Sampela Ples Long Graun Bilong Promis

Gilead—Hap Bilong Ol Man i Gat Strongpela Bel

TAIM ol Israel i redi long brukim Wara Jordan na i go insait long Graun Bilong Promis, Moses i tokim ol: “Yupela i mas sanap strong . . . God, Bikpela bilong yumi, bai i stap wantaim yupela.”​—⁠Lo 31:⁠6.

Lain bilong Ruben na Gat na hap lain bilong Manase ol tu i mas harim dispela tok bilong Moses. Ol i bin lukim graun bilong Gileat i gutpela bilong ol sipsip samting bilong ol, olsem na ol i tok ol i laik sindaun long dispela hap.​—⁠Namba 32:​1-40.

Gileat i stap long hapsait bilong Wara Jordan long hap is, kirap long hap not bilong Raunwara Detsi na i go inap long Raunwara Galili. Dispela hap i kirap long Ples Daun Bilong Jordan na i go antap long ol ples i gat stretpela graun na ol liklik maunten na i gat planti wara long en. Olsem na Gileat i gutpela ples bilong planim wit o kon na bilong lukautim ol bulmakau sipsip samting. Lukim piksa antap na yu ken save Gileat em i wanem kain ples. Tasol bilong wanem ol Israel i mas strongim bel bilong go insait long dispela gutpela hap?

I no olsem ol i pret na ol i laik sindaun long Gileat, nogat. Ol i orait pinis long brukim Wara Jordan na mekim pait long ol birua i sindaun long Graun Bilong Promis. Na taim ol i kam bek long Gileat ol i mas i gat strongpela bel, long wanem, bai ol i stap long ples klia na ol Amon long hap bilong saut-is na ol Siria long hap bilong not ol inap i kam pait long ol. Na tru tumas, ol Amon na Siria i kam pait long ol.​—⁠Josua 22:9; Hetman 10:​7, 8; 1 Samuel 11:1; 2 King 8:28; 9:14; 10:​32, 33.

Long kain taim olsem, ol i mas strongim bel. Taim Jehova i larim ol Amon i daunim ol Gileat na givim hevi long ol, ol i tanim bel na ol i kisim wanpela hetman, em i “strongpela man bilong pait,” nem bilong em Jepta. Papa bilong em, nem bilong em Gileat. Jepta i bin mekim wanpela tok promis i kamapim klia olsem em i laik bai God i soim rot long em na helpim em, maski em i strongpela man. Jepta i tok, sapos God i helpim em long daunim ol Amon, orait, husat man o meri i kam ausait bilong bungim em, Jepta bai givim em long God ‘olsem ofa bilong paia i kukim olgeta.’a Orait, pikinini meri bilong Jepta i kam ausait pastaim, em wanpela pikinini tasol bilong em. Bihain pikinini meri i go mekim wok long haus lotu bilong God. Em nau, Jepta na pikinini meri bilong em tu ol i gat strongpela bel.​—⁠Hetman 11:​1, 4-40.

Taim Sol i kamap king, ol Amon i tok ol bai kamautim wanpela ai bilong ol man bilong Jabes-gileat. Kwiktaim Sol i bungim ami bilong em bilong strongim Jabes. (1 Samuel 11:​1-11) Orait, nau yumi ken stori long taim Sol i laik pinis long mekim wok king na bai yumi ken save long wanpela man i gat strongpela bel.

Sol i bin pait long ol Filistia na em wantaim tripela pikinini man bilong em ol i dai. Ol birua i katim het bilong Sol na hangamapim skin bilong em wantaim tripela pikinini man long banis bilong taun Betsan. (1 Samuel 31:​1-10; long han sut long ples ol i kamautim graun long en, em bipo taun Betsan i stap long en.) Tok bilong dispela i kamap long Jabes, long ples maunten bilong Gileat long hapsait bilong Wara Jordan. Lain bilong Gileat bai mekim wanem bilong sakim dispela strongpela lain birua i bin bagarapim king bilong Israel?

Lukim mep i makim rot ol Gileat i bihainim. “Ol strongpela strongpela man bilong Jabes i wokabaut long nait na i go kamap long Betsan. Na ol i . . . kisim bodi bilong Sol na bilong ol pikinini man bilong en, na karim i kam long Jabes.” (1 Samuel 31:12) Ol Jabes i mas i gat strongpela bel bilong i go insait long ples bilong ol birua. Olsem na Baibel i kolim ol olsem strongpela man.

Bihain lain Israel i bruk na 10-pela lain i kamap olsem Israel long hap bilong not, na graun bilong Gileat i insait long en. Ol Siria na bihain Asiria, ol i wok long kisim sampela hap graun bilong ol long hap is bilong Wara Jordan. Olsem na maski bipo ol Gileat i gat strongpela bel na ol i sanap strong, nau ol i kisim nogut, long wanem, ol i stap klostu long mak bilong ol birua.​—⁠1 King 22:​1-3; 2 King 15:⁠29.

[Ol Futnot]

[Piksa Kredit Lain long pes 8]

Pictorial Archive (Near Eastern History) Est.

[Piksa Kredit Lain long pes 9]

Pictorial Archive (Near Eastern History) Est.

[Mep long pes 8]

RAUNWARA GALILI

RAUNWARA DETSI

Wara Jordan

Betsan

Ramot-gileat

Jabes

GILEAT

[Kredit Lain]

Based on a map copyrighted by Pictorial Archive (Near Eastern History) Est. and Survey of Israel.