Mekim Kain Kain Tokples Yu Ting God i As Bilong En?
DEVON i tok: “Mi no kliagut long dispela samting. Long olgeta wik long haus lotu bilong mi, i luk olsem planti manmeri i save kisim holi spirit na mekim kain kain tokples. Sampela bilong ol dispela manmeri i save insait long ol pasin pamuk samting. Mi save bihainim stretpela pasin, tasol maski mi beten planti taim, mi no save kisim dispela presen bilong holi spirit. Bilong wanem i olsem?”
Gabriel tu i save go long haus lotu we i luk olsem ol manmeri i save kisim holi spirit na mekim kain kain tokples. Em i tok: “Samting i bagarapim bel bilong mi em taim mi wok long beten ol narapela i distebim mi. Ol i bikmaus na kolim strong ol tok em ol yet na mi tu i no kliagut long en. Ol dispela tok i no save helpim wanpela man. Mi ting wanpela presen bilong holi spirit bilong God i mas kamapim gutpela wok.”
Ol samting i painim Devon na Gabriel i kamapim wanpela bikpela askim: Olsem wanem? God i as bilong pasin bilong mekim kain kain tokples em planti lotu long nau i save mekim? Bilong bekim dispela askim, i gutpela long skelim dispela presen long taim bilong ol Kristen bilong pastaim.
“Ol i Stat Long Mekim Tok Long Ol Kain Kain Tok Ples”
Long Baibel yumi ritim stori bilong sampela man na meri husat i bin kisim strong long mekim ol tokples em ol i no bin lain long en. Namba wan taim dispela samting i kamap em long de Pentikos 33 C.E., em sampela wik bihain long indai bilong Jisas Krais. Long dispela de long Jerusalem, inap olsem 120 disaipel bilong Jisas ol i bung na “Holi Spirit i pulap long olgeta dispela manmeri, na ol i stat long mekim tok long ol kain kain tok ples.” Ol manmeri i kam long ol narapela kantri “ol i kirap nogut, long wanem, ol wan wan man na meri i harim ol i toktok long tok ples bilong em stret.”—Aposel 1:15; 2:1-6.
Baibel i stori long sampela narapela disaipel bilong Jisas husat i gat dispela presen bilong mekim ol narapela tokples. Olsem, holi spirit i givim strong long aposel Pol na em inap mekim tok long kain kain tokples. (Aposel 19:6; 1 Korin 12:10, 28; 14:18) Tasol olgeta kain presen olsem i kam long holi spirit bilong God i mas i gat gutpela wok bilong en, a? Olsem na pasin bilong mekim kain kain tokples long taim bilong ol man i bin raitim Baibel i mekim wanem gutpela wok?
Mak i Soim Olsem God i Orait Long Ol
Taim Pol i raitim pas long ol Kristen long Korin, sampela bilong ol i bin mekim ol kain kain tokples, na Pol i tok dispela “pasin bilong mekim tok long narapela tok ples, em i mak . . . long ol man i no bilip.” (1 Korin 14:22) Olsem na strong bilong mekim kain kain tokples na ol narapela pasin bilong wokim ol mirakel, em i mak long ol man i no bilip olsem God i orait long dispela nupela kongrigesen Kristen. Ol presen bilong wokim mirakel, ol i olsem sainbot na i soim rot long ol man i laik kisim save long tok i tru long ol i mas i go we bilong painim ol manmeri God i makim.
Baibel i no stori olsem Jisas o ol profet i bin stap paslain long taim bilong ol Kristen, ol i bin mekim tok long wanpela tokples ol i no bin lain long en bipo, nogat. Olsem na presen em ol disaipel bilong Jisas i kisim bilong mekim kain kain tokples i gat sampela narapela wok bilong en tu.
Wanpela Rot Bilong Autim Gutnius
Long kirap bilong wok autim tok bilong Jisas, em i tokim ol disaipel bilong em long autim gutnius bilong Kingdom Bilong God long ol Juda tasol. (Matyu 10:6; 15:24) Olsem na ol disaipel i no save go tumas long ol ples we ol manmeri bilong ol narapela lain i sindaun long en. Tasol i no longtaim na dispela bai senis.
Liklik taim bihain long indai bilong Jisas long 33 C.E., taim Jisas i kirap bek pinis em i tokim ol disaipel bilong em long “mekim olgeta lain manmeri i kamap disaipel.” Na tu, em i tokim ol disaipel bilong em olsem ol bai autim tok bilong em “i go inap long olgeta hap bilong graun.” (Matyu 28:19; Aposel 1:8) Bilong autim tok long olgeta hap ol i mas autim tok long planti tokples, na i no long tok Hibru tasol.
Tasol planti bilong ol disaipel bilong pastaim ol i ‘no bin skul, ol i man nating tasol.’ (Aposel 4:13) Olsem na olsem wanem ol inap autim tok long ol longwe kantri we ol manmeri i save mekim ol narapela tokples, em ol tokples ol i no bin harim bipo na ol i no bin lainim? Holi spirit i bin givim strong long sampela bilong ol dispela man long autim gut tok long ol kain kain tokples em ol i no bin lainim bipo.
Olsem na dispela presen long autim tok long kain kain tokples i mekim tupela bikpela wok. Namba wan, em i kamapim long ples klia olsem God i orait long ol. Namba tu, em i olsem gutpela tul bilong helpim ol Kristen bilong pastaim long inapim wok bilong ol long autim tok long ol manmeri bilong planti tokples. Olsem wanem? Pasin bilong mekim kain kain tokples long ol lotu long nau i save inapim dispela tupela wok?
Mekim Kain Kain Tokples Long Nau—Em Mak Olsem God i Orait Long Ol?
Yu bai putim we wanpela sainbot bilong helpim planti manmeri long komiuniti bilong yu? Bai yu putim insait long wanpela liklik haus? Nogat, a? Stori bilong ol samting i kamap long de Pentikos i kamapim olsem “planti manmeri” i lukim dispela mak olsem ol disaipel i mekim tok long kain kain tokples. Dispela i mekim na “3,000 manmeri i kam insait” long kongrigesen Kristen long dispela de! (Aposel 2:5, 6, 41) Sapos ol manmeri long nau i tok ol i mekim kain kain tokples, tasol ol i mekim olsem insait long haus lotu tasol, orait olsem wanem dispela pasin inap i stap olsem wanpela mak bilong helpim planti manmeri husat i no bilip?
Baibel i tok long pasin pamuk na ol “pasin bilong olpela bel” olsem ol i birua long wok bilong holi spirit, na i tok moa olsem “olgeta man i mekim ol dispela kain pasin, ol bai i no inap i go insait long kingdom bilong God.” (Galesia 5:17-21) Sapos yu lukim ol man i mekim kain kain pasin i no stret na ol i mekim kain kain tokples, ating i stret yu kisim tingting olsem, ‘I no stret na em inap paulim man sapos holi spirit bilong God i stap long ol manmeri husat i save mekim ol pasin em Tok Bilong God i no orait liklik long en?’ Dispela i olsem pasin bilong putim sainbot long rot we i stiaim ol man i go long rot i no stret.
Mekim Kain Kain Tokples Long Nau—Em i Rot Bilong Autim Tok?
Olsem wanem long narapela wok long pasin bilong mekim kain kain tokples long taim bilong ol aposel? Pasin bilong mekim kain kain tokples insait long ol lotu long nau, yu ting em i rot bilong autim gutnius long ol manmeri bilong kain kain tokples? Tingim, ol manmeri husat i bin stap long Jerusalem long de Pentikos long 33 C.E., ol i kam long planti kantri, na ol i kliagut long ol tok ol disaipel i mekim long kain kain tokples. Tasol long nau, ol man bilong mekim kain kain tokples, ol i save mekim ol tok em ol man i no kliagut long en.
Tru tumas, pasin bilong mekim kain kain tokples long nau i narapela kain olgeta long presen em holi spirit i bin givim long ol disaipel bilong Jisas long pastaim. Yumi save, bihain long indai bilong ol aposel na i kam inap long nau, i no gat wanpela stori long ol man i bin kisim strong bilong mekim kain kain tokples. Ol man bilong ritim Baibel i no kirap nogut long dispela. Aposel Pol i tok long ol presen bilong holi spirit, em pasin bilong mekim kain kain tokples i insait long en, olsem ol “bai i pinis.” (1 Korin 13:8) Sapos olsem, orait olsem wanem yumi ken save long husat i kisim holi spirit long nau?
Husat i Gat Mak Bilong Holi Spirit?
Jisas i save olsem dispela pasin bilong mekim kain kain tokples bai pinis bihain liklik long taim kongrigesen Kristen i kamap nupela. Paslain liklik long em i dai, Jisas i givim wanpela mak i kamapim klia husat i disaipel tru bilong em, na dispela mak bai i stap oltaim. Em i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Long wankain ves we Baibel i bin tok profet long ol presen bilong holi spirit bai pinis, Baibel i tok: “Pasin laikim i no inap pinis.”—1 Korin 13:8, NW.
Pasin laikim em i namba wan pasin Baibel i kolim long lista bilong “ol gutpela pasin” em holi spirit bilong God i save kamapim. (Galesia 5:22, 23) Olsem na ol manmeri husat i kisim tru holi spirit bilong God—na God i orait long ol—ol i gat pasin bilong laikim tru narapela narapela. Namba tri pasin holi spirit i save kamapim em bel isi. Olsem na ol manmeri husat i kisim holi spirit long nau, ol bai wok strong long stap bel isi, ol bai i no ting olsem tingting bilong ol yet tasol i stret na sakim tingting bilong ol narapela, ol i no bel nogut long ol man bilong narapela skin, na ol bai no pait na bagarapim man.
Na tu, tingim tok profet bilong Jisas i stap long Aposel 1:8. Em i tok profet olsem ol disaipel bilong em bai kisim strong bilong autim tok bilong em “i go inap long olgeta hap bilong graun.” Em i tok tu olsem ol bai mekim yet dispela wok “i go inap long dispela taim i pinis.” (Matyu 28:20) Olsem na dispela wok bilong autim tok long olgeta hap bilong graun, em i stap yet olsem wanpela mak long ol man i kisim holi spirit.
Wanem tingting bilong yu? Long nau wanem lain i gat mak bilong holi spirit? Husat i save kamapim ol pasin bilong holi spirit olsem pasin laikim na bel isi inap long mak we ol i kisim ol hevi long han bilong gavman, long wanem, ol i no laik insait long pait? (Aisaia 2:4) Husat i save sakim ol pasin bilong olpela bel olsem pasin pamuk, na i save rausim tu ol man i mekim kain pasin olsem insait long kongrigesen? (1 Korin 5:11-13) Husat i save autim tok long olgeta hap bilong graun olsem Kingdom Bilong God tasol inap kamapim gutpela samting long ol man?—Matyu 24:14.
Ol man i kamapim ol tok bilong dispela nius i no pret long tokaut olsem ol Witnes Bilong Jehova tasol i gat mak bilong holi spirit olsem Baibel i kolim. I gutpela yu kisim save long ol na bai yu yet i ken skelim olsem tru tru God i orait long ol o nogat.