Strong Bilong God i Wok Long Kamap Gutpela Olgeta Taim Mi No Gat Strong

TAIM MI YANGPELA LONG FINLAN

Mi bon long 1955, na mi las bon bilong mipela tripela bois. Mi kamap bikpela klostu long nambis long hap saut bilong Finlan, long wanpela biktaun ol i kolim Vantaa.

Mama bilong mi i kisim baptais olsem wanpela Witnes Bilong Jehova sampela yia paslain long mi bon. Tasol papa bilong mi i birua long tok i tru na em i no save larim Mama i stadi wantaim mipela o kisim mipela i go long ol miting bilong kongrigesen. So em i save skulim mipela long ol bikpela tok i tru bilong Baibel taim papa bilong mi i no stap.

Kirap long taim mi liklik, mi save bihainim tok bilong Jehova. Olsem, taim mi gat 7-pela krismas, tisa bilong mi long skul i belhat nogut tru bikos mi no laik long kaikai verilättyjä (em penkeik bilong ol Finlan em ol i wokim long blut). Long wanpela han em i skwisim wasket bilong mi long opim maus bilong mi, na long narapela han em i kisim fok na em i laik putim hap keik i go long maus bilong mi. Tasol mi paitim dispela fok na em i pundaun.

Taim mi gat 12 krismas, papa bilong mi i dai. Bihain long dispela, mi inap go long ol miting bilong kongrigesen. Ol brata long kongrigesen i mekim gutpela pasin laikim long mi na dispela i helpim mi long pas gut moa wantaim Jehova. Mi kirap ritim Baibel long olgeta de na stadi gut long ol Kristen pablikesen bilong yumi. Dispela pasin bilong stadi gut i helpim mi long winim mak na kisim baptais taim mi gat 14 krismas, long Ogas 8, 1969.

Bihain long mi pinis long skul, mi kirap long mekim wok painia oltaim. Insait long sampela wik bihain, mi muv i go sindaun long hap i sot long ol pablisa bilong autim tok, long Pielavesi, klostu long namel bilong Finlan.

Long Pielavesi, mi bungim Sirkka taim em i yangpela meri, na bihain mitupela i marit. Mi laikim tru pasin daun bilong em na pasin bilong em long pas gut wantaim Jehova. Em i no gat tingting long kisim biknem o mani kago na gutpela sindaun. Mitupela wantaim i gat laik long mekim wok bilong Jehova inap tru long skel bilong mipela, maski ol i givim wanem wok long mipela. Mitupela i marit long Mas 23, 1974. Mipela i no go long hani mun, nogat, mipela i go autim tok long Karttula em hap we i sot tru long ol man bilong autim gutnius bilong Kingdom.

JEHOVA I LUKAUTIM MIPELA

Long kirap bilong marit bilong mipela, Jehova i soim mipela olsem em bai lukautim mipela sapos mipela i putim Kingdom i stap nambawan samting long laip bilong mipela. (Mat. 6:33) Olsem, long Karttula mipela i no gat kar. Pastaim mipela i save raun long baisikol. Tasol long winta, ples i save kol nogut tru. So bilong go autim tok long bikpela teritori bilong kongrigesen, mipela i nidim kar. Tasol sori tru, mipela i no gat mani bilong baim wanpela kar.

Mipela i kirap nogut olsem bikpela brata bilong mi i kam visitim mipela. Em i givim kar bilong em long mipela. Em i baim pinis rejistresen bilong kar. So mipela gat wok long baim tasol fiul. Bihain long dispela, mipela i gat kar em mipela i nidim.

Jehova i soim mipela olsem em i mekim wok bilong lukautim mipela long ol samting mipela i nidim. Wok bilong mipela em long putim Kingdom i stap nambawan samting long laip bilong mipela.

SKUL GILEAT

Taim mipela i stap long Skul Bilong Wok Painia long 1978, Raimo Kuokkanen,a em wanpela bilong ol tisa i kirapim mipela long aplai long Skul Gileat. So mipela i kirap stadi long tok Inglis bambai mipela i ken winim mak bilong go. Tasol long 1980, paslain long mipela i putim aplikesen, ol i singautim mipela i go wok long brens ofis long Finlan. Long dispela taim ol lain i wok long Betel i no inap aplai long Skul Gileat. Tasol mipela i laik mekim wok long hap we Jehova i laik mipela i mekim, na i no long hap we mipela yet i laikim. Olsem na mipela i ekseptim invatesen bilong go wok long Betel. Maski i olsem, mipela i wok yet long stadi long tok Inglis bikos mipela i ting nogut rot i op na mipela inap aplai long Skul Gileat.

Sampela yia bihain, lain Gavening Bodi i tok orait long ol lain i wok long Betel i ken aplai long Skul Gileat. Kwiktaim mipela i putim aplikesen, tasol dispela i no makim olsem mipela i no amamas long wok long Betel. Nogat! Mipela i laik kisim skul na stap redi tasol long mekim wok long hap i sot long ol pablisa sapos i gat nid long mekim olsem. Ol i singautim mipela i go long Skul Gileat, na mipela i grediuet olsem namba 79 klas long Septemba 1985. Ol i salim mipela i go mekim wok misineri long Kolambia.

FES MISINERI ASAINMEN BILONG MIPELA

Long Kolambia, ol i asainim mipela i go wok long brens ofis. Mi traim bes long mekim asainmen bilong mi, tasol bihain long mipela i wok long brens inap wanpela yia, mi pilim olsem mipela i mas senisim asainmen bilong mipela. Em fes taim na em wanpela taim tasol long laip bilong mi we mi bin askim long mekim narapela asainmen. Bihain long en, ol i salim mipela i go mekim wok misineri long biktaun bilong Neiva, em long hap bilong Huila.

Mi save amamas long mekim wok autim tok. Taim mi stap singel na mekim wok painia long Finlan, sampela taim mi save autim tok kirap long bikmoning i go inap long apinun tru. Taim mitupela Sirkka i marit nupela, planti taim mitupela i save autim tok de olgeta. Taim mipela i autim tok long ol longwe teritori, sampela taim mipela i save slip long kar. Dispela i sotim taim bilong mipela long ron long rot na i opim rot long mipela i ken kirap long bikmoning long neks de na autim tok.

Taim mipela i mekim wok olsem misineri, mipela i pilim gen dispela amamas bilong autim tok em mipela i bin pilim long bipo. Kongrigesen bilong mipela i go bikpela na ol bratasista long Kolambia i save rispektim, laikim, na tingim mipela tru.

BETEN I GAT STRONG

I no gat ol Witnes long ol taun i stap klostu long Neiva, em taun ol i asainim mipela long mekim wok long en. Mi tingting planti tru long hau gutnius inap i go kamap long ol manmeri long ol dispela hap. Tasol pait i stap namel long gavman na ol ami i birua long gavman, olsem na ol dispela eria i no seif long ol man bilong narapela kantri. So mi beten olsem wanpela man o meri long ol dispela taun i mas kamap wanpela Witnes. Mi tingting olsem dispela man o meri i mas stap long Neiva bilong kisim save long tok i tru. Olsem na mi beten tu olsem bihain long em i baptais, em i mas kamap strong long bilip bambai em i ken go bek long taun bilong em na autim tok. Mi no luksave olsem Jehova inap mekim samting winim tingting mi gat.

Bihain tasol long en, mi kirap stadi long Baibel wantaim wanpela yangpela man nem bilong em Fernando González. Em i save stap long Algeciras, em wanpela bilong ol taun i no gat Witnes long en. Long olgeta wik, Fernando i save travel inap 50 kilomita i go long Neiva bilong wok. Em i save redim gut stadi bilong em na kwiktaim em i kirap long kam long ol miting. Kirap long fes wik bilong stadi bilong em, Fernando i save bungim ol narapela long taun bilong em na skulim ol long ol samting em i lainim long Baibel stadi bilong em.

Fernando i kisim baptais long Janueri 1990, em 6-pela mun bihain long em i kirap long stadi. Bihain long en, em i kamap painia oltaim. Nau i gat wanpela asples Witnes long Algeciras, olsem na ol brata long brens i pilim olsem em i seif long salim ol painia salim i go long dispela hap. Long Februeri 1992, ol i kamapim wanpela kongrigesen long dispela taun.

Yu ting Fernando i autim tok long taun bilong em tasol? Nogat! Bihain long em i marit, em na meri bilong em i muv i go sindaun long San Vicente del Caguán, em narapela taun we i no gat Witnes. Ol i helpim wok bilong kamapim wanpela kongrigesen long dispela hap. Long 2002, ol i makim Fernando long mekim wok wasman sekit, na em na meri bilong em Olga i mekim yet dispela wok i kam inap long nau.

Long dispela ekspiriens, mi lainim wanpela bikpela samting olsem yumi mas beten na kolim stret ol samting yumi tingting long en long ol tiokratik asainmen bilong yumi. Jehova i save mekim samting em yumi no inap long mekim. Tingim, wok bilong bungim kaikai em wok bilong em, na i no wok bilong yumi.—Mat. 9:38.

JEHOVA I SAVE GIVIM YUMI “LAIK NA STRONG LONG MEKIM OL SAMTING EM YET I LAIKIM”

Long 1990 ol i makim mipela long mekim wok wasman raun. Fes sekit bilong mipela em biktaun Bogotá. Mipela i pret long mekim dispela asainmen. Mi na meri bilong mi, mipela i nomol manmeri na mipela i no gat bikpela save long mekim wanpela wok. Na mipela i no lain long stap long wanpela biktaun i gat planti manmeri long en. Tasol Jehova i truim tok promis bilong em i stap long Filipai 2:​13, olsem: “God tasol i save strongim yupela, em i givim yupela dispela laik na strong long mekim ol samting em yet i laikim.”

Bihain ol i salim mipela i go wok sekit long hap bilong taun Medellín, em taun mi stori long en long kirap bilong atikol. Ol manmeri long dispela hap i lain pinis long pasin bilong pait na kilim man long strit, olsem na ol i no pret moa long en. Olsem, wanpela taim mi mekim Baibel stadi i stap na ol man i kirap sutim gan ausait long haus mi stap long en. Mi laik go daun long floa na hait, tasol Baibel sumatin i wok yet long ritim ol paragraf, na em i no pret liklik. Em i ritim paragraf pinis na em i tok eskius na em i go ausait. Bihain liklik em i kam bek wantaim tupela liklik pikinini, na isi tasol em i tok: “Sori, mi go kisim ol pikinini bilong mi.”

I gat sampela narapela taim we hevi inap kamap long mipela. Wanpela taim mipela i go long ol haus na autim tok i stap na meri bilong mi i ran i kam long mi, em i pret nogut tru. Em i tok wanpela i sutim em long gan. Mi kirap nogut tru long dispela. Tasol bihain mipela i painimaut olsem dispela man i no sutim Sirkka, em i sutim narapela man i wokabaut klostu long Sirkka.

Bihain mipela i lain pinis long pasin bilong ol man long strit long pait na bagarapim man. Pasin bilong ol asples Witnes long sanap strong na karim ol dispela hevi na ol hevi i nogut moa, dispela i strongim mipela. Mipela i tingting olsem sapos Jehova i helpim ol, Em bai helpim mipela tu. Oltaim mipela i save bihainim edvais bilong ol asples elda, na mipela i save was gut na lusim ol narapela samting long han bilong Jehova.

Sampela taim ol samting i kamap i no nogut olsem mipela i ting long en. Wanpela taim mi harim olsem tupela meri i singaut bikmaus na kros i stap ausait long haus mi go visitim. Mi no gat laik long lukim ol meri i kros, tasol mama bilong haus i singautim mi go long veranda. Tru tru, dispela kros i no kamap namel long tupela meri, nogat, em tupela pisin perot i wok long singaut na bihainim pasin bilong tupela meri long neiba long kros.

SAMPELA MOA BLESING NA OL HATWOK

Long 1997, ol i makim mi long mekim wok olsem wanpela tisa bilong Ministerial Trening Skul.b Mi save amamas long stap sumatin bilong ol skul tiokratik, tasol mi no bin ting mi inap kisim dispela gutpela blesing bilong stap olsem tisa long wanpela skul.

Bihain mi mekim wok olsem wasman distrik. Taim ol i pinisim dispela wok, mi go bek long wok sekit. So winim 30 yia, mi amamas long mekim wok tisa na wok wasman raun. Mi bin kisim planti blesing tru long rot bilong ol dispela asainmen. Tasol sampela taim i gat ol hatwok bilong en. Nau bai mi stori long dispela.

Mi gat strongpela pasin. Dispela i helpim mi long daunim ol hatwok bilong mi. Tasol sampela taim mi strong tumas long stretim ol hevi insait long ol kongrigesen. Sampela taim, mi tok strong long ol bratasista long mekim pasin laikim na bihainim gutpela tingting long pasin ol i mekim long ol narapela. Tasol sori tru, em long ol dispela taim we mi yet i no bihainim ol dispela pasin.—Rom 7:​21-23.

Ol popaia bilong mi i mekim na sampela taim mi save bel hevi tru. (Rom 7:24) Wanpela taim mi beten na tokim Jehova olsem i gutpela long mi lusim wok misineri bilong mi na go bek long Finlan. Na long dispela apinun mi go long wanpela miting bilong kongrigesen. Ol tok mi harim long dispela miting i strongim mi long stap yet long asainmen bilong mi na wok yet long stretim ol pasin kranki bilong mi. I kam inap long nau, mi pilim tru hau Jehova i bekim dispela beten bilong mi. Na tu, mi tenkyu tru long hau Jehova i helpim mi long daunim ol pasin kranki bilong mi.

BILIP TRU OLSEM GUTPELA SAMTING BAI KAMAP BIHAIN

Mitupela Sirkka i tenkyu tru long Jehova i larim mipela i yusim laip bilong mipela long insait long fultaim sevis. Na tu, mi tenkyu tru long Jehova i givim mi gutpela meri i gat pasin laikim husat i sapotim mi long mekim wok bilong Em insait long ol dispela yia.

Klostu nau bai mi gat 70 krismas na bai mi lusim ol wok bilong mi olsem tisa na wasman raun. Tasol mi no bel hevi long dispela. Wai? Bikos mi bilip tru olsem yumi onarim Jehova taim yumi mekim wok bilong em long pasin daun na long bel olgeta yumi tenkyu na preisim em. (Mai. 6:8; Mak 12:​32-34) Bilong onarim Jehova, i no gat wok long yumi yet i kisim biknem.

Taim mi tingim bek ol asainmen mi bin mekim, mi luksave olsem mi no kisim ol dispela asainmen bikos mi gutpela olgeta o mi gat save long mekim dispela wok, nogat. Jehova yet i givim ol dispela asainmen long mi bikos long bikpela pasin helpim bilong em. Em i givim mi ol dispela asainmen, maski mi gat ol pasin kranki. Na mi save olsem Jehova i helpim mi long mekim ol dispela asainmen. Long dispela rot, strong bilong God i kamap gutpela olgeta taim mi no gat strong.—2 Kor. 12:9.