“Lukautim Gut Marit Bilong Yupela”
“Marit i gutpela samting tru, na yupela ol marit i mas lukautim gut marit bilong yupela, bai em i stap klin tru long ai bilong God.”—HIBRU 13:4.
PLANTI manmeri i marit longtaim na ol i stap amamas, maski planti ol narapela i brukim marit bilong ol. Planti marit i stap gut wantaim na marit bilong ol i gutpela, maski pasin na lain bilong man i no wankain olsem bilong meri bilong em. Insait long lain bilong ol Witnes Bilong Jehova i gat ol gutpela marit i stap. Tru, sampela taim man i no wanbel wantaim meri bilong em long sampela samting, na sampela taim narapela i gat tok long narapela, tasol ol i lain pinis long karim ol dispela liklik hevi i kamap na bai dispela samting i no bagarapim marit bilong ol. Wanem sampela samting i bin helpim ol long i stap gut wantaim?—Kolosi 3:13.
2 Wanpela Kristen i marit inap 16 yia na em i tok: “Taim hevi i kamap namel long mitupela, narapela i putim yau long harim tingting bilong narapela.” Em nau, tupela i mas toktok gut wantaim na kamapim tingting bilong ol, na narapela i mas harim gut hevi bilong narapela. Wanpela meri i marit pinis inap 31 yia na em i tok: “Mitupela i save holim han, na mekim sampela amamas wantaim; em bikpela samting bilong helpim marit bilong mitupela.” Na tupela moa i bin marit inap longtaim na ol i tok, ol i save lap planti taim, na ol i save lap long ol popaia bilong ol yet na bilong poroman; man i tok, dispela i helpim ol long save long gutpela pasin wantaim pasin kranki bilong narapela, na pasin sori inap i stap yet namel long tupela. Na em i tok, em i save tokaut long popaia bilong em na tok sori long meri. Sapos ol i mekim pasin daun olsem, marit bai stap gutpela na i no ken bruk.—Filipai 2:1-4; 4:5.
Planti Senis i Kamap
3 Long nau, ol man i kisim narapela kain tingting long marit. Planti marit i save slip wantaim narapela i no poroman tru bilong em. Ol i ting i no gat rong long mekim olsem.
4 Wanpela wasman Kristen i tok: “Ol man i no bihainim moa stretpela pasin. Ol i ting stretpela pasin em i samting bilong bipo tasol.” Ol bikman bilong politik, na ol man i gat nem long spot o singsing samting, ol i no bihainim pasin i stret long ol samting bilong marit olsem Baibel i makim, na ol man i litimapim nem bilong kain man olsem. Ol i no gat tok long ol pasin sem na pasin pamuk. Ol maniman i gat biknem na namba long dispela graun ol i no strong long bihainim pasin i stret. Ol i ting dispela i samting nating. Ol i orait long planti pasin God i tambuim. Olsem na ol narapela man i bihainim pasin bilong ol dispela bikman. Pol i tok: “Ol i no save sem moa long pasin ol i save mekim. Ol i go insait tru long pasin nogut, na bel bilong ol i kirap tru long mekim ol kain kain pasin doti.”—Efesus 4:19; Sindaun 17:15; Rom 1:24-28; 1 Korin 5:11.
5 God i no senisim lo bilong em. Em i tok, man i mas maritim meri pastaim na bai tupela i ken slip wantaim, na tupela marit i no ken slip wantaim narapela poroman; dispela em i pasin pamuk.a Pol i tok: “Ol man i save mekim pasin nogut, ol bai i no inap i go insait long kingdom bilong God. Ating yupela i no save long dispela, a? Nogut yupela i giamanim bel bilong yupela yet. Ol man i save mekim pasin pamuk, na ol man i save lotu long ol giaman god, na ol man i trabel long ol marit meri, na ol man i save mekim ol kain kain pasin i gat sem wantaim ol arapela man, . . . bai i no inap i go insait long kingdom bilong God. Na bipo sampela bilong yupela i stap kain man olsem. Tasol God i wasim yupela pinis na mekim yupela i kamap lain manmeri bilong em stret. Yupela i kisim nem stretpela man pinis. Na long nem bilong Bikpela Jisas Krais na long strong bilong Spirit bilong God yet, God i mekim yupela i kamap stretpela manmeri long ai bilong en.”—1 Korin 6:9-11.
6 Pol i kolim ol pasin nogut, na nau em i tok: “Bipo sampela bilong yupela i stap kain man olsem.” Sampela ol Kristen, taim ol i no kamap Kristen yet ol i bin mekim pasin nogut, olsem pasin pamuk na ol narapela kain pasin sem. Tasol ol i kisim stretpela tingting na ol i bilip long Krais na long ofa bilong em, na ol i lusim ol dispela pasin nogut; ol i kirap bihainim laik bilong God na mekim ol pasin i stret, olsem na nau ol i stap amamas.—1 Pita 4:3, 4.
7 Ol man bilong graun i no gat wankain tingting olsem bilong God long ol pasin nogut; ol i no save tambuim tumas pasin nogut i gat sem, tasol God i putim bikpela tambu long dispela samting. Ol marit na ol singel i save mekim pasin pamuk na pasin sodom na pasin sem, na ol i kalapim lo bilong God olsem Baibel i kolim.—Kisim Bek 20:14, 17; 1 Korin 6:18.
Mas Sakim Pasin Nogut
8 Pasin sem inap i kam insait long lain Kristen tu. Dispela pasin i gat strong na i laik pulim ol Kristen tu. Rot bilong dispela pasin long kam insait i olsem: Ol piksa na stori nogut i save kamap long televisen na video, na ol stori nogut long sampela buk. Wan wan Kristen i bin pundaun long dispela samting na ol i mekim pasin pamuk o ol narapela kain pasin sem, na ol i no tanim bel, na ol i raus long lain Witnes Bilong Jehova. Tasol planti rauspela man ol i bin tanim bel na ol i kirap gen long bihainim pasin i stret, na kongrigesen i kisim bek ol.—Lukim Luk 15:11-32.
9 Satan i stap na em i laik pulim na pundaunim ol man na bagarapim ol. Baibel i tok piksa long em na i tok, em i olsem wanpela laion i raun na i laik kaikai man, olsem kaikai man i no was gut na abrusim em. Em i save giamanim ol man na grisim ol long kain kain rot. Long olgeta yia em i save pundaunim sampela Kristen. Ol man bilong graun ol i bihainim tingting bilong Satan na ol i tingting tumas long inapim ol laik nogut bilong skin bilong ol. Ol i no bosim o daunim dispela laik liklik, nogat.—Efesus 2:1, 2; 6:11, 12; 1 Pita 5:8.
10 Pasin pamuk inap long traim olgeta Kristen, maski sampela i elda, o wasman sekit, o wasman distrik, o ol manmeri i wok long Betel, o ol painia i autim tok bilong Baibel long ol man inap planti aua long olgeta mun, o papa o mama i gat bikpela wok long lukautim pikinini bilong ol na mekim bikpela long ol, o ol yangpela em wanlain bilong ol i laik pulim ol. Tingting nogut inap kirapim bel bilong ol long mekim pasin sem wantaim narapela. Olsem na Pol i tok: “Sapos wanpela man i ting em i sanap strong, orait em i mas lukaut gut. Nogut em i pundaun. Ol traim i bin kamap long yupela, ol i no ol narakain traim. Nogat. Ol i wankain olsem ol traim i save kamap long olgeta man.” Sori tumas, sampela Kristen i bin holim bikpela wok insait long kongrigesen tasol ol i no bin was gut, olsem na pasin pamuk samting i bin pulim ol na ol i pundaun.—1 Korin 10:12, 13.
Samting i Pulim na Traim Ol
11 I gat planti samting inap traim o pulim yumi long mekim pasin pamuk na bagarapim marit. Sampela brata i bin mekim ol bung bilong amamas na ol i gat planti dring. Sampela i bin laikim tumas ol musik na singsing nogut o danis nogut inap long kirapim bel bilong ol. Long Afrika sampela man bilong graun i gat planti mani na ol inap kisim planti meri, na sampela ol narapela meri i rabis long ol samting bilong skin, na ol i ting sapos ol tu i pas wantaim wanpela man olsem, ol i no ken sot moa long ol samting bilong skin, maski ol i mas mekim pasin pamuk. Na sampela man Kristen i kisim wok long ol longwe hap, na meri bilong ol i stap long ples, olsem na traim i painim ol, bai ol i stap gut long marit bilong ol o nogat. Tasol sapos ol i bin stap wantaim meri bilong ol, kain traim olsem i no inap painim ol.
12 Na Satan i gat sampela pasin moa bilong pundaunim man. Sampela man ol i bin stap klostu long wanpela meri i no meri bilong ol, na tingting nogut i kamap long ol. Ating narapela i lainim narapela long draivim ka na tupela tasol i stap insait long ka, o kain taim olsem.b Na sapos elda i go helpim wanpela sista o givim sampela tok long em, em i mas tingting gut, nogut tupela tasol i stap, na tupela i toktok i go, na samting i kamap bilong kirapim bel bilong tupela na ol i mekim pasin i no stret.—Lukim Mak 6:7; Aposel 15:40.
13 Kain traim olsem i bin painim sampela Kristen, na ol i no bin was gut, na ol i mekim pasin pamuk. Bipo tu dispela samting i bin kamap. Olsem Baibel i tok: “Bel bilong yumi olgeta wan wan i save kirap na pulim yumi. Dispela laik nogut bilong yumi yet i save grisim yumi na giamanim yumi, bilong kirapim yumi long mekim sin.”—Jems 1:14, 15; 1 Korin 5:1; Galesia 5:19-21.
14 Sampela man na meri i bin raus long lain Kristen, long wanem, ol i bin mekim pasin sem, na as bilong dispela samting ol i mekim, em ol i tingim laik bilong ol tasol. Sapos man i pamuk wantaim meri bilong narapela man, em i rongim dispela man, na em i rongim ol pikinini bilong dispela meri. Na sapos dispela man yet i marit, em i rongim meri bilong em na ol pikinini bilong em. Sapos meri i katim marit bilong ol, o dispela narapela man i katim marit bilong em, dispela bai putim bikpela hevi long ol pikinini, long wanem, pikinini i mas i gat gutpela papamama i pas gut wantaim na bai em i ken stap bel isi na amamas.—Filipai 2:1-4.
15 Long planti man o meri, pasin pamuk i no save kamap wantu tasol. Isi isi hevi i wok long kamap namel long man wantaim meri bilong em. Ating tupela i no toktok gut wantaim. Ating narapela i no tingim narapela o helpim em o sori liklik long em. Ating narapela i no inapim laik bilong narapela long taim ol i slip wantaim. Na taim wanpela i kirap mekim pasin pamuk, ating em i no bin i stap klostu long God. Em i no tingim moa Jehova i stap na i save long ol tingting na pasin yumi mekim. Long tingting bilong em, ating dispela tok “God” i olsem wanpela tok nating na yumi no gat wok long tingim God o bihainim lo bilong em long olgeta taim. Olsem na nau rot i op na bai em i brukim lo bilong God.—Song 51:3, 4; 1 Korin 7:3-5; Hibru 4:13; 11:27.
Bilong Sakim Pasin Pamuk
16 Sapos wanpela Kristen i pilim olsem pasin pamuk i laik pulim em, em i ken tingim wanem samting? Namba wan samting, em i mas tingim pasin bilong Kristen long laikim tru narapela, olsem ol lo bilong Baibel i makim. Em i no ken larim laik nogut bilong skin i kirapim em long inapim laik bilong em tasol na maski long laik bilong poroman bilong em, na maski samting em i mekim i putim hevi long poroman o sampela moa. Em i mas bosim gut skin na bihainim tingting bilong Jehova long ol samting bilong maritpasin. Em i mas tingim kongrigesen, na em i mas tingim nem bilong Jehova, nogut em i mekim sampela samting i bagarapim nem bilong kongrigesen na nem bilong Jehova. (Song 101:3) Bilong abrusim pasin nogut, em i mas bihainim tingting bilong Krais long olgeta samting em i laik mekim. Krais i bin tingim laik bilong ol narapela man, na bilong em yet nogat.—Sindaun 6:32, 33; Matyu 22:37-40; 1 Korin 13:5, 8.
17 Bilong sakim pasin nogut, Kristen i mas strongim bilip bilong em na tingim gutaim bai kamap bihain. Bilong helpim em long mekim olsem, em i ken tingim Jisas na sampela manmeri moa ol i bin holimpas lo bilong God long olgeta taim. Pol i tok: “Ol dispela manmeri bilong bipo . . . ol i soim yumi pasin bilong bilip. Olsem na yumi mas lusim olgeta kain samting i mekim yumi i no inap ran strong, na olgeta sin i save pas long yumi. Na yumi mas strongim bel na ran strong long dispela resis God i bin makim bilong yumi ran long en. Yumi mas lukluk i go long Jisas, . . . na bihain em bai inapim tru bilip bilong yumi. . . . Em i stap strong, na em i karim pen na i dai long diwai . . . Na nau em i sindaun long han sut bilong sia king bilong God.” (Hibru 12:1-3) Taim pamuk i laik pulim wanpela marit, nogut em i larim laik nogut bilong skin i bosim em na em i kirap mekim sampela samting inap bagarapim marit bilong em. Em i mas tingting gut na bihainim savepasin na abrusim pasin bilong bagarapim marit na daunim dispela laik nogut bilong skin, na em i mas wok long kamap wanbel gen wantaim poroman marit bilong em na stretim hevi i bin stap namel long tupela.—Jop 24:15.
18 Taim wanpela marit i mekim pasin pamuk, dispela em i samting nogut tru. Taim tupela i marit, i olsem ol i tok promis long narapela bai lukautim narapela na stap poroman tru na laikim tru narapela, na no ken giaman o haitim sampela rong o brukim tok promis ol i bin mekim, maski hevi i kamap namel long tupela. Tupela i mas bihainim stret dispela tok promis o kontrak em narapela i bin mekim long narapela long taim tupela i bin marit nupela, na tupela i no ken larim hevi i senisim dispela. Narapela i mas inap long bilip tru long pasin na tingting bilong narapela. Narapela i no ken rongim narapela. Baibel i kamapim tingting bilong Jehova long dispela samting, olsem: “Sapos yu no bihainim promis, yu olsem longlong man. Na God i no save amamas long dispela kain man. Olsem na yu mas bihainim promis bilong yu.”—Saveman 5:4.
19 Sapos wanpela man i tanim bel na em i kam insait long tok i tru, ol ensel long heven i amamas tru. Tasol sapos wanpela Witnes Bilong Jehova i brukim lo bilong Jehova na em i mekim pasin nogut, Satan wantaim lain bilong em i amamas tru, em ol spirit nogut wantaim lain bilong Satan long graun.—Luk 15:7; KTH 12:12.
Traim i Painim Yumi Olgeta
20 Olsem wanem? Pasin pamuk i strongpela samting tumas long pulim man na em i mas mekim? Satan na laik bilong skin i strong tumas na bai Kristen i no inap sakim? Harim gutpela tok bilong Pol: “God . . . i no inap larim wanpela bilong ol traim . . . i winim strong bilong yupela. Nogat. Sapos traim i kamap long yupela, orait God bai i wokim rot bilong helpim yupela. . . . Em bai i mekim yupela i sanap strong, na dispela traim bai i no inap daunim yupela.” Nau long dispela taim yumi no inap abrusim ol traim, tasol sapos yumi beten askim God long helpim yumi long sanap strong na givim baksait long traim, yumi inap winim ol dispela traim.—1 Korin 10:13.
21 God bai helpim yumi olsem wanem long sanap strong na winim ol traim na no ken pundaun? Olsem wanem em i ken helpim yumi ol wan wan na bai marit o famili bilong yumi i no ken bagarap na yumi no ken mekim nogut nem bilong Jehova o kongrigesen? Narapela tok i kam bihain bai toktok long ol dispela samting.
[Ol Futnot]
a Matyu 5:32 na 19:9 i toktok long “pasin pamuk,” na long tok Grik ol i kolim porneia, na i makim olgeta kain pasin sem.
b Tru, sampela taim i no gat rong long brata i stap klostu long sista; ating em i laik kisim em long ka na bringim em long hap em i laik go long en.
Yu Tingim Yet?
◻ Wanem sampela samting i ken strongim marit?
◻ Bilong wanem yumi mas sakim tingting bilong graun long wanem pasin i stret o i no stret?
◻ Wanem sampela samting inap pulim man long mekim pasin pamuk?
◻ Wanem nambawan rot bilong sakim pasin pamuk?
◻ Taim wanpela samting i traim yumi, God i save helpim yumi olsem wanem?
[Askim Bilong Stadi]
1. Planti marit i lain pinis long wanem samting na dispela i strongim marit bilong ol?
2. (a) Wanem sampela samting i ken strongim marit? (b) Wanem sampela samting inap mekim nogut long marit? (Lukim blok long pes 14.)
3, 4. Wanem kain senis nau i kamap long ol samting bilong marit? Wanem sampela pasin i no stret?
5. (a) God i ting olsem wanem long pasin pamuk? (b) Wanem ol samting i olsem “pasin pamuk”?
6. Wanem gutpela tok bilong Pol i stap long 1 Korin 6:9-11 bilong strongim bel bilong yumi?
7. Olsem wanem pasin bilong ol man i narapela kain long lo bilong God?
8. Pasin nogut inap mekim wanem long Kristen?
9. Satan i mekim wanem long ol man i no save was gut?
10. Traim inap painim husat? Bilong wanem i olsem?
11-13. Wanem sampela samting i givim rot long pasin pamuk i kamap?
14. Wanem rong inap kamap sapos man o meri i tingim laik bilong em yet tasol?
15. Ating wanem as na wanpela marit i kirap mekim pasin pamuk?
16. Kristen i ken mekim wanem bilong sakim pasin pamuk?
17. Husat ol i bin bihainim pasin i stret na i stap gut long God?
18. (a) Sapos wanpela marit i no bihainim stret lo bilong marit, olsem wanem dispela i rongim poroman bilong em? (b) God i ting olsem wanem long man i brukim tok promis bilong em?
19. Taim wanpela Witnes i pundaun, husat ol i amamas na husat ol i no amamas?
20. Olsem wanem yumi ken sakim ol traim? (2 Pita 2:9, 10)
21. Bihain bai yumi toktok long wanem ol samting?
[Blok long pes 14]
OL SAMTING I SAVE STRONGIM MARIT
◻ Bihainim gut ol lo bilong Baibel
◻ Tupela mas pas gut long Jehova
◻ Papa mas tingim mama na sori long em na harim tingting bilong em
◻ Tupela mas toktok gut wantaim long olgeta samting
◻ Narapela mas amamasim narapela
◻ Mas lap planti taim na no ken pes drai
◻ No ken haitim popaia; lusim rong bilong narapela
◻ Narapela i no ken les long laikim narapela
◻ Stap wanbel long mekim bikpela long pikinini na stretim ol
◻ Beten wantaim long Jehova
OL SAMTING I SAVE NOGUTIM MARIT
◻ Bikhet, na tingim laik bilong yu tasol
◻ Tupela i no wok gut wantaim
◻ Narapela i no toktok gut wantaim narapela
◻ Tupela i no toktok gut wantaim long ol samting tupela i laik mekim
◻ Ol i no skelim gut ol samting ol i mas baim
◻ Tupela i gat narapela narapela pasin long bosim pikinini
◻ Papa i save wok oltaim, o em i save mekim ol narapela samting na em i no tingim famili
◻ Papa i no helpim famili long ol samting bilong spirit
[Piksa long pes 15]
Sapos tupela marit i stap gut wantaim, bai ol i stap amamas