Yu Tingim?

Olsem wanem? Yu bin tingim gut tok bilong ol nupela Wastaua? Sapos olsem ating bai yu amamas long tingim bek ol dispela tok hia:

▫ I gat wanem mak bilong gutpela pasin bilong Jehova i soim ol disaipel bilong Jisas olsem Jehova i laikim ol? (Song 86:⁠17) Spirit holi i mekim na ol Kristen bilong pastaim i amamas na sanap strong taim kain kain hevi na traim i painim ol. (1 Tesalonaika 1:⁠6) Long nau tu, Jehova em i as bilong “olgeta gutpela samting yumi save kisim,” na em i amamas long “givim Holi Spirit long ol man i askim em.” (Jems 1:17; Luk 11:13) Spirit holi i givim amamas long ol disaipel bilong Jisas na em i olsem wanpela mak i soim ol, Jehova i laikim ol.​—⁠12/15, pes 18-19.

▫ Bilong wanem yumi mas kisim tingting bilong Jehova long mekim tok giaman? Song 5:6 i tok, God bai “bagarapim” ol man bilong giaman. Na Kamapim Tok Hait 21:8 i tok, ol man i mekim tok giaman bai go long “namba 2 dai.” Dispela i mas kirapim yumi long mekim tok tru tasol, na bai yumi inap kisim laip oltaim.​—⁠12/15, pes 23.

▫ Wanem lotu bilong ol Samaria? (Jon 4:20) Ol Samaria i bilip long 5-pela hap tasol bilong Baibel, olsem long Stat i go inap long Lo. Long yia 350 samting paslain long Krais, ol i sanapim wanpela haus lotu long Maunten Gerisim bambai ol man i no ken i go lotu long haus lotu bilong God long Jerusalem. Bihain ol man i bagarapim haus lotu bilong ol, tasol inap long nau ol i wokim yet bung bilong Pasova long Maunten Gerisim long olgeta yia.​—⁠1/1, pes 25.

▫ Ol Kristen i gat wanem wok long pasim ol samting i wok long bagarapim graun na wara na win? Taim Jisas i stap long graun em i no wok long stretim olgeta hevi bilong ol man. Long rot bilong Kingdom, Jehova bai kamapim stretpela pasin long graun, na pasin bilong bagarapim graun bai pinis olgeta. Olsem na ol Witnes Bilong Jehova i bihainim stretpela tingting: Ol i laikim tumas ol narapela, olsem na ol i no bagarapim samting bilong ol, tasol ol i tingim wok bilong autim tok bilong Kingdom em nambawan bikpela wok. (Matyu 6:33)​—⁠1/1, pes 31.

▫ Olsem wanem Jisas i stap olsem lait? (Jon 8:12) Jisas i givim bel long autim gutpela tok bilong Kingdom bilong God. (Luk 4:43; Jon 18:37) Na em i kamapim long ples klia ol bilip kranki bilong ol lotu giaman na dispela i helpim ol man long lusim kalabus bilong lotu giaman. (Matyu 15:​3-9) Na bikpela samting, em i dai bilong baim bek ol man. (Matyu 20:28; Jon 3:⁠16)​—⁠1/15, pes 10-11.

▫ Wanem sampela as na yumi mas daun long God Jehova? Jehova em i Bikpela King na Nambawan Bos bilong olgeta hap, na long dispela as yumi mas daun long em. Na Jehova i gat olgeta strong, na i no inap man i winim em, olsem na man i mas daun long em. Na God i wokim yumi na bai yumi mas mekim wok bilong em, olsem na yumi olgeta manmeri i mas daun long em long olgeta samting.​—⁠2/1, pes 10-11.

▫ Wanem samting i helpim Josep long sakim meri bilong Potifar na em i no mekim pasin pamuk wantaim em? Em i tingim Jehova, na em i laik i stap gut long Em, na dispela tingting i strongim em long sakim dispela meri. Na tu, em i no laik rongim man bilong dispela meri. Tasol bikpela samting, em i nolaik tru long mekim wanpela rong long God.​—⁠2/15, pes 21.

▫ Wanem insait bilong dispela tok Jisas i mekim: “Mi as bilong tok tru”? (Jon 14:⁠6) Jisas i autim tok tru, na em i bihainim tok tru. Olsem na lotu Kristen tru i no olsem wanpela lotu yumi insait nating long en, nogat; em i wanpela samting yumi mas bihainim long olgeta taim, olsem wanpela pasin o wanpela kain wokabaut.​—⁠3/1, pes 15.

▫ Song 51 i lainim yumi long wanem samting? Dispela song i helpim yumi long save, sapos yumi pundaun na mekim rong, gutpela Papa bilong yumi long heven bai helpim yumi sapos yumi tanim bel na krai long em i ken sori long yumi. Tasol bikpela samting tru, em yumi mas tingting long samting nogut em rong bilong yumi i mekim long nem bilong Jehova.​—⁠3/15, pes 18.

▫ Baptais long wara i makim wanem samting? Baptais i makim olsem ol man i givim bel tru long God. Taim ol man i go insait tru long wara, dispela i makim olsem ol i dai pinis long olpela pasin bilong ol, em pasin bilong tingim ol yet tasol. Taim ol i lusim wara na kam antap, dispela i makim olsem, nau ol i stap laip bilong mekim laik bilong God, na dispela laik i olsem namba wan samting long laip bilong ol. (Matyu 16:24)​—⁠4/1, pes 5-6.