Yu Ting i Mas i Gat Wanpela Mesaia Bilong Helpim Ol Man?

“WANPELA BIKMAN I TOK, I MAS I GAT WANPELA MESAIA BILONG HELPIM OL MAN”

Dispela het-tok i kamap long wanpela nius (The Financial Post) bilong Toronto, Kanada, long 1980. Dispela bikman em Aurelio Pesai (Peccei), em i presiden bilong wanpela klap ol i kolim Klap bilong Rom. Nius i tok, dispela bikman i ting i mas i gat wanpela man em God i stiaim tingting bilong em, maski em i man bilong saiens o bilong politik o bilong lotu, na em i ken i go pas na stretim ol hevi bilong graun i laik bagarapim olgeta lain, na long dispela rot em inap kisim bek ol man. Tasol yu ting ol hevi bilong graun i go bikpela olgeta na i mas i gat wanpela man olsem Mesaia bilong helpim ol man? Tingim wanpela hevi bilong dispela graun​—em hangre.

YU LUKIM piksa bilong wanpela pikinini meri long nius. Dispela pikinini i no winim yet 5-pela krismas. Ai bilong em i no lait, na taim yu lukim, yu no amamas. Ai bilong em i kamapim bel bilong em, em i gat bikpela pen bilong hangre. Tarangu, dispela pikinini i no gat kaikai. Taim em i kamap nupela na i kam inap long nau, em i stap olsem tasol.

Tru, ating yu olsem planti ol narapela man​—yu no laik lukim dispela kain piksa, olsem na kwiktaim yu opim narapela pes bilong nius. I no olsem yu no sori long pikinini, nogat. Yu bel hevi, long wanem, yu save, i no gat rot moa bilong helpim em​—em i bun nating olgeta na bel bilong em i solap​—em i laik bagarap. Ating nau em i dai pinis. Na yu save tu, dispela samting i no painim dispela pikinini tasol, nogat.

Yu ting i gat hamas pikinini em bikpela hangre i painim ol? Inap 14 milion! Em bikpela namba tru, a? Yumi ken mekim wanpela tok piksa na bai yu ken pilim tru dispela bikpela namba. Tingim wanpela bikpela haus stediam ol i save pilai spot long en; inap 40 tausen manmeri ol i ken sindaun insait long en. Orait nau tingim 40 tausen pikinini i pulap long dispela haus stediam. Orait, nau tingim 350 haus stediam olsem, em olgeta wan wan i gat 40 tausen pikinini. Nau bungim olgeta dispela pikinini wantaim na em i kamap olsem 14 milion. Wanpela lain bilong Yunaitet Nesen i tok, long ol kantri i no gat planti wok bisnis samting, long olgeta yia bikpela lain pikinini olsem dispela namba ol bai dai long hangre o long ol sik em hangre i kamapim​—em inap olsem 40 tausen pikinini long olgeta de, em wankain namba olsem ol pikinini i stap long wanpela haus stediam yumi bin tok piksa long en! Orait, nau yumi ken bungim ol bikpela manmeri ol i stap hangre, na taim yumi bungim olgeta manmeri na pikinini wantaim, dispela namba i bikpela tru, inap olsem wan bilion.

Bilong Wanem i Gat Bikpela Hangre?

Dispela graun i save kamapim planti kaikai, winim tru skel bilong olgeta man i stap long graun, na em inap kamapim planti kaikai moa. Tasol long olgeta wan wan minit, inap 26 pikinini ol i save dai long hangre na sik. Tasol insait long dispela wan minit wan minit, ol gavman i save tromoi K2 milion bilong wokim ol samting bilong pait. Em bikpela mani tru ol i tromoi insait long wan minit tasol. Orait, tingim ol gutpela samting ol inap mekim long dispela mani bilong helpim ol dispela 26 pikinini!

Olsem na yumi no ken tok, kaikai o mani i sot na long dispela as tasol planti man i stap hangre. I gat ol narapela as bilong dispela hevi. Olsem wanpela profesa bilong Ajentin, em Jos Hardoi (Jorge E. Hardoy) i tok, ‘ol man bilong graun i no laik givim strong na taim na mani samting na save long ol lain i sot long ol dispela samting.’ Tru tumas, i no olsem ol kantri i sot long mani na kaikai samting, nogat. Wanpela bikpela as bilong dispela hevi, em ol man yet​—ol i save mangal na tingim skin bilong ol yet, na dispela strongpela tingting i bosim ol samting ol i mekim. Olsem na ol bikpela maniman i holim planti samting bilong skin, na ol rabisman i lus long ol dispela samting.

Tru, sampela lain i givim bel tru long helpim ol lain i stap hangre, na ol i wok strong long bringim kaikai i go long ol, tasol i gat planti samting i save pasim rot bilong ol. Long planti kantri i gat bikpela pait long en, bikpela hangre i stap. Sampela taim ol birua i pasim rot bambai kaikai i no ken kamap long lain ol i pait long en. Tupela lain wantaim i ting, sapos ol i larim kaikai i go insait long ples bilong ol birua, i olsem ol i givim kaikai long ol birua bilong ol. Na sampela taim ol gavman i save mekim wok long bikpela hangre bilong helpim wok politik bilong ol.

I Gat Rot Bilong Stretim?

Tasol i gat planti hevi moa i painim ol man​—i no dispela bikpela hangre tasol. Ol i wok long pinisim ol bikbus, na tromoi marasin nogut long win na wara na graun, na ol bikpela pait i wok long kamap na planti milion man i bagarap, na pasin raskol i go bikpela na ol man i no bilip moa long narapela man, na pasin pamuk na ol narapela pasin nogut i go bikpela. Ol dispela hevi i mekim na yumi ken save tru, ol man bilong graun i no inap bosim gut sindaun bilong ol.

Planti man i tingim ol dispela hevi i kamap na ol i ting, i no gat wanpela rot bilong stretim ol hevi bilong graun. Na sampela i gat wankain tingting olsem bilong dispela saveman bilong Itali, em Aurelio Pesai. Ol i ting, i mas i gat wanpela man i narapela kain tru​—wanpela man i gat bikpela strong, winim ol man bilong graun​—em tasol inap stretim hevi bilong hangre na ol narapela hevi. Olsem na ol i tingim wanpela man olsem mesaia i mas kamap bilong helpim ol man. Tasol inap yumi ken wetim wanpela man olsem i kamap bilong helpim yumi? O dispela em i wanpela tingting nating tasol?

[Piksa Kredit Lain long pes 2]

Cover photos: Top: U.S. Naval Observatory photo; Bottom: NASA photo

[Piksa Kredit Lain long pes 3]

WHO photo by P. Almasy

[Ol Piksa Kredit Lain long pes 4]

WHO photo by P. Almasy

U.S. Navy photo