Rot Bilong Jehova Em Nambawan Rot Long Bihainim
EM STORI BILONG ERKKI KANKAANPÄÄ
KIRAP long taim mi pikinini yet mi gat laik long mekim wok long brens-ofis bilong ol Witnes Bilong Jehova long Finlan, em ol i kolim Betel. Olsem na long 1941, taim wanpela wasman bilong raun i tokim mi, “Yu laik mekim wanem wok long bihain?” mi bekim tok olsem: “Oltaim mi gat laik long i go wok long Betel.”
Em i tok: “Yu mas lusim tingting long dispela. Ol i no inap singautim yu.” Pastaim mi bel hevi tru, tasol bihain mi ting olsem: ‘Maski, em laik bilong Jehova.’ Na sampela mun bihain ol i singautim mi i go wok long Betel.
Mi bilong bus na mi gat 17 krismas tasol na mi save sem na mi go kamap long haus brens long Helsinki. Long dispela de, long Novemba 1941, i kol nogut tru. Mi subim baten long dua na belo i krai. I no longtaim na wasman bilong brens, em Kaarlo Harteva, em i kam sekanim mi. Long dispela taim i gat 1,135 Witnes long Finlan.
Papa i Lainim Mi Long Lotu Kristen
Long yia 1914 papa i kisim wanpela buk bilong Sosaiti Was Taua (The Divine Plan of the Ages), tasol liklik taim bihain Namba Wan Pait i kirap na papa i no kaunim dispela buk.
Kantri Finlan i wok strong long kisim independens na sampela hevi i kamap. Ol manmeri bilong dispela kantri i bruk long tupela lain—ol i kolim ol Wait na ol Ret. Ol Wait em ol lain i gat wok bisnis na ol i gat gutpela sindaun liklik. Ol Ret em ol lain wokman. Papa i laik i stap nating—em i no laik helpim ol Wait o ol Ret. Tasol tupela lain wantaim i ting em i birua bilong ol.
Bihain, tupela taim ol i tok long kilim em i dai—pastaim ol Wait i tok long mekim, na bihain ol Ret i tok long mekim. Wanpela taim wanpela man i kilim i dai narapela man na polis i no inap holim em, olsem na ol i holim papa na 9-pela yangpela man moa na kot i tok, ol i mas i dai. Wanpela tisa bilong papa i stap long lain bilong kot i tok, gutpela sapos ol i no kilim papa, na kot i orait long dispela. Tasol ol i kilim i dai ol narapela 9-pela yangpela.
Long narapela taim tu kot i tok, papa i mas i dai, tasol bihain ol i no kilim em i dai. Dispela i mekim na papa i laik hait! Em wantaim brata bilong em i wokim hul insait long graun i olsem haus bilong ol, na ol i stap long en i go inap long taim pait i pinis. Liklik brata bilong ol i save kisim kaikai na wara i go long ol.
Pait i pinis long yia 1918, na papa i marit. Em i wokim haus klostu long dispela hul. Bihain mi save gut long dispela hul, long wanem, mi save pilai insait long en. Papa i tokim mi, taim em i hait insait long hul, em i beten planti taim, na em i tok promis long God olsem, sapos em i kisim save long ol samting em i mas mekim bilong lotuim God, em bai mekim.
Papa i marit pinis na liklik taim bihain em i mas i go raun bilong mekim wok bisnis na em i laik kisim wanpela buk bilong kaunim. Long liklik rum antap, em i lukim dispela buk (The Divine Plan of the Ages) em i bin kisim planti yia bipo. Em i opim na em i kirap kaunim ol tok bilong wanpela sapta, nem bilong en: “De Bilong Jehova.” Kaunim pinis, orait nau em i tokim em yet planti taim olsem, ‘Dispela em tok i tru, em tok i tru.’ Em i lusim rum antap i kam daun na em i tokim mama: “Mi painim pinis lotu i tru.”
Ol tok em i lainim, kwiktaim em i kirap autim long ol narapela, olsem ol wanblut bilong em na ol man i stap klostu long haus bilong mipela. Bihain em i kirap mekim ol tok long ples bung. I no longtaim na sampela moa long dispela hap ol i kirap long bung wantaim em. Bihain papa i bungim ol Baibel Stiuden, em nem bilong ol Witnes Bilong Jehova long dispela taim, na em i kisim baptais long 1923. Taim mipela ol 4-pela pikinini i kamap, papa i no les long lainim mipela. Taim kongrigesen i kamap, papa i putim lo olsem mipela i mas i go long olgeta miting bilong kongrigesen.
Mi Tingim Sampela Samting i Bin Kamap Taim Mi Liklik Yet
Mi tingim wanpela kibung i bin kamap long kongrigesen bilong mipela long 1929 taim mi gat 5-pela krismas. Planti bilong ol narapela kongrigesen klostu ol i kam bung wantaim mipela, na wanpela brata bilong brens em tu i kam. Long dispela taim, long Finlan, ol brata i save bihainim wanpela pasin long ol kibung, olsem: Ol i save askim God long mekim gut long ol pikinini. Long dispela kibung, brata bilong brens-ofis i mekim dispela, olsem Jisas i bin mekim. Mi no lusim tingting long dispela samting.—Mak 10:16.
Mi tingim tu samting i bin kamap long 1931, em mipela kisim nem ol Witnes Bilong Jehova. Papa i pilim tru dispela samting, na em i kaunim gut tokaut bilong dispela long kongrigesen.
Na mi inap tingim taim mi liklik yet mi save autim tok wantaim papa. Pastaim mi save harim tasol ol tok papa i mekim, tasol bihain mi yet mi autim tok. Long 1935, taim wanpela wasman bilong raun i kam lukim mipela, mi go long ol manmeri i stap klostu long haus bilong mipela na singautim ol i kam long dispela miting. Na mi wok long tilim ol liklik buk long ol, na sampela ol i kisim.
Mi Skul na Tingting Gut
Mipela 4-pela pikinini tasol long skul i gat papamama Witnes, na planti taim ol wanskul i tok bilas long mipela, long wanem, mipela i no save poromanim ol long mekim ol pasin i no Kristen. Ol wanskul i laik pulim mi long smok, tasol mi no mekim. Na ol i save tok bilas na kolim mipela Lain Bilong Russell (em namba wan presiden bilong Sosaiti Was Taua), o ol i kolim mipela Lain Bilong Harteva (em wasman bilong brens long Finlan long dispela taim). Tasol mi amamas, long wanem, sampela yangpela i bin tok bilas long mipela, bihain ol i kamap Witnes.
Tisa i laik bai mi winim bikpela skul, na pastaim mi tingting long kamap ensinia. Tasol bihain wanpela kibung bilong ol Witnes i kamap long Pori long Me 1939, na mi senisim tingting. Mi wantaim liklik brata bilong mi, nem bilong em Tuomo, mitupela i dediket long Jehova na bilong makim dispela, mipela i kisim baptais long dispela kibung, long Me 28, 1939. Na long kirap bilong Septemba, Namba 2 Pait i kirap.
Ol bikpela senis i kamap long Yurop. Pait i laik kirap namel long Finlan na Rasia. Papa i wok long tok strong olsem Armagedon i wok long i kam klostu na em i tok, gutpela sapos mipela i mekim wok painia. Olsem na long Disemba 1940, mi wantaim brata bilong mi, mitupela i kirap mekim wok painia long hap bilong not long Finlan.
Wok Painia na Wok Long Betel
Taim mipela i mekim wok painia, mipela i bin i stap longtaim wantaim Uria Kalio (Yrjö Kallio), em wanpela brata i bin kamap wanpela Baibel Stiuden long Pensilvenia, long Amerika, inap 30 yia bipo. Uria em man bilong sori na em i lukautim gut mitupela. Brata wanblut bilong em (Kyösti Kallio) i bin i stap presiden bilong Finlan long 1937 i go inap 1940. Uria i tokim mipela em i bin autim tok long brata bilong em na stori gut long em long Kingdom bilong God, em dispela gavman tasol inap mekim gutpela wok gavman na kamapim gutaim tru long olgeta hap bilong graun.
Long olgeta taim laik bilong mi long wok long Betel i wok long kamap strong moa. Dispela wasman bilong raun i bin tok, ol i no inap singautim mi i go wok long Betel, tasol gutpela tru, bihain ol i singautim mi. Pastaim ol i givim ol liklik wok long mi, tasol i no longtaim na ol i givim wok long mi long faktori. Mi wok long planti dipatmen long faktori, olsem long liklik rum bilong prinim ol nius samting na long hap bilong salim ol buk samting i go.
Mi No Insait Long Pait
Long 1942, taim mi gat 18 krismas, gavman i tok mi mas insait long ami. Mi sakim ol, olsem na planti taim ol i singautim mi i go na inap planti aua ol i sutim ol askim long mi; tupela taim ol i makim mi long gan na givim ol askim long mi. Na sampela taim ol i paitim mi. Na ol i save putim mi insait long wanpela rum long haus kalabus i kol nogut tru na kol i laik kilim mi.
Na long Janueri 1943, taim i kamap bilong kot i kolim strafe bilong mi wantaim ol narapela Witnes. Kepten bilong ami i bin givim ol askim long mipela, em i strong long tok, mipela i mas kalabus inap 10-pela yia o moa. Tasol pasto bilong ami i laik bai mipela kisim bikpela strafe moa—em i raitim pas na tok, ‘ol i mas kilim i dai ol dispela man i no laik helpim kantri, o salim ol i go lukstil long hap bilong Rasia na ol Rasia i ken mekim save long ol.’
Ol i wokim kot giaman na singautim mi i kam na ol i tok, mi mas i dai. Tasol ol i tok olsem bilong mekim pretim mi, na sampela aua bihain mi kam sanap gen long kot, na ol i tok, mi mas kalabus inap 3 yia 6 mun. Mi apil na kot i tok, mi mas kalabus tupela yia.
Long kalabus, kaikai i sot na ol wankalabus i save tok long mekim nogut long mipela. Sampela i man bilong mekim pasin sodom na tupela taim ol i laik bagarapim mi, tasol laki tru mi inap abrusim ol. Wanpela i tok, em bai kilim mi i dai sapos mi no larim em i mekim dispela pasin sem long mi. Tasol mi singaut long Jehova long helpim mi, olsem mi save mekim long olgeta hevi i painim mi, na em i helpim mi. Dispela i no liklik traim, long wanem, bipo dispela man i bin kilim man i dai. Taim em i lusim kalabus, em i mekim gen dispela rong na em i kalabus gen.
Ol man i save, ol Witnes Bilong Jehova i stretpela man, na ating long dispela as i no longtaim na ol i givim sampela wok long mi ol i save givim long ol man ol inap bilip long ol. Mi save givim kaikai long ol narapela kalabus long skel, na mi fri long raun long olgeta hap bilong haus kalabus. Long dispela rot mi yet mi gat kaikai inap long mi, na mi inap lukautim gut ol brata Kristen bilong mi. Wanpela brata i kamap patpela liklik long kalabus, maski kaikai i sot—kain samting olsem i save kamap wan wan taim tasol!
Long Septemba 1944 mi lusim kalabus, na long dispela de stret Brata Harteva tu i lusim kalabus. Nau mi inap wok gen long Betel. Mi tingting olsem, ‘Wok strong long Betel inap 16 aua long olgeta de i winim tru kalabus.’ Na inap long nau mi no save slek long wok!
Mi Kisim Kain Kain Wok
Long pinis bilong yia 1944, mi bungim Margit, em wanpela naispela yangpela meri painia. Mi laikim em na em i laikim mi, olsem na mipela i marit long Februeri 9, 1946. Bihain, inap wanpela yia, mi wok long Betel na Margit i wok painia long Helsinki. Tasol long Janueri 1947 ol i makim mipela long mekim wok sekit.
Mitupela i save raun lukim ol brata na mipela i save stap wantaim ol famili; sampela taim mitupela na famili tu i slip long wanpela rum tasol. Mipela i save ol i laik lukautim gut mipela, na mipela i save amamas tasol long ol samting ol i mekim bilong lukautim mipela. Long dispela taim i gat ol liklik sekit, na long sampela kongrigesen i no gat wanpela Witnes i baptais pinis!
Long 1948 ol i singautim mipela i go wok gen long Betel. Tupela yia bihain wanpela brata bilong Amerika (em Wallace Endres) em i kam long Finlan na ol i makim em olsem wasman bilong brens. Em i wok strong long kirapim mipela long lainim tok Inglis, na mipela bihainim tok bilong em. Olsem na mipela inap insait long namba 19 klas bilong skul misineri, ol i kolim Skul Gileat, long Saut Lansing, long provins Nu Yok, long Februeri 1952.
Mipela winim skul pinis na ol i salim mipela i go bek long Finlan. Tasol pastaim ol i lainim mi long wok long ol bikpela masin bilong prinim ol buk na nius, em ol i stap long namba wan ofis bilong ol Witnes Bilong Jehova long Bruklin, long biktaun Nu Yok.
Mipela i go bek long Finlan na ol i makim mi olsem wanpela wasman bilong raun na mipela i mekim dispela wok i go inap long 1955, na long dispela yia ol i singautim mipela long wok gen long brens-ofis bilong Finlan. Long dispela yia mi kisim wok olsem wasman bilong faktori, na tupela yia bihain mi kisim wok olsem wasman bilong brens. Kirap long 1976 mi stap olsem kodineta bilong Komiti Bilong Brens long Finlan.
Mi amamas, long wanem, papamama bilong mi i bin i stap gut long Jehova i go inap long taim ol i dai. Na winim 100 wanblut na famili bilong papa i bin kamap Witnes. Na inap long nau, olgeta brata susa bilong mi wantaim lain bilong ol, olgeta i mekim wok bilong Jehova. Wanpela susa bilong mi i mekim wok painia.
Mi Bin Kisim Planti Blesing
Ol yia i kamap i go pinis na mi wok wok wok, tasol em wok bilong Jehova, olsem na mi bin kisim planti blesing tru. (1 Korin 3:6-9) Tasol mi no bin kisim ol blesing na amamas tasol. I gat sampela hevi na hatwok tu i bin painim mi. Taim mi liklik yet mi kisim save olsem, yumi mas lain long bosim gut skin. Yumi no inap bihainim olgeta laik bilong yumi. Planti taim ol narapela i bin stretim mi, na mi lain long stretpela pasin yumi mas bihainim.
Olsem: Long taim bilong pait, mipela i sot long planti samting, na dispela i lainim mi olsem yumi inap i stap laip, maski yumi no gat planti samting. Mi lain long skelim gut ol samting—em samting mi mas kisim o nogat. Inap long nau, taim mi tingting long baim wanpela samting, mi save askim mi yet: Tru mi gat wok long dispela o nogat? Na sapos nogat, orait mi no baim.
Mi save tru olsem Jehova i bin helpim mi long rot bilong oganaisesen bilong em. Long ol dispela yia mi bin wok long brens-ofis, mi kisim bikpela amamas long lukim lain Witnes Bilong Jehova long Finlan i go bikpela—pastaim i gat 1,135 Witnes, tasol nau i gat 18,000 samting ol i stap! Tru tumas, mi lukim olsem Jehova i bin helpim wok bilong mi, tasol mi save, em i mekim olsem, long wanem, dispela wok em wok bilong Em, i no bilong yumi. (1 Korin 3:6, 7) Taim mi liklik yet mi tingting pinis long mi laik bihainim rot bilong Jehova, na tru tumas dispela rot em nambawan rot long bihainim.
[Piksa long pes 23]
Erkki Kankaanpää long nau, wantaim meri bilong em Margit