Askim

Hibru 9:​16, 17 i tok, man i wokim kontrak i mas i dai pastaim na bai kontrak i gat strong. Tasol God i bin wokim nupela kontrak na em no bin i dai. Olsem na wanem insait bilong dispela tok long Hibru sapta 9?

Long Hibru 9:​15-17, Baibel i tok: “Jisas i stap namelman bilong strongim nupela kontrak. Em i dai pinis bilong baim bek ol manmeri na lusim ol sin ol i bin mekim long taim namba wan kontrak i stap yet. . . . Man i ting long bihain em bai i dai, na em i laik tokaut long husat bai i kisim ol samting bilong en, em i save raitim dispela tok long pepa, olsem kontrak. Na sapos pikinini i laik bihainim dispela kontrak na kisim ol samting papa i makim bilong en, orait ol man i mas save gut pastaim olsem, papa i dai pinis, na bai ol i larim pikinini i kisim ol samting bilong en. Sapos dispela man i dai pinis, orait nau tok bilong kontrak i gat strong. Tasol sapos dispela man i mekim kontrak em i stap laip yet, orait kontrak bilong en i stap nating.”

God Jehova yet em i Man bilong wokim nupela kontrak. Long Jeremaia 31:​31-34 God i tok profet olsem, em yet bai wokim nupela kontrak wantaim lain bilong em. Aposel Pol i kamapim dispela tok bilong Jeremaia long Hibru 8:​8-13, na dispela i kamapim klia olsem Pol i save God yet i as bilong dispela kontrak.

Tasol long Hibru sapta 9, bihain long ves 15-17, Pol i stori long ol narapela narapela wok Jisas i bin mekim long nupela kontrak. Em i kam olsem Hetpris bilong dispela kontrak. Na em i givim em yet olsem ofa bilong nupela kontrak, long wanem, “blut bilong Krais” tasol inap “pinisim asua bilong yumi na yumi save olsem yumi stap klin tru long ai bilong God.” Na tu, Krais i Namelman bilong dispela kontrak, olsem Moses i bin i stap namelman bilong kontrak bilong Lo.​—⁠Hibru 9:​11-15.

Pol i tok, blut i mas kapsait bilong strongim ol kontrak God i wokim wantaim ol man. Olsem kontrak bilong Lo. Moses em i namelman bilong en, na em i bin mekim ol samting bilong kamapim dispela kontrak namel long God na ol Israel bilong skin. Em nau, Moses i gat bikpela wok insait long dispela kontrak, na em i man long graun i bin helpim ol Israel taim ol i wok long kam insait long dispela kontrak. Long dispela as yumi ken ting Moses i olsem man bilong kamapim kontrak bilong Lo em Jehova i as bilong en. Tasol yu ting Moses i mas kapsaitim blut bilong em yet bambai kontrak bilong Lo i ken kamap na kirap mekim wok bilong en? Nogat. Em i kilim ol animal olsem ofa na blut bilong ol i olsem senis bilong blut bilong em yet.​—⁠Hibru 9:​18-22.

Olsem wanem long nupela kontrak God i wokim wantaim lain Israel bilong spirit? Krais Jisas i bin kisim wok olsem Namelman bilong dispela kontrak Jehova i wokim wantaim lain Israel bilong spirit. Tru, Jehova i as bilong dispela kontrak, tasol Krais Jisas i bin mekim bikpela wok long en. Em i Namelman bilong en, na tu, taim em i stap man long graun em i bin helpim ol man i paslain long ol narapela long i kam insait long dispela kontrak. (Luk 22:​20, 28, 29) Na em inap tru long mekim ofa bilong strongim dispela kontrak. Tasol em i no kilim ol animal olsem ofa. Nogat. Em i stap man long graun i gutpela olgeta na em i givim blut bilong em yet olsem ofa. Olsem na Pol inap tok Krais i olsem man bilong kamapim nupela kontrak. Krais “i go insait long heven stret. Na nau em i stap klostu tru long God, na em i wok long helpim yumi.” Na long dispela taim nupela kontrak i kisim strong.​—⁠Hibru 9:​12-14, 24.

Tru, Pol i tok Moses na Jisas i man bilong wokim kontrak, tasol em i no tok tupela i as bilong ol dispela kontrak, nogat​—⁠God yet i as bilong en. Tasol dispela tupela man long graun i mekim wok olsem namelman bilong kamapim ol dispela kontrak. Na bilong strongim tupela kontrak, blut i mas kapsait​—⁠blut bilong ol animal i olsem senis bilong Moses, na Jisas i mekim ofa long blut bilong em yet bilong helpim ol man em ol i insait long nupela kontrak.