Ol i Wet na Kisim Bagarap!

TRIPELA famili, em 7-pela manmeri na 6-pela pikinini, ol i ranawe siksti i go. Maunten i bin pairap na tromoi ol ston i kam daun, na ating pastaim ol dispela lain i bin hait insait long haus na wetim dispela samting nogut i pinis. Bihain maunten i no pairap moa na tromoi ol ston i go daun. Tasol nau narapela samting nogut i kamap​—⁠maunten i tromoi sit bilong paia i go antap olsem blakpela smok. Em nau, ol dispela famili i mas ranawe i go bilong abrusim bagarap.

Wanpela man i go pas, ating em boi bilong ol, na em i karim sampela kaikai long bek. Tupela liklik manki i bihainim em. Ol narapela i bihainim ol i go​—⁠ol i pret nogut tru na pundaun nabaut na ol i wok long painim rot bilong ranawe. Ol i laik pulim win, tasol ol i pulim dispela smok nogut em sit bilong paia i pulap long en. Olgeta wan wan i pundaun long graun na ol i dai, na bihain dispela sit bilong paia i karamapim ol dispela 13-pela man meri pikinini olsem matmat bilong ol. Skin bilong ol i hait i stap inap olsem 2,000 yia, na nau ol man bilong digim graun bilong kisim save long ol samting bilong bipo ol i painim ol bun samting bilong ol na ol i kisim save long samting nogut i bin painim dispela lain.

Ol i tok, i gat olsem 16,000 manmeri i bin bagarap long biktaun Pompei long Itali taim Maunten Vesuvias i pairap long Ogas 24, long yia 79. Taim maunten i kirap long pairap, planti ol i ranawe na ol i abrusim bagarap. Tasol planti maniman ol i no laik lusim kwik ol gutpela haus na kago bilong ol, olsem na ol dispela ston na sit bilong paia i pundaun long haus bilong ol, inap olsem 6-pela mita, na i karamapim ol olgeta na ol i dai.

Planti samting bilong dispela bagarap i wankain liklik long bagarap i laik painim ol man bilong nau. Taim Maunten Vesuvias i kirap long pairap, dispela i olsem mak bilong bagarap i laik kamap. Tasol long nau i gat wanpela mak i kamap long olgeta hap, bilong toksave olsem bikpela bagarap tru i laik painim ol man bilong nau. Bilong abrusim bagarap, yumi mas kirap kwik na mekim sampela samting. Sapos yumi wet, bai yumi bagarap. Orait, wanem dispela mak? na taim yumi lukim yumi mas mekim wanem? Kaunim stori i kam bihain long dispela na bai yu ken save.

[Piksa Kredit Lain long pes 2]

Cover photo by National Park Service

[Piksa Kredit Lain long pes 3]

Soprintendenza Archeologica di Pompei