Ripot Long Wok Bilong Kingdom

Ol i Autim Tok Long Kain Kain Taim na Ples na Gutpela Samting i Kamap

PLANTI manmeri i kisim save namba wan taim long tok i tru bilong Baibel long rot bilong wanpela Witnes Bilong Jehova i redi long autim tok long kain kain taim na ples. Long dispela samting ol Witnes i bihainim gutpela pasin bilong Krais Jisas, em i autim tok long wanpela meri bilong Samaria i kam long hul wara bilong pulimapim wara. (Jon, sapta 4) Long Is Afrika, wanpela Witnes Bilong Jehova i bihainim dispela pasin na em i autim tok long wanpela sister Katolik. Brens-ofis bilong Sosaiti Was Taua i stori long ol samting i bin kamap, olsem:

◻ Long moningtaim tru wanpela meri Witnes i go long taun na em i bungim wanpela sister Katolik na em inap toktok wantaim em, olsem na em i askim sister olsem: “Yu go we long kain taim olsem?” Sister i tok: “Mi go bilong beten long God bilong mi.” Nau Witnes i tok: “Yu save long nem bilong dispela God bilong yu?” Sister i tok: “Mi ting God em nem bilong em.” Nau Witnes i tokim em em i laik kam long haus bilong em long belo bek bilong toktok wantaim em long nem bilong God. Orait tupela i toktok pinis na bihain dispela sister i go long haus lotu bilong em na askim wanpela pris olsem: ‘Yu save long insait bilong tok “Jehova”?’ Pris i tok: “Em nem bilong God.” Sister i kirap nogut tru, long wanem, pris hia i save pinis, tasol no gat wanpela taim na em i lainim sister olsem.

Inap 9-pela de dispela Witnes i go bek lukim dispela meri na lainim em long ol tok i tru olsem: God i no Triwan, na yumi no gat tewel, na i no gat bikpaia, na ol man i dai pinis bai kirap bek. Meri i kisim gut ol dispela tok na askim Witnes long givim liklik hap taim long em bambai em inap tingim gut ol dispela nupela tok. Tupela wik bihain meri i askim Witnes long toktok moa wantaim em. Tasol em i tingting pinis long lusim misin bilong em na em i tromoi pinis ol piksa bilong lotu, na ol korona, na kruse samting bilong em. Pris i toktok wantaim em bilong traim kirapim em long kam bek long misin, tasol em i strong long bihainim tok i tru. Bihain em i baptais, na inap planti mun em i bin mekim wok painia haptaim, maski em i sik na lapun tru.

Haus bilong em i bikpela, olsem na em i tokim kongrigesen long mekim wok long en olsem wanpela Haus Kingdom. Ol brata i senisim olpela rup na wokim nupela, na rausim ol banis insait long haus na wokim bikpela hap bilong en i kamap olsem gutpela ples bung. Dispela meri, bipo em i wanpela sister Katolik, em i slip long wanpela rum long baksait bilong dispela haus. Em i amamas tru em inap mekim dispela samting bilong helpim wok bilong lotuim Jehova.

◻ Narapela stori i kam long biktaun Kampala long Yuganda na i kamapim klia olsem pasin bilong autim tok long kain kain taim na ples em i gutpela. Wanpela misineri Witnes em i laik go long wanpela ofis bilong gavman. Em i go antap long ofis long lift na em i autim tok long ol man i stap wantaim em long lift. Wanpela man, em Mista L⁠—⁠—⁠—⁠—, em i tok em i gat laik long kisim ol buk samting dispela misineri i soim long em, tasol em i no inap kisim long dispela taim. Olsem na em i givim nem bilong em na atres bilong ofis bilong em long misineri. Bihain misineri i go long dispela ofis na tokim ol em i laik lukim Mista L⁠—⁠—⁠—⁠—. Ol i singautim Mista L⁠—⁠—⁠—⁠— i kam, tasol misineri i kirap nogut, long wanem, em narapela man. I gat tupela man long dispela ofis i gat wankain nem. Witnes i autim tok inap sotpela taim tasol long namba 2 Mista L⁠—⁠—⁠—⁠—, na dispela man i gat bikpela laik long harim tok. Namba wan Mista L⁠—⁠—⁠—⁠— i no gat laik moa long harim tok, tasol Witnes i kirap long stadi wantaim namba 2 Mista L⁠—⁠—⁠—⁠— na nau em i wanpela Witnes i baptais pinis. Na meri bilong em wantaim pikinini man bilong em i kamap strong long tok i tru na laik kisim baptais.

Krais Jisas i Gutpela Wasman, na em i save long ol man i kain olsem sipsip em bel bilong ol i laikim stretpela pasin. Ol dispela stori i makim olsem Jisas i save stiaim lain bilong em i go painim kain man olsem. Tru tumas, pasin bilong autim tok long kain kain taim na ples em inap karim gutpela kaikai!​—⁠Jon 10⁠:14.