Ol Yangpela Ol i ‘Bilip Long Jehova’
I NO ol yangpela tasol i gutpela long ai bilong Jehova, na i no ol lapun tasol i gat gutpela save na tingting. (Lukim Sindaun 11:22; Saveman 10:1.) Ol man i gutpela long ai bilong Jehova na ol i gat gutpela tingting, em ol man i bilip tru long Jehova na ol i givim bel long tokim em: “Yu God bilong mi.”—Song 31:14; Sindaun 9:10; 16:31.
Long olgeta hap i gat planti manmeri i gutpela tru long ai bilong Jehova, em ol yangpela na ol lapun, na ol i kamapim gutpela tingting bilong ol na ol i mekim wok bilong God na autim gutpela tok bilong Kingdom bilong em, olsem Sabrina i mekim; em i gat 8-pela krismas.
Sabrina i bilong Jemani na em i stap long gret 2 long skul. Em i namba wan Witnes Bilong Jehova i bin i go long dispela skul, na ol narapela pikinini i tok bilas long em i go inap long taim wanpela samting i bin kamap. Tisa i tokim ol long kisim wanpela buk ol i save laikim na bringim tumora long skul. Long nait Sabrina i redim stori bilong buk Baibel Stori Buk Bilong Mi. Em i kisim i go long skul, na em i pret liklik. I gat 26 pikinini i stap, na em i ting em i no gat bikpela hap taim bilong kamapim tok bilong em. Tasol em i strong na em i tingim Jehova bai helpim em. Tisa i tok, husat i bin karim buk i kam na em i laik toktok pastaim long buk bilong em? Tasol i no gat wanpela i bin kisim buk i kam—Sabrina tasol. Em i sanap na stori long dispela buk na soim ol piksa long ol na tokim ol em Baibel i as bilong ol dispela tok. Stori pinis, na nau em i askim ol: “Husat i laikim wanpela buk olsem?” Em i givim wanpela long tisa, na sampela de bihain em i givim 10-pela long ol narapela pikinini. Tisa i tok: “Bipo mi no bin lukim o harim kain samting olsem.” Tisa i givim mak A long Sabrina, long wanem, em i winim ol narapela.
Planti yangpela Witnes i kamap pablisa na ol i amamas long autim tok long skul. Erika i bilong Meksiko na em i gat 11-pela krismas. Taim em i liklik yet papamama i bin lainim em long laikim Jehova. Em i mekim gutpela wok long skul. Tisa i tokim em long raitim wanpela stori long sik AIDS na long tabak na dring. Em i lukim sampela tok long Kirap! na em i raitim stori bilong ol dispela samting, na stori bilong em i win. Tisa i askim em, em i bin kisim we ol dispela save. Erika i givim sampela Kirap! long em i gat ol dispela kain tok long en. Bihain tisa i skulim ol pikinini long dispela ol samting na em i kisim tok bilong en long ol dispela Kirap! Erika i gat gutpela pasin, na em i daun long ol tisa, na em i mekim gutpela wok na kisim bikpela mak long skul, olsem na ol i laik givim prais na namba long em bilong i go long bikpela skul. Tasol samting em i moa amamas long en i olsem: Em i bin kamapim long ples klia olsem em i wanpela Witnes Bilong Jehova, na em i bin tilim ol buk samting bilong Baibel long skul, na em i litimapim nem bilong God.
Na i gat wanpela manki nem bilong em Shannon, bilong Nu Silan. Em i gat 10-pela krismas, na wanpela ai tasol i gutpela. Sik kensa i bin bagarapim narapela ai long taim em i liklik yet. Taim em i gat 7-pela krismas mama bilong em i kirap long stadim Baibel wantaim ol Witnes Bilong Jehova, tasol bihain liklik, mama i prenim wanpela man na tupela i sindaun wantaim, tasol tupela i no marit, na nau mama i lusim stadi. Tasol Shannon i krai long stadi, na mama i orait long em i ken stadi. Oltaim ol Witnes i go lukim ol, na bihain 3-pela wantaim i stadi na kamap strong long spirit, na mama i maritim dispela man na tupela i kisim baptais.
Wanpela taim Shannon wantaim meri bilong wasman sekit i raun autim tok, na wanpela man i askim Shannon: “Olsem wanem long ai bilong yu?” Shannon i tok: “Em i gat sik kensa na ol i rausim, tasol klostu nau Paradais bai kamap na Jehova bai givim nupela ai long mi, na mipela i kam bilong tokim yu long dispela samting.”