Mi Lusim Pasin Antap na Mi Kisim Amamas
LONG 1970, mi gat 23 krismas na mi laik tru long kisim biknem. Mi wok mani long wanpela klap bilong ol man i gat ka, long Ivren, Itali, na mi kamap nambawan kuskus. Mi gat strongpela tingting long kisim biknem. Tasol mi no amamas—mi stap bel hevi. Bilong wanem?
Long wanem, man bilong mi i lusim bikpela hap taim long pilai kas wantaim ol wantok bilong em long ol ba, na mi wanpela i gat bikpela wok long lukautim famili. Sindaun bilong mitupela i wok long go nogut. Mitupela i kros na tok pait long ol liklik liklik samting. Dispela i mekim na mi gat planti tingting kranki.
Mi save tingting olsem: ‘No gat wanpela man i tingim mi.’ ‘Ol man i laikim mi, long wanem, mi holim bikpela wok.’ Na mi save tingting: ‘God i no stap, long wanem, sapos em i stap bai em i no larim pen na pasin nogut i stap. I stap bilong man i no gat as tru bilong en—dai tasol i wetim em.’ Mi no save bilong wanem i olsem.
Senis i Wok Long Kamap
Long 1977, tupela Witnes Bilong Jehova i kam long haus bilong mipela. Man bilong mi, nem bilong em Sankalo (Giancarlo), i singautim tupela i kam insait na ol i toktok. Sankalo i bilip long tok bilong evolusen, olsem olgeta samting i kamap nating tasol, na em i gat tingting long kirapim tupela long bilipim dispela tok. Tasol tupela ya i senisim tingting bilong em!
I no longtaim na Sankalo i kirap senisim tu pasin bilong em. Em i no kros kwik olsem bipo; em i wok long lusim bikpela hap taim liklik long helpim mitupela pikinini meri. Em i wok long tokim mi long ol samting em i lainim, tasol mi save tok kros na pinisim toktok.
Tasol wanpela taim ol Witnes i kam na mi putim gut yau long tok bilong ol. Ol i toktok long pasin nogut bilong nau bai pinis, na long Kingdom bilong God, na graun bai kamap paradais, na ol man i dai pinis ol bai kirap bek. Mi kirap nogut! Inap 3-pela nait mi no slip! Mi laik kisim sampela save moa, tasol mi gat pasin antap na dispela i pasim mi long kamapim ol askim long man bilong mi. Bihain em i tok strong olsem: “Orait, nau yu mas putim gut yau. Mi save pinis long bekim bilong olgeta askim bilong yu.” Na nau em i kamapim ol tok i tru bilong Baibel.
Sankalo i tokim mi, nem bilong Man bilong wokim olgeta samting em Jehova, na em i Man bilong pasin sori, na Em i givim Pikinini bilong Em olsem ofa bilong baim bek yumi na bai yumi inap i stap oltaim, na taim God i bagarapim pinis ol man nogut long Armagedon, bai Krais Jisas i bosim graun inap 1,000 yia na em bai kirapim bek ol man i dai pinis. Sankalo i tokim mi, ol man i kirap bek, tingting na skin bilong ol bai wok long kamap gutpela olgeta na bai ol inap i stap oltaim long Paradais long graun.
De bihain, mi go wantaim man bilong mi long Haus Kingdom. Bihain mi tokim em: “Ol manmeri ya, narapela i laikim tru narapela. Mi laik kam olgeta taim, long wanem, dispela lain i stap amamas tru.” Mi kirap long go long olgeta miting, na wanpela Witnes i lainim mi long tok bilong Baibel. Mi tingim gut ol samting mi lainim, na i no longtaim na mi bilip olsem mi painim pinis ol lain i lotu tru long God. Long 1979, mitupela man bilong mi i kisim baptais bilong makim olsem mitupela i dediket pinis long Jehova.
Mekim Wok Bilong God Long Olgeta De
Bihain, long wanpela kibung sekit, mi harim wanpela tok i kirapim ol man long mekim wok autim tok long olgeta de. Dispela i kirapim mi long mekim dispela wok, na mi beten tokim Jehova long dispela samting. Tasol sori tru! Mi kisim bel, na dispela i pasim mi long mekim dispela wok. Insait long 4-pela yia mipela i kisim 3-pela pikinini. Bikpela sik i kisim tupela na ol i laik i dai, tasol tupela i orait bek na mi amamas tru long dispela.
Orait nau mi pilim olsem mi inap autim tok long olgeta de. Mi lusim wok mani bambai mi inap mekim gut wok bilong lukautim famili. Man bilong mi em wanpela tasol nau i wok mani, olsem na mipela i skelim gut mani na bai em inap long ol samting mipela i mas kisim—no ken lusim nating mani olsem bipo. Tasol Jehova i mekim gut long mipela—no gat wanpela taim mipela i sot long kaikai samting.
Long 1984, pikinini meri bilong mi, em i gat 15 krismas na nau tasol em i baptais, em i kirap mekim wok autim tok long olgeta de. Long dispela taim man bilong mi i kisim wok elda. Na olsem wanem long mi? Mi pilim olsem mi no inap yet long mekim wok painia, olsem na mi tingting long lusim 30 aua long olgeta mun long mekim wok autim tok. Mi winim dispela mak mi bin putim, na mi tokim mi yet olsem: ‘Yu mekim gutpela wok tru! Yu bin wok strong.’
Tasol mi hambak gen. (Sindaun 16:18) Mi ting mi mekim gutpela wok na mi no ken wok long kamap strong moa long ol samting bilong spirit. Olsem na mi no stap strong moa long ol samting bilong spirit, na ol gutpela pasin mi kisim pinis i wok long lus. Orait, bihain mi kisim sampela gutpela tingting mi sot tru long en na dispela i stretim mi.
Long 1985, tupela wasman bilong raun wantaim meri bilong ol i kam lukim kongrigesen na ol i slip long haus bilong mipela. Mi lukim gutpela pasin bilong ol, ol i daunim ol yet na redi long lusim taim na strong bilong ol yet bilong helpim ol narapela, na dispela i kirapim mi long tingim gut ol samting mi mekim. Mi wok long painim save long tok bilong pasin daun long ol buk Sosaiti Was Taua i bin wokim. Mi tingim bikpela pasin daun bilong Jehova i kamap klia long ol samting em i bin mekim bilong helpim yumi ol sinman. (Buk Song 18:35) Mi save mi mas senisim tingting bilong mi.
Mi beten askim Jehova long helpim mi long kisim pasin daun bambai mi inap mekim wok bilong em long pasin em i laikim, na soim rot long mi bambai ol samting mi mekim i ken litimapim nem bilong em. Mi wokim pepa bilong mekim wok painia, na mi kirap mekim dispela wok long Mas 1989.
Nau mi stap amamas tru; mi lusim pasin antap na dispela i bin helpim mi long i stap amamas. Mi painim pinis as tru bilong i stap bilong mi—mi mas helpim ol man long save olsem God tru, em Jehova, em i no stap longwe long ol man i wok long painim em.—Em stori bilong Vera Brandolini.
[Piksa bilong Vera Brandolini long pes 26]