Rot Bilong Mekim Gut Wok Papa

“Yupela papa, yupela i no ken mekim ol pikinini bilong yupela i kros, nogut ol i pilim olsem ol i no inap mekim wanpela gutpela wok.”​—Kolosi 3:21.

PAPA i ken mekim wanem na bai em i no ken skrapim bel bilong ol pikinini bilong em? Em i mas save olsem wok bilong em olsem papa em i bikpela samting. Wanpela magasin i stori long ol sik bilong tingting, i tok: “Wok papa em narapela kain long ol narapela wok na i gat hatwok bilong en. Dispela wok inap mekim bikpela samting long bel na tingting bilong ol pikinini.”

Wanem wok bilong papa? Planti famili i ting em wok bilong papa long stretim ol pikinini. Planti mama i save tokim pikinini i bikhet olsem, ‘Yu wet! Papa i kam pastaim!’ Tru, papamama i mas stretim ol pikinini long stretpela rot na strong long ol pikinini i mas bihainim tok bambai ol i ken kamap gutpela man taim ol i go bikpela. Tasol i gat sampela samting moa ol papa i mas mekim bilong stap gutpela papa.

Sori tru, i no olgeta man i bin i gat gutpela papa na bai ol i ken bihainim pasin bilong em. Sampela man i kamap bikpela insait long famili i no gat papa. Tasol sampela man em papa bilong ol i bin mekim hatpela pasin long ol, ol inap mekim wankain pasin long pikinini bilong ol yet. Kain papa olsem inap mekim wanem bilong abrusim pasin bilong papa bilong em na mekim gut moa wok papa?

I gat wanpela buk i gat ol gutpela tok yumi ken bilip tru long en long pasin bilong mekim gut wok papa. Baibel i gat nambawan gutpela tok bilong helpim famili long i stap amamas. Tok bilong en i no ol tok nating tasol; na tok bilong en i no inap nogutim yumi. Nogat. Tok bilong Baibel i kamapim savetingting bilong Man i kamapim ol tok bilong Baibel, em God Jehova, husat i As bilong famili. (Efesus 3:​14, 15) Sapos yu wanpela papa, em bai gutpela sapos yu skelim tok Baibel i mekim long pasin bilong mekim wok papa.a

Em i bikpela samting long mekim gut wok papa. Dispela bai helpim ol pikinini bilong yu long stap gut long skin, bel na tingting, na tu, long pas gut wantaim God. Pikinini husat i pas gut wantaim papa bilong em, ating em bai i no hatwok tumas long kisim pasin bilong pas gut wantaim God. Tingim, Baibel i tok, Jehova, em Man Bilong Wokim yumi, em i Papa bilong yumi. (Aisaia 64:8) Nau yumi ken skelim sikspela samting ol papa i mas mekim long pikinini bilong ol. Long dispela sikspela samting, bai yumi skelim olsem wanem pasin bilong bihainim ol stiatok bilong Baibel inap helpim ol papa long mekim wok bilong ol.

1 Papa i Mas Laikim Tru Ol Pikinini

Jehova i nambawan gutpela piksa long pasin bilong mekim gut wok Papa. Baibel i stori long God i ting olsem wanem long Jisas, em namba wan Pikinini bilong em, na i tok: “Papa em i laikim tru Pikinini.” (Jon 3:35; Kolosi 1:15) Jehova i save kamapim pasin bilong em long laikim tru Pikinini bilong em na orait long em. Taim Jisas i kisim baptais, Jehova i stap long heven na i tok: “Yu Pikinini bilong mi. Mi laikim yu tumas. Bel bilong mi em i amamas long yu.” (Luk 3:22) Jisas i save tru olsem Papa bilong em i laikim em. Ol papa i ken lainim wanem samting long pasin bilong God?

No ken les long tokim ol pikinini bilong yu olsem yu laikim ol. Kelvin, papa bilong 5-pela pikinini, i tok: “Long olgeta taim mi traim long kamapim pasin bilong mi long laikim ol pikinini. Mi save tokim ol olsem mi laikim ol, na tu, mi save soim olsem mi tingim olgeta wan wan. Mi bin helpim wok bilong senisim nepi bilong ol na wasim ol.” Na tu, ol pikinini bilong yu i mas save olsem yu amamas long ol. Olsem na no ken skelim ol tumas, na wok long stretim ol long olgeta taim. Nogat. Mobeta yu tok amamas long ol planti taim. Donizete i gat tupela yangpela pikinini meri, em i tok: “Papa i mas wok strong long painim rot bilong tok amamas long ol pikinini bilong em.” Taim ol pikinini i save olsem yu amamas long ol, dispela inap helpim ol long kisim stretpela tingting long ol yet, na dispela inap helpim ol long i go klostu moa long God.

2 Papa i Mas Stap Gutpela Piksa

Jon 5:19 i tok, Jisas inap “mekim tasol ol samting em i lukim Papa i mekim.” Tingim, dispela skripsa i tok Jisas i lukim na i mekim ol samting Papa bilong em i “mekim.” Planti taim ol pikinini i save mekim olsem. Olsem, sapos papa i rispek na mekim gutpela pasin long mama, ating pikinini man bilong em bai rispek na mekim gutpela pasin long ol meri taim em i kamap bikpela. Pasin bilong papa i save stiaim tingting bilong ol pikinini man, tasol tu, pasin bilong papa inap stiaim tingting ol pikinini meri bai i gat long ol man.

Olsem wanem? Ol pikinini bilong yu i hatwok long tok sori? Long dispela samting tu, pasin bilong papamama i bikpela samting. Kelvin i tingim wanpela taim we tupela pikinini man bilong em i brukim wanpela kamera i gat bikpela pe. Em i kros nogut tru na i paitim strong tebol na tebol i bruk i go tupela. Bihain Kelvin i pilim nogut tru na i tok sori long olgeta, na long meri bilong em tu, long em i bin kros olsem. Em i pilim olsem taim em i tok sori, dispela i kamapim gutpela samting; ol pikinini bilong em i no hatwok long tok sori.

3 Ol Pikinini i Mas Pilim Amamas Insait Long Famili

Jehova em i God bilong “amamas.” (1 Timoti 1:11) Olsem na Pikinini bilong em, Jisas, i amamas tru long i stap wantaim Papa bilong em. Sindaun 8:​30, 31 i helpim yumi long kliagut long pasin i stap namel long Jisas na Papa bilong em. Em i tok: “Mi stap wantaim em [Papa] na em i makim mi olsem saveman i bosim wok. . . . Mi bin amamas i stap oltaim long ai bilong Bikpela.” Man! Papa na Pikinini i pas gut tru wantaim!

Ol pikinini bilong yu i mas pilim amamas insait long famili. Pasin bilong lusim hap taim bilong pilai wantaim ol pikinini inap helpim wok bilong kamapim amamas insait long famili. Pasin bilong pilai wantaim i save helpim papamama na pikinini long pas gut wantaim. Felix i wanbel long dispela tok. Em i gat wanpela yangpela pikinini man na em i tok: “Pasin bilong makim taim bilong amamas wantaim pikinini man bilong mi i bikpela samting tru bilong helpim mipela long pas gut wantaim. Mipela i save pilai wantaim, bung wantaim ol pren, na go raun wantaim. Dispela i bin strongim pasin bilong famili long pas gut wantaim.”

4 Ol Pikinini i Mas Kisim Save Long God

Papa i bin skulim Jisas, olsem na Jisas inap tok: “Olgeta tok mi harim long em [Papa], em mi save autim long ol manmeri bilong graun.” (Jon 8:26) Long tingting bilong God, em wok bilong papa long skulim ol pikinini long bihainim stretpela pasin na long save long God. Wanpela wok bilong yu papa, em yu mas putim ol stretpela stiatok i go daun long bel bilong ol pikinini. Kain wok olsem i mas kirap taim ol pikinini i liklik yet. (2 Timoti 3:​14, 15) Felix i kirap ritim ol Baibel stori long pikinini man bilong em taim pikinini i liklik yet. Felix i ritim ol gutpela stori i kirapim tingting, olsem i stap long buk Baibel Stori Buk Bilong Mi.b Taim pikinini man i kamap bikpela, Felix i ritim ol narapela buk bilong Baibel i stret long krismas bilong pikinini.

Donizete i tok: “Em i hatwok tru long mekim famili Baibel stadi long pasin ol pikinini i amamas long en. Em i bikpela samting long papamama i soim olsem ol i tingim tru pasin bilong pas gut wantaim God, long wanem, ol pikinini i save luksave hariap taim papamama yet i no mekim ol samting ol i tokim ol pikinini long mekim.” Carlos i gat tripela pikinini man, na em i tok: “Long olgeta wik mipela famili i save bung wantaim na toktok long ol samting bilong famili. Olgeta wan wan long famili inap makim wanem samting mipela bai toktok long en.” Oltaim Kelvin i painim rot bilong stori wantaim ol pikinini bilong em long God, maski ol i stap we o mekim wanem samting. Dispela i kirapim yumi long tingim tok bilong Moses: “Oltaim yupela i mas tingim ol dispela lo nau mi givim long yupela. Na yupela i mas lainim ol pikinini bilong yupela long ol dispela lo. Na tokim ol long taim yupela i stap long haus na long taim yupela i wokabaut long rot, na long taim yupela i malolo na long taim yupela i wok.”​—Lo 6:​6, 7.

5 Papamama i Mas Stretim Ol Pikinini

Papamama i mas stretim ol pikinini bambai ol i ken kamap man o meri i gat gutpela tingting na i mekim gutpela wok. I luk olsem sampela papamama i ting olsem bilong stretim ol pikinini ol i mas mekim hatpela pasin, olsem mekim strongpela tok bilong pretim ol pikinini o mekim tok i daunim ol. Tasol Baibel i no tok papamama i mas mekim hatpela pasin taim ol i stretim pikinini. Nogat. Ol papamama i mas stretim ol pikinini long pasin laikim, olsem Jehova i save mekim. (Hibru 12:​4-​11) Baibel i tok: “Yupela papa, yupela i no ken bagarapim tingting bilong ol pikinini bilong yupela na mekim ol i belhat long yupela. Nogat. Yupela i mas . . . stretim gut ol pikinini bilong yupela na skulim ol long tok bilong Bikpela.”​—Efesus 6:4.

Sampela taim papamama i mas givim strafe long pikinini. Tasol pikinini i mas save long as na em i kisim strafe. Taim papamama i stretim pikinini, ol i no ken mekim long pasin i kirapim pikinini long pilim olsem ol i no laikim em. Baibel i no orait long pasin bilong paitim nogut tru pikinini​—dispela inap bagarapim skin bilong em. (Sindaun 16:32) Kelvin i tok: “Taim mi mas stretim ol pikinini long ol bikpela rong ol i bin mekim, oltaim mi traim long kamapim klia as na mi stretim ol, em pasin bilong mi long laikim ol tru.”

6 Banisim Ol Pikinini Long Ol Samting Nogut

Ol papamama i mas lukautim ol pikinini bambai ol poroman nogut na ol samting nogut i no ken bagarapim ol. Sori tru, i gat “ol man nogut” long dispela graun husat i gat bikpela laik long bagarapim ol pikinini. (2 Timoti 3:​1-5, 13) Olsem wanem yu ken lukautim ol pikinini bilong yu bambai ol samting nogut i no ken bagarapim ol? Baibel i kamapim dispela gutpela tok: “Man i gat gutpela tingting, em i save olsem, hevi i laik kamap long em na em i abrusim. Tasol man i no gat tingting, em i lukim trabel i stap long rot bilong en, na em i go na bungim na karim hevi.” (Sindaun 22:3) Bilong banisim ol pikinini na hevi i no ken painim ol, yu mas luksave long ol samting inap bagarapim ol. Tingim ol samting inap kamapim hevi, na mekim ol samting bilong lukautim ol pikinini. Olsem, sapos yu larim ol pikinini i yusim Intenet, lainim ol long yusim long stretpela rot. I gutpela moa long putim kompiuta long ples klia we yu ken lukim pikinini i mekim wanem wok long en.

Papa i mas redim na skulim ol pikinini long ol samting nogut inap painim ol long dispela graun. Olsem wanem? Ol pikinini bilong yu i save long samting ol i mas mekim sapos wanpela man i traim long mekim pasin nogut long ol taim yu no stap?c Pikinini bilong yu i mas save long wanem pasin i stret o i no stret long mekim long sem bilong ol. Kelvin i tok: “Mi no lusim dispela wok long han bilong ol narapela, long ol tisa tu, nogat. Mi ting em wok bilong mi yet long skulim ol pikinini bilong mi long ol samting bilong maritpasin na long was gut long ol man i save mekim pasin sem long ol pikinini.” Olgeta pikinini bilong em i kamap bikpela na samting nogut i no bin painim ol, na nau ol i marit na i stap amamas.

Askim God Long Helpim Yu

Nambawan gutpela presen papa inap givim long ol pikinini bilong em, em long helpim ol long pas gut wantaim God. Em i bikpela samting tru long papa i stap gutpela piksa. Donizete i tok: “Ol papa i mas soim olsem ol i tingim tru pasin bilong ol yet long pas gut wantaim God. Dispela i mas kamap ples klia moa yet long taim ol i bungim sampela hevi. Long kain taim olsem, papa i soim olsem em i bilip tru long Jehova. Pasin bilong beten wantaim famili na planti taim tok tenkyu long God long gutpela pasin Em i mekim, dispela bai lainim ol pikinini olsem em i bikpela samting long God i stap Pren bilong ol.”

Orait long wanem rot man i ken mekim gut wok papa? Askim man husat i save gut tru long pasin bilong mekim bikpela long ol pikinini​—em God Jehova. Sapos yu bihainim Tok Bilong God long skulim pikinini bilong yu, ating bai yu lukim samting em Sindaun 22:6 i tok long en, olsem: “Em bai i wokabaut long dispela rot inap long em i lapun tru.”

[Ol Futnot]

[Piksa long pes 19]

Papa i mas stap gutpela piksa long ol pikinini

[Piksa long pes 20]

Papa i mas lainim ol pikinini long save long God

[Piksa long pes 21]

Papamama i mas stretim pikinini long pasin laikim