Pe Bilong Baim Bek Planti Manmeri
LONG Mas 31, 1970, klostu long Maunten Fuji long Japan, 9-pela memba bilong wanpela lain ol i kolim Ret Ami Bilong Japan, ol i hansapim kepten bilong wanpela balus i gat 120 samting pasindia na boskru, na ol i tok strong long kepten i mas bringim ol i go kamap gut long Not Koria.
Taim balus i pundaun pinis long biktaun Siol long Ripablik bilong Koria, namba tu bilong minista bilong trenspot long Japan, nem bilong em Shinjiro Yamamura, em i tok em i redi long kamap senis bilong ol manmeri i stap kalabus long balus, maski em i mas i dai tu. Ol lain i bin hansapim kepten ol i orait long dispela na larim ol pasindia i go, tasol ol i pasim i stap kepten wantaim ol boskru. Orait nau balus i go long biktaun Piongyang, na long dispela ples ol dispela Ret Ami i putim ol yet long han bilong polis. Bihain, Mista Yamamura na kepten bilong balus i go bek long Japan. Bagarap i no bin painim ol.
Long dispela taim wanpela man tasol i bin kamap senis bilong 120 samting manmeri. Dispela stori inap helpim yumi long save olsem wanem wanpela man tasol inap givim laip bilong em bilong baim bek planti manmeri. Tasol bilong kisim gut dispela tok bilong Baibel, yumi mas kisim sampela save moa.
Yumi mas save, sin i bin kamap olsem wanem. Baibel i kamapim klia dispela samting olsem: “Wanpela man i bin mekim sin, na long dispela pasin sin i kamap long graun. Na sin i bringim dai i kam. Na dai i kisim olgeta man, long wanem, olgeta man i bin mekim sin.” (Rom 5:12) Orait, sin i kamap olsem wanem? Long rot bilong dispela wanpela man i bin mekim sin, em Adam, em namba wan man God i bin wokim. Long Baibel, long Stat sapta 1 i go inap 3, yu inap kaunim stori bilong taim God i wokim Adam na wanem samting i mekim na Adam i bikhet na sakim lo bilong God.
Dispela stori i kamapim klia olsem i gat wanpela man i stap hait em i bin kirapim Adam long mekim sin. Dispela man i laik kisim strong bilong i stap bos, na bilong inapim dispela laik em i tingting long bosim Adam na olgeta pikinini Adam inap kamapim. Dispela man em Satan. Na Baibel i kolim em “dispela snek bilong bipo yet,” long wanem, long rot bilong wanpela snek em i bin kirapim Adam long mekim sin. (Kamapim Tok Hait 12:9) Gutpela Man bilong wokim yumi em i bin tokim Adam, em wok bilong Em yet bilong skelim wanem samting i gutpela na wanem samting i nogut. Adam i mas tingim gut dispela samting na bihainim tok bilong God. Tasol snek i grisim meri bilong Adam, em Iv, na meri i sakim tok bilong God. Na Iv i pulim man bilong em long sakim tok. Dispela samting Adam i mekim i makim olsem em i no laik aninit moa long wok bos bilong God, olsem na long laik bilong em yet em i kamap sinman na em i no inap givim laip i stap gutpela olgeta long ol pikinini bilong em—ol tu i kamap sinman.
Yumi olgeta i karim yet ol hevi bilong sin. Dispela i kamap olsem wanem? Long wanem, Man bilong wokim yumi em i bin tokim Adam tupela Iv, sapos long laik bilong ol yet ol i sakim tok bilong em, bai ol i dai. Adam i mekim sin, olsem na Adam yet i mekim na yumi olgeta i kalabus long sin na i dai.—Stat 2:17; 3:1-7.
Wanem samting inap baim bek yumi long sin? Krais Jisas i kam daun long graun “bilong givim laip bilong em bilong baim bek planti manmeri.”—Matyu 20:28.
Baim Bek, na Mekim i Kamap Fri
Baibel i kamapim klia olsem i gat tupela hap long wok bilong baim bek ol man, em olsem: (1) baim bek na (2) mekim i kamap fri. Wanpela saveman bilong Baibel (Albert Barnes) i stori long wanpela hap tok Grik (lyʹtron) ol i tanim olsem “baim bek” na em i tok: “Dispela tok pe bilong baim bek man i makim pe tru bilong baim bek ol man i stap kalabus. Mani ol birua i singaut long en bilong mekim i kamap fri ol man ol i bin holim long pait, dispela mani i olsem pe bilong baim bek ol dispela man ol i bin kalabusim; em olsem rot bilong ol kalabusman i ken kamap fri. Olsem na wanem wanem samting i mekim man i kamap fri long strafe o pen o sin, dispela samting em i olsem pe bilong baim bek man.”
Olsem na dispela hap tok Grik (lyʹtron) i makim “wanem wanem samting i mekim man i kamap fri.” Na dispela hap tok Grik i kamapim klia wok o rot bilong mekim man i kamap fri.
Aposel Pol i kolim kain hap tok Grik olsem (an·tiʹly·tron) bilong kamapim klia wanem kain pe inap baim bek man. Long 1 Timoti 2:6 (Baibel New World Translation), Pol i tok, Jisas “i bin givim laip bilong em yet olsem pe i wankain stret bilong baim bek olgeta manmeri.” Wanpela buk (Greek and English Lexicon to the New Testament bilong Parkhurst) i tok: ‘Dispela hap tok Grik i makim pe ol man i givim bilong baim bek ol kalabus bilong pait long han bilong ol birua, na i makim tu dispela kain pasin bilong givim laip bilong narapela olsem senis o bekim bilong laip bilong narapela.’ Olsem na pe bilong baim bek man i mas stret tru, olsem wankain stret. Tasol olsem wanem ofa Jisas i givim bilong baim bek ol manmeri i olsem “pe i wankain stret”?
Pe i Wankain Stret
Adam i mekim na sin na i dai i kalabusim yumi olgeta. Adam i gutpela man olgeta na em inap i stap oltaim, tasol em i mekim sin na gutpela laip bilong em i lus. Bilong baim bek dispela kain laip, wanpela man i gutpela olgeta wankain tru olsem Adam long pastaim, em i mas lusim gutpela laip bilong em, dispela i olsem pe i wankain stret. Tasol no gat wanpela man long lain bilong Adam i gutpela olgeta na em inap baim bek yumi—olgeta man long lain bilong Adam ol i sinman. (Jop 14:4; Buk Song 51:5) Tasol God i gat gutpela save na tingting na em i opim rot bambai yumi inap lusim kalabus bilong sin na i dai. Em i kisim gutpela laip bilong dispela wanpela Pikinini long heven em yet i bin kamapim, na em i putim long bel bilong wanpela nupela meri i no bin slip wantaim wanpela man, na em i lukautim dispela Pikinini na em i kamap gutpela man olgeta. (Luk 1:30-38; Jon 3:16-18) Dispela tok long Jisas i bin kamap long graun long rot bilong wanpela meri i no bin slip wantaim man, em i no stori nating bilong litimapim nem bilong wanpela man i bin kamapim wanpela lotu. Nogat. Em i helpim yumi long save long samting i stret God i mas mekim bilong baim bek ol man.
Bilong baim bek olgeta man, taim Jisas i stap long graun em i mas i stap stret tru i go inap long taim em i dai. Em i bin mekim olsem, na em i dai olsem ofa. Long dispela rot Jisas i givim gutpela laip bilong em olsem pe bilong baim bek olgeta man. (1 Pita 1:19) Olsem na i stret yumi ken tok, “wanpela man i bin kisim ples bilong yumi olgeta na i dai.” (2 Korin 5:14) Tru tumas, “olgeta man bilong lain bilong Adam ol i save dai. Na olsem tasol olgeta man bilong lain bilong Krais bai ol i kisim laip.”—1 Korin 15:22.
Wanpela Man i Kisim Ples Bilong Planti Man
Pastaim yumi bin stori long wanpela lain i bin hansapim kepten bilong balus. Long dispela taim ol man dispela lain i kalabusim long balus ol i no gat rot bilong helpim ol yet long kamap fri, maski ol i gat planti mani. Mas i gat wanpela man i no insait long dispela lain i stap kalabus na em i ken helpim ol. Dispela man i mas inapim sampela mak na em i ken kamap olsem senis bilong ol. Na i wankain tu long ol samting bilong dispela pe bilong baim bek olgeta man. Wanpela man bilong raitim song long Baibel em i tok: “Ol man . . . i save bikmaus nabaut long ol yet i gat planti samting, . . . no gat wanpela man i ken baim bek em yet long mani. Na em i no inap givim mani long God inap long baim laip bilong en. Nogat tru. Long wanem, pe bilong baim bek man, em i antap tumas. Man i no inap baim God bai God i larim em i stap laip oltaim na em i no ken i dai.” (Buk Song 49:6-8) Tru tumas, i mas i gat wanpela man i no insait long lain bilong Adam na em i ken helpim ol man. Laip bilong wanpela man tasol inap baim bek olgeta man sapos dispela man inapim sampela mak olsem stretpela lo bilong God i makim. Krais Jisas em i gutpela man olgeta na em tasol i bin inapim olgeta dispela mak.
God Jehova i kamapim rot bilong kisim bek ol man, na dispela rot em pe Krais Jisas i givim bilong baim bek ol. Tasol God i bin mekim sampela samting moa bilong helpim ol. Em i tok pinis, Satan i mas i dai, long wanem, Satan i bin pulim ol man long mekim sin. (Kamapim Tok Hait 12:7-9) I no longtaim na Jehova bai kalabusim dispela man i gat asua, em Satan, na bihain bai Em i pinisim em—bai em i ‘tromoi Satan i go daun long bikpela hul i gat paia,’ dispela i makim olsem Satan bai bagarap na pinis olgeta. (Kamapim Tok Hait 20:1-3, 7-10, 14) Taim dispela spirit nogut i pinis na pe bilong baim bek ol man i wok long helpim yumi, bai yumi lusim tru kalabus bilong sin na i dai na strong bilong Satan long bosim yumi. Olgeta manmeri i bihainim tok bai ol i kamap fri olsem, na bai ofa bilong Krais Jisas i helpim tru ol, na bai skin na tingting bilong ol i wok long kamap gutpela olgeta.
Yu Yet na Pe Bilong Baim Bek Ol Man
Taim ol man long hap bilong Is ol i lainim tok olsem Krais Jisas i bin givim laip bilong em olsem pe bilong baim bek olgeta manmeri, planti ol i pilim tru dispela gutpela samting God i bin mekim bilong helpim ol. Wanpela em Kasuo. Olgeta taim dispela man i save pulim smel bilong marasin bilong pen bilong mekim em i spak. Taim em i spak olsem na draivim ka, planti taim em i bagarapim ol ka bilong em. Tripela pren bilong em ol tu i save spak olsem na dispela i givim bikpela sik long ol na bihain ol i kilim i dai skin bilong ol yet. Kasuo tu em i traim kilim i dai skin bilong em yet. Bihain em i kirap long stadi na lainim tok bilong Baibel. Ol tok i tru em i lainim i kirapim em long stretim pasin bilong em. Em i wok strong long lusim dispela pasin bilong spak i bagarapim skin bilong em, tasol em i hatwok tru long lusim. Laik bilong bel long mekim pasin i stret i pait wantaim laik nogut bilong skin bilong em. Olsem na em i amamas long em inap beten askim God long lusim rong bilong em long rot bilong ofa bilong Krais Jisas! Kasuo i beten, na ol poroman Kristen i helpim em, na long dispela rot em i lusim dispela pasin nogut. Nau em i amamas long mekim wok bilong Jehova na bel bilong em i stap stret long ai bilong God.
Yu tingim Sisako, em meri yumi bin stori long em long kirap bilong stori i kamap paslain long dispela? Em i stadi long Baibel na em tu i kisim save long dispela rot bilong baim bek ol man. Taim em i kisim save olsem God i bin givim Pikinini bilong Em bilong baim bek ol man long sin, em i pilim tru dispela pasin bilong God. Sisako i dediket long Jehova. Nau em i gat 77 krismas, tasol em i save lusim inap olsem 90 aua long olgeta mun long tokim ol man long bikpela sori na marimari bilong Jehova.
Tok bilong pe bilong baim bek ol man i mas i stap olsem bikpela samting long yu tu. Long rot bilong en God bai opim rot bambai ol man i ken kamap fri tru—fri long sin na i dai. Olgeta man i bilip long ofa bilong Krais, bihain bai ol inap kisim laip oltaim long paradais long graun. Plis tokim ol Witnes Bilong Jehova long helpim yu, na bai yu yet yu ken kisim save long olsem wanem yu inap lusim kalabus bilong sin na i dai long rot bilong dispela pe bilong baim bek ol man.
[Piksa Kredit Lain long pes 5]
Courtesy of the Mainichi Shimbun