Bipo Mi Stap Nogut​—⁠Nau Mi Stap Amamas

STORI BILONG VICENTE GONZÁLEZ

Taim ol neiba i harim olsem mi bin sutim mi yet long gan inap fopela taim, tasol mi no dai, ol i kirap kolim mi olsem “Supaman.” Tasol mi no wanpela “supaman,” nogat tru. Mi laik stori bilong wanem mi laik kilim i dai mi yet.

MAMA i karim mi long 1951, long Guayaquil, Ekwado. Papamama bilong mi i wokim haus bilong ol na bilong 9-pela pikinini bilong ol long wanpela ples (Las Invasiones) klostu long solwara. Ol famili i stap rabis ol i bin go sindaun nating long dispela hap, na ol i wokim ol haus long mambu na putim rup kapa. Ol i wokim ol haus long tais na ples mangro, olsem na ol haus i sanap long ol pos diwai. Mipela i no gat pawa na mipela i kuk long stov i wok long ston kol, na mipela i wokabaut inap wanpela kilomita bilong kisim wara bilong dring.

Ol bratasusa bilong mi i kirap mekim wok mani taim ol i yangpela yet bilong helpim famili long baim kaikai samting. Taim mi gat 16 krismas mi no skul moa, na mi kisim wok long wanpela faktori olsem man bilong bringim tok i go i kam. Mi wantaim ol poroman bilong mi i kirap dring na mekim pasin pamuk. Taim maus bilong bel bilong mi i kotim mi, mi go long konpesio. Pris i save tok: “Pikinini, yu mekim gutpela konpesio,” na bihain em i salim mi i go na em i no givim sampela gutpela tok bilong Baibel bilong helpim mi. Olsem na mi wok yet long mekim ol wankain pasin. Bihain, mi pilim olsem pasin bilong mekim rong na mekim konpesio i go i go i no gat as bilong en, olsem na mi no go moa long lotu. Long dispela taim, mi luksave long pasin i no stret ol man i mekim. Olsem: Planti man i stap rabis na ol i hatwok tru long painim kaikai samting, na ol maniman i gat planti gutpela samting. I olsem laip i no gat as bilong en. Mi pilim olsem i no gat wanpela gutpela samting inap kamap long laip bilong mi.

Wanpela taim mi kisim save olsem fopela susa bilong mi i wok long ritim ol buk na nius bilong ol Witnes Bilong Jehova. Mi tu i kirap ritim ol dispela buk. Wanpela buk i kirapim tingting bilong mi, em Tok i Tru i Bringim Man Long Laip Oltaim. Buk i stori long planti tok bilong Baibel long pasin man inap kliagut long en. Mi tingim yet olsem mi bin tok, ‘Dispela em i tok i tru!’ Tasol insait long 15 yia bihain long dispela, mi kisim save olsem i hatwok tru long bihainim tok i tru.

Taim mi gat 22 krismas, mi kirap wok long wanpela beng. Wanpela taim wanpela wanwok bilong mi i soim mi long olsem wanem em i save kisim mani long beng long pasin hait na bihain bekim mani i go bek. Mi tu i kirap mekim olsem i go i go inap long mi bin kisim bikpela mani tru na mi no inap haitim moa rong bilong mi. Mi wari nogut tru, long wanem, mi pilim olsem mi no inap bekim dispela mani. Olsem na mi tingting olsem mi bai tokim lain bilong beng long samting mi bin mekim, na bihain kilim i dai mi yet, olsem givim strafe long mi yet.

Mi raitim pas i go long beng, na bihain mi baim wanpela liklik gan na mi go long wanpela hap long nambis i no gat man long en, na mi sutim mi yet tupela taim long het na tupela taim long bros. Maski mi kisim bikpela bagarap, mi no dai. Wanpela man i raun long baiskol i painim mi na hariap em i stretim rot bilong kisim mi i go long haus sik. Taim mi kamap orait pinis, ol i kotim mi long mani mi bin stilim na mi go kalabus. Taim mi lusim kalabus, mi sem na bel hevi, long wanem, nau mi gat ripot i stap long ol polis olsem mi wanpela raskol. Fopela bulet i no bin kilim mi i dai, olsem na ol neiba i kirap kolim mi olsem “Supaman.”

Rot i Op Long Senisim Pasin

Long dispela taim, Paul Sánchez, wanpela misineri bilong ol Witnes Bilong Jehova, i kam lukim mi. Namba wan samting mi luksave long en, em bikpela smail bilong em. Paul em i man bilong amamas na tingim ol gutpela samting, olsem na mi orait long em i stadi long Baibel wantaim mi. Mi tingting, ‘Ating em inap helpim mi long stap amamas na painim as bilong i stap laip.’

Paul i helpim mi na mi kisim save long ol samting God i laik mekim bilong helpim ol man, na tu, ol man i laikim na i bihainim tok bilong God ol bai stap long wanpela paradais long graun. (Song 37:29) Mi kisim save tu olsem God i no as bilong pasin i no stret na ol man i stap rabis, nogat, as bilong dispela em pasin bilong ol man long bikhet long God. (Lo 32:​4, 5) Ol dispela tok i tru i olsem lait long laip bilong mi. Mi no hatwok long stadi long Baibel, tasol mi hatwok tru long senisim pasin bilong mi.

Mi kisim wok long wanpela ofis we mi mas lukautim mani bilong kampani. Mi pundaun gen na kirap stilim mani. Taim mi no inap haitim moa pasin stil bilong mi, mi ranawe i go long narapela taun long Ekwado na stap long hap inap wanpela yia. Mi traim long lusim kantri, tasol mi no inap, olsem na mi go bek long ples.

Paul i painim mi gen, na mipela i kirap stadi. Long dispela taim mi wokim disisen long bihainim ol stiatok bilong Baibel na mekim wok bilong Jehova. Olsem na mi tokim Paul long pasin stil mi bin mekim, na em i givim strongpela tok kaunsel long mi. Em i tokim mi long ritim sampela ves bilong Baibel olsem Efesus 4:​28, em i tok: “Ol stilman i no ken stil moa. Nogat. Nau ol i mas wok.” Mi luksave olsem mi mas tokaut long pasin stil mi bin mekim na karim hevi bilong en.

Mi wok long tingting long i stap bilong mi, na mi kirap mekim wok olsem wanpela atis. Long wanpela de, wanpela man i kam long ples wok bilong mi na i tok em i laik lukim wanpela piksa mi bin droim. Tasol em i wanpela polis na em i gat kotpepa bilong holim mi. Olsem na mi sanap gen long kot na go kalabus. Paul i kam lukim mi, na mi tok promis long em, “Bai yu no bel hevi long yu helpim mi long kisim save long Baibel.” Mipela i wok yet long stadi taim mi stap long kalabus.

Mi Soim Olsem Mi Gat Gutpela Bel

Taim mi lusim kalabus, mi wokim tingting long givim bel olgeta long mekim wok bilong Jehova, na insait long tupela yia mi soim olsem mi gat gutpela bel. Long 1988, mi kisim baptais na kamap wanpela Witnes Bilong Jehova. Mi laik inapim ol yia mi bin westim, olsem na mi kirap mekim wok bilong God fultaim olsem wanpela painia, na mi wok strong long toktok wantaim ol yangpela insait long ol lain raskol.

Planti taim wanpela lain raskol i save rait nabaut long ol wol bilong Haus Kingdom bilong mipela. Mi save long ol dispela mangi na haus bilong ol, olsem na mi go lukim ol na stori long wok bilong Haus Kingdom, na mi askim ol long rispektim ol samting bilong mipela. Bihain long dispela ol i no rait nabaut moa long ol wol.

Bihain, taim mipela i stretim Haus Kingdom na wok long rausim olpela peint bilong en, wanpela yangpela Witnes, nem bilong em Fernando, i painim wanpela rait long wol i tok “Rokrok” (La Rana, long tok Spen). Em i singaut: “Em nem bilong mi ya!” Taim em i insait long wanpela lain raskol, Fernando i bin raitim nem bilong em long dispela haus. Nau em i wok long rausim nem bilong em!

Namba wan taim mi lukim Fernando, em i spak long drak. Inap tupela taim mama bilong em i bin salim em i go long haus sik bilong helpim ol man long lusim drak, tasol dispela i no bin helpim em. Olsem na mama i les long helpim em na i go sindaun long narapela hap na lusim Fernando i stap wanpis. Fernando i salim olgeta samting em inap kisim mani long en​—⁠ol dua, windo, na rup bilong haus tu​—⁠bilong baim ol drak. Wanpela de mi go toktok wantaim em long rot, mi givim kol dring long em, na askim em sapos em i laik stadi long Baibel. Em i tok orait long dispela, na mi amamas long lukim olsem em i laikim tok i tru. Em i lusim lain raskol, lusim ol drak, kirap kam long ol miting Kristen, na i no longtaim na em i kisim baptais.

Taim mitupela Fernando i autim tok long ol haus, planti manmeri i luksave long mipela na i singaut olsem “Rokrok!” o “Supaman!” na ol i askim mipela long mipela i wok long mekim wanem. Ol i kirap nogut long lukim wanpela raskol na wanpela stilman bilong bipo i holim Baibel na i kam lukim ol.

Wanpela taim mi autim tok long wanpela man na Fernando i toktok wantaim neiba bilong dispela man. Man mi toktok wantaim em i poinim pinga long Fernando na i tok: “Lukim dispela man long hap. Wanpela taim em i bin poinim gan long het bilong mi.” Mi tokim em olsem Fernando i lusim pinis ol olpela pasin bilong em na nau em i bihainim ol stiatok bilong Baibel. Taim Fernando i pinis long toktok wantaim neiba, mi singautim em long kam na em i sekanim man bilong haus. Dispela man i tok: “Yangpela man, mi laik tok amamas long yu bin senisim pasin bilong yu.”

Planti taim tru ol man i bin mekim kain tok olsem long mi na long Fernando. Dispela i bin opim rot long mipela i ken autim tok long ol na kirapim planti Baibel stadi. Yes, mi na Fernando i amamas tru long stap olsem Witnes Bilong Jehova.

Wanpela Bikpela Samting Long Laip Bilong Mi

Long 2001, taim mi gat 50 krismas, mi kirap nogut na amamas tru long ol i singautim mi i go long Ministerial Trening Skul i kamap long Peru. Inap etpela wik ol Witnes i winim mak ol i kisim skul long ol strongpela tok bilong Baibel bilong helpim ol long mekim wok autim tok.

Olgeta samting bilong skul i gutpela samting tru, wanpela samting tasol mi no amamas long en​—⁠mi mas mekim tok long ai bilong ol man, em samting mi pret tru long mekim. Planti yangpela sumatin i mekim ol gutpela tok na i luk olsem ol i no pret liklik. Tasol taim mi go long pletfom bilong mekim namba wan tok bilong mi, mi pilim olsem mi samting nating, mi save pilim olsem taim mi liklik yet. Ol han i tuhat nating na i guria, nek na ol skru bilong lek bilong mi tu i guria. Tasol Jehova i helpim mi long rot bilong holi spirit bilong em na ol gutpela brata. Wanpela tisa i tingim mi na bihain long klas em i helpim mi long redim ol tok bilong mi. Na bikpela samting tru, em i helpim mi long bilip long Jehova. Taim skul i pinis, em namba wan taim long laip bilong mi long amamas long mekim tok long ai bilong ol man.

Bikpela samting i traim mi i kamap long wanpela kibung bilong ol Witnes Bilong Jehova long Guayaquil. Long ai bilong 25,000 manmeri, mi stori long olsem wanem mi kamap wanpela Witnes. Tasol taim mi toktok, mi pilim tru gutpela wok mi mekim bilong strongim bel bilong dispela bikpela lain, na nek bilong mi i kirap guria. Bihain, wanpela long kibung i kam long mi na i tok, “Brata González, taim yu kamapim ekspiriens bilong yu, aiwara i pulap long ai bilong olgeta long odiens.” Mi laik tru long ekspiriens bilong mi i strongim bel bilong ol lain husat i hatwok long lusim ol olpela pasin bilong ol.

Nau mi wanpela elda na painia oltaim, na mi bin helpim 16 manmeri long kisim stretpela save long tok i tru bilong Baibel. Mi amamas tru long papamama na fopela susa bilong mi i bin dediketim laip bilong ol long Jehova. Mama i bin stap gut long God i go inap long em i dai long 2001. Mi tok tenkyu tru long Jehova long em i bin larim mi i kisim save long em, na mi save olsem nambawan gutpela rot bilong soim olsem mi amamas tru long dispela, em long rot bilong singautim ol narapela man tu long i go klostu long em.​—⁠Jems 4:⁠8.

[Piksa long pes 13]

Fernando, “Rokrok,” wanpela raskol bipo mi bin helpim em long save long tok i tru

[Piksa long pes 13]

Paul Sánchez, misineri i stadi long Baibel wantaim mi

[Piksa long pes 14]

Vicente González long nau