Gutnius Em i Wanem Samting Tru?

LONG taim bilong Krismas, planti man i save harim na stori long Gutnius. Tasol wanem insait tru bilong dispela tok Gutnius? Em i wanpela gutpela samting bilong helpim yu yet wantaim famili bilong yu?

Dispela tok “Gutnius” i olsem “gutpela tok,” na yumi laik harim sampela gutpela tok long olgeta taim​—⁠i no long taim bilong Krismas tasol, a? Tasol dispela tok “Gutnius” em i no wanpela gutpela tok nating. Em i gutpela tok bilong wanpela samting stret, na i kirap long wanpela hap stret. Em i wanpela gutpela tok God i bin makim bilong ol man i mas autim long olgeta lain.

Asbisop bilong Rio de Janero (Eugênio Salles) i stori long dispela gutpela tok taim em i tok, ‘Yumi mas mekim ol wok i stret wantaim Gutnius; yumi no ken bihainim tingting bilong ol man.’ Tok bilong asbisop i stret. Tasol bilong mekim ol wok i stret wantaim Gutnius, yumi mas save, Gutnius em i wanem samting tru. Orait, olsem wanem yumi inap kisim dispela save? Na sapos yumi mekim ol wok i stret wantaim Gutnius, dispela bai helpim yumi olsem wanem?

Gutnius Em i Wanem Samting?

Planti man i gat tingting kranki long dispela Gutnius. Long yia 1918 wanpela lain bilong ol misin long Amerika (National Council of the Churches of Christ) i amamas long Lig ov Nesen i kamap na i tok, em i olsem Kingdom bilong God i kamap long graun long rot bilong wok politik, na ‘as bilong en em Gutnius.’ Tasol dispela Lig ov Nesen i pundaun tru long kamapim gutaim na pinisim pait long graun. Olsem na tok bilong ol dispela misin i kranki. Lig ov Nesen i no insait liklik long dispela Gutnius.

Long nau sampela lain i laik helpim ol man long kamap fri long rot bilong wok politik o long kisim gutpela sindaun, ol i mekim bikpela tok long dispela Gutnius. Tasol taim ol i mekim ol dispela tok, i olsem ol i sakim Gutnius tru. Wanpela nius bilong Brasil (Veja) i tok, ‘Misin Katolik i kirap long helpim ol wok bilong ol man, na em i no tingting long helpim lain bilong en long ol samting bilong spirit. Taim pris i mekim tok insait long haus lotu, ol man i laik bai em i toktok long God, tasol ol i harim tasol ol tok olsem gavman i no helpim ol rabisman long kisim gutpela sindaun na ol kain tok olsem.

Tru, taim sampela man i harim olsem sindaun bilong ol bai kamap gutpela liklik, o sampela lain politik i senis, ating dispela i olsem gutpela tok long yau bilong ol. Tasol em i no dispela gutpela tok olsem Gutnius, nogat. Wanpela bisop i tokaut olsem misin bilong em i no bin autim dispela Gutnius tru long ol man. Em i tok, ‘Kirap long 1960 samting, mipela i no bin skulim lain bilong misin long ol samting bilong spirit, long wanem, ol samting bilong skin i go insait long ol bilip bilong mipela.’

Wanpela ripot i kamap long wanpela nius (Time) i makim olsem ol lotu Talatala tu i no tingim moa dispela Gutnius. Nius i tok, ‘Ol bikpela misin i no kamapim klia tok bilong ol na bai ol man inap kisim gut, long wanem, ol i no klia gut long dispela tok ol i mas autim.’ Orait, ol i mas autim wanem tok? Na wanem dispela Gutnius?

Insait Bilong En

Wanpela bikpela buk (Webster’s Ninth New Collegiate Dictionary) i kamapim insait bilong dispela tok “Gutnius” na i tok, “em i wanpela tok i stori long Krais, na kingdom bilong God, na God bai kisim bek ol man.” Na dispela buk i tok, “gutnius” i olsem “tok bilong lotu Kristen em ol i kamapim insait bilong en”; o “ol tok em wanpela tisa bilong lotu i skulim ol man long en.” Orait, olgeta dispela tok em buk i mekim, em i stret long Gutnius o nogat? Nogat. As bilong ol tok bilong Gutnius em Baibel. Olsem na namba wan tok dispela buk i mekim long Gutnius, em tasol i stret, na tupela narapela tok i no stret​—⁠ol i kamapim tingting bilong ol man bilong nau long dispela tok “gutnius.”

Narapela bikpela buk (Vine’s Expository Dictionary of New Testament Words) i tok, long hap bilong Nupela Testamen, dispela tok “Gutnius” i makim gutpela tok bilong Kingdom bilong God, na em bai kisim bek ol man long rot bilong Krais, sapos ol i bilip long indai bilong Em.” Yumi mas kisim gut dispela tok, long wanem, sapos yumi save gut long insait tru bilong dispela gutnius o gutpela tok, dispela inap helpim yumi long i stap gutpela long nau, na bihain bai yumi inap i stap amamas.

Wanpela Tok i Klia

Olsem dispela bikpela buk i soim yumi, Gutnius i kamapim ol samting bilong Krais Jisas; olsem na fopela hap bilong Baibel i stori long i stap na wok bilong Jisas, ol i kolim fopela Gutnius. Kirap long taim Jisas i kamap nupela pikinini long graun, olgeta tok i stori long Jisas em i gutpela tok tru, olsem gutnius. Taim ensel i tokaut long mama i karim Jisas, ensel i tok: “Harim. Mi bringim gutnius i kam long yupela, em nius bilong mekim olgeta manmeri i amamas tru. Long dispela de long taun bilong Devit, wanpela meri i karim pikinini. . . . Em i Bikpela, na em i man God i makim bilong kisim bek ol manmeri bilong en.”​—⁠Luk 2:​10, 11.

Taim Jisas i go bikpela em i mas kamap Krais, em man God i tok promis long salim i kam. Em i mas kamapim klia ol samting God i laik bai ol man i mas mekim na bai em i kisim bek ol, na Jisas bai dai bilong helpim ol man, na em bai kirap bek, na bihain em bai kamap King bilong Kingdom bilong God. Dispela em i gutpela tok tru, a? Olsem na ol tok i stori long Jisas, ol i kolim Gutnius.

Taim Jisas i stap long graun em i givim bel tru long autim gutnius. Long hap bilong Gutnius Matyu i raitim, Baibel i tok: “Jisas i go raun long olgeta taun na ples. . . . Em i autim gutnius bilong kingdom bilong God.” (Matyu 9:35) Jisas i no tingting tasol long mekim gut bel bilong man na em i autim tok, nogat. Em i tokaut tu olsem: “Kingdom bilong God em i kam klostu pinis. Yupela i mas tanim bel na bilip long gutnius.” (Mak 1:15) Taim ol man i harim na bihainim dispela gutnius, em i senisim pasin na wokabaut bilong ol.

Taim Jisas i dai pinis, lain bilong em i wok long autim Gutnius. Ol i autim tok bilong Kingdom, na ol i tokaut tu long em i kirap bek pinis na i sindaun long han sut bilong God long heven, na em i givim pe bilong gutpela skin bilong em long God bilong baim bek ol man bilong graun. Em i man God i bin makim bilong kamap King bilong Kingdom na bosim graun, olsem na em i gat wok long bagarapim ol birua bilong God na kamapim bek paradais long graun.​—⁠Aposel 2:​32-36; 2 Tesalonaika 1:​6-10; Hibru 9:​24-28; KTH 22:​1-5.

Long nau i gat narapela tok i insait long gutnius. Ol samting i kamap long graun i makim klia olsem Jisas i kamap King pinis, na nau yumi stap long taim bilong las de. (2 Timoti 3:​1-5; KTH 12:​7-12) Taim bilong Kingdom i mas bagarapim ol birua bilong God em i klostu pinis. Dispela em i gutpela tok tru, a?

Stori i kamap bihain long dispela i kamapim klia olsem tok bilong Gutnius i gat bikpela strong. Em i bin helpim wanpela meri long lusim wok bilong ol spirit nogut i bin kalabusim em, olsem wok marila samting. Na wanpela man bilong stil em i stap kalabus, tasol Gutnius i helpim em long i stap amamas. Na Gutnius inap helpim yu tu​—⁠sapos yu harim na bihainim tok bilong dispela Gutnius.