Askim
Sapos Kristen i no inap painim gutpela poroman bilong marit long em, Kristen i ken mekim wanem?
Tru, yumi ol Kristen i givim bel long God, tasol sapos yumi tingting strong long wanpela samting i mas kamap, na em i no kamap, ating bai yumi bel hevi tru. Sindaun 13:12 i tok: “Sapos man i ting long kisim wanpela samting na i wet nating longpela taim, bai em i bel hevi moa yet.” Sampela Kristen i bel hevi olsem long taim ol i gat laik long marit, tasol ol i no inap painim gutpela poroman. Na dispela kain bel hevi i save painim moa yet ol manmeri em aposel Pol i tok, “ol i no inap bosim gut laik bilong bodi.”—1 Korin 7:9.
Jehova yet i putim laik long skin bilong yumi na yumi gat laik long marit. Olsem na yumi no ken kirap nogut long dispela kain laik i kamap long bel bilong planti Kristen singel. (Stat 2:18) Na sapos ol wanlain bilong Kristen i strong long em i mas marit (o ol wanlain i save makim krismas bilong man na em i mas marit) o em i stap long wanpela kongrigesen i gat planti marit long en, em ol i stap amamas, ol dispela inap mekim na bai em tu i gat bikpela laik long marit. Tasol sapos Kristen i bel hevi long dispela samting inap longpela taim, dispela i no gutpela. Orait, Kristen singel i ken mekim wanem bilong daunim dispela kain bel hevi?
Ating i hatwok liklik, na nogut ol narapela i tingim hevi bilong em i olsem samting nating tasol. Tasol bilong karim o winim dispela bel hevi, Kristen yet i mas mekim sampela samting.
I gat wanpela lo bilong Baibel em i kamapim rot bilong winim dispela bel hevi, olsem: “Amamas bilong man i givim samting long ol arapela man, dispela i winim amamas bilong man i kisim samting bilong em yet.” (Aposel 20:35) Krais Jisas, em wanpela man singel, em i mekim dispela tok na em i save, dispela tok em i tru. Sapos yumi mekim ol samting bilong helpim ol narapela man na yumi no tingting long helpim yumi yet tasol, dispela em i gutpela rot tru bilong daunim bel hevi i painim yumi taim yumi wet nating longpela taim long kisim wanpela samting. Orait, Kristen singel i ken mekim wanem na bai dispela tok inap helpim em?
Wok strong long mekim sampela gutpela pasin bilong helpim famili bilong yu yet na ol narapela insait long kongrigesen, na long mekim sampela wok moa long autim tok. Gutpela tok hia i no bilong tokim yu olsem, ‘Mekim planti wok na bai yu lusim tingting long laik bilong yu long marit.’ Nogat. Tasol sapos yu wok strong long mekim ol dispela wok Kristen, bai yu inap wok tu long bosim gut bel na bai ‘i no gat wanpela samting i hariapim yu long marit, bai yu inap bosim laik bilong yu’ na mekim gutpela wok long taim yu stap singel.—1 Korin 7:37.
Sampela i bin tingting strong olsem ol i laik marit na ol i bin larim dispela i kamap olsem nambawan samting long tingting bilong ol. Long rot bilong nius, ol i bin tokaut olsem ol i painim poroman bilong marit long em. Tasol mobeta ol i tingim ol gutpela samting inap kamap long pasin bilong i stap singel.—Lukim Wastaua bilong Me 1, 1988, “Ol i No Marit, Tasol Ol Inap Tru Long Mekim Wok Bilong God” na “Ol i No Marit, Tasol Ol i Stap Amamas,” na Wastaua bilong Me 15, 1992, “Yu Ting Marit Tasol Em Rot Bilong i Stap Amamas?”
Beten askim Jehova long helpim yu long dispela taim yu stap singel. (Filipai 4:6, 7, 13) Ol Kristen i no marit ol i ken mekim wok long ol hap taim bilong ol long stadi na tingim gut ol tok bilong God na bilong i go long ol miting na bekim tok samting. Planti ol i bin mekim olsem na long dispela rot bel bilong ol i bin “kisim malolo” olsem Jisas i tok promis long ol man i bihainim em. (Matyu 11:28-30) Dispela i bin helpim ol long kamap strong long spirit na bai ol inap kamap gutpela man o meri marit sapos bihain ol i painim gutpela poroman na ol i marit.
Yu no ken lusim tingting olsem Jehova i save long hevi bilong ol singel i mekim wok bilong em. Em i save yu laik marit, tasol gutpela Papa bilong yumi long heven i save tu long ol samting em inap helpim yu long i stap strong long spirit na bilong helpim bel bilong yu long i stap gutpela inap olgeta taim. Olsem na sapos yu wet long Jehova na long olgeta de yu wok long bihainim ol lo bilong em, yu ken bilip tru olsem em bai inapim laik bilong yu long ol bikpela samting yu mas kisim bilong helpim yu long i stap gutpela inap oltaim oltaim.—Lukim Song 145:16.