God i Bosim Ol Wasman Wantaim Sipsip

“Bikpela [Jehova] yet bai i stap king bilong yumi na em yet bai i givim ol lo long yumi na bosim yumi. Na em bai i was gut long yumi na yumi no painim taim nogut.”​—⁠AISAIA 33:⁠22.

LONG gavman bilong God, God yet i stap bos, na lain i stap aninit long em ol i mas daun long em na bihainim ol lo bilong em long olgeta samting, ol bikpela samting na ol liklik samting tu. Ol Kristen bilong pastaim ol i bin daun long lo bilong God. Olsem na ol inap tok olsem: “Bikpela [Jehova] yet bai i stap king bilong yumi na em yet bai i givim ol lo long yumi na bosim yumi. Na em bai i was gut long yumi na yumi no painim taim nogut.” (Aisaia 33:22) God Jehova i bosim oganaisesen bilong em bilong nau tu, na lain remnan i stap olsem as bilong dispela oganaisesen.

Olsem Wanem God i Bosim Yumi Long Nau?

² Olsem wanem yumi ken tok, Jehova i bosim oganaisesen bilong em? Long wanem, ol manmeri insait long en i save bihainim ol lo bilong em, na ol i bihainim pasin bilong Krais Jisas em Jehova i putim em i stap King. Nau long dispela taim bilong las de, Bikpela King Jehova i tokim Jisas: “Kisim naip bilong yu na katim kaikai. Olgeta kaikai bilong graun i mau pinis, olsem na nau em i taim bilong katim dispela kaikai.” (KTH 14:15) Jisas i mekim olsem, na ol Kristen tu i helpim dispela bikpela wok na ol i wok strong long autim gutnius na kamapim disaipel. (Matyu 28:19; Mak 13:10; Aposel 1:⁠8) Taim ol i mekim olsem, ol i wanwok bilong Jehova, em Bikpela King.​—⁠1 Korin 3:⁠9.

³ Na pasin bilong ol Kristen tu i stret long lo bilong God na i makim olsem ol i daun long em. Jisas i tok: “Man i mekim pasin i tru, em i save kam long lait, bai ol man i ken lukim gut olsem, em i bin mekim wok bilong en long strong bilong God.” (Jon 3:21) Ol man bilong graun i mekim planti tok long wanem ol pasin i stret na wanem ol pasin i no stret, tasol ol Kristen i no insait long ol dispela tok pait bilong ol. Wanem pasin God yet i tok em i stret, ol Kristen i bihainim dispela, na wanem pasin God i tok i no stret, ol i abrusim dispela olsem em i samting nogut tru. Na ol i lukautim gut famili bilong ol, na daun long papamama, na daun long ol gavman tu. (Efesus 5:​3-5, 22-33; 6:​1-4; 1 Timoti 5:8; Taitus 3:⁠1) Olsem na ol i stap aninit long God na bihainim laik bilong em.

⁴ Adam tupela Iv i raus long Paradais, long wanem, ol yet i laik makim wanem pasin i stret na wanem pasin i no stret. Tasol Jisas nogat. Em i tok: “Mi no inap mekim wanpela samting long tingting bilong mi yet. Mi save bihainim tok mi kisim long Papa.” (Jon 5:30; Luk 22:42; Rom 12:2; Hibru 10:⁠7) Sol em namba wan king bilong Israel, na em i bihainim hap tok tasol bilong Jehova, olsem na Jehova i rausim em. Samuel i tokim em: “Pasin bilong bihainim tok bilong [God], em i namba wan pasin tru. Na pasin bilong ofaim ol gutpela abus long em, em i namba 2 tasol.” (1 Samuel 15:22) Sapos yumi bihainim laik bilong Jehova long sampela samting tasol, olsem yumi go long ol miting, na autim tok, tasol bihain yumi mekim pasin i no stret, yu ting yumi stap aninit long Jehova? Nogat, a? Yumi mas wok strong long bihainim olgeta laik bilong God. (Efesus 6:6; 1 Pita 4:​1, 2) No ken bihainim pasin bilong Sol. Yumi mas i stap aninit tru long God.

Gavman Bilong God

⁵ Long bipo, Jehova i bin kamapim klia ol tok i tru long rot bilong ol profet na king na aposel, tasol long nau nogat. Nau i no gat profet o aposel olsem. Jisas i tok, taim em i kamap king em bai putim wanpela lain olsem “wokboi i gat gutpela tingting,” na em bai makim dispela lain bilong bosim olgeta samting bilong em. (Matyu 24:​45-47; Aisaia 43:10) Long 1919 ol i kisim save olsem lain remnan em dispela “wokboi.” Kirap long dispela taim Lain Bilong Bosim Ol Witnes i olsem maus bilong ol, na ol i stap olsem lain bilong gavman bilong God long graun. Long ol kantri i gat ol Komiti Bilong Brens, na ol wasman bilong raun, na ol elda bilong kongrigesen, na ol i olsem maus bilong dispela Lain Bilong Bosim Ol Witnes.

⁶ Sapos yumi wok gut wantaim oganaisesen bilong God, dispela i makim olsem yumi daun long gavman bilong God. Olsem bai yumi stap wanbel na wok gut wantaim “ol arapela manmeri bilong God.” (1 Pita 2:17) Sapos yumi mekim olsem, Jehova bai amamas. Em “i save mekim stret olgeta wok bilong en.”​—⁠1 Korin 14:⁠33.

Ol Elda Long Gavman Bilong God

⁷ Olgeta elda, maski wanem wok ol i holim, ol i mas winim mak olsem Baibel i kolim. (1 Timoti 3:1-7; Titus 1:​5-9) Ol tok Pol i givim long ol elda long Efesus, em olgeta elda i mas bihainim. Em i tok: “Yupela i mas was gut long yupela yet, na long olgeta manmeri bilong sios bilong God, . . . na Holi Spirit i makim yupela i stap wasman bilong ol dispela sipsip bilong God.” (Aposel 20:28) Em nau, spirit holi bilong God Jehova i makim ol. (Jon 14:26) God yet i givim namba long ol. Ol i lukautim lain bilong God. Ol dispela sipsip i bilong God na i no bilong ol elda. God i bosim oganaisesen.

⁸ Pol i raitim pas i go long ol Efesus na em i kolim ol wok Jisas i givim long ol elda olsem: “Long sampela man em i givim wok aposel. Na . . . wok profet. Na . . . wok bilong autim gutnius . . . Na . . . wok pasto na wok bilong skulim ol manmeri long ol pasin God i laikim. Krais i givim ol dispela presen . . . bilong God bai yumi inap long mekim gutpela wok bilong em. Olsem na bai bodi bilong Krais i ken kamap strong na i stap gut.” (Efesus 4:​11, 12) Bihain ol aposel na profet i dai pinis taim dispela “bodi bilong Krais” i nupela yet. (Lukim 1 Korin 13:⁠8.) Tasol ol elda i gat bikpela wok yet long autim gutnius, na mekim wok wasman, na skulim ol man.​—⁠2 Timoti 4:2; Taitus 1:⁠9.

⁹ Long gavman bilong God em yet i stap bos, olsem na ol elda i mas save long laik bilong em. Em i bin tokim Josua long kaunim Lo long olgeta de, na ol elda tu i mas stadi long olgeta taim, na taim ol i laik save long sampela samting ol i mas lukim Baibel, na ol i mas save gut long ol buk em “wokboi i gat gutpela tingting” i kamapim. (2 Timoti 3:​14, 15) Olsem Wastaua na Kirap! na ol narapela buk samting i makim ol lo bilong God yumi mas bihainim.a Elda i mas save long tok bilong ol dispela buk samting bilong Sosaiti Was Taua, na em i mas save tu long as bilong ol dispela tok, em ol lo bilong Baibel. Olsem na long pasin marimari na gutpela tingting em inap bihainim ol dispela lo na tok bilong Baibel.​—⁠Lukim Maika 6:⁠8.

Mekim Wok Long Pasin Kristen

¹⁰ Long yia 55 samting, Pol i raitim namba wan pas bilong em i go long kongrigesen long Korin. Sampela man i laik litimapim nem bilong ol insait long kongrigesen na Pol i mas stretim dispela samting. Em i tok: “Ating yupela i pulap pinis long ol gutpela samting . . . na yupela i stap gut tru . . . winim mipela pinis na i kamap olsem ol king. O sori, mi laikim tumas bai yupela i stap king tru, bai mipela tu i ken i stap king wantaim yupela.” (1 Korin 4:⁠8) Long dispela taim bipo olgeta Kristen i bilong i go long heven long bihain na mekim wok king na pris wantaim Jisas. (KTH 20:​4, 6) Tasol ating sampela elda hia long Korin i lusim tingting olsem God i no makim sampela bilong i stap king insait long kongrigesen Kristen long graun. Ol wasman i no ken bihainim pasin olsem bilong ol king bilong dispela graun​—⁠ol i mas lain long bihainim pasin daun, em wanpela pasin Jehova i amamas long en.​—⁠Song 138:6; Luk 22:​25-27.

¹¹ Sapos man i gat pasin daun, yu ting dispela i makim olsem em i no gat strong? Nogat tru! Jehova yet i gat pasin daun. (Song 113:​5, 6) Ol king bilong Israel i bin wok aninit long Jehova long taim ol i bosim ami long pait na bosim kantri tu, tasol king “i no ken litimapim nem bilong em yet na daunim ol arapela Israel.” (Lo 17:20) Jisas i kirap bek pinis na nau em i stap King long heven, tasol taim em i stap long graun em i mekim pasin daun na wasim lek bilong ol disaipel. Em i laik bai ol aposel tu i gat pasin daun, na em i tok: “Mi Bikpela na mi Tisa, na mi wasim lek bilong yupela. Orait yupela tu i mas wasim lek bilong ol arapela.” (Jon 13:14; Filipai 2:​5-8) Olgeta biknem i mas i go long Jehova tasol, na long ol man nogat. (KTH 4:11) Maski Kristen em i elda o nogat, em i mas tingim wanpela tok bilong Jisas olsem: “Yupela i mas tok, ‘Mipela i wokboi nogut. Samting mipela i mekim, em i wok tasol bilong mipela.’ ” (Luk 17:10) Sapos elda i no gat dispela kain tingting, em i no daun long God.

¹² Na ol elda i mas i gat pasin sori tu. Jon i kamapim klia olsem pasin sori i bikpela samting. Em i tok: “Man i no save laikim ol arapela, em i no save long God.” (1 Jon 4:⁠8) Ol man i no gat pasin sori ol i no daun na bihainim tok bilong Jehova, na ol i no save gut long em. Baibel i toktok long Pikinini bilong Jehova olsem: “Em i laikim tumas ol manmeri bilong en . . . moa yet i go inap long taim em i dai.” (Jon 13:⁠1) Jisas i givim tok long 11-pela man em ol bai kamap olsem lain bilong bosim ol Kristen, na em tok: “Lo bilong mi em i olsem: Yupela wan wan i mas laikim tru ol arapela, long wankain pasin olsem mi bin laikim yupela.” (Jon 15:12) Dispela pasin bilong laikim tru ol narapela em mak bilong Kristen tru. Ol man i gat bikpela hevi na ol man i laik painim ol samting bilong spirit, ol i save kam long lain i gat pasin sori insait long en. (Aisaia 61:​1, 2; Jon 13:35) Ol elda i mas kamapim dispela pasin long ol man.

¹³ Sampela taim ol elda i mas stretim sampela bikpela hevi, olsem samting bilong marit, o samting bilong ol yangpela em hatwok long ol bikpela man i save long en, o sampela i bel hevi na ol i no save long as bilong en. Sampela taim elda i no save em bai mekim wanem bilong stretim hevi, tasol sapos em i beten askim Jehova long givim gutpela tingting long em, na em i painim sampela tok long ol buk samting bilong dispela “wokboi i gat gutpela tingting,” na em i bihainim pasin daun na mekim pasin sori long ol sipsip, bai em inap helpim ol, maski hevi bilong ol i bikpela.

¹⁴ Jehova i mekim gut long oganaisesen bilong em “na em i givim ol presen” long yumi, em ol elda. (Efesus 4:⁠8) Sampela taim ol brata i raitim pas long Sosaiti Was Taua na ol i toktok long gutpela pasin sori na pasin daun bilong ol elda i lukautim ol sipsip bilong God. Wanpela elda i tok: “Wasman sekit i kam na em i helpim gut mipela, na ol narapela bilong kongrigesen i toktok yet long gutpela pasin bilong em. Em i lainim mi gut na nau mi save mi mas givim bel long helpim ol brata na strongim bel bilong ol.”

¹⁵ Wanpela sista i gat bikpela sik na em i mas i go slip long wanpela haus sik i stap longwe, na bihain em i raitim pas na i tok: “Long namba wan nait mi slip long haus sik mi pret na mi tingting planti, tasol wanpela elda i bin kam lukim mi na strongim mi. Em wantaim ol narapela brata i bin kam helpim mi planti taim, na ol narapela manmeri i lukim dispela pasin na ol i save, sapos ol dispela gutpela brata i no bin beten na helpim na lukautim mi long pasin sori olsem, mi no inap orait gen. Bai mi dai.” Na narapela sista i tok: “Bipo mi gat bikpela bel hevi, na sapos ol elda i no bin helpim mi bai mi dai. Wanpela brata wantaim meri bilong em i no save wanem tok ol i ken givim long mi, . . . tasol ol i mekim pasin sori long mi na ol i tingim mi, maski ol i no save long hevi bilong mi.”

¹⁶ Tru tumas, planti elda i bihainim tok bilong Pita olsem: “Lukautim gut ol manmeri bilong God. Ol i stap olsem ol sipsip long han bilong yupela. Na yupela i mas amamas long mekim . . . Na yupela i no ken mekim dispela wok bilong kisim pe . . . Yupela i mas i gat laik tru long mekim . . . Yupela i no ken i stap olsem ol bikman na daunim dispela ol manmeri . . . Mas mekim gutpela pasin tasol, bai ol i ken lukim na bihainim.” (1 Pita 5:​1-3) Ol elda i stap aninit long God na ol i helpim gut yumi!

Ol Sipsip Bilong God

¹⁷ I no ol wasman tasol i mas i stap aninit long God. Olgeta sipsip tu i mas mekim olsem. Ol lo bilong Jehova i stiaim ol wasman, na ol dispela lo i mas stiaim ol sipsip tu. Olgeta Kristen, i no ol elda tasol, ol i mas daun long Jehova na bai em i ken mekim gut long ol. (Jems 4:⁠6) Olgeta i mas lain long mekim pasin sori long ol narapela, na bai Jehova i ken amamas long ofa bilong ol. (1 Korin 13:​1-3) Yumi olgeta i mas kisim “gutpela save na tingting, na dispela i ken pulap tru” long yumi.​—⁠Kolosi 1:⁠9.

¹⁸ Ol yangpela wantaim lapun ol i stap namel long pasin bilong graun em Satan i bosim, na i hatwok long ol long i stap gut long Jehova. Pasin bilong bilas, na ol musik na piksa na buk bilong ol man em inap long traim ol. Hap save bilong tok i tru i no inap helpim yumi long sakim ol dispela samting na sanap strong. Yumi mas kisim stretpela save na gutpela tingting i stap long Baibel. (Sindaun 2:​1-5) Yumi mas lain gut long pasin bilong stadi, na tingim gut ol samting yumi stadi long en, na nau yumi mas bihainim. (Song 1:​1-3; KTH 1:⁠3) Pol i tokim olgeta Kristen olsem: “Strongpela kaikai em i bilong ol man i kamap bikpela pinis. Ol kain man olsem ol i bin lain gut long pasin bilong skelim wanem ol pasin i gutpela na wanem ol pasin i nogut.”​—⁠Hibru 5:⁠14.

Ol Sipsip Wantaim Wasman

¹⁹ Taim ol brata i wok gut wantaim ol elda, dispela i kamapim klia olsem ol i stap aninit long God. Pol i tokim Timoti: “Givim biknem na gutpela pe long ol hetman i mekim gutpela wok. . . . Em ol hetman i save . . . autim tok bilong God na . . . skulim ol manmeri long ol pasin God i laikim.” (1 Timoti 5:17; 1 Pita 5:​5, 6) Wok elda em i gutpela wok bilong mekim, tasol planti elda i gat famili na ol i mas wok mani na bai ol i ken lukautim meri pikinini bilong ol. Ol i amamas long mekim wok elda long kongrigesen, na sapos ol brata i bihainim tok na wok gut wantaim ol na ol i no toktok planti long ol samting, bai ol elda i no hatwok long mekim wok bilong ol.​—⁠Hibru 13:⁠17.

²⁰ Pol i tok: “Mas tingting long ol [elda] . . . bilong yupela . . . Mas tingting long pasin ol i bin wokabaut long en, na yupela i mas bihainim pasin bilong bilip bilong ol.” (Hibru 13:⁠7) Tasol Pol i no laik kirapim ol brata long bihainim ol elda yet, nogat. (1 Korin 1:12) Yumi no ken kamap olsem lain bilong wanpela man. Yumi stap lain bilong God. Tasol yumi ken bihainim bilip bilong elda i gat pasin daun na i stap aninit long God na em i save autim tok na go long olgeta miting na mekim pasin sori long ol brata.

Ol i Bilip Strong

²¹ Long nau pasin bilong ol man bilong graun i go nogut olgeta, tasol i gat wanpela oganaisesen bilong God i stap, na dispela i kamapim bikpela strong bilong em na i litimapim nem bilong em. (Aisaia 2:​2-5) Klostu 5 milion man meri pikinini i stap aninit long dispela gavman bilong God, na maski hevi i painim ol tu, ol i tingim Jehova i stap King bilong ol, na dispela i kamapim strongpela bilip bilong ol. Moses i olsem “man i bin lukim God, na em i stap strong tru,” na ol Kristen bilong nau i gat wankain strongpela bilip. (Hibru 11:27) Ol i amamas long i stap insait long gavman bilong Jehova, na olgeta de ol i tok tenkyu long em. (Song 100:​4, 5) Ol i pilim tru olsem Jehova i lukautim ol, olsem na ol i amamas long tokaut olsem: “Bikpela [Jehova] yet bai i stap king bilong yumi na em yet bai i givim ol lo long yumi na bosim yumi. Na em bai i was gut long yumi na yumi no painim taim nogut.”​—⁠Aisaia 33:⁠22.

[Ol Futnot]

Baibel i Tok Wanem?

◻ Olsem wanem ol Kristen i aninit long gavman bilong God?

◻ Olsem wanem God i stap bos bilong oganaisesen bilong em?

◻ Ol elda i mas mekim wanem na bai ol inap mekim gut wok bilong ol?

◻ Ol elda i mas i gat wanem kain pasin?

◻ Wanem kain pasin i mas i stap namel long sipsip na wasman?

[Askim Bilong Stadi]

1. Olsem wanem ol Kristen bilong pastaim na ol Kristen bilong nau i aninit long gavman bilong God?

2. Olsem wanem ol Witnes Bilong Jehova i daun long wok king bilong Jehova?

3. Olsem wanem ol Kristen i daun long lo bilong Jehova long ol samting bilong stretpela pasin?

4. Wanem tingting nogut bilong Adam na Iv na Sol? Tasol olsem wanem tingting bilong ol Kristen i narapela kain?

5, 6. Long nau, wanem rot bilong Jehova long bosim lain bilong em? Sapos yumi bihainim dispela pasin em i bin putim, wanem gutpela samting bai kamap?

7. Olsem wanem yumi save, spirit holi bilong Jehova i makim ol elda Kristen?

8. Ol elda i gat wanem wok long nau?

9. Ol elda i mas mekim wanem na bai ol inap kamapim laik bilong God insait long kongrigesen?

10. Ol elda i no ken bihainim wanem pasin? Ol i mas mekim wanem?

11. (a) Husat sampela i gat pasin daun? (b) Ol elda na ol narapela Kristen i mas ting olsem wanem long ol yet?

12. Bilong wanem ol elda Kristen i mas i gat pasin sori?

13. Maski wanem bikpela hevi i kamap, elda i ken mekim wanem bilong helpim gut ol sipsip?

14, 15. Sampela i tok wanem na yumi save Jehova i mekim gut long lain bilong em na i givim planti gutpela elda long ol?

16. Pita i givim wanem tok long ol elda?

17. Kolim sampela gutpela pasin olgeta wan wan insait long kongrigesen i mas wok long kisim.

18. (a) Bilong wanem hap save tasol bilong tok i tru i no inap? (b) Yumi olgeta mas mekim wanem na bai yumi ken kisim stretpela save?

19, 20. Yumi mas mekim wanem bilong wok gut wantaim ol elda? Bilong wanem yumi mas mekim olsem?

21. Olsem wanem ol Kristen i kamapim klia olsem ol i holim strongpela bilip olsem bilong Moses?

[Piksa long pes 16]

Adam tupela Iv i raus long Paradais, long wanem, ol yet i laik makim wanem pasin i stret o i no stret

[Piksa long pes 18]

Sapos elda i mekim pasin sori long ol sipsip, em inap helpim gut ol