Bilong Wanem Yumi Mas Mekim Wok Bilong Jehova?
“DE BILONG JEHOVA i kam klostu! Liklik taim ‘bikpela hevi tru’ bai kamap, na sapos yu mekim wok bilong God yu no ken bagarap.” Sapos wanpela man i tok olsem long yu, bai yu ting olsem wanem?—Sefanaia 2:2, 3; Matyu 24:21.
Tru, yumi mas tingting long de bilong Jehova na long mekim wok bilong em na bai yumi no ken bagarap. Tasol dispela i no namba wan samting i mas kirapim yumi long mekim wok bilong God Jehova. Wanem as na yu yet yu mekim wok bilong Jehova?
Mas i Gat Gutpela As
Sapos man i tingting long gutpela samting em bai kisim long bihain, na dispela tingting i as na em i mekim wok bilong God, tasol bihain em i no kisim dispela samting em i bin tingim, ating em bai lusim wok bilong God. Sampela man i bin ting Krais Jisas bai kam bek long yia 1843 o 1844, tasol em i no bin mekim olsem. Namba wan presiden bilong Sosaiti Was Taua em Charles Taze Russell, na George Storrs em pren bilong em, na Storrs i raitim wanpela tok long wanpela nius (Bible Examiner) bilong Septemba 1846 na em i tok:
“Sapos man i save, klostu nau de bilong Bikpela bai kam, na dispela tasol i kirapim em long bihainim pasin Kristen, dispela i no gutpela as na em i mekim olsem. Sapos 1846 na 1847 i kamap na i go pinis na Bikpela i no kam olsem sampela man i ting em bai kam, ol bai bel hevi nogut tru, olsem ol man i bin mekim long 1843 na 1844. Pastaim planti man i tok ol i bilip na ol i laik bihainim pasin Kristen, tasol nau ol i surik na ol i no givim bel moa long bilip olsem bipo ol i bin bilip na mekim wok bilong God na autim tok long ol man na tokim ol olsem nau em i taim bilong Krais i mas kam. Pastaim bikpela lain i bilip na ol i bihainim pasin Kristen, tasol klostu olgeta i pundaun na wan wan tasol i holimpas bilip. Olsem wanem na nau ol i no strong moa? Ol i bin tingting long ol yet tasol na dispela tasol i as na ol i bilip. Ol i olsem sinman i save em i laik i dai, na dispela tasol i mekim na em i kamap Kristen, tasol sapos em i save em i no ken i dai, em bai maski long kamap Kristen.”
Mas i Gat Gutpela As na Yumi Mekim Wok Bilong God
Sapos man i tingim laik bilong em yet tasol na dispela tasol i kirapim em long mekim wok bilong God, o em i pret long i dai na dispela tasol i kirapim em long mekim wok bilong God, ol dispela samting i no gutpela as bilong kirapim em long bihainim laik bilong Jehova. Ating sampela i amamas long i stap long Paradais, na dispela tasol i kirapim ol long mekim wok bilong God. Tasol sapos ol dispela man i harim olsem de bilong Jehova na taim bilong ‘bikpela hevi tru’ i no yet, ating ol i no ken givim bel tumas long mekim wok bilong God.
Tru, i no gat rong sapos yumi amamas long ol gutpela tok promis bilong God. Em i laik bai yumi amamas long ol gutpela samting em bai givim long ol man i save bihainim lek bilong Pikinini bilong em, em Krais Jisas. Aposel Pol i tok: “Yupela i mas amamas. Sapos hevi i kamap long yupela, orait yupela i mas sanap strong. Na yupela i mas beten long olgeta taim.” (Rom 12:12) Yumi mas beten, na yumi “mas amamas long Bikpela na bai em i strongim” na helpim yumi long karim ol hevi na bai yumi no ken les long taim yumi wetim God i truim ol tok promis bilong em. (Nehemia 8:10) Na taim yumi wet i stap, i gat planti as na yumi mas mekim wok bilong em. Wanem sampela as?
Wok Bilong Yumi
Jehova em i Nambawan Bikpela King bilong olgeta hap, olsem na em i tok, yumi mas lotu long em wanpela tasol. (Kisim Bek 20:4, 5) Olsem na olgeta Kristen i mas givim bel olgeta long God, maski ‘bikpela hevi tru’ i kamap long tumora o long yia bihain o long narapela taim bihain. Ol i mas laikim Jehova long bel na laip na tingting na strong olgeta bilong ol. (Mak 12:30) Sampela Kristen bilong bipo i bin ting de bilong Jehova bai kam long taim ol i stap yet, tasol nogat. Ol i dai, tasol ol i bin stap strong inap long ol i dai, maski ol samting ol i bin wetim i no kamap long taim bilong ol. (1 Tesalonaika 5:1-5; 2 Tesalonaika 2:1-5) Tasol sapos ol i bin stap strong inap long ol i dai, ol bai kirap bek na kisim laip long heven.—KTH 2:10.
Ol Witnes Bilong Jehova i mas i stap gut long wok bilong em, long wanem, ol yet i bin orait long bihainim laik bilong em. Ol ensel holi i save mekim laik bilong Bikpela King Jehova, na yumi tu inap mekim olsem. (Song 103:20, 21) Jisas i bin ting dispela wok i gutpela samting tru, olsem na em i tok: “Kaikai bilong mi, em long bihainim laik bilong [God] na long pinisim wok em i bin givim mi.” (Jon 4:34) Sapos yumi tu i gat wankain tingting bai yumi givim bel long litimapim nem bilong Jehova na tokim ol man long ol samting em bai mekim olsem Baibel i makim, na dispela wok bai helpim ol man long samting bilong spirit. Na sapos yumi laikim tumas Jehova, na dispela laik i kirapim yumi long mekim wok bilong em, dispela i gutpela samting, maski wanem taim de bilong Jehova bai kamap.
Amamas i As na Yumi Mekim Wok
God i bin sori long yumi, na em i givim Pikinini bilong em bilong baim bek yumi na bai yumi no ken lus, olsem na yumi mas amamas long God olsem, na dispela amamas i mas kirapim yumi long mekim wok bilong em. Yumi i sinman, na bipo yumi no inap long kam klostu long Jehova, tasol Jisas i tok: “God i gat wanpela Pikinini tasol i stap. Tasol God i laikim tumas olgeta manmeri . . . , olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim.” (Jon 3:16) Jehova yet i bin kirap mekim olsem. Pol i tok: “Yumi stap yet olsem ol manmeri bilong mekim sin, na Krais i dai bilong helpim yumi. Long dispela pasin God i bin . . . laikim yumi moa yet.” (Rom 5:8) Olsem na yumi mas givim bel long mekim wok bilong God.
Na yumi amamas tu long Jehova i lukautim yumi long ol samting bilong skin na bilong spirit. Baibel wantaim ol buk ‘gutpela wokboi’ i givim long yumi i stiaim lek bilong yumi na bai yumi ken bihainim laik bilong God. (Matyu 24:45-47; Song 119:105) Kingdom em i namba wan samting bilong yumi, olsem na Jehova i lukautim yumi long ol samting bilong skin. (Matyu 6:25-34) Yu amamas long dispela samting?
God i bin helpim yumi long lusim lotu giaman, na dispela i mas kirapim yumi long mekim gut wok bilong em. Pamukmeri Bikpela Babilon “i sindaun antap long ol bikpela wara,” olsem “ol manmeri bilong olgeta lain man na . . . kain skin na . . . tok ples.” (KTH 17:1, 15) Tasol em i no sindaun antap long lain bilong Jehova o bosim lotu bilong ol. Ol i no bilip long tok giaman olsem man i gat tewel na tewel i no inap i dai. Ol i save “God . . . i kisim graun na em i wokim man long en. Na em i winim win bilong laip i go insait long nus bilong man, na man i kisim laip,” “tasol ol man i dai pinis, ol i no inap save long wanpela samting” moa. Tasol bihain ol inap kirap bek gen. (Stat 2:7; Saveman 9:5, 10; Aposel 24:15) Lain bilong God i no save pret long tewel bilong man i dai pinis o lotu long en. Olsem wanem? Dispela gutpela save i helpim yu long givim baksait long bilip giaman na holimpas lotu bilong Jehova?—Jon 8:32.
Na long olgeta de Jehova i save sambai long yumi, olsem na yumi mas strong long mekim wok bilong em. Devit i tok: “Litimapim nem bilong Bikpela [Jehova]. Olgeta de em i save karim ol hevi bilong yumi.” (Song 68:19) Na em i tok: “Maski papa na mama i givim baksait long mi, Bikpela [Jehova] bai i lukautim mi.” (Song 27:10) Sapos yumi mekim gut wok bilong Jehova, em bai helpim yumi long karim ol hevi bilong yumi. Yu save amamas long em i mekim olsem?—Song 145:14.
Givim Biknem Long Jehova na Wok King Bilong Em
Na yumi mas i gat laik long givim biknem long Jehova, na dispela laik i mas kirapim yumi long mekim wok bilong em. Ol ensel i save mekim olsem. Ol i tok: “Bikpela [Jehova], yu God bilong mipela. Yu tasol yu stap antap tru na . . . olgeta man i ken amamas long yu na litimapim nem bilong yu na i stap aninit long . . . yu. Yu bin wokim olgeta samting. Long laik bilong yu yet . . . dispela olgeta samting i stap.” (KTH 4:11) King Devit i tokim Jehova olsem: “O Bikpela, yu God bilong . . . mipela, . . . mipela ol manmeri . . . i ken litimapim nem bilong yu oltaim oltaim. Yu gat biknem, na yu stap antap tru. Yu nambawan olgeta. . . . Olgeta samting i stap long heven na graun i bilong yu tasol. . . . Yu tasol i save givim ol planti gutpela samting long mipela. Na yu tasol yu bosim olgeta samting. . . . Nau mipela i tenkyu long yu.” (1 Stori 29:10-13) Yumi mas mekim olsem long taim yumi wet i stap long em i truim ol tok promis bilong em.—1 Korin 10:31.
Na yumi mas i gat strongpela laik long autim tok bilong Kingdom bilong God. Devit i beten long Jehova olsem: “Olgeta samting yu bin wokim bai i litimapim nem bilong yu. Na ol manmeri bilong yu bai i tenkyu long yu. Bai ol i tok long biknem bilong yu . . . na bai ol i stori long bikpela strong bilong yu . . . na bai olgeta manmeri i ken save . . . yu stap strongpela king, na nem bilong yu i bikpela tru.” (Song 145:10-13) Namba wan wok bilong ol Kristen i bilong autim tok bilong Kingdom. (Matyu 24:14; 28:19, 20) Yu gat strongpela laik long mekim olsem?
Wok bilong mekim nem bilong Jehova i stap holi na bilong stretim tok i bin kamap long wok king bilong em, dispela i mas i stap olsem nambawan bikpela samting long yumi bambai yumi gat laik long mekim wok bilong Jehova na stap gut long dispela wok. Yumi mas beten na bai nem bilong Jehova “i mas i stap holi” na ‘Kingdom bilong em i mas kam.’ (Matyu 6:9) Na yumi mas tokim ol man long ol dispela samting na long ol tok i tru.—Esekiel 36:23; 39:7.
Amamas na Belgut
Sapos yumi mekim gut wok bilong Jehova yumi ken save em bai amamas, na dispela wok bai makim Satan em i man bilong giaman. Satan i tok, yumi mekim wok bilong Jehova, long wanem, yumi tingting long em bai mekim gut long yumi, na dispela tingting tasol i as na yumi mekim wok bilong em. Tasol sapos yumi laikim tumas Jehova, na dispela i as na yumi mekim wok bilong em, dispela i makim Satan em i man bilong tok giaman. (Jop 1:8-12) Olsem na Jehova i tokim yumi: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” (Sindaun 27:11) Na sapos yumi stap strong, maski Satan i laik pulim yumi, dispela bai strongim bel bilong ol narapela brata sista.—Filipai 1:12-14.
Sapos yumi amamas long mekim wok bilong helpim ol man long i kam insait long tok i tru, dispela amamas bai strongim yumi. Jisas i bin amamas long helpim ol man long ol samting bilong spirit. “Em i skulim ol . . . [na] autim gutnius bilong kingdom bilong God, na em i . . . sori tru long ol, long wanem, tingting bilong ol i paul nabaut, . . . na em i tokim ol disaipel . . . ‘Planti kaikai tumas i mau pinis . . . tasol i no gat planti wokman i stap bilong kisim. Olsem na . . . Papa . . . bai em i salim ol wokman i go bungim kaikai bilong en.’ ” (Matyu 9:35-38) Sapos dispela wok i stap longtaim liklik na i no pinis kwik, yumi ken amamas long helpim yet ol man long ol samting bilong spirit, na yumi ken sori long ol.—Matyu 22:39.
Wanem As na Yu Mekim Wok Bilong God?
Yumi bin stori long sampela as tasol na yumi stap gut long wok bilong Jehova. Yu mas askim yu yet, ‘Wanem samting i kirapim mi na mi mekim dispela wok?’ (Rom 14:12; Hibru 4:13) Sapos yumi tingting long samting bilong helpim yumi yet, na dispela tasol i as na yumi mekim laik bilong Jehova, em i no ken orait long yumi.
Sapos yumi gat bikpela tingting long litimapim nem bilong Jehova na bihainim laik bilong em na mekim wok bilong em, na yumi no tingim laik bilong yumi yet, em bai mekim gut long wok bilong yumi! (Sindaun 10:22) Na bai yumi ken stap laip oltaim, long wanem, yumi bin mekim gut wok bilong Jehova!
[Piksa Kredit Lain long pes 8]
SIX SERMONS, by George Storrs (1855)
[Piksa long pes 9]
Planti tausen ol i mekim wok bilong Jehova long Japan
[Piksa long pes 10]
Ol i mekim wok bilong Jehova long Kot Diwa