Mekim Kain Kain Tok Ples—Em Wanpela Wok Bilong Lotu Kristen Tru, o Nogat?
BIL i stori long taim em wantaim 6-pela man moa i stap insait long haus lotu na wanpela man i sanap klostu long alta na em i autim tok bilong lotu. Bil i tok, ‘Mi harim em i mekim beten long kain kain tok ples, na mi pilim olsem i gat wanpela kain strong i stap insait long haus lotu.’ Olsem wanem? Dispela samting i bin painim Bil i wankain olsem samting em spirit holi i bin mekim long ol Kristen long taim bilong ol aposel? Em i mak bilong lotu tru bilong Baibel? Sapos yumi skelim gut ol tok bilong Baibel long dispela samting, bai yumi inap painim bekim stret bilong ol dispela askim.
Ol stori bilong Baibel i kamapim klia olsem: Taim spirit holi i kamapim wanpela strongpela wok, olsem autim tok long kain kain tok ples, i gat wanpela bilong ol 12-pela aposel o aposel Pol i stap. I gat 3-pela stori long Baibel long ol i bin mekim kain kain tok ples, na namba wan stori em long taim 120 disaipel i bung long Jerusalem long Pentikos bilong yia 33. (Aposel 2:1-4) Inap 3-pela yia hap bihain wanpela liklik lain Itali ol i harim Pita i autim tok, na ol i kisim spirit holi na ol i kirap “mekim tok long ol kain kain tok ples na i litimapim nem bilong God.” (Aposel 10:44-48) Na 19 yia bihain long Pentikos, olsem long yia 52, Pol i autim tok long wanpela lain long Efesus na em i putim han antap long 12-pela disaipel. Orait, nau ol tu i kirap “mekim tok long ol kain kain tok ples, na ol i autim tok olsem profet.”—Aposel 19:6.
Bilong Wanem Ol i Kisim Dispela Strong?
Taim Jisas i laik i go bek long heven, em i tokim ol disaipel bilong em: “Bihain Holi Spirit bai i kam i stap long yupela, na yupela bai i kisim strong. Na yupela bai i autim tok bilong mi long Jerusalem, . . . na i go inap long olgeta hap bilong graun.” (Aposel 1:8) Em nau, Jisas i kamapim klia olsem spirit holi yet bai helpim ol long mekim dispela bikpela wok bilong autim tok.
Long nau yumi gat ol telefon samting bilong salim tok i go long olgeta hap long planti kain tok ples, tasol bipo ol i no gat dispela samting. Ol i mas autim tok long maus, na dispela strong ol i kisim long mekim tok long kain kain tok ples, em bai helpim ol long mekim dispela bikpela wok. Na dispela samting i kamap long Pentikos bilong yia 33, taim ol Kristen i autim tok long ol Juda na ol narapela lain i bin kam insait long lotu Juda. Ol lain bilong Partia, Midia, Elam, Krit, Arebia, Mesopotemia, Judia, Kapadosia, Pontus, Esia, na sampela lain bilong Rom, ol i harim ol disaipel i autim tok bilong “ol strongpela wok bilong God” long tok ples bilong ol dispela lain yet, na ol i kisim gut long ol dispela tok ol i autim. Kwiktaim 3 tausen i kamap bilipman.—Aposel 2:5-11, 41.
Dispela wok bilong mekim kain kain tok ples em i wanpela tasol bilong ol nainpela strongpela wok bilong spirit em Pol i kolim long pas em i raitim long ol Kristen long Korin. Tru, Pol i ting olsem dispela wok olsem “presen” i nambatu tasol long ol narapela strongpela wok, tasol em i bikpela samting bilong helpim lain Kristen bilong pastaim long autim gutpela tok bilong Kingdom long planti lain. Em wanpela wok i bin helpim planti manmeri long kam insait long dispela nupela lain Kristen na strongim ol.—1 Korin 12:7-11; 14:24-26.
Dispela wok bilong mekim kain kain tok ples na ol narapela strongpela wok bilong spirit holi i bin kamap long taim bilong ol aposel, ol i olsem mak bilong kamapim klia olsem God i lusim pinis olpela lain Israel em ol i bin i stap lain bilong em yet inap 1,500 yia. Nau em i kisim nupela lain o kongrigesen Kristen, em Pikinini bilong em i bin kamapim.—Lukim Hibru 2:2-4.
Ol dispela “presen” o strongpela wok bilong spirit ol i nambawan samting bilong helpim nupela lain Kristen long kamap strong. Pol i tokaut klia olsem taim ol dispela “presen” i mekim pinis wok bilong ol, ol bai pinis. Em i tok: “Wok bilong autim tok bilong God olsem profet, em bai i pinis. Na ol kain kain tok ples bai i pinis.”—1 Korin 13:8.
Tasol wanem taim dispela wok bilong mekim kain kain tok ples bai i pinis? Aposel 8:18 i tok, ol i bin kisim ol dispela “presen” o strong long spirit holi taim ol “aposel i putim han antap long ol.” Orait, taim olgeta aposel i dai pinis, ol man i no inap kisim moa ol dispela “presen” na dispela strong bilong mekim tok long kain kain tok ples. Olsem na ol man i bin kisim dispela strong long ol aposel, taim ol tu i dai pinis, ol dispela “presen” o strongpela wok bai pinis. Long dispela taim, lain Kristen i kamap strong pinis na ol kongrigesen Kristen i kamap pinis long planti kantri.
‘Ol Tok Ples Yumi No Save Long En’
Sampela man i tok, ol man bilong mekim tok long kain kain tok ples long nau, ol i mekim olsem bilong pulim ai bilong ol man; tasol sampela i tok, em i wankain strongpela wok olsem ol i bin mekim long taim bilong ol aposel. Long ol haus lotu bilong nau, taim ol i mekim ‘ol tok ples yumi no save long en,’ bel bilong ol i kirap na ol i mekim narapela kain tok i no inap wanpela man i ken save long en. Olsem na wanpela man i tokaut olsem: “Taim mi mekim tok long kain kain tok ples, planti taim mi save mekim long rum bilong mi yet, bambai mi ken tingim ol dispela tok. . . . Mi save sem long mekim long ai bilong ol man.” Narapela man i tok: “Mi no save long ol dispela tok mi mekim. Tasol oltaim mi pilim olsem wanpela samting i subim maus bilong mi long toktok.”
Taim ol i mekim ol dispela kain tok ples em ol man i no save long en, dispela inap givim wanem gutpela save long ol? Na olsem wanem long insait bilong en? Ol man bilong tanim ol dispela tok, ol i save kamapim narapela narapela insait bilong wanpela tok—tok bilong ol i no wankain. Orait, bilong wanem tok bilong ol i no wankain? Ol i laik haitim dispela samting na ol i tok, ‘God i givim save long ol na narapela i kamapim narapela insait bilong dispela tok, na narapela i kamapim narapela insait bilong en.’ Wanpela i tok, ‘Mi lukim olsem sampela taim insait bilong tok ol i mekim i no stret.’ Wanpela buk i stori long wanpela man i no laik tanim tok wanpela meri i mekim long tok ples ol man i no save long en, long wanem, man i tok, dispela tok em i tok doti nogut tru. Em i narapela kain tru long ol dispela kain kain tok ples ol Kristen i bin mekim long taim bilong ol aposel—ol i bin mekim bilong strongim kongrigesen!—1 Korin 14:4-6, 12, 18.
Tru sampela long nau ol i tok, insait bilong sampela tok ol i bin harim i gutpela tru, na ol i bilip olsem God i mekim wok long dispela rot taim em i “laik givim stret wanpela tok long ol man.” Tasol Jisas wantaim ol aposel i givim pinis ol tok bilong God long yumi—i gat wanem ol narapela tok yumi mas kisim? Nogat, a? Pol i bin kisim spirit holi, tasol em i bin tok: “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru bilong skulim yumi long tok tru na bilong . . . stretim wokabaut bilong yumi na bilong skulim yumi long ol pasin i stret long ai bilong God.”—2 Timoti 3:16, 17.
Long nau lain Kristen i no nupela lain, olsem na i no gat wok moa long ol strongpela wok bilong spirit na bai ol man i ken luksave long dispela lain. Baibel i toksave olsem: “Sapos mipela yet i autim gutnius long yupela o sapos wanpela ensel bilong heven i autim, na sapos dispela gutnius i no wankain olsem dispela gutnius bipo mipela i bin autim long yupela, orait man i mekim dispela pasin, em i ken lus.”—Galesia 1:8.
Dispela mirakel bilong mekim kain kain tok ples, i no gat wok moa bilong en, na Baibel i no tok em i wanpela wok bilong lotu Kristen long nau. Yumi gat Baibel olgeta na ol i wokim long planti tok ples, olsem na olgeta tok bilong God yumi mas kisim, em yumi holim pinis. Long Baibel yumi inap kisim stretpela save long Jehova na Pikinini bilong em, em dispela save i helpim man long kisim laip i stap oltaim.—Jon 17:3; Kamapim Tok Hait 22:18, 19.
Long taim bilong ol aposel tu, aposel Pol i mas raitim pas long kongrigesen Korin bilong stretim tingting bilong ol long dispela “presen” God i givim long ol Kristen bilong pastaim long mekim kain kain tok ples. Ating sampela i bin kirap nogut long dispela strongpela wok na ol i mekim olsem ol liklik pikinini, na ol i ting em i bikpela samting tru. (1 Korin 14:1-39) Pol i tok strong olsem i no olgeta Kristen long dispela taim bipo ol i bin mekim kain kain tok ples. Em i no wanpela samting ol i mas mekim bilong kisim laip oltaim. Dispela wok i bin i stap nambatu long wok bilong autim tok olsem profet. Tru tumas, mekim tok long kain kain tok ples i no wanpela wok ol Kristen tru i mas mekim bilong kisim laip i stap oltaim.—1 Korin 12:29, 30; 14:4, 5.
Samting i Kirapim Ol Long Mekim Long Nau
Sampela i bilip olsem ol bikman bilong lotu yet i save kirapim lain bilong ol long kisim save long mekim kain kain tok ples. Sampela taim, ol man em bel bilong ol i save kirap nating na ol i no gat strongpela tingting, ol dispela kain man i save mekim kain kain tok ples long lotu. Wanpela buk (Tongues of the Spirit, bilong Cyril G. Williams) i tok, ‘long planti lotu em i kamap olsem wanpela mak bilong man i gat nem insait long dispela lain.’ Olsem na ating samting i kirapim ol long mekim, em ol i laik insait long wanpela lain i gat biknem long mekim kain kain tok ples ol man i no save long en.
Na presiden bilong Yunivesiti Loyola, em Donald P. Merrifield, em i tok, ‘ating bel bilong ol i kirap nating na tingting bilong ol i olsem i paul, na dispela i kirapim ol long mekim tok long kain kain tok ples, na sampela i tok, samting i kirapim ol long mekim, em strong bilong ol spirit nogut.’ Wanpela pasto, em Todd H. Fast, em i tok, “Ol man i gat narapela narapela tingting long dispela wok bilong mekim kain kain tok ples. Satan i gat planti rot bilong paulim yumi.” Baibel yet i toksave long yumi olsem Satan wantaim ol spirit nogut ol inap stiaim ol man na bosim maus o toktok bilong ol. (Aposel 16:17, 18) Jisas i bin rausim wanpela spirit nogut i bin kirapim wanpela man long singaut strong na pundaun long graun. (Luk 4:33-35) Na Pol i toksave olsem ‘Satan yet bai senisim pasin bilong em na kamap olsem ensel bilong lait.’ (2 Korin 11:14) Olsem na sapos long nau ol man i laik painim strong bilong mekim kain kain tok ples em God i no save givim moa long lain bilong em, ol i givim rot long Satan long giamanim ol. Baibel i toksave long yumi olsem: “Satan em bai i mekim olgeta kain strongpela wok na ol kain kain giaman mirakel.”—2 Tesalonaika 2:9, 10.
Kain Kain Tok Ples—Na Lotu Kristen Tru
Long taim bilong ol aposel, ol Kristen i bin kisim “presen” bilong spirit holi long mekim kain kain tok ples, ol i mekim wok long en bilong tokim ol man long ol gutpela wok bilong God. Na em i bikpela samting long ol i mas tanim stret ol dispela tok na bai olgeta i ken kisim gut. (1 Korin 14:26-33) Pol i tokim ol: “Sapos yupela i mekim tok long narapela tok ples ol man i no save long en, olsem wanem bai ol i save as bilong dispela tok? Tok bilong yupela bai i lus nating.”—1 Korin 14:9.
Tru, spirit bilong God i bin strongim ol Kristen bilong pastaim long mekim kain kain tok ples, tasol ol i no mekim ol toktok nabaut i no gat wanpela man inap save long en o tanim dispela tok. Spirit holi i bin kamapim ol tok i helpim ol Kristen long bringim gutnius i go hariap “long olgeta manmeri i stap long graun.”—Kolosi 1:23.
Krais Jisas i bin tokim lain bilong em long wanpela wok ol i mas mekim nau long taim bilong las de, olsem: “Olgeta lain man i mas harim man i autim gutnius [bilong Kingdom] pastaim.” (Mak 13:10) Olsem long taim bilong ol aposel, long nau tu olgeta man bilong graun i mas harim tok bilong Kingdom. Ol man inap mekim olsem, long wanem, nau ol i bin tanim Baibel olgeta o sampela hap bilong en i go long klostu 2,000 tok ples. Dispela spirit bilong God i bin kirapim ol Kristen bilong pastaim na ol i strong long autim tok, em dispela spirit yet i helpim dispela bikpela wok bilong autim tok em ol Witnes Bilong Jehova i mekim long nau. Long maus na long ol masin bilong wokim ol buk na nius i kamapim tok i tru bilong Baibel, ol i save mekim ‘gutpela tok ples.’ Dispela tok i go long planti kantri na ailan, winim 200. Samting i kamap ples klia i olsem: Spirit bilong God i kirapim ol Witnes Bilong Jehova tasol long tokaut long ol man long ol gutpela strongpela wok bilong God.—Sefanaia 3:9, NW; 2 Timoti 1:13.
[Ol Piksa long pes 7]
Ol i go long ol haus na autim tok long Japan
Ol i go long ol sip na autim tok long Kolambia
Daunbilo: Ol i mekim Baibel-stadi long Gwatemala
Daunbilo tru: Ol i autim tok long hap bilong bus long Netelan