Askim

◼ Bilong wanem yumi save tingim yia 29 C.E. i bikpela yia bilong helpim yumi long save long ol yia bilong Baibel, na yumi no tingim yia 14 C.E., em yia Sisar Taiberius i kirap mekim wok king na Luk 3⁠:1 i kolim nem bilong em?

Baibel i no kolim yia bilong Sisar Taiberius i kirap mekim wok king. Tasol Baibel i stori long wanpela samting i bin kamap long Oktoba samting long namba 15 yia bilong em i stap king, na dispela i helpim ol man i stadi long Baibel long save, dispela samting i bin kamap long yia 29 C.E. Olsem na yia 29 em i bikpela yia bilong helpim yumi long save long ol yia bilong Baibel.

Sisar Taiberius em i namba 2 king bilong Rom. Planti buk i stori long bipo ol i tok olsem. Wanpela buk (The New Encyclopædia Britannica) i tok: “Ogastus [em namba wan king bilong Rom] i dai long Ogas 19 long yia AD 14. Nau Taiberius i kamap namba wan na em i wok long stiaim gavman bilong helpim em yet na . . . long Septemba 17 em i kamap king.”a

Dispela i makim de stret na yia stret bilong Taiberius i kirap long mekim wok king, na dispela i helpim yumi long save long ol yia bilong Baibel, long wanem, Luk 3⁠:​1-3 i stori long wok bilong Jon Bilong Baptais na i tok: “Long namba 15 yia bilong Sisar Taiberius i stap king bilong Rom, Pontius Pailat em i stap namba wan gavman bilong distrik Judia. . . . Long dispela taim Jon, pikinini bilong Sekaraia, em i stap long ples i no gat man, na God i givim tok bilong em long Jon. Olsem na Jon i go long olgeta hap i stap klostu long wara Jordan, na em i autim tok long ol manmeri i mas tanim bel na kisim baptais, na bai God i tekewe sin bilong ol.”

Jon i no kirap mekim dispela wok long taim Taiberius i kirap long mekim wok king. Nogat. Jon i kirap mekim dispela wok long “namba 15 yia bilong Sisar Taiberius.” Dispela namba 15 yia i kirap long Septemba long yia 28 C.E. na i pinis long Ogas o Septemba long yia 29 C.E. Tasol dispela i no helpim yumi long save wanem de o mun stret Jon i bin kirap mekim wok bilong em long dispela namba 15 yia, na i no helpim yumi long save long de o yia samting bilong sampela narapela samting i bin kamap long dispela taim.

Tasol sampela tok bilong Baibel i helpim yumi long save long dispela. Olsem: Tok profet bilong Daniel long “70 taims 7-pela yia” i makim 29 C.E. olsem yia bilong Bikman God i bin makim i mas kam. Na dispela tok profet i makim olsem Jisas bai mekim wok bilong em inap 3-pela yia na hap. (Daniel 9⁠:​24-27) Orait, i gat sampela tok moa bilong helpim yumi long kisim stretpela save long dispela, olsem: Jisas i bin kamap long graun 6-pela mun bihain long taim mama i karim Jon Bilong Baptais; taim Jisas i baptais, “em i gat samting olsem 30 krismas”; Jisas i dai long Epril samting long yia 33 C.E. (long taim bilong Pasova) na long dispela taim em i gat 33 na hap krismas.​—⁠Luk 1⁠:​24-38; 3⁠:23; 22⁠:​14-16, 54.b

Dispela stretpela save Baibel i givim long yumi na ol yia ol buk i kolim bilong Taiberius i stap king, dispela i helpim ol man i stadi long Baibel na ol inap skelim gut ol yia na kisim save olsem: Jon Bilong Baptais i bin kirap mekim wok bilong em long mun Epril samting long yia 29 C.E., na 6-pela mun bihain, olsem long Oktoba samting long yia 29 C.E., Jon i bin givim baptais long Jisas. Olsem na yia 29 C.E. i bikpela yia bilong helpim yumi long save long yia bilong ol samting Baibel i stori long en; yia 14 C.E., nogat.

[Ol Futnot]