Raun na Lukim Graun Bilong Promis
SAPOS wanpela pren i tokim yu olsem em i bin baim wanpela nupela haus bilong yu olsem presen, na dispela haus i stap long wanpela naispela ples i no gat planti pairap—ol samting i stap isi. Ating yu laik save, ‘Haus i luk olsem wanem?’ Na yu gat laik tru long lukim dispela haus, na go insait long olgeta rum bilong lukim ol. Long wanem, em nupela haus bilong yu!
Long yia 1473 B.C.E., Jehova i bin givim Graun Bilong Promis—olsem nupela haus—long lain Israel bilong bipo. Kirap long hap not i go inap long hap saut, longpela bilong dispela hap graun i olsem 500 kilomita na braitpela bilong en i olsem 55 kilomita samting.a Graun Bilong Promis i stap long wanpela hap em graun bilong en i gat gutpela gris na em i gutpela ples tru long sindaun long en, na i gat ol ples i narapela narapela kain.
Tasol bilong wanem i gutpela nau yu kisim save long wanpela “haus,” em God i bin givim long sampela narapela man em ol i bin stap longtaim bipo? Em gutpela, long wanem, save yu kisim long dispela kantri em planti samting i bin kamap long en long bipo, em inap helpim yu long pilim moa ol stori bilong Baibel. Profesa Yohanan Aharoni, nau em i dai pinis, em i tok: “Long hap bilong Palestain, ol samting bilong kantri na ol samting i bin kamap long dispela kantri long bipo i pas strong wantaim. Yumi mas save long tupela samting wantaim na dispela bai helpim yumi long save gut long ol samting bilong dispela hap.” Taim ol samting long Graun Bilong Promis i bin stap gutpela tru, kantri i olsem piksa bilong Paradais klostu nau bai i kamap aninit long Kingdom bilong God long olgeta hap bilong graun!—Aisaia 11:9.
Taim Krais Jisas i stap long graun, em i bin stori long sampela samting bilong Graun Bilong Promis em planti man i bin save long en bambai em i ken skulim gut ol man. (Matyu 13:24-32; 25:31-46; Luk 13:6-9) Taim yumi skelim sampela samting long kantri Palestain bilong bipo, ating yumi tu inap lain long planti samting em inap helpim yumi. Olsem na i gutpela sapos long tingting yumi raun lukim sampela ples bilong dispela kantri, em lain bilong God i bin sindaun long en inap planti handet yia. Bai i gat planti samting Graun Bilong Promis i ken skulim yumi long en.
[Futnot]
a Taim mipela i tok “Graun Bilong Promis” long dispela stori, mipela i tingim ol samting olsem em i bin stap long bipo olsem Baibel i stori long en. Na mipela i no tingim ol ples em ol lain politik na lotu long nau i tok em bilong ol.
[Piksa Kredit Lain long pes 3]
Garo Nalbandian