutpela tok bilong Kingdom bilong God. Jisas i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.”—Matyu 24:14.
Klostu Nau!
Ol samting yumi lukim i kamap long graun i makim klia olsem ol wok God i mekim bilong stretim rot bambai stretpela gavman bilong em i ken kirap bosim graun, ol dispela wok i laik inap nau. Jisas i stori long ol samting nogut tru wok bos nogut bilong ol man bai kamapim na yumi lukim nau long taim bilong yumi, na bihain Jisas i tok: “Taim yupela i lukim ol dispela samting i kamap, yupela i ken save, kingdom bilong God i kam klostu.”—Luk 21:10, 11, 31.
Klostu nau bai God i rausim olgeta man nogut long dispela graun. Bai ol samting i kamap tru olsem Baibel i tok: “I no longtaim na bai ol man nogut i lus olgeta. Bai yu wok long painim ol long ples bilong ol, tasol yu no inap lukim ol.” (Buk Song 37:9, 10) Yu ting wanem kain pasin bai kamap long graun taim ol man nogut i pinis? Husat bai bosim ol samting long dispela taim? Baibel i tok: “I gat wanpela king [em Krais Jisas i stap king long heven] bai i kamap, na dispela king wantaim ol bikman bilong kantri [ol man em i makim long graun na ol i stap gut long em] bai ol i bihainim gutpela na stretpela pasin tasol na bosim gut ol manmeri. Na stretpela pasin bai i kamapim pasin bel isi na ol manmeri bai i no pret moa na bai ol i sanap strong oltaim. Na Bikpela i tok olsem, ol manmeri bilong em bai i gat gutpela sindaun na bai ol i stap gut na malolo long ol ples bilong ol. Na bai ol i no pret long wanpela samting.”—Aisaia 32:1, 17, 18.
Long dispela rot gavman bilong God long heven bai i stretim ol samting nogut em pasin nogut bilong ol man i bin kamapim. Na dispela gavman bai bosim ol manmeri i bilip long God na bai ol i stap wanbel wantaim. Baibel i stori long dispela gutpela pasin bai kamap, olsem: “Ol wel dok na ol pikinini sipsip bai i stap gut wantaim, na ol lepat bai i slip wantaim ol pikinini meme. Ol pikinini bulmakau wantaim ol yangpela laion bai i raun na kaikai wantaim, na ol liklik manki bai i was long ol. . . . Bai i no gat wanpela i mekim nogut long narapela, long wanem, olgeta samting long graun bai i save tru long Bikpela.”—Aisaia 11:6-9.
Em gutpela samting tru bai kamap, long wanem, God i bin isi long ol man! Olsem na yu no ken kros na tok, God i wok isi isi tumas. Nogat. Gutpela sapos nau yu aninit long Kingdom bilong em taim em i wet yet, a? Kisim save long ol lo bilong em long Baibel na bihainim oltaim. Bung wantaim ol manmeri em ol i stap wanbel na aninit long em. Sapos yu mekim olsem, bai pasin isi bilong God inap helpim yu long kisim ol blesing bilong oltaim oltaim.