Ol Samting Graun Bilong Promis Inap Skulim Yumi Long En

GRAUN Bilong Promis olsem Baibel i stori long en, em i wanpela kantri i narapela kain tru. Hap graun bilong en i no bikpela tumas, tasol i gat ol maunten, na ples daun, na wara, na raunwara samting. Long hap bilong not, i gat ol maunten ais; long hap bilong saut, ol ples i hat. Long ol ples daun i gat ol gaden i save kamapim planti gutpela kaikai, na i gat ol ples drai, na long ol liklik maunten i gat ol gaden prut na gras bilong ol bulmakau sipsip.

I gat ol ples daun na ol liklik na bikpela maunten, na long sampela hap i gat gutpela san na sampela hap i kol, na graun bilong en i narapela narapela kain, na long sampela hap i gat bikpela gris na long sampela hap nogat, ol dispela samting i mekim na i gat ol kain kain diwai, na purpur, na plaua samting​—⁠sampela bilong ol i save kamap long ol bikpela maunten i kol, na sampela long ol ples drai, na sampela long ol stretpela hap graun em ol wara i bin tromoi ston long en, na long ol ples ston i stap antap. Wanpela saveman bilong skelim ol plaua samting i tok, i gat inap olsem 2,600 kain kain diwai plaua samting long dispela hap graun! Taim ol Israel bilong bipo i bin go long dispela kantri, wantu ol i bin kisim save olsem em i gutpela hap graun. Long wanpela ples daun ol i bin kisim wanpela rop wain i traipela nogut tru na i gat planti pikinini wain long en, na ol i mas pasim long wanpela hap diwai na tupela man i karim i kam! I stret dispela ples daun i gat nem Eskol, long wanem, insait bilong dispela nem i olsem “Rop [Wain].”a​​—⁠Namba 13:​21-​24.

Orait, nau yumi ken stori long sampela ples bilong dispela kantri i narapela kain tru, na bai yumi stori moa yet long ol hap bilong saut.

Hap Ol i Kolim Sefela

Nambis bilong biksolwara Mediterenian i stap long hap wes bilong Graun Bilong Promis. Lusim dispela hap i go long is inap olsem 40 kilomita, em wanpela hap graun ol i kolim Sefela. Dispela hap tok “Sefela” i olsem “Ples Daun,” tasol dispela hap i gat planti liklik maunten long en. Yumi inap kolim olsem ples daun taim yumi skelim dispela hap wantaim ol maunten bilong hap bilong Juda i stap long hap is.

Lukim piksa bilong mak bilong graun na skelim ol hap bilong Sefela wantaim ol hap i stap klostu. Long hap is em ol maunten bilong Juda; long hap wes em ol ples daun bilong nambis bilong Filistia. Long taim bilong ol man i bin raitim Baibel, dispela hap graun bilong Sefela i olsem wanpela banis namel long lain bilong God na ol birua bilong ol. Taim ami bilong ol birua i laik kirapim pait long Jerusalem, em biktaun bilong Israel, ol Israel i bin go bungim ol long hap bilong Sefela bilong sakim ol i go bek.

Samting olsem i bin kamap long yia 830 B.C.E. samting. Baibel i tok, King Hasael bilong Siria “i kam wantaim ol ami bilong en na i pait long taun Get [em taun i stap klostu long mak bilong graun bilong Sefela]. Ol i winim ol Get na kisim taun pinis, orait ol i tanim na i go bilong pait long Jerusalem.” King Joas i pasim Hasael, long wanem, em i bin givim em planti gutpela presen bilong haus bilong God na haus bilong king. Tasol dispela stori i soim yumi olsem dispela hap bilong Sefela em i bikpela samting bilong lukautim Jerusalem.​—⁠2 King 12:​17, 18.

Ating dispela inap skulim yumi long sampela samting. Hasael i laik daunim Jerusalem, tasol pastaim em i mas brukim hap graun bilong Sefela. Na i wankain long Satan. Em i save ‘raun bilong kaikai’ ol wokman bilong God, tasol planti taim em i mas brukim pastaim wanpela samting i olsem strongpela banis​—⁠ol wokman bilong God i save bihainim ol lo bilong Baibel, olsem ol lo i tok no ken poroman wantaim ol man nogut na no ken laikim tumas mani kago. (1 Pita 5:8; 1 Korin 15:33; 1 Timoti 6:10) Sapos man i lusim lo bilong God liklik, em bai mekim ol bikpela rong. Olsem na long nau yu mas bihainim olgeta lo bilong God bambai bihain yu no ken brukim ol lo bilong God.

Ples Maunten Bilong Juda

Lusim hap bilong Sefela na i go insait, em ples maunten bilong Juda. Ol gaden long dispela hap graun i save kamapim wit na bali samting, na wel bilong oliv na wain. I gat ol bikpela maunten, olsem na Juda em i gutpela ples bilong hait long ol birua. Olsem na King Jotam i bin wokim “ol strongpela ples . . . na ol taua” long dispela hap. Long taim bilong hevi ol man inap ranawe i go hait long ol dispela ples.​—⁠2 Stori 27:⁠4.

Wanpela taun i gat biknem long ples maunten bilong Juda em Jerusalem, narapela nem bilong en Saion. I olsem ol birua i no inap daunim kwik Jerusalem, long wanem, long hap bilong is na wes na saut bilong Jerusalem ples i go daun tru, olsem na ol birua i no inap daunim kwik Jerusalem. Na man bilong raitim stori bilong ol samting i bin kamap bipo, em Josifas, em i tok long hap bilong not i gat wanpela strongpela banis​—⁠i olsem 3-pela banis. Tasol i no inap sapos wanpela ples hait i gat banis na ol samting bilong pait tasol, nogat; ples hait i mas i gat sampela samting moa. Em i mas i gat wara. Wara em bikpela samting long taim ol birua i banisim taun, long wanem, sapos ol man i stap insait long taun ol i no gat wara, ol i mas givim ol yet long han bilong ol birua.

Ol Jerusalem i bin kisim wara long hul wara Siloam. Tasol King Hesekia i save olsem ol Asiria i laik banisim Jerusalem, olsem na long yia 740 B.C.E. samting, em i wokim narapela banis ausait long bikpela banis bambai hul wara Siloam i stap insait long banis bilong taun na ol birua i no ken pasim wara bilong ol Jerusalem. Na em i pasim tu ol hul wara ausait long taun bambai i hatwok long ol Asiria long painim wara bilong ol taim ol i kam banisim taun. (2 Stori 32:​2-5; Aisaia 22:11) Na i no dispela tasol. Hesekia i painim rot bilong kisim sampela wara moa i kam insait long Jerusalem!

Hesekia i bin wokim wanpela baret insait long graun, kirap long hul wara Gihon i go inap long hul wara Siloam.b Dispela baret Hesekia i bin wokim, ol man i tok em i wanpela bikpela wok tru bilong bipo, em ol saveman tasol inap mekim. Man! Tingim dispela: Wanpela baret ol i katim long ston​—⁠longpela bilong en inap olsem 533 mita, na em i go antap olsem 1.8 mita. Long nau, inap 2,700 yia bihain, ol man i go raun lukim Jerusalem ol i ken wokabaut insait long dispela gutpela baret, em planti man i kolim baret bilong Hesekia.​—⁠2 King 20:20; 2 Stori 32:⁠30.

Bikpela wok Hesekia i bin mekim bilong givim sampela wara moa long ol Jerusalem na lukautim dispela wara, dispela inap skulim yumi long wanpela gutpela samting. Jehova i olsem “hul wara i gat wara bilong givim laip.” (Jeremaia 2:13) Tingting bilong em i stap long Baibel na em inap helpim yumi long i stap laip. Olsem na i bikpela samting yumi mas stadi gut long Baibel. Tasol taim bilong mekim stadi, na save yu kisim long dispela rot, i no inap kamap nating long yu. Ating long olgeta de yu mas mekim planti wok, olsem na yu mas wok strong tru​—⁠olsem ‘digim wanpela baret’​—⁠bilong painim taim bilong stadi. (Sindaun 2:​1-5; Efesus 5:​15, 16) Na sapos yu kirap pinis long mekim stadi bilong yu, yu mas bihainim taim, yu mas tingim olsem stadi bilong yu em i bikpela samting. Was gut, no ken larim wanpela man o wanpela samting i pasim yu long kisim dispela gutpela wara.​—⁠Filipai 1:​9, 10.

Ol Ples Drai

Long hap is bilong ples maunten bilong Juda em ples drai bilong Juda, ol i kolim tu Jesimon; insait bilong dispela nem i olsem “Ples Drai.” (1 Samuel 23:19) Long hap bilong raunwara Detsi, dispela ples drai i gat ol maunten ston na ol traipela baret namel long ol i go daun moa. Insait long 24 kilomita, graun i go daun inap 1,200 mita. Dispela ples drai nating bilong Juda i stap hait long ol win i save karim ren i kam long hap bilong wes, olsem na liklik ren tasol i save pundaun long dispela hap. Ating em dispela ples drai nating em ol Israel i bin salim wanpela meme i go long en long Bikpela De Bilong God i Tekewe Sin Bilong Ol Manmeri. Em dispela ples yet Devit i bin ranawe i kam long en taim Sol i ranim em. Na long dispela ples Jisas i no bin kisim kaikai inap 40 de na Satan i traim em.​—⁠Wok Pris 16:​21, 22; Song 63, het-tok; Matyu 4:​1-11.

Lusim ples drai bilong Juda i go long saut-wes inap 160 kilomita em ples drai bilong Paran. Taim ol Israel i lusim Isip na i go long Graun Bilong Promis, inap 40 yia ol Israel i wokim ol kem bilong ol long dispela hap. (Namba 33:​1-49) Moses i bin tok, em “bikpela ples wesan nating, we i gat olkain snek na binatang i gat marasin nogut . . . [na] ples i drai olgeta.” (Lo 8:15) Yumi kirap nogut, inap planti milion Israel i no bin bagarap long dispela ples! Em long wanem Jehova i bin lukautim ol long kaikai samting.

Samting i kamap long dispela hap i kirapim tingting bilong yumi long tingim olsem Jehova inap lukautim yumi tu, maski yumi stap long dispela graun i olsem wanpela ples drai nating long samting bilong spirit. Yumi tu i stap namel long ol man i olsem snek na binatang i gat marasin nogut. Ating long olgeta de yumi mas stap na wok namel long ol man i save autim sampela tok nogut inap bagarapim tingting bilong yumi. (Efesus 5:​3, 4; 1 Timoti 6:20) Ol man i wok strong long bihainim ol lo bilong God maski ol dispela hevi i stap, yumi mas litimapim nem bilong ol. Ol i stap gut long God na dispela i kamapim long ples klia olsem Jehova i save helpim ol.

Ol Liklik Maunten Bilong Karmel

Insait bilong dispela nem Karmel i olsem “Gaden Prut.” Graun bilong dispela ples long hap not i gat bikpela gris, na longpela bilong en inap 50 kilomita. Em i gat planti gaden wain na diwai oliv na diwai prut. Ol bikpela maunten bilong dispela hap em i gutpela samting tru long ai. Aisaia 35:2 (NW) i stori long “ol gutpela samting bilong Karmel,” i makim olsem gutpela ples tru i bin kamap taim God i kisim ol Israel i go bek long ples bilong ol.

Sampela ol bikpela samting i bin kamap long hap bilong Karmel. Long dispela ples Elaija i bin resis wantaim ol profet bilong god Bal, na Jehova i salim “paia i kam daun” bambai ol i ken save Em yet i God tru. Na Elaija i bin stap long het bilong maunten Karmel taim em i lukim wanpela liklik klaut i kamap na bihain bikpela ren i kam daun, na dispela i pinisim hevi bilong ol Israel, long wanem, longpela taim ol i no gat ren long Israel. (1 King 18:​17-46) Na senis bilong Elaija, em Elisa, em i bin stap long maunten Karmel taim meri bilong Sunem i kam lukim em bilong askim em long helpim pikinini bilong em i dai pinis; bihain Elisa i kirapim bek dispela pikinini.​—⁠2 King 4:​8, 20, 25-37.

Long nau ol liklik maunten bilong Karmel i gat yet ol gaden prut na diwai oliv na diwai wain. Long mun Epril Me ol naispela naispela plaua i save pulap tru long graun. King Solomon i bin tokim yangpela meri bilong Sulam olsem: “Het bilong yu i antap moa olsem het bilong maunten Karmel.” Ating taim Solomon i mekim dispela tok em i tingim gutpela gras tru bilong yangpela meri o em i tingim pasin bilong em long holim het bilong em i go antap.​—⁠Solomon 7:⁠5.

Ol liklik maunten bilong Karmel i bin luk nais moa yet, na ol i stap olsem mak bilong ol gutpela samting bilong spirit Jehova i givim long lain bilong em long nau ol i save lotu long em. (Aisaia 35:​1, 2) Ol Witnes Bilong Jehova i stap long wanpela paradais bilong spirit, na ol i wanbel long tok bilong King Devit, em i tok: “Mi kisim olgeta gutpela samting long yu tasol. Tru tumas, ol dispela samting i gutpela tru!”​—⁠Song 16:⁠6.

Ol birua bilong God i bin givim planti hevi long lain Israel bilong bipo, na olsem tasol lain bilong God long nau tu ol i mas karim planti hevi. Tasol ol Kristen tru i no save lusim tingting long ol gutpela blesing Jehova i save givim long ol​—⁠olsem lait bilong tok i tru bilong Baibel i wok long go bikpela long olgeta taim, na wanpela bikpela lain brata i stap long olgeta hap, na rot i op bilong kisim laip oltaim long Paradais long graun.​—⁠Sindaun 4:18; Jon 3:16; 13:⁠35.

“Olsem Naispela Gaden Bilong Bikpela”

Graun Bilong Promis bilong bipo i bin luk nais tru. Olsem Baibel i tok, em “graun i gat planti gris na ol kaikai i save kamap gutpela tumas.” (Stat 13:10; Kisim Bek 3:⁠8) Moses i tok em wanpela “gutpela kantri tru. Dispela kantri i gat ol bikpela wara na ol hul wara. Na sampela wara tu i save ran aninit long graun na kamap antap long ol ples daun na long ol ples maunten. Dispela kantri i save kamapim wit na bali, na pikinini bilong diwai wain na diwai fik na diwai pomigranet na diwai oliv, na hani bilong binatang. Long dispela graun bai yupela i no ken hangre, na i no ken sot long wanpela samting. Na ol ston bilong dispela kantri i gat ain long en, na bai yupela i ken painim kapa insait long ol maunten.”​—⁠Lo 8:​7-9.

Jehova i givim gutpela ples tru long lain bilong em bilong bipo, olsem na bai em inap givim gutpela ples paradais i stap long olgeta hap bilong graun long ol gutpela wokboi bilong em​—⁠em ples i gat ol maunten, na ples daun, na wara, na raunwara. Yes, Graun Bilong Promis bilong bipo wantaim ol gutpela maunten, na wara, na raunwara samting, i bin i stap olsem wanpela ples i makim gutpela ples paradais bilong spirit em ol Witnes bilong em i stap long en long nau, na i makim Paradais tru bai kamap bihain long nupela taim. Tok promis bilong Song 37:29 bai kamap tru, olsem: “Ol stretpela man bai i kisim graun God i givim ol, na bai ol i stap oltaim long en.” Taim Jehova i givim dispela gutpela ples paradais olsem haus long ol manmeri i bihainim ol lo bilong em, ol bai i amamas tru long go insait long olgeta “rum,” na ol bai mekim olsem inap long olgeta taim bihain!

[Ol Futnot]

[Mep long pes 4]

GALILI

Maunten Karmel

Raunwara Galili

SAMARIA

SEFELA

Ol Maunten Bilong Juda

Raunwara Detsi

[Kredit Lain]

NASA photo

[Mep long pes 4]

Hap graun bilong Sefela i olsem wanpela banis namel long lain bilong God na ol birua bilong God

MI 0 5 10

KM 0 8 16

Graun Bilong Ol Filistia

Sefela

Ples Maunten Bilong Juda

Ples Drai Bilong Juda

Ples Daun Bilong Jordan

Raunwara Detsi

Graun Bilong Ol Amon na Moap

[Mep/Piksa long pes 5]

Baret bilong Hesekia: Ol i bin katim long ston, longpela bilong en inap 533 mita

Ples Daun Bilong Tairofon

Hul Wara Siloam

TAUN BILONG DEVIT

Ples Daun Bilong Kidron

Gihon

[Ol Piksa long pes 6]

Devit i ranawe i go long ples drai bilong Juda taim Sol i laik kilim em. Bihain Satan i bin traim Jisas long dispela hap

[Kredit Lain]

Pictorial Archive (Near Eastern History) Est.

[Ol Piksa long pes 7]

Elaija i bin daunim ol profet bilong Bal long maunten Karmel

[Kredit Lain]

Pictorial Archive (Near Eastern History) Est.

[Ol Piksa long pes 8]

“God, Bikpela bilong yumi, i bringim yupela i go long dispela gutpela kantri tru. Dispela kantri i gat ol bikpela wara na ol hul wara. Na sampela wara tu i save ran aninit long graun na kamap antap long ol ples daun na long ol ples maunten.”​—⁠Lo 8:⁠7