“Moning! Yu Save Long Nem Bilong God?”
BRENS-OFIS bilong ol Witnes Bilong Jehova long Brasil i kisim wanpela pas bilong tupela pikinini meri bilong Fotalesa em ol i gat 12-pela krismas na mama i karim tupela wantaim. Tupela i tok:
“Long 1990 mipela stap long gret 5 long skul, na skul i wokim wanpela bung em ol manmeri bai kam long en bilong lukim ol samting ol skulmanki i wokim, na ol sumatin i mas redim wanpela stori long samting ol i bin lainim long skul. Mipela tokim tisa, mipela laik redim stori long narapela samting. Em i bin harim mipela i stori long Jehova na Baibel, olsem na em i tok: ‘Yupela ken redim wanpela stori bilong God bilong yupela.’
“Mipela amamas, long wanem, nau rot i op na bai mipela i ken kamapim tok i tru na soim ol long ol buk bilong Baibel i gat nem bilong Jehova i stap long en. Mipela raitim tok bilong Song 83:18 na pasim long piksa bilong wanpela Baibel i op i stap. Na mipela putim long tebol sampela ol Baibel i gat nem bilong Jehova i stap long en (The Jerusalem Bible, New World Translation), na sampela buk i kamapim ol tok bilong Baibel. Na mipela putim video na televisen tu bilong kamapim wanpela piksa wokabaut ol man i laikim tru, na long dispela piksa ol i kamapim nem bilong Jehova.
“Taim wanpela man o meri i kam long tebol bilong mipela bilong lukim ol samting i stap long en, mipela i save tok, ‘Moning. Yu save long nem bilong God?’ Em i bekim sampela tok, na nau mipela i tok, ‘Lukim ol Baibel hia. Lukim nem bilong Jehova i stap.’ Na nau mipela i kirapim video i kamapim nem bilong Jehova na man i ken lukim. Sapos sampela man i laikim, mipela i givim magasin na liklik nius long em na bai em i ken karim i go na kaunim.
“Wanpela yangpela i kam long tebol bilong mipela na em i laik kisim buk Sampela Askim Bilong Ol Yangpela—Ol Gutpela Bekim. Tisa bilong mipela i lukim buk Rot Bilong Kamapim Amamas Insait Long Famili, na em i tok, ‘Olaman! Em gutpela buk tru!’ Ol man i bin kisim 7-pela buk na 18 liklik nius na 67 magasin long mipela. Mipela i amamas long kisim namba 3 prais long dispela bung. Tasol mipela i kisim bikpela amamas moa long kamapim long ples klia nem bilong God, em Jehova, long ol manmeri i kam long dispela bung.”