Sampela Ples Long Graun Bilong Promis

Em i Lukautim Ol Israel Long Sainai

LONG tingting bilong yu, lukim planti milion man meri pikinini ol i wokabaut i go long wanpela “bikpela ples wesan nating, we i gat olkain snek na binatang i gat marasin nogut. . . . dispela ples i drai olgeta”!

God i stori olsem long dispela ples long Baibel long Lo 8:15. Ol dispela tok bilong God i helpim yumi long save long ol hevi inap painim ol Israel taim ol i lusim Isip na wokabaut raun long ples wesan nating bilong Sainai. I gat wanpela bikpela hevi, olsem: Husat bai givim kaikai na wara inap long ol?

Ol lain Israel i bin wok kalabus long hap bilong maus bilong wara Nail, tasol ol i no sot long wanpela samting. Long banis bilong sampela hul bilong ston i olsem matmat bilong ol man bilong bipo, i gat piksa bilong kain kain kaikai, olsem ol pikinini wain, na melen, na ol narapela kaikai bilong gaden, na tu ol pis na kakaruk. Dispela i kamapim klia olsem ol i gat kain kain kaikai. Olsem na taim ol Israel i toktok planti long ol i laik tru long kaikai abus, i stret ol i tok: “Long Isip mipela i bin kaikai planti pis mipela i bin kisim nating. Na mipela i bin kisim ol kukamba na melen na olkain anian.”​—⁠Namba 11:​4, 5; 20:⁠5.

Ol Israel i brukim Solwara Retsi, na bihain ol i save Sainai em wanem kain ples tru. Ol i no bihainim rot i go long hap bilong not, em rot ol man bilong bisnis i save go i kam long en; ol i baut i go long poin long hap bilong saut. Taim ol i wokabaut pinis inap 80 kilomita long dispela ples wesan nating, ol i sot tru long wara. Ol i go kamap long wanpela wara, tasol ol i no inap dring, long wanem, dispela wara i gat pait, na ating i gat sampela sik long en. Ol i krai na tok: “Bai mipela i dringim wanem samting?” God i helpim ol​—⁠em i mekim wara i kamap gutpela na ol inap long dring.​—⁠Kisim Bek 15:​22-25.

Lukim lain kamel long piksa i stap antap. Dispela inap helpim yumi long save long hatwok bilong ol Israel long wokabaut long ples wesan nating i go kamap long hap bilong Maunten Sainai. Olsem wanem bai ol i kisim wara na kaikai inap long ol na bilong lukautim ol bulmakau na sipsip samting bambai ol i ken i stap laip?​—⁠Kisim Bek 12:38.

Lain Israel i wokabaut i go moa long hap bilong saut na liklik taim bihain ol i kamap long wanpela ples i gat wara na kaikai, em ples Elim. (Kisim Bek 15:27) Tasol ol i no kamap yet long ples ol i laik go long en. Ol i laik i go long “maunten bilong God,” em Maunten Sainai. (Kisim Bek 3:1; 18:5; 19:2; 24:​12-18) Maunten Sainai i stap longwe long Elim inap olsem 120 kilomita​—⁠ol i mas wokabaut longwe yet long ples nogut i no gat wara.

Dispela bikpela lain i wokabaut i go long Maunten Sainai, na ol i kam klostu long wanpela ples i gat bikpela wara long en, ol i kolim Feiran, na ating ol i malolo liklik long dispela ples. Yu inap lukim liklik hap bilong dispela ples long piksa long narapela pes hia.a Dispela ples i stap long ples daun long ples wesan nating i go long hap bilong Solwara Retsi (Pasis bilong Sues). Ol inap kisim gutpela malolo long dispela ples!

Hap bilong Sainai em i “bikpela ples wesan nating” i gat ol samting nogut long en, tasol long dispela ples Feiran, ol lain Israel inap malolo gut na kisim win aninit long ol diwai det na ol narapela diwai. Ol inap kisim planti kaikai bilong diwai det​—⁠ol i ken kaikai dispela long dispela ples, na kisim sampela i go wantaim ol.

Long Feiran i gat wara na planti diwai i karim kaikai, long wanem, wara i save kamap insait long graun long dispela ples. Sapos yu stap long ples wesan nating na wantu yu lukim gutpela wara bilong dring, bai yu amamas tru, a? Olsem na maski Sainai em ples wesan nating, i gat sampela ples bilong kisim wara. Sampela taim ol i mas digim wanpela hul wara i go daun tru insait long graun. Em hatwok long pulimapim wara long ol baket samting na pulim i kam antap, na sapos ol i gat planti sipsip samting, bai ol i hatwok moa yet. Long nau ol Arap i save raun raun long hap bilong Sainai, ol i laik tru long i go long ol hul wara bambai ol inap kisim wara bilong ol yet na bilong ol kamel bilong ol.​—⁠Lukim Stat 24:​11-20; 26:​18-22.

Tru, sampela taim ol Israel i toktok planti, long wanem, ol i sot long wara na kaikai na i olsem ol i no gat rot bilong kisim, tasol ol i gat wara na kaikai. Sampela taim God i wokim mirakel na givim long ol. (Kisim Bek 16:​11-18, 31; 17:​2-6) Na sampela taim em i soim rot long ol na bringim ol i go long “ples bilong wokim kem” i gat wara na ol diwai samting i stap, na ol inap kisim wara wantaim kaikai. (Namba 10:​33-36) Long olgeta taim God i kirapim tingting bilong ol long tingim ol planti gutpela samting ol man i stap gut long em bai kisim long Graun Bilong Promis.​—⁠Lo 11:​10-15.

[Ol Futnot]

[Piksa Kredit Lain long pes 24]

Pictorial Archive (Near Eastern History) Est.

[Piksa Kredit Lain long pes 24]

Pictorial Archive (Near Eastern History) Est.

[Piksa Kredit Lain long pes 24, 25]

Pictorial Archive (Near Eastern History) Est.

[Piksa Kredit Lain long pes 25]

Pictorial Archive (Near Eastern History) Est.