Mi Makim Wanpela Bilong Tupela Papa
“Yu no pikinini man bilong mi moa! Lusim dispela haus nau, na no ken kam bek inap long taim yu lusim dispela lotu!”
MI LUSIM haus na mi no karim sampela klos i go—klos mi pasim long skin, em tasol. Long dispela nait ol bom i pairap klostu long hap mipela i save stap long en, na mi no save liklik bai mi go we. Inap 6-pela yia i lus pastaim na bai mi kam bek long haus.
Wanem samting inap mekim, na papa i kros nogut tru na em i strong long pikinini man bilong em yet i mas lusim haus? Orait, mi laik stori long olsem wanem dispela i kamap.
Mi Go Bikpela Long Taim Bilong Pasin Birua
Papamama i sindaun long Berut, Lebanon, em i wanpela kantri bipo planti turis i laik kam na raun long en. Tasol kirap long 1975 i kam inap long 1990, dispela taun i kamap ples bilong wanpela pait nogut. Mama i karim mi long 1969, mi namba wan pikinini bilong wanpela famili Aminia i gat 3-pela pikinini. Olsem na mi tingim taim mi liklik yet, em i no taim bilong pait.
Papamama i bilong Misin Aminia Apostolik, tasol mama i save kisim mipela i go long lotu tupela taim tasol long olgeta yia—long taim bilong Ista na Krismas. Olsem na famili bilong mipela i no save tingim tumas ol samting bilong lotu. Tasol ol i salim mi long wanpela haiskul bilong ol Evanjelikal, na long dispela skul ol i skulim mi long ol samting bilong lotu. Tasol long dispela taim, mi no gat laik long kisim save long ol samting bilong lotu.
Wanpela samting planti manmeri bilong Aminia i lainim taim ol i liklik, em long birua long ol man bilong Turki. Long taim bilong Namba Wan Pait, ol Turki i kilim i dai planti handet tausen manmeri bilong Aminia na ol i kisim klostu olgeta hap bilong kantri Aminia. Long 1920, hap bilong is ol i no kisim i kamap wanpela hap bipo Soviet Yunion i bosim. Taim mi yangpela, mi tingting strong long pait bilong kamapim stretpela pasin.
Mi Senisim Tingting
Tasol long 1985 samting, taim mi gat 15 krismas samting, ol samting ankol bilong mi i tokim mi long en i kirap senisim tingting bilong mi. Em i tok, klostu nau God i Gat Olgeta Strong bai pinisim olgeta pasin i no stret. Em i tok, long rot bilong Kingdom Krais Jisas i bin lainim ol disaipel long beten long en, ol manmeri i bin dai long taim ol narapela i bagarapim nating ol, ol bai kirap bek long graun.—Matyu 6:9, 10; Aposel 24:15; KTH 21:3, 4.
Mi amamas tru. Mi laik harim sampela tok moa, olsem na mi wok yet long mekim ol askim. Em nau, mi kirap stadi long Baibel, na mipela i stadi long haus bilong wanpela narapela Witnes.
Taim mi kisim save moa long dispela Papa bilong mi long heven, em Jehova, na mi kirap laikim em moa yet, mi pret olsem wanpela de bai kamap na mi mas pasim tok long bel long samting em bai hatwok long mekim—bai mi pas gut wantaim famili bilong mi o wantaim God Jehova.—Song 83:18.
Hatwok Long Makim Rot Mi Laik Bihainim
Bihain, mama i harim olsem mi save stadi wantaim ol Witnes Bilong Jehova. Em i kros nogut tru na em i tok, mi no ken stadi moa long Baibel. Taim em i luksave olsem mi tingting strong long ol samting mi bilip long en, em i tok em bai tokim papa. Long dispela taim mi no wari, long wanem, mi ting mi inap mekim stret ol samting na sanap strong long ai bilong papa. Tasol dispela tingting i kranki stret.
Taim papa i kisim save olsem mi bung wantaim ol Witnes Bilong Jehova, em i belhat nogut tru. Em i tok, em bai rausim mi long haus sapos mi no lusim Baibel-stadi bilong mi. Mi tokim em mi no ken lusim stadi, long wanem, samting mi kisim save long en em tok i tru. Em i singaut bikmaus, na mekim ol tok swea, na bihain em i krai olsem liklik pikinini. Em i krai long mi na askim askim mi long lusim ol Witnes.
Bel bilong mi i bagarap stret, mi laikim tupela papa wantaim—Jehova na papa. Mi save tupela wantaim i laikim mi tru, na mi laik amamasim tupela, tasol i olsem mi no inap mekim olsem. Dispela hevi i winim strong bilong mi. Mi tokim papa bai mi mekim olsem em i laik mi mekim; mi ting olsem, bai mi kirap stadi gen na kamap wanpela Witnes taim mi bikpela pinis. Long dispela taim mi gat 17 krismas tasol.
Inap sampela de bihain long dispela, mi sem long samting mi bin mekim. Mi pilim olsem Jehova i no amamas na mi no bin bilipim tok bilong man bilong raitim Song, em Devit, em i tok: “Maski papa na mama i givim baksait long mi, Bikpela bai i lukautim mi.” (Song 27:10) Tasol mi stap yet long haiskul, na papamama i baim skul bilong mi.
Mi Sanap Strong
Winim tupela yia mi no go lukim ankol bilong mi o bung wantaim ol Witnes, long wanem, mi save papamama i wok long lukluk long mi olgeta taim. Long wanpela de long 1989, taim mi gat 20 krismas, mi bungim wanpela Witnes mi save long em. Long gutpela pasin em i tokim mi, sapos mi laik mi ken go lukim em. Em i no mekim sampela toktok long Baibel, olsem na mi go lukim em.
Bihain, mi kirap stadi long Baibel na go long ol miting bilong ol Witnes Bilong Jehova long Haus Kingdom. Mi stadi long ples wok bilong mi, long wanem, long dispela hap mi inap stadi gut. Olsem na mi pilim tru gutpela pasin bilong Jehova, na mi kisim save olsem em i bikpela samting long pas gut wantaim em, maski wanem samting i painim yumi. Long Ogas long dispela yia yet, mi kirap stori long ol narapela man long samting mi lainim pinis.
Inap long dispela taim famili bilong mi i no save long dispela samting. Tasol sampela de bihain mi sanap gen long ai bilong papa, tasol nau mi redi gut long toktok wantaim em. Em i wok long bosim bel taim em i askim mi olsem: “Pikinini, tru yu save bung yet wantaim ol Witnes Bilong Jehova?” Aiwara i pulap long ai bilong em taim em i wetim bekim bilong mi. Mama na susa bilong mi ol i krai isi i stap.
Mi tokim em olsem, nau tasol mi kirap bung wantaim ol Witnes na mi gat strongpela laik long kamap wanpela bilong ol. Em nau, kwiktaim ol samting i kamap. Papa i bikmaus na mekim dispela tok i stap long kirap bilong dispela stori. Em i holimpas mi na bikmaus olsem em bai kilim mi i dai. Mi inap lusim em, na taim mi ran i go daun long lata, mi harim liklik brata bilong mi i traim mekim papa i stap isi. Mi beten long Jehova: “Kirap long nau yu Papa bilong mi. Mi makim yu olsem Papa bilong mi, olsem na plis lukautim mi.”
Bekim Pe Nogut
Sampela de bihain, papa i go long haus bilong ankol, em i ting em bai painim mi long dispela hap. Papa i paitim ankol na i laik kilim em i dai, tasol sampela Witnes i stap long haus bilong ankol ol i pasim em. Papa i lusim haus na em i tok, em bai kam bek. I no longtaim na em i kam bek wantaim sampela man bilong ami ol i holim gan. Ol i kisim ol dispela Witnes na ankol bilong mi—em i sik nogut tru—na bringim ol i go long hetkota bilong ami.
Bihain ol i kirap painim ol narapela Witnes i stap long dispela hap. Ol i go insait tu long haus bilong wanpela Witnes. Ol i kisim ol buk, ol Baibel tu, na hipim ol long rot na kukim long paia. Tasol ol i no mekim dispela tasol. Ol i holim 6-pela Witnes na sampela manmeri i save stadi wantaim ol. Ol i putim olgeta long wanpela liklik rum, na sutim planti askim long ol, na bihain paitim ol. Ol i kukim skin bilong sampela long smok. Stori bilong ol dispela samting i go bikpela kwiktaim long hap bilong mipela. Ol ami i wok long painim mi long olgeta hap. Papa i tokim ol long painim mi na maski ol i mekim wanem long mi, ol i mas subim mi long senisim tingting bilong mi.
Sampela de bihain, wanpela kongrigesen i mekim miting na ol ami i brukim Haus Kingdom na go insait. Ol i strong long kongrigesen olgeta—em ol man, na meri, na pikinini—ol i mas lusim Haus Kingdom. Ol i kisim Baibel bilong ol na subim ol long wokabaut i go long hetkota bilong ami, na long dispela hap ami i sutim ol askim long ol.
Mi Ranawe Long Grik
Taim ol dispela samting i kamap, wanpela famili Witnes i lukautim mi long wanpela hap i longwe long hevi. Wanpela mun bihain mi lusim kantri na go long Grik. Taim mi kamap long Grik, mi dediketim laip bilong mi long God Jehova na kisim baptais bilong makim olsem mi dediket pinis.
Long Grik mi pilim pasin sori bilong ol brata bilong spirit em ol i bilong narapela narapela kantri—bilong Turki tu. Mi pilim tru tok bilong Jisas, em i tok: “Olgeta man i bin ting long mi na long gutnius na i lusim haus o brata o susa o mama o papa o pikinini o gaden, bai ol i kisim 100 moa. Taim ol i stap yet long dispela graun God bai i givim ol planti samting tru, i winim ol samting ol i bin i gat bipo. Ol bai i kisim planti haus na planti brata na planti susa na planti mama na planti pikinini na planti gaden. Na tu, bai sampela man i mekim pasin nogut long ol. Na long taim i laik kamap bihain ol bai i kisim laip i stap gut oltaim oltaim.”—Mak 10:29, 30.
Inap 3-pela yia mi stap long Grik. Planti taim mi raitim pas i go long papa, tasol em i no bekim pas bilong mi. Bihain sampela i stori long mi olsem, taim ol pren i go lukim famili bilong mi na ol i askim papa long mi, em i tok: “Mi no gat pikinini man i gat kain nem olsem.”
Bihain Long Sikspela Yia Mipela i Bung Gen
Long 1992 taim pait i pinis, mi go bek na sindaun gen long Berut. Long rot bilong wanpela pren, mi toksave long papa mi laik kam bek long haus. Em i tok, em i amamas long kisim mi bek sapos mi lusim pinis bilip bilong mi. Olsem na mi rentim wanpela flet na stap long en inap 3-pela yia. Long Novemba 1995, papa i kam long ples wok bilong mi na em i tok, em i laik lukim mi. Mi no stap long dispela taim, olsem na em i askim ol long toksave long mi olsem, em i laik mi kam bek long haus. Pastaim mi hatwok tru long bilipim dispela tok. Olsem na taim mi go lukim em mi tingting planti. Taim mipela i bung, bel bilong mipela i amamas tru. Papa i tok, em i no kros moa long mi, long wanem, mi wanpela Witnes, na em i laik mi kam bek long haus!
Nau mi wanpela elda Kristen na mi mekim wok bilong God long olgeta de long wanpela kongrigesen tok Aminia. Planti taim mi bungim ol manmeri i olsem papa bilong mi, ol i save birua long narapela long famili, long wanem, ol i laik lotu long Jehova. Mi save taim papa i birua long lotu bilong mi, em i bilip tru olsem samting em i mekim i stret. Baibel i helpim ol Kristen long save olsem ol narapela long famili bai birua long ol.—Matyu 10:34-37; 2 Timoti 3:12.
Mi laik wanpela taim i mas kamap na papa na ol narapela long famili, ol tu i ken bilip long nupela taim Baibel i stori long en. Long dispela taim bai i no gat pait moa o pasin bilong bagarapim nating planti manmeri, na ol man i no ken rausim moa ol narapela man long kantri bilong ol yet o birua long ol, long wanem, ol i bihainim stretpela pasin. (2 Pita 3:13) Long dispela taim, ol man i no gat wok moa long makim wanpela bilong tupela samting ol i laikim tru long bel bilong ol.—Wanpela man i salim dispela stori i kam.