Ripot Long Wok Bilong Kingdom
Man i Stap Strong Bai Kisim Prais
JISAS i tok, ol man bai mekim nogut long lain bilong em, na Pol tu i tok olsem. Em i tok: “Olgeta man i laik pas wantaim Krais Jisas na i bihainim pasin bilong God, ol man bai i mekim nogut long ol.” (2 Timoti 3:12) Tasol sapos yumi stap strong long wok bilong God Jehova em bai mekim gut long yumi.
◻ Wanpela man bilong lotu Buda long wanpela taun long Malesia em i strong long lainim 3-pela pikinini meri na 3-pela pikinini man bilong em long lotu Buda, tasol ol wantaim mama i stadi wantaim ol Witnes Bilong Jehova long Baibel. Wanpela man i tokim dispela papa: “Yu no bosim gut ol pikinini bilong yu. Yu larim ol i kamap Witnes Bilong Jehova. Mi wantaim ol pikinini bilong mi i bihainim lotu Buda, em lotu bilong ol tumbuna. Sori tumas long yu!”
Papa em siksti i go long haus na i laik paitim sista Witnes i stadi wantaim ol pikinini, tasol ol i mekim gut bel bilong em na ol i stadi yet wantaim ol Witnes na go long ol miting, na mama i helpim ol.
Bihain papa i bungim ol pikinini wantaim mama na i tok: “Sapos yupela bihainim laik bilong mi bai mi larim yupela i stap long haus, tasol sapos yupela i kamap Kristen yupela mas raus.” Bikpela pikinini man i kirap bungim ol klos samting bilong em na bai em i ken lusim haus. Papa i singaut: “Yupela i bikhet long mi! Gutpela sapos mi dai!” Em i siksti i go ausait, na ol i bihainim em na ol i tok: “Nogat! Plis yu no ken kilim i dai skin bilong yu!” Em i pilim tru tok bilong ol, na em i go bek long haus.
Bihain moa papa i lukim gutpela pasin bilong ol, em tok bilong Baibel i bin mekim. Em i bungim pren bilong em i bin tok bilas long em na pren i tok: “Mi bel hevi long ol pikinini bilong mi, ol i giamanim mi na stil long mi.” Na nau papa i tok: “Ol pikinini bilong mi i no olsem. Ol i mekim pasin sori long mi na helpim mi long mani bilong bekim dinau bilong ka taim mi no gat wok.”
Mama wantaim 3-pela pikinini meri i kisim baptais, na wanpela pikinini man i mekim wok painia salim, na papa i no kros moa. Em i save toktok gut wantaim ol, na em i go long Memorial.
Jehova i mekim gut long pikinini man na 3-pela susa bilong em wantaim mama, long wanem, ol i bin stap strong na bihainim tok bilong Jehova. Nau ol i wok strong long autim tok bilong Kingdom na ol i mekim bel bilong Jehova i amamas.—Sindaun 27:11.