Toksave

Bilong Helpim Ol Komiti Bilong Lain Bilong Bosim Ol Witnes

Long dispela taim i gat 12-pela brata long Lain Bilong Bosim Ol Witnes Bilong Jehova na ol i wok strong yet long mekim ol wok bilong ol. Ol i save tenkyu long ‘bikpela lain’ long gutpela wok ol i mekim bilong helpim ol. (Kamapim Tok Hait 7:​9, 15) Long dispela taim lain Witnes i wok long i go bikpela tru long olgeta hap na i olsem i stret i mas i gat sampela man bilong helpim Lain Bilong Bosim Ol Witnes. Olsem na ol i pasim tok pinis long singautim sampela brata i kam helpim ol, em planti bilong ol dispela brata i bilong ‘bikpela lain.’ Ol dispela brata bai stap long ol miting bilong Ol Komiti Bilong Lain Bilong Bosim Ol Witnes, em Komiti Bilong Helpim Ol Wokman, na Bilong Wokim Ol Buk, na Bilong Wok Autim Tok, na Bilong Wok Tisa, na Bilong Raitim Tok. Long dispela rot bai i gat 7-pela o 8-pela brata long ol miting bilong olgeta wan wan komiti. Ol brata bilong komiti i bilong Lain Bilong Bosim Ol Witnes ol bai bosim miting, na ol dispela helpim bilong ol bai insait long ol toktok, na ol bai mekim ol wok em komiti i givim long ol. Dispela nupela pasin bai kirap long Me 1, 1992.

Inap planti yia nau lain remnan i wok long i go liklik, tasol ‘bikpela lain’ i wok long i go bikpela moa yet. Yumi no bin ting em bai i go bikpela olsem. (Aisaia 60:22) Yumi tenkyu tru long Jehova long lain i go bikpela olsem! Long 1931, taim ol brata i kisim nupela nem, olsem ol Witnes Bilong Jehova, i gat inap olsem 39,372 ol i autim tok bilong Kingdom, na planti bilong dispela lain ol i tok God i bin makim ol na ol i brata bilong Krais. (Aisaia 43:​10-12; Hibru 2:11) Inap 60 yia bihain, olsem long 1991, inap olsem 4,278,820 i autim tok bilong Kingdom long olgeta hap, na 8,850 tasol i tok ol i bilong lain remnan. Olsem Baibel i makim pinis, ‘bikpela lain’ i go bikpela tru, na nau i winim tru lain remnan bilong “liklik lain”​—⁠long olgeta 480 bilong ‘bikpela lain’ i gat wanpela bilong lain remnan. (Luk 12:32; Kamapim Tok Hait 7:​4-9) Wok bilong Kingdom i go bikpela na i mas i gat ol man bilong helpim lain remnan, olsem na ol i save pilim tru gutpela wok ‘bikpela lain’ i mekim, em ol i wok gut wantaim ol na helpim ol.

Dispela Wastaua i stori olsem i gat sampela i wok wantaim lain Israel bilong spirit long nau, em ol i olsem ol wokman bilong haus bilong God (ol Netinim) na ol tumbuna pikinini bilong ol wokboi bilong Solomon long bipo. Dispela tupela lain i bin lusim Babilon na i go bek long Jerusalem wantaim liklik lain Juda; ol dispela man i no bilong lain Israel ol i bikpela lain, winim lain bilong ol Livai i go bek. (Esra 2:​40-58; 8:​15-20) “Ol man ol i givim” bilong mekim wok long nau, em ol i bilong ‘bikpela lain,’ em ol strongpela brata i gat save pinis long lukautim ol brens, na long mekim wok sekit na distrik, na long mekim wok elda insait long ol 66,000 kongrigesen nau i stap long graun.

I no longtaim i go pinis ol i bin mekim ol Skul Bilong Wok Kingdom long olgeta hap bilong skulim ol elda na ol wokman bilong kongrigesen. Long Amerika inap olsem 59,420 elda i bin skul. Nau ol dispela “hetman” inap mekim gutpela moa ol wok bilong ol.​—⁠1 Pita 5:​1-3; lukim tu Efesus 4:​8, 11.

Long namba wan ofis bilong ol Witnes Bilong Jehova long Bruklin, sampela bilong ol dispela “man ol i givim,” ol i bin mekim wok inap planti yia pinis. Sampela ol i strongpela elda bilong ‘bikpela lain’ na ol i bin lain na kisim gutpela save long mekim wok. Olsem na Lain Bilong Bosim Ol Witnes i bin makim sampela bilong ol dispela elda bilong helpim ol long ol miting bilong ol komiti bilong ol. I no olsem ol dispela elda i bin wok planti yia, winim ol narapela, na ol i kisim dispela wok. Nogat. Ol i makim ol elda i strongpela brata i gat save pinis na ol inap helpim narapela narapela wok. Brata i kisim wok bilong wok wantaim wanpela komiti, dispela i no makim em i gat bikpela namba. Nogat. Olsem Jisas i tok long ol disaipel bilong em, “yupela olgeta i stap brata brata.” (Matyu 23:⁠8) Tasol ol dispela brata bai kisim bikpela wok, olsem na ol i mas “bekim planti samting.”​—⁠Luk 12:⁠48.

Mipela i amamas long lukim oganaisesen bilong Jehova i go bikpela na i kamap strong long nau. Insait long 10-pela yia i go pinis, lain bilong autim tok i go bikpela klostu 100 pesen. Dispela i stret wantaim tok profet i makim Man I Winim Devit, em Krais Jisas, olsem: “Strong bilong gavman bilong en bai i wok long kamap bikpela oltaim, na bai i no gat pait na ol manmeri bai i sindaun gut oltaim.” (Aisaia 9:⁠7) Ol wokman bilong haus bilong God long bipo (ol Netinim) i bin wok gut wantaim ol pris na wokim gen ol banis bilong Jerusalem, na olsem tasol long nau, truim bilong tok profet long oganaisesen bilong Jehova i wok long kamap, olsem: “Ol man bilong ol arapela kantri bai i kam wokim gen ol banis bilong yu.” (Aisaia 60:10; Nehemia 3:​22, 26) Yumi mas litimapim nem bilong ‘ol Netinim’ long nau, em ol i wok strong long helpim lotu i tru​—⁠ol i wok gut wantaim “ol pris bilong Bikpela” long wanem wanem wok ol i givim long ol insait long oganaisesen bilong Jehova long olgeta hap.​—⁠Aisaia 61:​5, 6.