Ol i Bung Wantaim Ol Man i Laikim Pasin Bilong i Stap Fri Em God i Givim Long Ol

I GAT planti samting i makim olsem ol Witnes Bilong Jehova i narapela kain. Ol tasol i save long ‘gutpela tok ples.’ (Sefanaia 3⁠:⁠9) Ol tasol i stap wanbel wantaim, na narapela i laikim tru narapela, em wanpela mak bilong ol Kristen tru, olsem Jisas i tok. (Jon 13⁠:35) Na ol tasol i stap fri, long wanem, ol i save long tok i tru, olsem Jisas i bin tok long Jon 8⁠:32: “Yupela bai i save long tok tru, na tok tru bai i mekim yupela i kamap fri.”

Dispela tok Krais Jisas, em Pikinini bilong God, i bin mekim long ol disaipel bilong em, i bin kamap tru. Olgeta Witnes Bilong Jehova, em ol i bin i go long “Ol Man Bilong Laikim Pasin Bilong i Stap Fri” Kibung Distrik, nau ol i pilim tru dispela tok, winim ol narapela taim bipo. Ol tok bilong kibung i kamapim gut ol kain kain samting bilong dispela pasin bilong i stap fri ol i kisim.

Namba wan bilong ol dispela kibung bilong helpim gut ol man i kamap long Jun 7, 1991, long biktaun Los Enjeles, long Kalifonia, long Amerika. I gat sampela musik bilong kirapim program long 10⁠:20 long moningtaim, na bihain i gat singsing na beten. Namba wan tok i kamapim sampela strongpela tok bilong Jems 1⁠:​25. Wanpela Baibel (The Jerusalem Bible) i tanim dispela ves olsem: “Sapos long olgeta taim man i putim tingting bilong em i go long stretpela lo bilong mekim man i kamap fri, na dispela i stap olsem pasin bilong em, na em i no harim tasol na lusim tingting, nogat, em i givim bel long bihainim, orait, em bai amamas long olgeta wok em i save mekim.” Yumi save lukim skin bilong yumi long glas na bai yumi ken save yumi mas stretim skin na klos bilong yumi olsem wanem, na olsem tasol long olgeta taim yumi mas lukluk long nambawan gutpela lo bilong God i helpim man long i stap fri, na bai yumi ken save long ol pasin bilong yumi em yumi mas stretim.

Orait, nau siaman i mekim tok olsem: “Yupela Ol Man Bilong Laikim Pasin Bilong i Stap Fri, Mipela Laik Tok Amamas Long Yupela.” Ol Witnes Bilong Jehova i laikim pasin bilong i stap fri, na ol i no laik bai sampela samting i kalabusim ol. Siaman i kamapim sampela tok bilong ol man i gat save long lo, em ol i tok, ol man i no ken i stap fri sapos i no gat lo i stap. Tru ol Kristen i no fri long bihainim laik bilong ol yet, tasol ol i fri long bihainim laik bilong Jehova. Ol i laik mekim bikpela wok long dispela pasin bilong i stap fri ol i kisim, tasol ol i no mekim nabaut long en. Kirap long 1919, ol Witnes Bilong Jehova i stap fri na i no gat planti samting i pasim ol olsem bipo. Siaman i toktok long sampela buk na kibung i bin stori long dispela pasin bilong i stap fri. Em i tok, olgeta man i kam long kibung bai kisim sampela save moa long pasin bilong i stap fri em God i givim long ol, na long ol wok ol i ken mekim long en.

Bihain long dispela, brata i mekim tok i singautim sampela brata sista i kam long pletfom na ol i stori long ol i amamas long kam long kibung. Kain kibung olsem em i taim bilong amamas na i wankain long ol kibung bilong ol Israel bilong bipo, em ol i amamas long bung 3-pela taim long olgeta yia. Ol stori bilong ol dispela brata sista i kamapim klia olsem ol kibung i taim bilong amamas na bilong kisim strong long spirit.

Na nau as tok bilong kibung i kamap, nem bilong en: “Wok Bilong Pasin Bilong i Stap Fri Em God i Givim Long Yumi.” Ol man i kam bung i kisim save olsem Jehova tasol inap mekim olgeta laik bilong em, long wanem, em i Nambawan Bikpela, na em i gat olgeta strong. Tasol Jehova i tingim nem bilong em na em i laik helpim yumi ol man, olsem na sampela taim em i save daunim kros bilong em na em i bosim gut laik bilong em. Jehova i larim man i bihainim planti laik bilong em, tasol Jehova i putim mak na bai man i no ken bihainim olgeta laik bilong em, long wanem, olgeta man i mas aninit long Jehova na i gat sampela lo Em i putim long ol. Jehova i givim pasin long ol man long i stap fri bambai ol i ken i stap amamas, na tu, bai ol i ken lotu long em na litimapim nem bilong em na mekim em i belgut. Ol Witnes Bilong Jehova i bin mekim gutpela wok long dispela fri bilong ol​—⁠ol i bihainim gutpela pasin na givim bel long mekim wok autim tok, olsem na ol man long olgeta hap i save litimapim nem bilong ol.

Fraide Long Belo Bek

Long Fraide long belo bek ol man i harim wanpela tok olsem: “Yu Save Mekim Wanem Kain Wok​—⁠Wok i No Gat Laip Long En, o Wok Bilong Jehova?” Ol wok i no gat laip long en i makim ol wok o laik nogut bilong skin, na i makim tu ol pasin i no bilong spirit na i no inap helpim man long kisim laip oltaim, em ol pasin i no save kamapim gutpela wok, olsem sampela pasin bilong kisim mani kago. Olsem na yumi mas skelim gut pasin bilong yumi, na bai yumi ken save yumi tingim Kingdom pastaim, o nogat.

Bihain wanpela tok i kamap i wankain liklik, olsem: “Inapim Wok Bilong Yumi, Olsem Wokman Bilong God.” Brata bilong mekim dispela tok i kamapim klia olsem i no gutpela sapos ol Kristen i mekim nating wok autim tok na ol i no givim bel long en, na ol i tingting tasol long kisim ol aua na bai ol i ken putim ripot. Ol i mas i gat laik long mekim gut olgeta hap wok bilong autim tok. Brata i singautim sampela i kam long pletfom na em i toktok wantaim ol, na i gat soim tu, na dispela i helpim ol brata long kisim gut ol dispela tok, na i kirapim olgeta long inapim tru wok bilong ol, olsem wokman bilong God.

Brata i mekim wanpela tok, nem bilong en: “Wanpela Lain i Stap Fri, Tasol Ol i Gat Wok,” na em i tok: Lain bilong Jehova i kisim save long tok i tru na ol i amamas long ol i stap fri, tasol i gat wanpela bikpela tok i tru ol i mas save long en, olsem: Pasin bilong i stap fri i gat bikpela wok bilong en. Ol i stap fri, tasol ol i mas mekim gutpela wok long dispela​—⁠ol i mas litimapim nem bilong Jehova, nogut ol i ting ol i stap fri na ol i ken mekim pasin nogut. Ol i kamap Kristen, olsem na ol i gat wok long bihainim tok bilong “ol gavman,” na long wok gut wantaim ol elda long kongrigesen. (Rom 13⁠:⁠1) Na tu, ol i mas was gut long wanem kain klos ol i pasim, na long pasin bilong ol long komim gras, na ol narapela pasin ol i bihainim. Ol i mas tingim dispela tok olsem: “Yumi olgeta wan wan bai yumi mas tokim God long as bilong olgeta pasin yumi bin mekim.”​—⁠Rom 14⁠:12; 1 Pita 2⁠:⁠16.

Bihain, wanpela tok i kamap bilong helpim olgeta Kristen, nem bilong en: “Pinis i Klostu, Tasol No Ken Pret.” Ol man i pret long ol samting i laik kamap, tasol ol Kristen i mas strongim bel na bai ol inap mekim wok autim tok. Bilong ol Kristen i ken stap strong na no ken pret, ol i mas bilip tru olsem Jehova bai lukautim ol. Sapos ol i pret long God, nogut em i kros long ol, bai ol i no pret tumas long ol man. Na sapos ol i putim long tingting sampela tok bilong Baibel em i save mekim gut bel, dispela bai strongim ol na bai ol i no pret. Na oltaim ol i mas bung wantaim ol wanlotu bilong ol. Na tu, olgeta wan wan i mas beten na bai ol i ken sanap strong na no ken pret. Sapos ol Kristen i stap strong na ol i no pret, bai ol i stap wanbel wantaim God Jehova.

Bilong pinisim program bilong namba wan de, ol i lukim wanpela pilai, nem bilong en Ol i Kamap Fri Bilong Mekim Wok Bilong Trupela Lotu. Em i stori long wanpela famili bilong nau, em stori bilong Esra i helpim ol. Esra wantaim 7,000 manmeri ol i lusim sampela samting bilong ol yet bambai ol inap go bek long Jerusalem. Dispela pilai i helpim olgeta wan wan long kibung long skelim ol samting i olsem bikpela samting long ol, na em i helpim ol long save, olsem wanem ol inap mekim bikpela wok moa bilong Jehova. Dispela pilai i helpim ol lapun wantaim ol yangpela.

Sarere Long Moningtaim

Bilong kirapim program long Sarere long moningtaim, pastaim i gat sampela musik, na i gat singsing na beten, na ol i toktok long teks bilong de, na nau wanpela tok i kamap i gat 3-pela hap bilong en, het-tok bilong en em “Yumi Stap Fri, Tasol Yumi Gat Wok Insait Long Famili.” Namba wan hap, nem bilong en “Olsem Wanem Papa i Ken Bihainim Pasin Bilong Jehova,” i helpim ol papa long save long sampela pasin bilong Papa Jehova, em ol i mas bihainim. Long 1 Timoti 5⁠:​8, Baibel i tok ol papa i mas lukautim famili bilong ol long ol samting bilong skin na long ol samting bilong spirit tu. Ol i bihainim pasin bilong Jehova na mekim gutpela wok tisa long famili na long stretim ol pikinini long pasin sori. Brata i lukautim dispela hap em i toktok wantaim sampela elda na toktok bilong ol i helpim ol brata long kisim gut ol dispela tok.

Namba 2 hap, nem bilong en “Wok Bilong Mama Long Helpim Famili,” i tok wok bilong mama insait long famili Kristen i gat namba, long wanem, mama i helpim famili. Orait, mama i mas mekim wanem? Em i mas bihainim pasin daun; em i no ken subim man bilong em long bihainim laik bilong em tasol. Meri i mas lukautim gut man bilong em na ol pikinini, na em i ken amamas long stretim gut na klinim gut haus. Na tu, ating planti taim rot i op long em i mekim wok autim tok. Wanpela famili i kam long pletfom na ol i stori olsem ol dispela tok bilong Baibel inap helpim famili long bihainim gutpela tingting.

Namba 3 hap bilong dispela tok, nem bilong en “Ol Pikinini i Save Harim Tok na Kisim Save,” i gutpela bilong helpim ol yangpela. Papamama i mas lainim pikinini long harim tok na kisim save. Sapos ol i mekim olsem, dispela bai kamapim biknem long Jehova, na kamapim klia olsem ol i sori long ol brata bilong spirit, na ol i sori long ol pikinini bilong ol. Sapos papamama i poroman gut wantaim pikinini na tupela i tingim em na helpim em na lainim em, dispela bai mekim ol i pas gut wantaim. Papamama i mas redi long bekim gut ol askim bilong pikinini na ol i mas kirapim em long kisim save. Brata i lukautim dispela hap i toktok wantaim wanpela papa na mama na ol i stori long olsem wanem ol famili i ken bihainim ol dispela tok.

Bihain nau wanpela gutpela tok i kamap, olsem: “Stap Fri na Bai Yu Ken Mekim Wok Bilong Jehova.” Yumi ken mekim olsem wanem? Yumi no ken tingting long kisim bikpela wok mani, o lusim bikpela hap taim tumas long mekim sampela liklik wok bilong amamas nating, o wok long kisim mani kago samting. Jisas na aposel Pol i makim gutpela pasin yumi ken bihainim long daunim sampela laik bilong skin. Lain bilong Jehova ol i no ken aigris nabaut long planti samting; ai bilong ol i mas lukluk i go long Kingdom tasol. Taim ol i laik baim wanpela samting bilong skin, gutpela sapos ol i bungim olgeta pe bilong dispela samting pastaim, na nau ol i baim​—⁠nogut ol i dinau na ol i kisim na bekim pe bihain. Ol yangpela i mas was gut, nogut ol i tingting nabaut long ol amamas ol inap kisim long maritpasin o long sampela wok bilong skin. Brata i mekim dispela tok i toktok wantaim wanpela painia singel em i stori long ol blesing em i kisim, long wanem, em i stap fri long mekim wok bilong Jehova.

Tok bilong “Kamap Fri Long Rot Bilong Dediket na Baptais” i pinisim program bilong moningtaim long Sarere. Dispela tok i kirapim ol brata sista i laik kisim baptais long tingim ol samting nogut em pasin bikhet bilong Adam i bin kamapim na nau ol man i stap kalabus, tasol Krais Jisas, em strongpela man bilong helpim ol man long lusim kalabus, em i mekim ofa na helpim ol man long kamap fri. Brata i mekim tok em i stori long ol samting man i mas mekim bilong kamap fri na bai em i ken bihainim laik bilong God, na em i stori tu long ol wok em man i laik baptais i mas mekim, na long ol blesing em bai kisim.

Sarere Long Belo Bek

Wanpela askim i kirapim program bilong belo bek long Sarere, em olsem: “Yu Save Wok Long Helpim Husat?” Ol man bilong dispela graun i save bihainim pasin bilong Satan na ol i wok long helpim ol yet. Tasol ol Kristen i mas bihainim pasin bilong Krais Jisas na daunim laik bilong ol yet na tingting long helpim ol narapela. Jisas i makim gutpela rot tru yumi ken bihainim! Em i lusim biknem bilong em long heven, na em i givim laip bilong em olsem ofa bilong helpim yumi. Sapos hevi i kamap namel long ol Kristen long samting bilong mani o bisnis, o sapos kros i kamap long wanem ol i gat narapela narapela pasin, orait, nau ol i mas tingim dispela askim olsem: Bai ol i wok long helpim ol yet o ol narapela man? Ol dispela samting i traim pasin sori bilong ol Kristen. Man i wok long helpim ol narapela, em bai amamas tru​—⁠winim amamas bilong man i kisim samting​—⁠na Jehova bai orait long em.

Bihain long dispela, wanpela tok olsem: “Yumi Mas Save Long Ol Samting Bilong Spirit Yumi No Strong Long En na Bai Yumi Ken Stretim.” Bikpela samting em yumi mas save long ol samting i makim man i no strong long ol samting bilong spirit, na nau yumi mas kirap mekim tru sampela samting na bai Satan na ol trik na giaman bilong em i no ken daunim yumi. Ol wokboi bilong Jehova i mas lain long laikim tru em, na ol i mas nolaik tru long pasin nogut. Bilong mekim olsem, ol i mas wok long kisim save long Jehova, olsem ol yet i mas stadi oltaim na givim bel long kisim gut save long ol samting ol i stadi long en, na ol i mas mekim olsem tu long famili-stadi. Ol i mas klia long ol kain pasin bilong amamas na spot samting i save litimapim pasin bilong pait na pasin sem. (Efesus 5⁠:​3-5) Na tu, pasin bilong beten oltaim na go long olgeta miting inap helpim ol long stretim ol samting bilong spirit ol i no strong long en.

Bihain long kibung, planti brata sista i toktok wantaim long tok olsem: “Yu Ting Marit Em Rot Bilong i Stap Amamas?” Planti yangpela i ting olsem! Brata i mekim dispela tok i kamapim klia olsem i gat bikpela lain ensel, em ol i stap gut long Jehova, ol i stap amamas, tasol ol i no marit. Na olsem tasol, planti Kristen i dediket long Jehova ol i stap amamas tru, maski ol i no marit. Na planti marit ol i katim marit, na dispela i kamapim klia olsem planti marit ol i no i stap amamas. Tru, marit em i olsem wanpela blesing, tasol sapos yumi tingim ol gutpela blesing olgeta Kristen i dediket long Jehova i kisim, bai yumi save, marit tasol i no rot bilong i stap amamas.

Bihain wanpela tok i gat 3-pela hap bilong en i kamap, het-tok bilong en i olsem: “Pasin Bilong i Stap Fri Ol Kristen i Kisim Nau Long Taim Bilong Yumi.” Brata bilong mekim namba wan hap em i tok long “Ol Gutpela Samting Bilong Pasin Bilong i Stap Fri Yumi Ol Kristen i Kisim.” Sampela samting i no kalabusim ol moa em ol bilip giaman bilong lotu, olsem na ol i no bilip moa long ol tok bilong God Triwan, na long man i gat tewel, na long bikpaia. Na tu, sin i no kalabusim ol moa. Ol Kristen i no nambawan olgeta, tasol ol i lusim pinis ol pasin nogut em inap kalabusim ol, olsem pasin bilong smok, na pilai laki, na spak, na pamuk. Na tu, ol i no kalabus moa long pasin bilong ting olsem i no gat wanpela gutpela samting inap kamap bihain, long wanem, ol i save Paradais bai kamap, na dispela i kirapim ol long tokim ol narapela long dispela samting.

Brata bilong mekim namba 2 hap, em i kamapim askim olsem: “Yu Yet Yu Laikim Tumas Dispela Pasin Bilong Stap Fri?” Yumi mas holimpas dispela gutpela pasin. Bilong mekim olsem ol Kristen i mas was gut, nogut ol i gat laik long sampela samting i no stret long ol Kristen. Ol man bilong graun i ting ol i stap fri, tasol ol i no i stap fri tru, long wanem, ol i stap kalabus long sin na long rot bilong kisim bagarap.

Laspela hap em “Ol Man i Laikim Pasin Bilong i Stap Fri Ol i Sanap Strong.” Bilong mekim olsem, ol Kristen i mas stap klostu long papamama bilong ol long heven, em Jehova na ol lain ensel, ol i olsem meri bilong em. Lain bilong Jehova i no ken larim ol man i bin lusim tok i tru i giamanim na pulim ol; na ol i mas givim baksait long ol man i laik pulim ol long mekim pasin nogut. Bilong ol Kristen i ken sanap strong long pasin bilong i stap fri, ol i mas larim spirit bilong God i “stiaim olgeta wokabaut bilong [ol].”​—⁠Galesia 5⁠:⁠25.

Ol man i amamas long harim wanpela tok, nem bilong en: “Nambawan Man Tru i Winim Olgeta Narapela Man.” Jisas em i nambawan man tru, long wanem, em i bin helpim moa yet ol man bilong graun, winim ol ami na nevi na gavman na king wantaim. Em i Pikinini bilong God yet, na taim em i no kam daun yet long graun em i bin i stap long heven. Taim Jisas i autim tok na lainim ol man, em i bihainim stret pasin bilong Papa bilong em long heven, olsem na em i tok: “Man i lukim mi, em i lukim Papa.” (Jon 14⁠:⁠9) Tru tumas, Jisas i kamapim klia olsem: “God yet em i as bilong dispela pasin bilong laikim ol arapela”! (1 Jon 4⁠:⁠8) Brata bilong mekim tok i kamapim gut ol pasin bilong Jisas, na nau em i tok, kirap long Novemba 1985 wanpela stori i bin kamap long olgeta Wastaua, na nem bilong dispela stori em “I Stap na Wok Bilong Jisas.” Planti man i bin tok, i gutpela sapos ol dispela stori i ken i stap long wanpela buk, olsem na nau Sosaiti i tokaut long wanpela nupela buk, nem bilong en “Nambawan Man Tru i Winim Olgeta Narapela Man.” Dispela buk i gat 133 sapta na ol piksa long en i gat kala. Ol dispela stori yumi bin lukim long Wastaua ol i stap long dispela nupela buk i gat 448 pes bilong en. Ol man i kam bung ol i amamas tru long harim dispela tok i pinisim program bilong Sarere.

Sande Long Moningtaim

Tok bilong “Wok Bilong Kisim Ol Man” i gat 3-pela hap bilong en na em i kirapim program bilong moningtaim long Sande. Namba wan hap em “Kisim Pis​—⁠Pis Tru, na Pis Long Tok Piksa” na i stori long Jisas i wokim wanpela mirakel na helpim sampela man long kisim planti pis tru, na nau em i singautim ol dispela man long kamap man bilong kisim ol man. Inap sampela yia, Jisas i lainim ol disaipel bilong em long pasin bilong kisim ol man, na kirap long de Pentikos long yia 33, ol i helpim planti manmeri long kamap disaipel.

Brata bilong lukautim namba 2 hap, em i stori long tok piksa bilong umben olsem i stap long Matyu 13⁠:​47-50. Em i kamapim klia olsem ol Kristen God i bin makim ol, na ol lotu giaman i gat nem Kristen, tupela wantaim i insait long wok bilong umben, long wanem, ol lotu i gat nem Kristen i bin mekim wok long tanim tok bilong Baibel i go long ol narapela tok ples, na long wokim planti Baibel na tilim long ol man, maski dispela wok i bungim planti pis nogut. Kirap long 1919 ol ensel i bin skelim ol man i kain olsem pis i go tupela lain; ol pis nogut ol i tromoi, na ol gutpela pis ol i putim long ol kongrigesen i kain olsem dis, em ol i save lukautim ol Kristen tru bambai ol i ken mekim wok bilong God.

Namba 3 hap “Kisim Ol Man Long Olgeta Hap” i stori long wok bilong kisim pis long olgeta hap em i samting bilong olgeta Kristen i dediket pinis. Winim 4,000,000 manmeri ol i insait long dispela wok long planti kantri, winim 200, na inap sampela yia nau, winim 230,000 nupela man i kisim baptais long olgeta wan wan yia. Brata i mekim tok i kirapim olgeta long lain bilong Jehova long mekim gutpela moa wok bilong kisim pis, na brata i toktok wantaim sampela “man bilong kisim pis” em ol i mekim gut dispela wok.

Brata bilong mekim narapela tok, em “Was i Stap Nau ‘Long Taim Bilong Las De’ ” i kolim 7-pela samting bilong helpim lain bilong God long was i stap, olsem: sakim ol samting i laik pulim yumi; beten; mekim wok bilong toksave long ol man olsem dispela pasin bilong graun bai pinis; stap gut long oganaisesen bilong Jehova; glasim yumi yet; tingim ol tok profet em truim bilong en i kamap pinis; yumi mas save, taim yumi nupela long tok i tru, taim bilong Jehova i laik kisim bek yumi i klostu, tasol nau dispela taim i klostu tru.

Wanpela tok nem bilong en “Husat Bai Abrusim Bagarap Long Taim Bilong ‘Bikpela Hevi Tru’ ?” em i pinisim program bilong moningtaim. Brata bilong mekim tok i stori long truim bilong tok profet bilong Joel, em hap truim bilong en i bin kamap long taim bilong ol aposel na long nau tu long taim bilong yumi, na liklik taim bihain olgeta samting bilong en bai kamap.

Sande Long Belo Bek

Pablik-tok em “Yumi Amamas Long Nupela Taim God Bai Kamapim na Yumi Stap Fri!” na em i kirapim program bilong belo bek na i stori moa long pasin bilong i stap fri, em as tok bilong kibung. Brata bilong mekim tok i stori olsem: Baibel i tok profet long wanpela nupela taim bai kamap na lotu giaman i no ken i stap moa bilong givim hevi long ol man, na ol bai i no gat hevi moa long ol samting bilong politik na long ol samting bilong mani tu, na i no gat sampela hevi bai kamap namel long ol narapela narapela skin. Sin na dai bai pinis. Ol man i no ken sik moa​—⁠bai ol inap i stap amamas oltaim long paradais long graun. Olsem na i gat planti samting na ol man i laikim tumas stretpela pasin bai ol i litimapim nem bilong Bikpela Man i bin kamapim dispela nupela taim na bai ol i tok: “Tenkyu Jehova, yu givim dispela gutpela taim long mipela na nau mipela i stap fri tru!”

Bihain long pablik-tok, wanpela nupela samting i kamap bilong ol kibung distrik​—⁠em stori bilong hap bilong Wastaua ol kongrigesen i mas stadi long en long wik bilong kibung. Tok bilong pinisim kibung na bilong kirapim na strongim ol brata, em “Yupela Ol Man Bilong Laikim Pasin Bilong i Stap Fri, Wok Long Kamap Strong Moa.” Brata bilong lukautim dispela tok i kamapim ol samting bilong as tok bilong kibung, em pasin bilong i stap fri. Em i tok lain bilong Jehova ol i amamas, long wanem, ol i stap fri, na em i kolim sampela samting ol Kristen i bin mekim bilong kamap strong. Em i kirapim ol long kamap strong moa na stap wanbel wantaim bambai ol i ken kisim planti blesing moa. Bilong pinisim tok, em i tok olsem: “Taim yumi wok long kamap strong moa, Jehova i ken wok yet long mekim gut long yumi olgeta, na bai yumi stap strong olsem ol man i laikim pasin bilong i stap fri.”

“Olgeta samting i stap nogut na i save bagarap. Dispela i no kamap long laik bilong ol yet. Nogat. God yet i mekim ol i stap olsem, bai ol i wetim gutpela samting God i laik mekim long ol. Long taim God i makim, God bai i pinisim dispela kalabus bilong bagarap nau olgeta samting i stap long en, na bai olgeta samting i stap gutpela tru wantaim yumi ol pikinini bilong God.”​—⁠Rom 8⁠:​20, 21.

[Ol Piksa long pes 25]

Wanpela yangpela i go long kibung long Prak, long Sekoslovakia

[Ol Piksa long pes 26]

1. Ol man i laik baptais i go long ples baptais long Prak, Sekoslovakia

2. Kisim baptais na kamap wanpela Witnes Bilong Jehova long Talin, Estonia

3. Ol man i kam long kibung long Usolye​—⁠Sibirskoye, Sibiria ol i amamas long kisim ol nupela buk

4. Tokaut bilong Baibel “New World Translation of the Holy Scriptures” long tok ples Sek na Slovak long kibung long Prak