Yumi Man Bilong Bilip
Ol i Givim Gutpela Tok Bilong Mekim Gut Bel Bilong Ol Man Long Itali
JEHOVA em i “God bilong mekim isi bel bilong olgeta man i gat hevi.” Ol wokman bilong em i lain long bihainim pasin bilong em, olsem na ol i save “mekim isi bel bilong ol man i gat kain kain hevi.” (2 Korin 1:3, 4; Efesus 5:1) Dispela wok em wanpela bikpela wok bilong autim gutnius em ol Witnes Bilong Jehova i mekim.
Helpim Wanpela Meri i Gat Hevi
Long ol yia i go pinis i gat bikpela hangre, pait, na planti man ol i gat laik long painim gutpela sindaun, olsem na ol i go sindaun long ol kantri i gat planti mani samting winim kantri bilong ol. Tasol i hatwok liklik long lain long sindaun long nupela hap. Manjola i save sindaun wantaim ol wanples bilong em bilong Albenia long Bogomanero. Em i no bin kisim tok orait na em i sindaun nating long Itali, olsem na em i no laik toktok wantaim Wanda, em wanpela Witnes Bilong Jehova. Tasol bihain Wanda i stretim tok wantaim Manjola long i kam lukim em, na kwiktaim em i gat laik long stadi long Tok Bilong God, maski em i no save gut long tok ples bilong Wanda. Wanda i kam lukim em sampela taim tasol, na bihain taim em i kam em i no lukim moa wanpela man long dispela haus. Wanem samting i bin kamap? Wanda i harim olsem olgeta man long dispela haus i ranawe, long wanem, wanpela bilong ol—em man Manjola i save raun wantaim em—em i bin kilim wanpela man i dai na ol polis i laik kisim em!
Fopela mun bihain Wanda i bungim gen Manjola. Wanda i tok: “Skin bilong em i kamap yelo na em i lusim skin, na i olsem taim nogut i bin painim em.” Manjola i tok, man em i save raun wantaim em, em i stap long kalabus, na ol poroman em i go long ol bilong kisim helpim, ol i no bin helpim em liklik. Dispela i mekim na em i beten long God i ken helpim em. Orait nau em i tingim Wanda, em dispela meri i bin toktok wantaim em long Baibel. Manjola i amamas tru long lukim Wanda gen!
Ol i kirapim gen stadi na i no longtaim na Manjola i kirap i go long ol miting Kristen. Em i kisim tok orait long gavman long sindaun long Itali. Inap wanpela yia bihain, Manjola i kisim baptais na kamap Witnes. Ol tok promis bilong God i bin mekim gut bel bilong em na em i go bek long Albenia bambai em i ken tokim ol wanples bilong em long ol dispela gutpela tok bilong mekim gut bel bilong ol.
Autim Tok Long Kem Bilong Ol Man Bilong Narapela Kantri
Planti kongrigesen long Itali i stretim rot bilong autim tok long ol man bilong narapela kantri ol i sindaun long Itali, kain olsem Manjola. Olsem: Wanpela kongrigesen long Florens i stretim rot bambai oltaim ol i ken i go lukim ol man long wanpela kem bilong ol man bilong narapela lain. Ol man bilong dispela kem—planti ol i bilong Isten Yurop, Masedonia, na Kosovo—kain kain hevi i painim ol. Sampela i save kisim ol drak na dring. Planti i bin stil bambai ol i ken kisim mani bilong lukautim ol yet long ol samting bilong skin.
I hatwok long autim tok long dispela kem. Tasol wanpela sista i save autim tok long olgeta de, nem bilong em Paola, em i bungim Jaklina, wanpela meri Masedonia. Ol i stori liklik olsem tupela taim samting, na Jaklina i kirapim pren bilong em Susanna long skelim tok bilong Baibel. Orait bihain Susanna i kirap toktok wantaim ol wanblut long Baibel. I no longtaim na 5-pela long dispela famili i kirap stadi long Baibel oltaim, na ol i go long ol miting Kristen, na ol i kirap bihainim ol samting ol i lain long en. Maski ol hevi i painim ol, Jehova na tok bilong em long Baibel i strongim bel bilong ol.
Wanpela Sister Bilong Misin i Kisim Tok Bilong Mekim Gut Bel Bilong Em
Long taun Fomia, wanpela Witnes i save autim tok long olgeta de, nem bilong em Assunta, em i toktok wantaim wanpela meri i no inap wokabaut gut. Dispela meri em i sister bilong wanpela lain bilong misin i save mekim wok bilong lukautim ol sikman long ol haus sik na long haus bilong ol sikman.
Assunta i tok long dispela sister olsem: “Yu gat pen long skin bilong yu tu, a? Tarangu, yumi olgeta i gat ol hevi yumi mas karim.” Sister bilong misin i harim dispela tok na em i krai na i tok olsem em i gat bikpela sik tru. Assunta i mekim gut bel bilong em na i tokim em olsem dispela God em Baibel i stori long en inap mekim gut bel bilong em. Dispela sister i kisim ol nius bilong Baibel em Assunta i tilim long em.
Long taim ol i toktok gen narapela taim, dispela sister, nem bilong em Palmira, em i tokaut olsem em i kisim bikpela pen na hevi. Em i bin stap longpela taim long wanpela haus bilong misin em ol sister i bosim. Em i bin lusim dispela hap liklik taim tasol, long wanem, em i gat sik, na ol i no orait long em i go bek. Tasol Palmira i bin mekim wanpela strongpela tok promis long God bilong mekim wok olsem wanpela sister bilong misin, na em i ting i no stret long brukim dispela promis. Em i bin i go long ol man bilong “oraitim sik,” bambai ol i ken givim marasin long em, tasol ol i mekim na tingting bilong em i bagarap stret. Palmira i orait long stadi long Baibel, na em i go long ol miting Kristen inap wanpela yia. Bihain em i go long narapela ples na ol Witnes i no bungim em moa. Tupela yia i lus na bihain Assunta i painim em gen. Famili bilong em na ol pris pasto i bin birua nogut tru long Palmira. Tasol em i kirap stadi gen long Baibel, na em i kamap strong, na em i kisim baptais na kamap wanpela Witnes Bilong Jehova.
Tru tumas, tok bilong God bilong mekim gut bel bilong ol man, em i bin strongim planti man. (Rom 15:4, 5) Olsem na ol Witnes Bilong Jehova long Itali i laik tru long bihainim yet pasin bilong God na givim gutpela tok bilong em long ol man bilong mekim gut bel bilong ol.