Gutnius Inap Helpim Yu Olsem Wanem?
BAIBEL em i wanpela buk i gat nem tru long ai bilong planti man. Tasol i no planti man i save kaunim gut na bai ol i ken bihainim ol tok bilong en. Ol i bin raitim tok bilong Baibel klostu olsem tu tausen yia i go pinis, olsem na planti man i ting ol i mas senisim sampela tok bilong en bilong helpim ol man bilong nau. Tasol olsem wanem? Tok bilong Baibel i bilong bipo tasol na i no inap helpim ol man bilong nau? Nogat. Yumi no ken ting olsem.
I gat planti milion man na meri na ol yangpela, ol i save pinis, Baibel em i samting tru bilong helpim yumi ol man. I olsem tok i go pas long wanpela Baibel i tok: ‘Baibel i no olsem wanpela gutpela buk yumi ken amamas long en na litimapim nem bilong en na em tasol, nogat; em i Gutnius bilong olgeta manmeri bilong olgeta hap—em i wanpela tok ol i mas kisim gut na bihainim long olgeta taim.’
Yu ting olsem wanem long Gutnius? Yu save mekim wok long en na bai em i stiaim wokabaut bilong yu long olgeta de? Orait, nau yumi ken stori long olsem wanem Gutnius i bin helpim sampela man long taim bilong ol aposel bipo na long taim bilong yumi tu.
Gutnius i Bin Helpim Ol
Long taim bilong Jisas sampela man bilong kisim pis na sampela meri marit ol i harim gutnius, na ol i kisim save long ol samting God i laik mekim bilong helpim ol man. Dispela gutnius i senisim tru i stap bilong ol na ol i stap bel isi. Maria bilong Makdala i gat spirit nogut i stap long em, tasol Jisas i oraitim em. Na Sakius bipo em i wanpela man bilong kisim takis, tasol gutnius i mekim na em i lusim pasin bilong mangal long mani. (Luk 8:2; 19:1-10) Taim ol aipas na ol lepraman i kam long Jisas, em man bilong autim gutnius, ol i kamap orait gen. (Luk 17:11-19; Jon 9:1-7) Jisas inap tok stret olsem: “Ol aipas ol i lukluk gen, na ol lek nogut ol i wokabaut. Skin bilong ol man i gat sik lepra, em i kamap klin, na ol yaupas i harim toktok. Ol man i dai pinis, ol i kirap gen, na ol rabisman i harim gutnius.”—Matyu 11:5.
Tasol bikpela samting tru, em gutnius i bin helpim ol dispela taranguman i gat gutpela bel na ol inap tingim gutpela taim bai kamap bihain na bai ol i gat gutpela sindaun. Ol i bilip na wetim Kingdom bilong God—em i winim tru gutnius bilong sampela lain ol i tok ol yet inap stretim hevi bilong ol man. (Matyu 4:23) Taim Jisas i dai, ol i no ting, samting ol i bilip na wet long en i lus nating, nogat. Baibel i tok, “Long olgeta de, ol i save go long tempel na long ol haus bilong ol manmeri . . . Ol i no lusim wok bilong autim gutnius. Nogat. Ol i tokaut klia olsem, Jisas em i dispela man God i bin promis long salim i kam.” (Aposel 5:42) Planti manmeri i kisim dispela tok bilong ol, na dispela tok i helpim tru ol.
Long dispela taim bipo, tok bilong Kingdom i nambawan gutpela tok. Orait, long nau tu tok bilong Kingdom em i gutpela tok?
Gutnius Long Nau
Sapos yu laik bai bel isi na gutaim tru i kamap long graun, na no gat pait o birua moa, orait, dispela tok bilong Kingdom bai i gutpela tok tru long yu. Long nau planti handet milion manmeri ol i sot long kaikai o ol i stap hangre, na ol sik nogut nogut i wok long bagarapim ol man, na pasin raskol i go bikpela tru, na planti gavman i no gat strong moa, olsem na tok bilong Kingdom i gutpela tok tru, long wanem, yumi inap wetim Kingdom tasol i stretim ol hevi na kamapim gutaim—i no gat narapela samting inap mekim olsem.
Long dispela as Jisas i tok long wanpela wok bai kamap long taim bilong yumi olsem: “Na bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Em nau, ol Witnes Bilong Jehova i wok long autim dispela gutnius long planti kantri, winim 200. Wanpela nius Katolik (Nova Evangelização 2000) i mekim gutpela tok long ol Witnes long dispela samting, na i tok, ‘Yumi inap painim we ol Witnes Bilong Jehova? Long haus bilong ol man. Na bilong kamap wanpela Witnes Bilong Jehova, man i mas kamap man bilong autim tok. Olsem na yumi lukim ol i wok strong long autim tok long ol man.’
Tasol gutnius i no inap helpim nating ol man. Em inap helpim ol man i putim yau long en na bihainim. Bilong kamapim klia dispela samting, Jisas i mekim tok piksa long wanpela man i tromoi pikinini wit long gaden. Pikinini wit i pundaun long kain kain graun, na dispela graun i makim bel bilong ol man i harim dispela gutnius. Jisas i tok: “Ol man i harim gutnius bilong kingdom bilong heven na i no save long as bilong en, . . . Satan i save kam long ol na tekewe kwiktaim dispela tok God i bin planim long bel bilong ol. . . . Ol dispela pikinini wit i pundaun long gutpela graun, em i olsem man i harim tok na i save gut as bilong en. Em i save karim kaikai, inap 100 o 60 o 30.”—Matyu 13:18-23.
Long nau tu, klostu olgeta man i no laik putim yau na save gut long as bilong gutnius. Bel bilong ol i no pilim tok bilong en, olsem na gutnius i no helpim ol. Tasol sampela man ol i givim bel long tok bilong gutnius na ol i wok long kisim save long ol samting ol i mas mekim bilong stretim pasin na wokabaut bilong ol na bai em i stret wantaim laik bilong God. Olsem na gutnius i helpim gut ol. Orait, yu yet yu bilong wanem lain?
Strong Bilong Gutnius Long Nau
Stori bilong sampela manmeri bilong nau i kamapim klia olsem taim man i kisim gut as bilong gutnius, dispela i helpim gut em, maski pastaim em i ‘no gat wanpela gutpela samting em inap wetim i kamap bihain, na em i no save long God.’ (Efesus 2:12; 4:22-24) Roberto em i wanpela man bilong Rio de Janero. Taim em i yangpela yet, em i bihainim pasin nogut; em i save kisim drak nogut, na pamuk, na stil. Bihain em i kalabus. Orait, taim em i stap kalabus, wanpela Witnes i kirap stadi wantaim em long Baibel. Em i wok long kamap strong long ol samting bilong spirit, na ol bos bilong haus kalabus i lukim dispela samting na ol i sotim tru taim bilong em bilong i stap kalabus.
Bihain Roberto i lusim kalabus na em i bungim wanpela yangpela meri em bipo Roberto i bin hansapim em long gan na paitim em. Meri tu i stadi long Baibel wantaim ol Witnes Bilong Jehova. Orait, wanem samting i kamap nau? Wanpela pas i stori long dispela na i tok, ‘Tupela i bung insait long Haus Kingdom, na tupela i krai na narapela i holim narapela olsem brata susa tru. Nau dispela man na dispela meri i save litimapim nem bilong Jehova.’
Na narapela tu, em Isabel, em meri bilong belhat. Em i insait tru long wok bilong ol spirit nogut olsem marila samting, na ol spirit nogut i save mekim nogut long em. Tasol bihain ol Witnes Bilong Jehova i stadi wantaim em long Baibel, na taim em i wok long stadi, tok bilong gutnius i helpim em tru. Bihain em i lusim kalabus bilong ol spirit nogut na em i senisim pasin bilong em—bihain moa em i lain long daunim belhat. Nau em i wanpela gutpela Kristen, na em i gat nem long mekim gut long ol man.
Tru tumas, gutnius i gat strong tru long senisim pasin bilong man. (1 Korin 6:9-11) Tasol gutnius inap mekim sampela samting moa. Em inap tokim yumi long ol gutpela samting bai kamap bihain.
Gutpela Samting Bai Kamap Bihain
Olsem Baibel i tok, ol gutpela samting tru bai kamap bihain. Bai yumi lukim truim bilong beten bilong Jisas long Kingdom bilong God i mas i kam, na ol man i mas bihainim laik bilong God long graun olsem ol i save mekim long heven. (Matyu 6:10) Klostu nau na God bai pinisim ol hevi na pasin nogut bilong dispela graun, na gavman bilong em long heven, olsem Kingdom, em bai bosim olgeta manmeri i gat stretpela bel na ol i bin harim gut tok bilong gutnius na ol i bihainim.—Daniel 2:44.
Ol man i stap gut long God ol bai wok long kamapim bek paradais long graun, na ol man bilong pasin daun ol i ken i stap oltaim long en. (Song 37:11, 29) Tru tumas, dispela gutnius long God bai pinisim tru pasin raskol, na sik, na pasin bilong bagarapim ol samting long graun, na pait, em i gutpela tok tru, a? Yu ken tingim olsem yu yet wantaim famili bilong yu i stap long dispela nupela taim, na yupela i stap bel isi na i no ken pret long sik o dai bai painim yupela—bai yupela stap gutpela tru.—KTH 21:4.
Tru, planti man i ting dispela gutpela tok em i wanpela stori nating tasol. Tasol dispela tingting i no stret. Dispela gutnius i gat as bilong en, na strong bilong en i kamap ples klia pinis—em i bin senisim pasin na wokabaut bilong planti man. Olsem na sapos ol narapela i no bilip long gutnius, yu no ken larim ol i pretim yu.
Tingim dispela tok piksa: Wanpela man i baim graun long hap ol i laik wokim planti haus long en. Em i save, bihain em inap kisim bikpela mani tru sapos em i baim dispela graun i go long ol man. Em nau, ol man bai tok, em i bihainim savepasin tru. Olsem tasol yu mas tingim gutpela sindaun yu inap kisim taim Kingdom i bosim graun, na nau yu mas kisim dispela gutnius na bilip long en, olsem man i bin kisim dispela graun. Long dispela rot bai God i kisim bek yu. I no gat narapela samting bai helpim yu olsem long bihain.—Rom 1:16.
Bilong kisim dispela gutnius, pastaim yu mas larim God i skulim yu, na nau yu mas bihainim ol dispela tok yu lainim. Wanpela profet i bin kolim sampela bikpela samting God i laik bai yu mekim, olsem: “Bihainim stretpela pasin, na laikim tru ol arapela man, na daunim tingting bilong yumi yet na i stap wanbel wantaim God bilong yumi, na bihainim em wanpela tasol.” (Maika 6:8) Tru, yu mas wok strong sapos yu laik lain long i stap wanbel wantaim God. Tasol ol Witnes Bilong Jehova i bin helpim Roberto na Isabel na planti milion moa long mekim olsem, na ol bai amamas long helpim yu tu.
Olsem na nau yu mas bihainim gutnius long olgeta samting yu mekim, na bai yu stap bel isi na i stap wanbel wantaim God na wetim truim bilong ol tok promis bilong em i kamap. I olsem yu putim mani long beng bilong helpim yu long bihain. Tasol maski strong bilong mani i pinis, em i no inap bagarapim dispela gutpela samting yu holim i stap. Orait, bihain bai yu kisim gutpela samting tru long en, olsem “winmani.” Em wanem samting? Aposel Jon i tok: “Olgeta pasin bilong dispela graun . . . bai i pinis wantaim. Tasol man i bihainim tok bilong God, em bai i stap oltaim.”—1 Jon 2:17.
[Piksa long pes 7]
Pikinini bilong wit, olsem gutnius, i pundaun long kain kain graun
[Kredit Lain]
Garo Nalbandian