Ripot Long Wok Bilong Kingdom

Ol i Stap Olsem Lait Long India

INAP 11,524 Witnes i autim gutpela tok bilong Kingdom long India. (Matyu 24:14) Long yia bilong wok bilong 1991, inap 1,066 i kisim baptais na ol i amamas long stap olsem lait na autim tok bilong Kingdom. Ol i amamas tru, long wanem inap olsem 28,866 i bin i kam long Memorial bilong tingim i dai bilong Jisas!

◻ Planti i kisim save long Kingdom taim wanpela Witnes i bin autim tok long ol long kain kain taim na ples. Olsem: Wanpela Witnes i autim tok long ol wanwok bilong em, na wanpela wanwok i amamas long dispela tok na bihain em i kamap olsem lait na autim tok long famili na ol pren bilong em. Ol tu i amamas long tokim ol narapela man long gutpela tok bilong Kingdom. Ripot i tok, insait long sampela yia tasol, ‘inap 30 manmeri i kam insait long tok i tru.’ Jehova i blesim dispela namba wan Witnes na em i blesim tu ol nupela brata spirit bilong em, long wanem ol i stap olsem lait.

◻ Wanpela yangpela brata i stap long narapela kongrigesen, em i stap olsem lait taim em i autim tok long ol wanskul bilong em. Sampela i laik tru long harim tok bilong Kingdom, olsem na planti taim em i stori wantaim ol i go inap biknait. Wanpela wanskul i bilong Misin Katolik, na pasto i tok samting nogut bai painim em sapos em i poromanim yet ol Witnes. Tasol em i bilip tru olsem ol tok ol Witnes i lainim em long en em ol tok i tru bilong Baibel, olsem na em i wok yet long stadi. Bihain em i kisim baptais na nau em i mekim wok olsem wanpela wokman bilong kongrigesen. Em i amamas, long wanem em i bin kisim save long tok i tru na nau em inap wetim ol gutpela samting bai kamap bihain!​—⁠Rom 12:⁠12.

◻ Narapela wanskul i no bilip long God, na em i save tok bilas long ol man i tok ol i bilip long God. Tasol wanpela taim em i bung wantaim Witnes wanskul na ol narapela wanskul, na em i kamapim planti askim. Em i kirap nogut taim dispela Witnes i bekim gut ol askim bilong em, na em i bilip olsem Baibel em i Tok bilong God. Em i wok long kisim save, na bihain em i kisim baptais. Papa bilong em i birua long em, na bihain papa i rausim em long haus. Tasol dispela yangpela man i stap gut long tok tru, na em i amamas tru long lukim tupela brata wanblut wantaim tupela wantok bilong em ol i kam insait long tok i tru na kisim baptais. Nau wanpela brata bilong em i wok long brens-ofis long India.

◻ Narapela wanskul i kam bung taim dispela yangpela Witnes i autim tok. Em i save smok olgeta taim na em i save dring planti. Long wanpela taim em i tingting long paitim tupela wanskul bilong em, long wanem yangpela Witnes i bin helpim tupela long kisim save long tok i tru, olsem na tupela i no laik straik, na tupela i no laik givim blut. Tasol nau dispela yangpela man em i kamap wanpela Witnes Bilong Jehova na em i amamas long i stap olsem lait.

◻ Dispela sumatin yumi stori long em long pastaim em i stap olsem lait, olsem na em i bin helpim 15 wanskul bilong em na ol i dediket na kisim baptais.

Yumi amamas tru long save olsem planti man long dispela bikpela kantri ol i bilip long tok bilong Baibel, na ol i wok wantaim bikpela lain brata long olgeta hap bilong graun, em Jehova i bungim ol bilong kisim laip oltaim aninit long Kingdom bilong em.