Sampela Ples long Graun Bilong Promis
Ples Nating Bilong Juda—I Narapela Kain Ples
LONG tingting bilong yu, yu ting ples nating bilong Juda long Graun Bilong Promis i olsem wanem? Sampela man i ting em i olsem traipela bikbus stret. Na sampela ol i ting em i olsem wanpela ples drai i gat wesan tasol long en.
Dispela ples i no olsem. Lukim piksa bilong en i stap antap. Long dispela piksa, yu lukim hap bilong dispela ples nating em Jisas i bin go long en. Ol man i tok Satan i bin kisim Jisas i go antap long dispela maunten na soim ‘olgeta kingdom bilong dispela graun’ long Jisas. Dispela maunten i antap moa na em i stap arere long dispela ples i no gat man na i lukluk i go long taun i gat planti diwai det i stap long en, em taun Jeriko long ples daun bilong Wara Jordan long hap bilong sankamap.—Matyu 3:1; 4:1-11.
Ples nating bilong Juda i kirap long dispela hap bilong not-is na i go bihainim hap bilong san i go daun long hapsait bilong Raunwara Detsi. Sapos yu lukim mep long skin bilong kalenda bilong Ol Witnes Bilong Jehova bilong yia 1989, dispela bai helpim yu long save gut long dispela hap. (Dispela kalenda i gat bikpela piksa bilong dispela piksa i stap antap). Dispela ples nating (em i op inap olsem 16 i go 24 kilomita) i stap long hap bilong sankamap long ol maunten bilong Juda na i go daun long nambis bilong Raunwara Detsi.
Ol dispela maunten i save pasim bikpela hap bilong ren em i save kam long Biksolwara Mediterenian. I no gat ol diwai samting i kamap long sait bilong ol maunten long hap bilong sankamap, na graun bilong ol dispela maunten i no strong tumas, em i olsem graun bilong wokim sospen graun. Long taim bilong kol, olsem long mun Novemba na Disemba, i gat liklik ren i kam daun long dispela hap. Long dispela taim gras i save kamap long ol maunten na ol lain sipsip i save kaikai. Long dispela hap ol i save wokim ol banis sipsip long ston em 1 Samuel 24:3 i stori long ol dispela “banis sipsip.”
Gras i kamap long dispela hap hia i no save stap longtaim. Win i kam long ples nating long hap bilong sankamap i save kukim dispela gras na i drai. Dispela samting i stret long tok profet i tok: “Gras i save drai, na ol plaua i save pundaun. Tasol tok bilong God bilong yumi i save stap oltaim oltaim.”—Aisaia 40:8; 1 Pita 1:24, 25.
Ating Jisas i tingim dispela tok profet taim em i raun long dispela ples nating inap 40 san na 40 nait. Em i stap long dispela ples ston namel long ol kil bilong maunten; i no gat ol diwai long dispela hap na san i kukim. Yu ting em i pilim olsem wanem? (Aisaia 32:2) Em nau, yumi ken save bilong wanem bihain “ol ensel i kam na i helpim Jisas”!—Matyu 4:1-11.
Bipo ol man i save go na hait long ples nating bilong Juda long wanem i no gat man i stap. Taim King Sol i belhat long Devit na Devit i ranawe, em i painim ples hait long dispela hap; em i tok dispela ples i olsem “ples drai i no gat wara long en.” (Buk Song 63:1 na long tok i go pas; 1 Samuel 23:29) Devit i bin hait long wanpela hul long maunten, ating dispela hul i kain olsem wanpela hul bilong maunten ol i kolim Um Katafa (Umm Qatafa) long ples daun (Wadi Khareitun) i kirap long taun Betlehem long hap bilong sankamap na i go kamap long Raunwara Detsi. (Hibru 11:32, 38) Lukim piksa long han sut hia, em man bilong kisim piksa i stap insait long hul na em i kisim. Yu ken lukim sampela blakpela sipsip i stap long han sut ol i wok long painim wan wan hap gras i kamap nabaut nabaut long arere bilong maunten.
Wanpela taim Sol i stap klostu long ples Engedi na em i laik pekpek, olsem na em i go insait long wanpela hul bilong maunten. Em i no save, Devit i stap insait tru long dispela hul. Devit i bin katim liklik hap long arere bilong longpela klos bilong Sol, tasol em i no laik bagarapim dispela man “[Jehova] yet i bin makim em.” Bihain Devit i singaut long Sol, ating taim king i stap daunbilo pinis namel long ol diwai i gat planti lip. (1 Samuel 24:1-22) Tasol ating yu kirap nogut long harim tok olsem i gat ol diwai long dispela hap, em ol i gat planti lip.
Yes, taim i gat planti wara, ol diwai na naispela plaua inap kamap long dispela ples nating, olsem long hap bilong Engedi. Sampela wara i save ran aninit long graun na i kamap antap long ples daun bilong Engedi, em dispela ples daun i save go kamap long nambis bilong Raunwara Detsi long hap bilong san i go daun. Ol dispela wara i save mekim na planti diwai i kamap long hap bilong Engedi na i olsem bikbus. Sapos yu go lukluk raun long dispela hap, bai yu lukim planti ol kain kain plaua na ol diwai i karim kaikai. Ating bai yu lukim ol animal tu, olsem ol mumut i stap long ples ston na ol wel meme bilong maunten; i gat ol bikpela wel pusi tu i stap long dispela ples, ol i kolim lepat!—1 Samuel 24:2; Solomon 1:14.
Ples nating bilong Juda inap kamapim planti ol kain kain plaua na diwai na dispela i helpim yumi long save moa long driman bilong Esekiel, em i lukim wara i lusim haus bilong God long Jerusalem na i ran i go. Dispela wara i kamap bikpela na i ran i go brukim ples nating bilong Juda. Wanem samting i kamap? Esekiel i tok: “Mi lukim planti diwai i sanap long arere bilong wara long hap na long hap. . . . Ol man i ken kaikai ol pikinini bilong ol dispela diwai na kisim ol lip bilong ol bilong mekim orait ol kain sik bilong ol.”—Esekiel 47:1-12; Aisaia 35:1, 6, 7.
Ples nating bilong Juda em i ples drai liklik na i no gat planti diwai long en na i no gat man, tasol em i no ples nating tasol. Em i narapela kain ples na planti taim Baibel i stori long en.—Luk 10:29-37.
[Piksa Kredit Lain long pes 22]
Pictorial Archive (Near Eastern History) Est.
[Piksa Kredit Lain long pes 23]
Pictorial Archive (Near Eastern History) Est.