Tok Bilong Baibel i Stret o Nogat?

Yu ting olsem wanem long Baibel? Sampela i ting em i tok God i givim long ol man. Tasol sampela i ting em i buk nating. Na sampela i no save Baibel i bilong mekim wanem. Sapos yu no save long as bilong Baibel, gutpela yu skelim tok bilong en na bai yu ken save.

INAP long yia 1700 samting ol man bilong lotu i gat nem Kristen ol i save givim biknem long Baibel, tasol bihain long yia 1800 planti tisa bilong lotu na bikman bilong misin i tok, ol i ting tok bilong Baibel i no stret.

Olsem na long nau planti man i no bilip tumas long tok bilong Baibel, maski ol yet i no bin skelim tok bilong en. Insait long ol kantri ol i kolim Kristen, planti man i givim bel long tok bilong ol saveman bilong graun. Tasol save bilong ol i no kamapim gutaim long graun. Pasin nogut i pulap long graun na ol man i no stap amamas tumas. Olsem na yumi mas skelim tok bilong Baibel na bai yumi ken save, sapos man i bihainim, dispela bai helpim man long i stap amamas na stap gut o nogat.

Na i gat narapela as tu na yumi laik save, Baibel i tok tru o nogat; em i olsem: Baibel i tok, bihain gutaim bai kamap long graun na ol man bai i gat gutpela sindaun tru. Yumi laik save, dispela tok i tru o nogat. Song 37:29 i tok: “Ol stretpela man bai i kisim graun God i givim ol, na bai ol i stap oltaim long en.” (KTH 21:​3-5) Kain tok promis olsem i save mekim wanem long yumi? Em i kirapim yumi long skelim gut ol tok bilong Baibel na bai yumi ken bilipim gut tok bilong en, a?

Long olgeta taim dispela magasin Wastaua i bin bihainim tok i tru bilong Baibel na kolim ol samting i makim tok bilong Baibel i tok stret. I gat sampela rot na bai yumi ken skelim tok bilong en. Sampela Wastaua i bin stori long dispela samting na i helpim yumi long bekim ol askim olsem: Tok bilong Baibel i stret wantaim ol samting i bin kamap bipo? Ol tok profet bilong en i stret? Yumi inap bihainim ol tok bilong en? Ol saveman inap tingim wanpela tok bilong en i no stret long yumi bilong nau i bihainim?

Na ol samting bilong graun tu inap helpim yumi long skelim tok bilong Baibel, i stret o nogat. Na stori bilong Baibel long dispela graun, em i stret tru, maski em i pait wantaim stori bilong ol haiden. Bipo ol haiden i tok, i gat wanpela ples ol daiman i stap long en. Wanpela buk (A Guide to the Gods) i stori long bilip bilong ol Grik bilong bipo na i tok, ‘Ol i bin ting graun i stretpela na solwara i banisim, na sapos yumi kalapim solwara na i go long hap, i gat narapela graun i stap na em i tudak na ol diwai i no save karim kaikai.’ Bihain ol man i save dispela stori i giaman, na nau ol i senisim na i tok, dispela ples i no stap long hapsait bilong solwara, nogat; em i stap insait long graun, na i gat ol hul olsem rot bilong i go long en. Buk bilong Richard Carlyon i stori olsem. Tasol long nau yumi save dispela tok i no stret.

Tasol Baibel i no tok, graun i stretpela, nogat. Baibel i gat trupela tok bilong saiens na i tok, graun i raunpela na i hangamap nating. (Jop 26:7; Aisaia 40:22) Na olsem wanem long ol hap bilong graun em Baibel i stori long en? Ol dispela hap i stap tru na yumi inap i go lukim? Sapos yumi go lukim kantri Isip, na Sainai, na Israel bilong nau, em ol hap Baibel i kolim, bai yumi inap tingim stret ol samting i bin kamap bipo long ol dispela hap, olsem Baibel i kolim?

[Piksa long pes 3]

“Bikpela . . . i sindaun long sia king bilong en antap long skai.”​—⁠Aisaia 40:⁠22

“God i bin mekim dispela graun i hangamap nating.”​—⁠Jop 26:⁠7.