Ol i No Wok Bisnis Long Tok Bilong God
LONG yia 1991 i gat wanpela program i bin kamap long televisen, em wanpela lain long Amerika i laik glasim gut wok bilong ol man i save autim tok bilong lotu long televisen. Ol i toktok wantaim wanpela man olsem, em i save mekim beten long telefon. Em i tokim ol: “Mipela i bin kisim mani long wok bilong God mipela i mekim.”
Dispela lain i glasim wok bilong 3-pela lain i save mekim lotu long televisen long Amerika, na ol i kamapim long ples klia olsem dispela 3-pela lain i kisim planti milion kina long ol man long olgeta yia. Ol i bin mekim kain kain pasin giaman bilong pulim mani long ol man. Ating yu kirap nogut long dispela samting, a?
Ol i Glasim Wok Bilong Ol Lotu
Long nau sampela gavman na oganaisesen bilong helpim ol man, na sampela man yet, ol i glasim gut wok bilong ol lain i mekim lotu long televisen na ol bikpela lotu bilong longtaim, nogut ol i mekim hait ol samting bilong pulim mani na gavman i tambuim dispela samting. Ol dispela lain i kisim save olsem sampela lotu i kisim bikpela mani long rot bilong bisnis, na ol i putim mani i go long sampela bikpela wok bilong ol lain politik, na ol pris pasto samting i kisim bikpela pe na ol i gat gutpela sindaun tru. Olsem na sampela lain i laik glasim gut dispela samting.
Klostu olsem 2,000 yia bipo, aposel Pol i tokaut klia long wok Kristen tru bilong autim gutnius, na yumi ken skelim wantaim wok lotu em sampela bikman bilong lotu i mekim long nau. Pol i tok: “Mipela i no olsem ol planti man, ol i save go nabaut na mekim wok bisnis long tok bilong God. Nogat. . . . Mipela i no save giaman nabaut. . . . Long ai bilong God mipela i save autim stret ol tok em i bin givim mipela.” (2 Korin 2:17) Orait, wanem lotu i save bihainim stret dispela pasin bilong lotu Kristen tru?
Bilong helpim yu long skelim dispela samting, yumi ken stori long Pol wantaim ol wanwok Kristen i bin kisim we mani bilong helpim ol long mekim wok bilong God. Olsem wanem dispela i narapela kain long pasin ol narapela lotu i bin mekim long taim bilong Pol?
Ol Man Bilong Raun Autim Tok Long Taim Bilong Ol Aposel
Pol i bin raun long ol narapela narapela hap na autim tok bilong God. Tasol long dispela taim bipo planti man i save raun na kamapim bilip bilong ol long ol man. Luk, em wanpela man bilong raitim tok bilong Baibel, em i tok, “Sampela Juda i save go nabaut na i wok bisnis long rausim ol spirit nogut.” (Aposel 19:13) Jisas i bin givim strongpela tok long ol bikman bilong lotu, olsem ol Farisi, na em i tok: “Yupela man bilong tupela maus. Yupela i save raun long olgeta hap bilong solwara na bilong graun, bilong mekim wanpela man tasol i kamap disaipel bilong yupela.” (Matyu 23:15) Jisas yet i save raun na autim tok bilong God. Em i lainim ol aposel na disaipel bilong em long bihainim pasin bilong em long autim tok long hap bilong Judia na Samaria na “i go inap long olgeta hap bilong graun.”—Aposel 1:8.
Taim lain bilong Jisas ol i raun, ol i bungim sampela man i no bilong lain Juda na ol tu i autim tok. Long Atens Pol i bungim sampela bilong lain Epikurian na lain Stoik, na ol i tok pait wantaim em. (Aposel 17:18) Long ol hap i stap aninit long Rom, ol man i save tok resis wantaim na mekim ol kain tok bilong pulim ol man. Na lain bilong god Aisis na Serapis i save grisim ol meri na ol lain i wok kalabus na tok promis long helpim ol long kamap fri long ol samting bilong lotu na long sindaun bilong ol. Na ol lotu long hap bilong Is tu i bin raun long ol narapela hap bilong pulim ol manmeri i kam long lotu bilong ol. Na ol i tok promis long tekewe sin bilong ol man na ol inap kisim save long sampela tok hait bilong ol god, na dispela i pulim ol long kam insait long lain bilong ol god giaman olsem Demeter na Dionisus Sibele.
Mani Bilong Mekim Dispela Wok
Tasol ol i mas lusim bikpela mani long baim rot bilong raun, na baim kaikai na ples slip na paiawut na klos na marasin samting. Ol dispela lain bilong raun autim tok bilong lotu samting, ol i save kisim mani long 5-pela rot: (1) Sampela i kisim pe long dispela wok; (2) sampela i mekim liklik wok mani bilong ol yet; (3) sampela man i singautim ol i kam long haus bilong ol na lukautim ol long kaikai samting, na sampela i givim liklik mani long ol bilong helpim ol; (4) sampela i pren wantaim ol maniman; (5) sampela i sanap long rot na singaut long mani.
Pol i save long sampela man bilong autim tok, em ol i tok ol i Kristen, tasol ol i pren wantaim ol maniman na ol i pulim mani bilong ol rabisman. Pol i krosim kongrigesen bilong Korin na i tok: “Sapos wanpela man i . . . pinisim olgeta samting bilong yupela, o sapos em i giamanim yupela na trikim yupela, . . . yupela i save larim em i mekim.” (2 Korin 11:20) Jisas i no bin pulim mani bilong ol man, na Pol wantaim ol wanwok tu i no mekim olsem. Tasol ol dispela man long Korin ol i “giaman aposel na giaman wokman,” na ol i wokman bilong Satan.—2 Korin 11:13-15.
Jisas i no bin tokim ol disaipel ol i ken kisim pe long wok bilong autim tok. Em i tok: “Yupela i bin . . . kisim nating, na i no gat pe long en. Olsem na yupela i mas givim nating long ol manmeri. Yupela i no ken kisim pe long en.” (Matyu 10:8) Long taim bilong Jisas, planti man i save sanap long rot na singaut long mani, tasol ol man i no save laikim dispela kain pasin. Long wanpela tok piksa bilong Jisas, wanpela wokboi i tok, ‘Mi sem long askim ol man long givim mani long mi.’ (Luk 16:3) Olsem na i no gat wanpela tok long Baibel i tok, ol gutpela disaipel bilong Jisas i bin singaut long mani o kaikai taim ol i autim tok. Ol i bihainim wanpela lo olsem: “Sapos man i no laik mekim wok, orait em i no ken kisim kaikai.”—2 Tesalonaika 3:10.
Jisas i laik kirapim ol disaipel long lukautim ol yet long tupela rot. Namba wan rot em olsem Pol i tok, ol i ken “kisim ol samting bilong helpim bodi long ol manmeri i kisim gutnius,” em ol manmeri i gat laik long givim samting long ol. (1 Korin 9:14; Luk 10:7) Namba tu rot, em ol i ken lukautim ol yet.—Luk 22:36.
Ol Samting Pol i Mekim
Pol i mekim wanem bilong bihainim ol dispela lo? Luk i stori long namba tu raun bilong Pol olsem: “Mipela i kalap long sip long Troas, na sip i ran i go stret long Samotres. Na long narapela de em i ran i go long Neapolis. Na mipela i lusim dispela ples na i go kamap long Filipai. . . . Mipela i stap sampela de long dispela taun.” Ol yet i baim rot na kaikai na ples slip bilong ol.—Aposel 16: 11, 12.
Bihain wanpela meri, nem bilong em Lidia, em i harim tok bilong Pol na em i bilip long en. Taim em wantaim ol wanhaus bilong em i kisim baptais, em i tokim Pol na Luk: “Sapos yupela i ting mi bilip tru long Bikpela, orait yupela i ken i kam i stap long haus bilong mi.” (Aposel 16:13-15) Ating Pol i tingim gutpela pasin bilong Lidia na em i tokim ol wanbilip long Filipai: “Long olgeta taim mi tingting long yupela, mi save tenkyu long God . . . Mi save amamas long yupela, long wanem, . . . yupela i bin poroman wantaim mipela long wok bilong autim gutnius.”—Filipai 1:3-5.
Pol i stori long planti manmeri i bin kisim ol dispela wokman Kristen. (Aposel 16:33, 34; 17:7; 21:7, 8, 16; 28:2, 7, 10, 14) Long ol pas Pol i raitim, em i tok tenkyu long gutpela pasin ol i bin mekim long em na long ol presen em i kisim. (Rom 16:23; 2 Korin 11:9; Galesia 4:13, 14; Filipai 4:15-18) Tasol em na ol wanwok tu i no tok, ol dispela manmeri i mas givim ol presen na mani long ol, nogat. Na ol Witnes Bilong Jehova inap tokaut olsem ol wasman bilong raun na helpim ol kongrigesen samting, ol i bihainim wankain tingting olsem bilong aposel Pol na ol wanwok bilong em.
Ol i No Wetim Man i Helpim Ol
Pol i no wetim ol man i mas lukautim em long ol samting. Em i bin lain long mekim wanpela wok. Dispela em i strongpela wok na em i mas wok i go inap planti aua, tasol em i kisim liklik pe tasol long en. Taim em i kamap long Korin bilong mekim wok misineri, “em i bungim wanpela Juda, nem bilong en Akwila . . . wantaim meri bilong en, Prisila, . . . [Pol] i save mekim wankain wok olsem tupela, em wok bilong wokim ol haus sel. Olsem na Pol i stap wantaim tupela, na ol i wok i stap.”—Aposel 18:1-3.
Bihain Pol i stap long Efesus na em i wok strong yet. (Lukim Aposel 20:34; 1 Korin 4:11, 12.) Ating em i gat save long wokim haus sel long strongpela laplap em i kisim long ples bilong em, em ol i wokim long gras bilong meme. Long tingting yumi inap lukim Pol i sindaun long liklik sia samting na em i katim laplap na wok long samapim haus sel i go inap long biknait. Ating em i wok insait long wanpela woksop na taim em i wok i stap, em i gat rot long autim tok long papa bilong woksop, na ol wokboi bilong em, na ol man i kam baim ol samting, na ol pren bilong em.—Lukim 1 Tesalonaika 2:9.
Pol i nolaik tru long kisim mani long wok misineri bilong em; em i no laik wok bisnis long tok bilong God. Em i tokim ol Tesalonaika: “Yupela i mas bihainim pasin bilong mipela. Taim mipela i stap wantaim yupela, mipela i no save sindaun nating. Mipela i no kisim nating sampela kaikai long han bilong yupela. Nogat. Mipela i baim tasol. Mipela i wok strong na mekim planti hatwok moa long san na long nait, bai mipela i no ken putim hevi long yupela. I no olsem mipela i no inap kisim kaikai samting long yupela. Nogat. Mipela inap tru long kisim, tasol mipela i no kisim, long wanem, mipela i laik soim yupela long gutpela pasin yupela yet i mas bihainim.”—2 Tesalonaika 3:7-9.
Ol Man i Bihainim Pasin Bilong Pol Long Nau
Ol Witnes Bilong Jehova i save bihainim gutpela pasin bilong Pol. Ol elda na wokman bilong kongrigesen i no kisim pe o liklik hap mani long kongrigesen, nogat tru. Ol i mas kisim wanpela wok mani long lukautim famili bilong ol, olsem ol narapela man i mekim. Na sampela i save autim tok long olgeta de, olsem wok painia, na ol tu i mas lukautim ol yet long kaikai samting; sampela i save wok haptaim tasol bilong kisim ol samting inap long ol. Long olgeta yia sampela Witnes i save lusim mani bilong ol yet long go long ol longwe hap bilong autim gutnius long ol man i no bin harim planti taim. Sapos sampela famili bilong dispela hap i laik singautim ol long kaikai o slip long haus bilong ol, ol i amamas, tasol ol i no subim ol dispela famili long mekim.
Long laik bilong ol yet ol Witnes i save autim tok na skulim ol man long Baibel, na ol i no save singaut long pe. Tasol sapos long laik bilong man yet em i laik givim liklik mani bilong helpim wok bilong autim gutnius long olgeta hap, ol i ken salim long Sosaiti Was Taua. (Matyu 24:14) Ol Witnes i no wok bisnis long tok bilong God. Olgeta wan wan inap mekim tok olsem Pol i bin mekim: “Mi bin autim gutnius bilong God long yupela, na mi no bin kisim pe long dispela wok.” (2 Korin 11:7) Ol Witnes Bilong Jehova i no save “mekim wok bisnis long tok bilong God.”
[Blok long pes 27]
BILONG GIVIM MANI SAMTING BILONG HELPIM WOK BILONG KINGDOM
◻ OL KONTRIBUSEN BILONG HELPIM WOK LONG OLGETA HAP: Planti ol i save makim hamas mani ol i laik givim olsem kontribusen na ol i save putim dispela mani i stap na taim ol i go long Haus Kingdom ol i putim long wanpela bokis kontribusen i gat nem olsem: “Ol Kontribusen Bilong Helpim Wok Bilong Sosaiti Long Olgeta Hap—Matyu 24:14.” Long olgeta mun ol kongrigesen i save salim ol mani bilong dispela bokis kontribusen i go long brens-ofis.
◻ OLSEM PRESEN: Sapos yu laik yu ken salim mani i go stret long Watch Tower Bible and Tract Society of Pennsylvania, 25 Columbia Heights, Brooklyn, New York 11201, o long brens-ofis bilong Sosaiti long hap bilong yu. Yu ken givim bis o narapela samting i gat bikpela pe bilong en, olsem kontribusen. Taim yu givim mani o narapela samting olsem, yu mas salim pas tu wantaim i tokaut klia olsem yu givim nating dispela samting olsem presen.
◻ OLSEM DINAU: Yu ken givim mani long Sosaiti Was Taua olsem dinau bilong mekim wok long en i go inap long taim yu dai, na sapos yu yet yu sot na yu laik kisim bek dispela mani, yu ken kisim.
◻ INSURENS: Sapos yu baim laip-insurens, orait yu ken raitim nem bilong Sosaiti Was Taua bambai ol i ken kisim dispela mani taim yu dai, o sapos yu baim insurens bilong kisim mani taim yu lapun na yu pinis long wok, orait yu ken raitim nem bilong Sosaiti bilong kisim dispela mani sapos yu dai taim yu no lapun yet. Yu mas toksave long Sosaiti long dispela samting.
◻ MANI LONG BENG: Sapos yu gat sampela mani long beng, yu ken bihainim lo bilong beng long hap bilong yu na pasim tok wantaim ol long givim dispela mani long Sosaiti Was Taua bilong mekim wok long en taim yu stap laip yet o bilong kisim long taim yu dai.
◻ OL SEA SAMTING: Sapos yu gat sea samting long wanpela kampani, yu ken givim nating long Sosaiti Was Taua olsem presen stret, o yu ken givim long Sosaiti na wokim rot bambai yu kisim yet interes o winmani bilong en.
◻ HAUS SAMTING: Sapos yu gat haus samting yu inap baim i go long ol man, yu ken givim long Sosaiti Was Taua olsem presen stret, o bilong yu ken i stap long en i go inap long yu dai na nau Sosaiti i ken kisim tru. Sapos yu laik mekim olsem, gutpela sapos yu toksave long Sosaiti pastaim.
◻ RAITIM PEPA: Yu ken i go long loya na raitim pepa na makim Sosaiti Was Taua (Watch Tower Bible and Tract Society of Pennsylvania) bilong kisim mani o haus samting bilong yu taim yu dai. O sapos i gat sampela mani samting beng o narapela lain i holim na em bilong yu kisim bihain, yu ken raitim pepa na tokaut olsem: Sapos yu dai paslain long taim bilong kisim dispela mani, orait ol i ken givim long Sosaiti. Long sampela kantri, sapos yu tok long givim mani olsem long wanpela lotu, bai yu abrusim sampela takis. Sapos yu raitim pepa olsem, yu ken raitim tupela na salim wanpela long Sosaiti.
Sapos yu laik kisim sampela save moa long ol dispela samting, yu ken raitim pas long International Bible Students Association of Papua New Guinea Inc., Box 636, Boroko, N.C.D.
[Blok long pes 29]
EM I LAIK HELPIM WOK AUTIM TOK
YANGPELA skulmeri, nem bilong em Tifani, bilong Baton Rus, Lusiana, long Amerika, em i wanpela Witnes Bilong Jehova, na long skul em i raitim wanpela stori, het-tok bilong en, “Skul Long Amerika.” Bihain papamama i kisim pas long het-tisa bilong skul. Pas i tok olsem:
“Long wanpela bikpela wik bilong ol skul, ol i save makim wanpela gutpela stori bilong ol wan wan klas na ol i save kaunim na olgeta klas i harim. Nau long moningtaim mi bin kaunim stori bilong Tifani na mi laikim tru. Em i narapela kain meri stret. Em i gat strongpela bel na em i gat gutpela save na em i save strong long mekim ol wok bilong em, na em i gat gutpela pasin tru. Mi no bin lukim wanpela sumatin bilong gret 6 i gat planti gutpela pasin olsem. Mipela amamas long Tifani i stap long skul bilong mipela.”
Tifani i winim nambawan prais long stori bilong em. Bihain em i raitim pas long Sosaiti Was Taua na em i tok: “Samting i bin helpim mi long winim nambawan prais, em buk Sampela Askim Bilong Ol Yangpela—Ol Gutpela Bekim. . . . Mi bin mekim wok long ol sapta bilong buk i stori long skul. . . . Tenkyu tru long dispela gutpela buk. Mi winim 7-pela dola long dispela nambawan prais, na mi laik givim dispela 7-pela dola wantaim 13 dola moa long yupela, olsem 20 dola olgeta, bilong helpim wok bilong autim tok long olgeta hap. . . . Mi tu mi laik mekim wok long Betel taim mi bikpela pinis.”
[Piksa long pes 26]
Sampela taim Pol i save samapim haus sel bilong kisim liklik mani