“Mipela No Inap Toktok Gut Wantaim!”

MAIKEL em wanpela loya, na em i man bilong toktok wantaim ol man, long wanem, dispela em wok bilong em. Tasol taim em i marit inap 16 yia pinis Maikel i tok: “Taim mi kam bek long haus long apinun, mi no inap toktok gut wantaim meri bilong mi Adrian. Em i save toktok planti long ol samting na sutim tok long mi. Mipela i save tok kros na tok pait long olgeta taim, na mi ting dispela bai bagarapim mipela. Mi ting dispela kain marit i no gutpela marit. Sapos mipela i mas mekim olsem tasol, mi laik lusim meri. Mi no inap i stap olsem tasol inap 20 o 30 o 40 yia moa.”

Tasol i no Maikel na Adrian tasol i stap olsem. Planti marit i save tok resis na tok kros wantaim olsem tupela hia i save mekim. Taim tupela marit i kirap long toktok wantaim long sampela samting, kwiktaim kros i kamap. Narapela i ting narapela i bin mekim wanpela tok i sutim em, tasol em i no mekim. Na maus bilong narapela i autim nating sampela tok na dispela i skrapim bel bilong narapela. Narapela i sutim tok long narapela, na nau tupela i no toktok moa wantaim. Ol i stap yet wantaim na ol i no brukim marit, tasol ol i no stap wanbel. Tupela i no stap olsem “wanpela bodi tasol” olsem Baibel i tok ol marit i mas mekim. (Stat 2:24) Ol i stap nogut tru. Ol i no laik katim marit, tasol ol i no laik toktok gut wantaim na stretim kros o hevi bilong ol na kamap wanbel gen olsem long taim ol i marit nupela, nogat. Olsem na ol i stap olsem tasol na bel na tingting na laik bilong narapela i stap longwe long bel na tingting na laik bilong narapela.

Ol dispela marit i mas kisim “gutpela tingting long ol gutpela rot ol i ken bihainim.” (Sindaun 1:⁠5) Baibel inap givim dispela gutpela tingting long ol. Baibel i gutpela “bilong skulim yumi long tok tru na bilong stretim ol manmeri tingting bilong ol i no stret.” (2 Timoti 3:16) Orait, nau bai yu save, olsem wanem tok bilong Baibel i ken helpim ol marit long toktok gut wantaim.