Lotuim God Long Pasin i Tru

Bilong God i ken orait long pasin bilong yumi long lotuim em, tok i tru i mas i stap olsem as bilong en. (Jon 4:23) Baibel i tok long ol Kristen tru olsem ‘ol i bilong ol lain bilong God, ol i stap sios bilong God bilong i stap oltaim, na dispela sios i olsem strongpela pos i karim tok tru.’ (1 Timoti 3:15) Ol man i insait long kongrigesen bilong God ol i bilip long tok i tru i stap long Baibel, na tu, ol i bihainim na helpim tok i tru, na ol i autim long olgeta hap bilong graun.—⁠Matyu 24:14; Rom 10:9–15.

PLANTI man i save long ol Witnes Bilong Jehova, long wanem, ol i save wok strong long skulim ol man long Baibel, em nau ol i mekim long 200 samting kantri. Ol i save stadi long Baibel na skulim ol man olsem em i tok i tru, na ol i no save abusim wantaim sampela tingting bilong ol man yet. Olsem wanem? Yu pilim tru ol tok bilong Baibel ol i skulim ol man long en? Planti ol i no laik long harim tok bilong ol Witnes Bilong Jehova, long wanem, ol i save harim ol tok i no stret ol man i save mekim long ol Witnes. Tasol ol man i gat gutpela bel, ol Witnes i laik bai ol yet i ken skelim bilong save olsem tok ol Witnes i autim em tok i tru o nogat. Dispela em bikpela samting tru, olsem na man i no ken harim tasol ol tok win na bilip nating long en. Planti man em ol yet i bin wok strong long kisim sampela save moa long ol tok ol Witnes Bilong Jehova i save skulim ol man long en na dispela i bin helpim ol tru.

Ol i Save Long Tok i Tru na Ol i No Pret Moa

Yumi ken tingim Eugenia. Em i bin go bikpela insait long famili i save strong long i go long lotu Katolik. Papa bilong Eugenia em wanpela bilong ol man i bin stretim ol samting bambai pop i ken i go raun long Meksiko long 1979. Wanpela taim Eugenia i go lukim ol pren bilong em na em i bungim ol Witnes Bilong Jehova. Ol Witnes i helpim em na em i kirap skelim gut ol samting em Baibel i toktok long en. Em i tok: “Pastaim, mi pret nogut tru. Mi painim pinis tok i tru! Tasol dispela i makim olsem planti bilip bilong mi long pastaim ol i no stret. Dispela bilip ol famili na pren bilong mi i holim, em i no stret. Em nau, mi pret. Mi wok long askim mi yet olsem, famili bilong mi bai ting olsem wanem long dispela nupela bilip mi kisim save long en. Sampela de i lus na Jehova i helpim mi na bel bilong mi i stap isi long dispela nupela samting i painim mi. Wanpela taim, long pasin hait mi toktok wantaim wanpela pren bilong famili bilong mi, em i wanpela saveman bilong lotu. Mi tokim em long olgeta laik bilong mi long painim tok i tru. Na em i tokim mi, ‘Sapos yu laik save long tok i tru, orait go lukim ol Witnes Bilong Jehova.’ ”

Dispela samting Eugenia i bin pret long en, em i kamap tru. Famili bilong em i rausim em long haus. Tasol ol Witnes i helpim yet Eugenia long ol samting bilong spirit. Em i tok: “Ol i strongim mi long holimpas yet tok i tru. Mi save olsem dispela em gutpela samting tru na mi mas strong tru long holimpas. Ol Witnes Bilong Jehova i amamas long mi bung wantaim ol na ol i mekim gut long mi, na dispela i bikpela samting long mi. Mi pilim olsem ol brata sista long kongrigesen Kristen i laikim mi tru. Taim mi pas wantaim oganaisesen bilong God, dispela i helpim mi long winim pret bilong i stap wanpis.”

Yumi ken tingim narapela stori. Sabrina i go bikpela long wanpela famili em long olgeta taim ol i save stori wantaim long Baibel. Na ol i kamapim wanpela ‘lotu bilong famili yet.’ Em i save bung wantaim ol lain bilong narapela narapela lotu na bai em i ken kamapim ol popaia bilong ol. Taim wanpela Witnes Bilong Jehova i laik mekim stadi Baibel wantaim em, em i amamas, tasol as tingting bilong em i bilong painim ol popaia na bai em i ken tok dispela bilip i no stret. Em i tok: “Taim mi stadi inap wanpela yia samting, mi pret, nogut mi lusim ‘tok i tru bilong mi.’ Planti lotu em mi bin bung wantaim ol, i no hatwok long mi long kamapim giaman bilong ol, tasol i hatwok long mekim olsem long ol Witnes.”

Sabrina i pret na bihain em i no stadi moa long Baibel wantaim ol Witnes Bilong Jehova. Tasol em i pilim olsem em i no kisim moa ol samting bilong spirit. Em i kirap stadi gen na nau em i amamas long dispela nupela tok i tru em i kisim save long en. Sabrina i wok long kamap strong na em i laik kirap autim tok long ol narapela long ol samting em i lainim. Na em i tokim ol Witnes long em i laik i go wantaim ol na autim tok long ol haus. Sabrina i stori olsem: “Pastaim long mi kisim tok orait long autim tok wantaim ol Witnes Bilong Jehova, ol i askim mi: ‘Tru tru yu laik kamap wanpela Witnes Bilong Jehova?’ Mi bekim tok olsem, ‘Nogat!’ Mi kirap pret gen.” Tasol Sabrina i wok yet long i go long olgeta miting na lukim ol lain bilong God na pasin bilong ol long bihainim ol lo bilong Baibel, na nau em i save olsem dispela em tok i tru. Em i kisim baptais na nau em i save autim tok long olgeta de.

Olsem Wanem na Em i Narapela Kain Tru?

Ating sampela bai tok, ‘Olsem wanem na ol tok ol Witnes i skulim ol man long en i narapela kain long ol narapela lotu?’ Orait yumi ken stori liklik long sampela bilip bilong ol Witnes na dispela bai helpim yu long save olsem ol i gutpela Kristen, na ol i save givim bel long stadi long Baibel. Mipela i laik kirapim yu long skelim long Baibel bilong yu ol tok bilong Baibel mipela i raitim wantaim sampela bilip bilong ol.

Taim yu skelim gut ol samting em ol Witnes Bilong Jehova i bilip long en na olsem wanem ol i save bihainim ol tok em Baibel i skulim ol long en, orait yu inap kisim blesing bilong i stap fri em tok i tru i save kamapim. (Jon 17:17) I no gat as na yu inap pret long tok i tru. Tingim tok promis bilong Jisas, em i tok: “Yupela bai i save long tok tru, na tok tru bai i mekim yupela i kamap fri.”​—⁠Jon 8:⁠32.

[Blok long pes 6]

SAMPELA AS BILIP BILONG OL WITNES BILONG JEHOVA

◯ Jehova em God i Gat Olgeta Strong. Nem bilong em i stap olsem 7,000 taim long ol olpela rait bilong Baibel.​—⁠Song 83:⁠18.

◯ Krais Jisas em Pikinini bilong God, na em i bin kam long graun bilong givim laip bilong em bilong helpim ol manmeri. (Jon 3:​16, 17) Ol Witnes Bilong Jehova i save bihainim ol tok em Jisas i skulim ol long en i stap long hap bilong Baibel em ol i kolim Gutnius.

◯ Dispela nem, ol Witnes Bilong Jehova, ol i kisim long Aisaia 43:​10 (NW), em i tok olsem: “Jehova i tok: ‘Yupela i witnes bilong mi.’ ”

◯ Dispela Kingdom em ol man i save beten long en long beten bilong Bikpela, em i wanpela gavman bilong heven na liklik taim em bai pinisim olgeta pen na hevi long graun na kamapim Paradais olsem Baibel i tok promis long en.​—⁠Aisaia 9:​6, 7; Daniel 2:​44; Matyu 6:​9, 10; KTH 21:​3, 4.

◯ Olgeta man i save mekim laik bilong God bai i gat rot long kisim ol blesing oltaim oltaim em Kingdom bai kamapim.​—⁠Jon 17:3; 1 Jon 2:​17.

◯ Ol Kristen i mas mekim pasin bilong ol i kamap wankain olsem Baibel i tok. Ol i mas mekim stretpela pasin, bihainim klinpela pasin, mekim gutpela pasin, na ol i mas laikim tru ol narapela i stap klostu long ol.​—⁠Matyu 22:39; Jon 13:35; 1 Korin 6:​9, 10.

[Piksa long pes 5]

Ol Witnes Bilong Jehova i save autim tok i tru bilong Baibel long ol manmeri long 200 samting kantri