I Gat Rot Bilong Tekewe Sin?
BIPO Sisako wantaim fopela bikpela pikinini bilong em, ol i klinim ol toilet long wanpela biktaun i stap 600 kilomita longwe long ples bilong ol. Taim Sisako i mekim wok, em i save kolim wanpela tok bilong lotu, olsem em i mekim singsing, tasol em i no save long insait bilong dispela tok. Dispela em wanpela pasin bilong wanpela lain bilong lotu ol i wok long kisim save long as tru bilong olgeta lotu.
Sisako i tok: “Mi wok strong long sakim ol laik bilong skin, tasol mi no inap senisim pasin bilong mi. . . . Mi no inap lusim tingting long rong narapela i mekim long mi, na mi no save givim bel tru long ol narapela.”
Ol man i stap long hap bilong Is, planti ol i no save long sin olsem Baibel i stori long en. Tasol planti ol i wankain olsem Sisako—bel bilong ol i kotim ol long pasin nogut ol i mekim. (Rom 2:14, 15) Sapos wanpela taim yu no bin sori long man i gat hevi o yu no bin bosim gut maus na yu mekim sampela tok i no stret yu mekim, orait, bel bilong yu i pilim nogut na i kotim yu, a? Dispela samting i save painim yumi olgeta. (Jems 4:17) Na yumi olgeta, ol yangpela wantaim ol lapun, sampela taim yumi save tingting nogut long narapela man, a?
Bilong wanem bel i save pilim nogut na kotim yumi? Long wanem, maski yumi save o nogat, yumi olgeta i gat maus bilong bel na yumi inap pilim pasin i no stret, olsem pilim rong o sin. Maski man i save long tok bilong Baibel long sin o nogat, yumi olgeta i gat sin long skin bilong yumi. Wanpela man i save gut long dispela samting em i tok: “Yumi olgeta man yumi bin mekim sin.”—Rom 3:23.
Sin Inap Tekewe?
Planti man long nau, na planti man moa long ol misin i gat nem Kristen, ol i wok long daunim maus bilong bel, na bai ol i no pilim moa sin o rong ol i mekim. Wanpela dokta (Karl Menninger, long buk Whatever Became of Sin?) em i tok, ‘Liklik taim na bai yumi no harim moa dispela tok sin.’ Tasol taim man i go lapun, maski em i no laik kolim dispela tok “lapun,” dispela i no inap pinisim lapun bilong em. Na olsem tasol, maski ol man i no laik kolim dispela tok “sin,” dispela i no inap pinisim sin. Tru tumas yumi olgeta i gat sin i stap long skin bilong yumi na i mas i gat man bilong kisim bek yumi long dispela samting i bagarapim yumi. Tasol husat inap mekim?
Aposel Kristen Pol tu i gat dispela askim. Em i tokaut olsem em i no laik mekim sin, tasol em i save mekim, na bihain em i kamapim askim olsem: “O sori, dispela hevi i bagarapim tru tingting bilong mi! Husat bai i helpim mi na mi lusim dispela bodi bilong i dai?” Pol i bekim tok olsem: “Mi tenkyu long God! Long han bilong Jisas Krais, Bikpela bilong yumi, em bai i helpim mi.” Olsem wanem Jisas inap helpim em? Long wanem, Jisas i givim laip bilong em olsem pe bilong baim bek olgeta man, na long dispela rot God bai tekewe sin bilong ol man.—Rom 7:14-25.
I gat inap olsem 3,500,000,000 manmeri long graun ol i no Kristen (ol i bikpela lain tru, winim inap tupela taim ol manmeri i gat nem Kristen), na planti bilong ol i hatwok long save, olsem wanem wanpela man tasol inap baim bek olgeta man. Olsem: Wanpela Muslim i stap long Japan em i stadi na lainim tok bilong Baibel inap liklik hap taim, tasol em i no inap bilipim dispela tok bilong pe bilong baim bek olgeta man na em i no stadi moa. Long tingting bilong planti man long hap bilong Is, dispela tok i narapela kain.
Tasol sampela man i gat nem Kristen, ol tu i hatwok long kisim gut dispela tok. Wanpela buk bilong ol Katolik (New Catholic Encyclopedia) i tok: ‘Ol tisa bilong lotu i no bin kamapim gut tok long pe bilong baim bek ol man, na ol i hatwok yet long mekim.’
Planti man i longlong long dispela tok, na dispela samting i kamap klia long tok bilong wanpela man bilong raitim ol tok bilong lotu, nem bilong em N. H. Barbour. Em i tok: ‘Sapos wanpela man i sutim lang long nil na givim pen long en na kilim i dai, long ai bilong wanpela papa long graun, dispela i no inap stretim rong pikinini bilong em i bin mekim. Na olsem tasol i dai bilong Krais i no inap bekim strafe man i mas kisim long ol rong bilong em.’ Na wanpela man i wok wantaim Barbour long dispela taim bipo, em Charles T. Russell, em i save em i mas kirap kwik na helpim tok bilong pe bilong baim bek ol man. Olsem na em i no wok moa wantaim Barbour, na long yia 1879 em i kamapim wanpela nupela nius bihain ol i kolim Wastaua, em dispela nius nau yu kaunim. Long taim ol i kirap long wokim dispela nius na i kam inap long nau, dispela nius i bin helpim dispela tok long ofa bilong Krais Jisas i bin baim bek ol man.
Tasol yu ting ol man i no bin lain long lotu “Kristen” ol inap bilipim dispela tok? Bilong helpim yumi long save, nau yumi ken skelim gut dispela tok olsem wanpela man i bin dai bilong baim bek olgeta man.