Yumi Mas Kisim Wanem Samting Bilong i Stap Amamas?
OL BIKMAN bilong gavman i kisim wok bilong ol taim ol manmeri i votim ol na ol i wok strong bambai ol dispela manmeri i ken stap amamas. Sapos ol i no mekim olsem, ating bai ol i pinisim ol long wok. Tasol wanpela niuspepa i tok, ‘ol man i no amamas moa na ol i les pinis’ long wok politik long Polan. Wanpela man bilong raitim nius i tok, ol manmeri long Amerika ‘i no bilip moa long wok politik.’ Narapela man i raitim buk i tok ‘long Frans planti man i les pinis long wok politik.’ Dispela tingting i no stap long dispela tripela kantri tasol. Yes, planti man bilong mekim wok politik i no mekim ol man i stap amamas.
Ol bikman bilong lotu tu i promis long givim amamas long ol man, ol i tok sapos ol i no inap long kisim long dispela laip bai ol i kisim long bihain. Ol i tok yumi gat tewel o spirit i no save dai. Tasol planti man i sakim dispela bilip, na Baibel i tok klia dispela i no tru. Planti man i no go lotu moa, na dispela i kamapim klia ol i no bilip moa olsem lotu inap helpim ol long i stap amamas.—Skelim wantaim Stat 2:7, 17; Esekiel 18:4, 20.
Ol Man i Laikim Tumas Mani i No Amamas
Sapos yumi no inap painim amamas long wok politik o ol lotu, bai yumi inap painim amamas we? Ating insait long ol wok bisnis? Ol man bilong bisnis i tok, em tu i ken givim amamas long ol man. Taim ol kampani i mekim ol toksave bilong kirapim ol man long baim samting bilong ol, ol i givim tingting olsem long ol man: Bai yu stap amamas sapos yu kisim ol kain kain samting yumi ken baim long mani.
Planti man moa i laik painim amamas long dispela rot. Wanpela ripot i tok, long olgeta tupela tupela famili long Jemani wanpela i gat bikpela dinau. Olsem na niuspepa Die Zeit bilong Jemani i tok, ‘planti bilong ol i no gat rot bilong pinisim dinau bilong ol.’ Na em i tok moa: ‘I no hatwok long kisim dinau long beng—tasol i hatwok tru long bekim gen.’
Em i wankain long ol narapela kantri i gat planti bikpela bisnis. Sampela yia i go pinis, David Caplovitz, em wanpela saveman long Yunivesiti bilong Nu Yok Siti i tok, long Amerika samting olsem 20 milion inap 25 milion famili i gat bikpela dinau tru. Na dispela i bagarapim sindaun bilong ol.
Ol dispela man i no stap amamas, a? Tasol olsem wanem? Yu ting wok bisnis inap mekim ol samting em wok politik na ol lotu i no inap mekim? Maniman King Solomon i bin tok olsem: “Sapos bel bilong man i skrap long kisim planti mani, orait oltaim bai em i ting em i sot long mani. Sapos man i tingting long kamap maniman, orait olgeta samting em i kisim i no inapim em. Olsem na dispela pasin bilong laikim tumas mani samting, em i no gat as bilong en.”—Saveman 5:10.
Painim amamas long rot bilong kisim planti mani kago i olsem driman tasol. Ating em i naispela driman, tasol em i no inap kamap tru.
Olsem Wanem Yumi Inap i Stap Amamas?
Aposel Pol i tok, Jehova “i as bilong pasin tru bilong amamas.” (1 Timoti 1:11) Taim dispela God bilong amamas i wokim ol man, em i wokim ol wankain olsem em yet na bai ol tu i ken amamas. (Stat 1:26) Sapos ol i mekim laik bilong God ol inap i stap amamas olsem man i raitim Song i tok: “Ol manmeri i putim Bikpela i stap God bilong ol, ol tu i ken amamas.” (Song 144:15) Yumi mas mekim wanem bilong mekim wok bilong God? Na olsem wanem dispela i ken mekim yumi i stap amamas? Orait, sapos yumi skelim sampela bilong ol 110 skripsa bilong Baibel i toktok long “amamas” na “stap amamas” bai yumi ken save long dispela samting.
Yumi Mas Kisim Ol Samting Bilong Spirit
Taim Jisas Krais i mekim Tok Long Maunten em i tok: “Ol manmeri i save, ol i stap rabis tru long ol samting bilong God, em ol i ken amamas.” (Matyu 5:3) Ol bisnis bilong dispela graun i laik grisim yumi na bai yumi ting yumi stap amamas sapos yumi baim planti samting. Ol i tokim yumi: Bai yu stap amamas sapos yu kisim wanpela kompyuta o video-kamera o telefon o wanpela ka o nupela samting bilong mekim spot na ol gutpela gutpela klos. Tasol ol i no tokaut olsem planti milion manmeri i stap amamas maski ol i no gat ol dispela samting. Tru ol dispela samting i mekim na sindaun i kamap gutpela moa, tasol ol i no as tru bilong i stap amamas.
Olsem Pol, ol man i save ol i mas kisim ol samting bilong spirit, ol i tok: “Sapos yumi gat kaikai na laplap samting, orait yumi ken tok, ‘Em inap long mi.’ ” (1 Timoti 6:8) Bilong wanem yumi ken tok olsem? Long wanem, ol samting bilong spirit yumi kisim i helpim yumi long kisim laip oltaim.—Jon 17:3.
Olsem wanem? Yumi gat rong sapos yumi gat mani bilong baim ol gutpela samting, na yumi amamas long kisim ol dispela samting? Ating nogat. Tasol sapos yumi no baim ol kain kain samting, maski yumi gat mani bilong baim, dispela i ken strongim yumi long samting bilong spirit. Long dispela rot yumi ken lain long amamas long liklik samting na stap amamas olsem Jisas, em i no gat planti samting olsem ol man bilong dispela graun. (Matyu 8:20) Na Pol i no bel hevi taim em i tok: “Mi save pinis long pasin bilong i stap isi, maski wanem kain samting i kamap long mi. Maski mi stap rabis tru o mi gat planti samting, mi save stap isi tasol. . . . maski mi gat planti kaikai o mi stap hangre, na maski mi gat planti samting o mi sot long ol samting. Olgeta kain samting i ken kamap long mi na mi save stap isi yet na belgut tasol.”—Filipai 4:11, 12.
Bilip Tru Long Jehova
Man i tingim tru ol samting em i mas kisim bilong stap gut long spirit em i bilip tru long God. Dispela bai mekim em i amamas, olsem King Solomon i tok: “Sapos man i bilip strong long [Jehova], bai em i ken amamas.”—Sindaun 16:20.
Yumi lukim planti man i bilip long mani na ol samting bilong ol, tasol ol i no bilip long God, a? Yumi tingim dispela samting na yumi ken save i no gutpela sapos yumi raitim long mani “Long God Mipela Bilip Strong”; tasol dispela tok i stap long mani bilong Amerika.
King Solomon i no sot long wanpela samting yumi ken baim long mani, tasol em i save man i bilip long mani kago i no stap amamas long olgeta taim. (Saveman 5:12-15) Mani yumi putim long beng i ken lus taim beng i bruk o taim mani i lusim strong bilong en. Ol haus inap bagarap long taim bilong bikpela win samting. Ol insurens inap bekim sampela mani, tasol ol i no ken stretim bel hevi yumi kisim. Ol sea samting inap long bagarap kwiktaim sapos bikpela hevi i kamap long stok-maket. Maski man i holim wok i gat bikpela pe, planti samting inap kamap na wok i pinis.
Olsem na ol man i bilip tru long Jehova, ol i save i gutpela sapos ol i bihainim dispela tok bilong Jisas: “Yupela i no ken bungim ol gutpela gutpela samting bilong yupela hia long dispela graun. Long dispela graun ol binatang na ros i save bagarapim ol samting, na ol stilman i save brukim banis na stilim. Tasol yupela i mas bungim ol gutpela samting bilong yupela long heven. Long heven ol binatang na ros i no save bagarapim ol samting, na ol stilman i no save brukim banis na stilim.”—Matyu 6:19, 20.
Sapos yumi bilip tru long God I Gat Olgeta Strong bai yumi i stap amamas na bel isi tru, long wanem, yumi save em i lukautim yumi, a?—Song 94:14; Hibru 13:5, 6.
Bihainim Tok Bilong Stretim Yu
Yumi amamas sapos wanpela gutpela pren i stretim yumi o givim strongpela tok long yumi long pasin sori. Wanpela man em i tok em i pren bilong Jop, em i tokim Jop: “Sapos God . . . i stretim pasin bilong wanpela man, orait dispela man i ken belgut.” Em i trupela tok, tasol taim Elifas i mekim dispela tok, em i sutim tok olsem Jop i bin mekim bikpela rong—tasol em i no bin mekim. Elifas i no strongim bel bilong Jop! Bihain taim Jehova i stretim Jop long pasin sori, long pasin daun Jop i bihainim dispela tok, na dispela i opim rot na bai em inap i stap amamas moa.—Jop 5:17; 16:2; 42:6, 10-17.
Long nau God i no save toktok wantaim ol wokboi bilong em olsem em i mekim bipo long Jop. Tasol em i stretim yumi long rot bilong Baibel na oganaisesen bilong em. Ol Kristen i wok strong long kisim planti mani kago, planti taim ol i no gat taim, o strong, o laik long stadi long Baibel na go long olgeta miting, em oganaisesen bilong Jehova i redim.
Sapos God i stretim yumi em i gutpela samting bilong helpim yumi olsem Sindaun 3:11-18 i tok: “Pikinini, sapos Bikpela i mekim wanpela samting long yu bilong stretim yu, yu no ken kros na bel nogut. Long wanem, Bikpela i save stretim ol man em i laikim tumas, . . . Man i kisim gutpela tingting na save, em i ken amamas tru, long wanem, gutpela na stretpela tingting i winim tru silva na gol . . . Gutpela tingting bai i helpim yu na yu inap i stap longpela taim long graun. . . . Gutpela tingting bai i mekim yu belgut oltaim na mekim sindaun bilong yu i kamap gutpela.”
Pasin i Klin na Bel Isi
Jisas i tok, ol man i stap amamas “bel bilong ol i klin” na ol “i save mekim i dai ol kros na pait.” (Matyu 5:8, 9) Tasol long dispela graun bilong laikim tumas mani kago, kwiktaim pasin bilong tingim yumi yet tasol na laik nogut inap long kamap long bel bilong yumi! Sapos yumi no larim gutpela tingting bilong God i stiaim yumi, ating laik long kisim bikpela mani inap grisim yumi long mekim samting i no stret. Na bai yumi no stap bel isi wantaim ol narapela! Olsem na dispela tok i stret: “Pasin bilong laikim tumas mani em i as bilong olgeta pasin nogut. Sampela man ol i bin laikim tumas mani, na dispela pasin i pulim ol na ol i lusim bilip pinis.”—1 Timoti 6:10.
Pasin bilong laikim tumas mani i kamapim pasin bilong mangal na man i no amamas. Nogut dispela kain pasin i kamap long yumi, olsem na taim sampela Kristen i bin tingting long baim wanpela bikpela samting ol i skelim ol dispela askim: Mi sot tru long dispela samting o nogat? Mi mas baim dispela samting i gat bikpela pe? O mi mas kisim dispela wok i gat gutpela pe? Olsem wanem long ol man i no gat ol dispela samting? Mi inap mekim gutpela wok moa long mani bilong mi sapos mi helpim wok bilong trupela lotu o wok autim tok, o ol man i no gat planti samting?
Stap Strong i Go i Go
Traim i bin painim Jop taim ol i stilim olgeta samting bilong em na em i stap rabis. (Jop 1:14-17) Maski wanem hevi i painim yumi, yumi mas lain long sanap strong. Sampela Kristen i mas karim hevi taim ol man i mekim nogut long ol, sampela i gat ol traim, na sampela i sot tru long kaikai na mani samting. Tasol sapos yumi sanap strong Jehova bai blesim yumi olsem disaipel Kristen Jems i tok long Jop: “Ol man i bin strongim bel na karim hevi, ol i save stap gut na amamas i stap.”—Jems 5:11.
Sapos yumi lusim sampela wok bilong spirit bilong kisim sampela samting moa bilong skin, ating em i helpim yumi inap liklik taim tasol. Tasol dispela pasin i no inap strongim bilip bilong yumi long wetim ol gutpela samting bai yumi kisim long Kingdom bilong God, a?—2 Korin 4:18.
Stap Amamas Nau na Long Olgeta Taim Bihain
Sampela man i no wanbel long rot Jehova i makim bilong mekim ol man i stap amamas. Ol i ting sapos ol i mekim ol samting God i tokim ol long mekim, dispela i no inap helpim ol long nau, tasol ol i no luksave ol dispela samting bai helpim ol long bihain. Na ol i no kisim save olsem sapos ol i bilip long mani kago, dispela i no inap helpim ol, na bihain bai ol i bel hevi. Olsem na tok bilong Baibel i stret: “Sapos pe bilong man i wok long go antap, orait planti wantok bai i wok long kam na stap wantaim em. Olsem na dispela man inap lukim ol mani samting bilong em, tasol em i no inap baim ol samting.” (Saveman 5:11; lukim tu Saveman 2:4-11; 7:12.) Hariap yumi no tingim moa ol samting pastaim yumi bin ting em i bikpela samting na yumi mas baim. Na bihain dispela samting i stap nating na i no gat wok bilong en!
Trupela Kristen i no larim ol narapela man i subim em long resis wantaim ol wantok long kisim planti samting bilong skin. Em i save ol mani kago bilong yumi i no bikpela samting tru, nogat. Bikpela samting, em pasin bilong yumi. Na em i save tru long rot bilong yumi man i ken i stap amamas: yumi mas stap gut wantaim Jehova na mekim wok bilong em long olgeta taim.
[Piksa long pes 20]
Mani kago tasol i no inap long givim amamas oltaim long yumi
[Piksa long pes 22]
Baibel i tok: “Ol manmeri i save, ol i stap rabis tru long ol samting bilong God, em ol i ken amamas.”