Ripot Long Wok Bilong Kingdom
Tok i Tru Bilong Baibel i Helpim Wanpela Sister Katolik Long Bolivia Long Kamap Fri
LONG NAU planti man i gat gutpela bel ol i lusim lotu giaman na kisim save long tok i tru bilong Baibel, na ol i lain long pasin bilong lotuim Jehova, em i God tru. Winim 7,600 manmeri long Bolivia na wanpela sister Katolik tu, ol i bin mekim olsem.
Namba wan taim M—— i toktok wantaim wanpela Witnes Bilong Jehova, em i gat 9-pela krismas tasol. Taim Witnes i kam long haus bilong em, em i opim dua, na em nau, em namba wan taim em i harim nem bilong God, em Jehova. Inap planti yia bihain em i no lusim tingting long dispela nem.
Long famili em wanpela tasol em pikinini meri, olsem na famili i pasim tok olsem em i mas kamap sister Katolik. M—— i tok: “Mi amamas tru, long wanem, mi ting dispela em rot bilong mekim wok bilong God.” Tasol long haus sister em i lukim ol i no mekim stretpela pasin, na ol i save mekim gut long sampela tasol na sampela nogat. Dispela i mekim na em i no amamas moa. Em i tok: “Ating mi no inap lusim tingting long ol bel hevi bilong mi, na long bikpela pen mi bin kisim taim ol i givim strafe long mi long skin na long spirit. Ol dispela samting i mekim na mi kisim tingting long God olsem em i no Man bilong pasin sori—em i hatpela Man i no marimari liklik na em i givim strafe tasol.”
Em i tok moa: “Taim mi no kamap sister yet, mi wok long painim nem Jehova long Baibel, tasol nogat. Mi lukim tasol ‘Yawe,’ na dispela i paulim mi. Wanpela de mi go painim dispela lain i save toktok long Jehova, tasol mi no bungim ol.
“Ol yia i kamap i go pinis na wanpela taim mi go lukim famili bilong mi, na mi lukim rait long wanpela haus i tok: ‘Haus Kingdom Bilong ol Witnes Bilong Jehova.’ Mi laik tokim ol, ol i profet giaman, tasol no gat wanpela man i stap insait. Long Sande mi go bek gen. Ol i miting i stap, na sampela i kirap nogut long lukim wanpela sister Katolik i kam long miting. Miting i pinis na mi laik lusim ol hariap. Tasol wanpela Witnes i tok gude long mi, olsem na mi askim em, ‘Bilong wanem yu holim dispela nem na tok bilas long Man Holi?’ Mi kamapim askim olsem na nau mitupela i kirap toktok wantaim long tok bilong Baibel. Mi tokim em long kam lukim mi long haus bilong papamama. Tasol sori tru, papamama i rausim em long haus. Mitupela i bung gen, olsem tupela mun bihain, na em i singautim mi i kam long haus bilong em na bai em i ken lainim mi long tok bilong Baibel. Mi kirap nogut long lainim tok i kamapim klia olsem ol Kristen i mas mekim wok long nem bilong God. Dispela save i strongim mi long givim baksait long olgeta samting i no gat as bilong en, em mi bin lain long en taim mi stap sister Katolik.
“Mi tingim planti samting i bin painim mi taim mi stap long dispela haus sister. Olsem: Wanpela taim mi hangre, olsem na mi raitim pas na askim papamama long salim sampela kaikai i kam long mi. Tasol mi no bin save, ol sister i save opim ol pas na kaunim pastaim na bihain ol i salim i go. Long taim bilong kaikai bihain long dispela, ol i putim bikpela hip bret na jem long plet bilong mi na subim mi long kaikai olgeta. Nau mi gat planti kaikai tumas. Mi kamapim dispela long ol pren bilong mi na wanpela i tok, gutpela sapos ol hap bret mi no inap kaikai em mi ken brukbrukim na tromoi long plua. Taim mi mekim olsem, wantu wanpela sister i holim mi na tromoi mi i go long plua, na em i tok strong olsem mi mas rapim long tang olgeta hap plua na mekim i kamap klin. Rum i bikpela. Mi bihainim tok bilong em na mi harim sampela i lap lap—ol i no sori liklik long mi.
“Nau mi stap fri long ol dispela samting na em gutpela tru. Tasol bilong kamap fri olsem, mi bin lusim sampela samting bilong mi. Olsem: Papa bilong mi i rausim mi long haus. Tasol taim mi stap yet long haus sister, mi bin helpim sampela yangpela sister Katolik long lainim tok i tru. Mi amamas long tokaut olsem, mipela sampela i bin dediket long God Jehova bilong mekim wok bilong em!
“Taim mi lusim haus sister, papa i hatwok long save bilong wanem mi no laik kisim wok i gat bikpela pe, tasol i save pulim bikpela hap taim. Mi sakim ol dispela wok, long wanem, mi laik bai mi gat taim bilong mekim wok bilong God. Nau mi mekim wok painia oltaim. Mi no gat planti samting, tasol mi stap amamas. Na mi amamas, long wanem, mama na ol brata bilong mi, nau ol i wok wantaim mi long mekim wok bilong Jehova.”
Tru tumas, tok i tru bilong Baibel i helpim ol man long lusim ol lotu giaman bilong dispela graun na kamap fri, na tu, em i helpim ol man long i stap amamas oltaim.—Jon 8:32.