Stap Aninit Long Gavman Bilong God
“Jehova em i Jas bilong yumi, Jehova em i Man bilong givim lo long yumi, Jehova em i King bilong yumi.”—AISAIA 33:22, NW.
DISPELA tok long gavman em i wanpela samting olgeta man i save tingim. Gutpela gavman i save kamapim bel isi na gutpela sindaun. Baibel i tok: “Sapos king i bosim kantri long stretpela pasin, orait kantri bai i stap strong.” (Sindaun 29:4) Tasol gavman nogut i save mekim pasin i no stret, na paulim mani samting, na daunim ol man. “Sapos man bilong mekim pasin nogut i bosim kantri, olgeta manmeri i save bel hevi tumas na krai nogut.” (Sindaun 29:2) Kirap long bipo yet na i kam inap nau, ol man i bin traim kain kain gavman—na sori tru, planti taim ol i bin “bel hevi tumas na krai nogut,” long wanem, ol gavman bilong ol i daunim ol. (Saveman 8:9) Olsem wanem? I gat wanpela kain gavman em inap tru long helpim ol manmeri i stap aninit long en na bai ol i stap belgut na amamas inap oltaim oltaim?
2. Olsem wanem dispela tok “gavman tiokratik” i stret tru long gavman bilong Israel bilong bipo?
2 Wanpela man bilong raitim stori bilong ol samting i bin kamap bipo, em Josifas, em i stori long wanpela gavman i narapela kain. Em i tok: ‘Sampela lain i bin putim wok bilong bosim kantri long han bilong wanpela man tasol, olsem king, na sampela ol i putim long han bilong wanpela liklik lain, na sampela ol i putim long han bilong ol man nating. Tasol man bilong givim lo long yumi [Moses] em i no tingim ol dispela kain oganaisesen politik, nogat; pasin bilong em long mekim wok long lo konstitusen bilong em, yumi ken kolim olsem “tiokratik,” olsem em i bin putim olgeta wok king na bikpela namba i go long han bilong God.’ (Buk Against Apion, II, 164, 165) Wanpela buk dikseneri (Concise Oxford Dictionary) i tok, gavman tiokratik i olsem “wanpela kain gavman em God i bosim.” Dispela tok i no stap long Baibel, tasol em i makim stret dispela gavman bilong lain Israel bilong bipo. Tru, i gat wanpela man bilong graun i stap king bilong ol Israel, tasol king tru bilong ol em Jehova. Aisaia, em wanpela profet bilong Israel, em i tok: “Jehova em i Jas bilong yumi, Jehova em i Man bilong givim lo long yumi, Jehova em i King bilong yumi.”—Aisaia 33:22, NW.
Gavman Tiokratik Tru Em Wanem Kain Gavman?
3, 4. (a) Gavman tiokratik tru em i wanem kain gavman? (b) Liklik taim nau na gavman tiokratik bai givim wanem ol gutpela blesing long olgeta man?
3 Kirap long taim Josifas i bin kamapim dispela tok “tiokratik,” planti lain i gat ol gavman ol i bin kolim olsem gavman tiokratik. Sampela i olsem bel nogut long sampela lain, na ol i strong tumas long ol man i mas bihainim tingting bilong ol, na ol i daunim ol man na mekim nogut long ol. Orait yu ting ol i gavman tiokratik tru? Sapos yumi skelim tok bilong Josifas long dispela tok “tiokratik,” yumi ken tok, nogat. Tasol taim ol buk i kamapim insait bilong dispela tok, ol i bin skruim sampela tok moa long en. Wanpela buk i tok, em i olsem ‘wanpela kain gavman em wanpela pris o wanpela lain pris i bosim, na ol pris i holim namba na strong bilong bosim ol samting bilong ples na ol samting bilong lotu.’ (World Book Encyclopedia) Tasol gavman tiokratik tru em i no wanpela gavman ol pris i bosim, nogat. Em wanpela gavman God yet i bosim, em Man bilong wokim olgeta samting long heven na long graun, em God Jehova.
4 Liklik taim nau na gavman tiokratik bai bosim olgeta hap bilong graun, na em bai mekim gut tru long ol man! “God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong . . . ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:3, 4) I no gat wanpela gavman ol pris bilong dispela graun i bosim em inap kamapim kain amamas olsem. Gavman God i bosim, em tasol inap. Olsem na ol Kristen tru i no laik kirapim wanpela gavman tiokratik long rot bilong sampela pasin politik. Ol i wetim God yet i kamapim wanpela gavman tiokratik bilong bosim graun long taim na long pasin em yet i makim.—Daniel 2:44.
5. Lo tiokratik tru i mekim wok we long nau? I gat wanem ol askim i kamap long dispela?
5 Tasol nau long dispela taim i gat lo tiokratik tru i stap. Em i wok we? Em i mekim wok namel long ol manmeri em long laik bilong ol yet ol i stap aninit long lo bilong God na ol i wok gut wantaim long mekim laik bilong em. Ol dispela manmeri ol i stap gut long em, em i bin bungim ol olsem wanpela “lain” bilong spirit i stap long olgeta hap na ol i stap long “kantri” spirit bilong ol. Dispela lain em liklik hap bilong “lain Israel tru bilong God” ol i stap yet long graun, na ol poroman Kristen bilong ol em ol inap olsem 5 milion 500 tausen samting. (Aisaia 66:8; Galesia 6:16) Ol i stap aninit long Krais Jisas, em i stap King long heven, na God Jehova, em “King bilong olgeta taim,” em i bin putim em long sia king. (1 Timoti 1:17; KTH 11:15) Olsem wanem dispela oganaisesen em i tiokratik? Lain bilong en i ting olsem wanem long namba bilong ol gavman bilong graun long bosim ol man? Na ol man i gat namba long bosim ol narapela insait long kantri spirit bilong ol, olsem wanem ol i save bihainim lo tiokratik?
Wanpela Oganaisesen Tiokratik
6. Olsem wanem God inap bosim wanpela oganaisesen i stap long graun?
6 Jehova i save stap long ples antap em yumi no inap lukim, orait olsem wanem em inap bosim wanpela oganaisesen i stap long graun? (Song 103:19) Em inap, long wanem, ol manmeri i stap insait long dispela oganaisesen ol i bihainim wanpela tok bilong Baibel, olsem: “Yu mas bilip strong long Bikpela. Yu no ken ting save bilong yu yet inap helpim yu.” (Sindaun 2:6; 3:5) Ol i bihainim “lo bilong Krais” na ol i bihainim ol lo bilong Baibel long olgeta samting long i stap bilong ol, na long ol dispela samting ol i mekim ol i larim God i bosim ol. (Galesia 6:2; 1 Korin 9:21; 2 Timoti 3:16; lukim Matyu 5:22, 28, 39; 6:24, 33; 7:12, 21.) Bilong mekim olsem, ol i mas stadi long Baibel. (Song 1:1-3) Olsem ol “gutpela lain manmeri” bilong Beria long bipo, ol i no bihainim ol man—ol i save wok oltaim long lukim Baibel na bai ol i ken save tru olsem ol tok ol i lainim i wankain olsem tok bilong Baibel. (Aposel 17:10, 11; Song 119:33-36) Ol i mekim wankain beten olsem man bilong raitim Song: “Mi bilip tru long olgeta lo bilong yu, olsem na yu givim gutpela tingting na gutpela save long mi.”—Song 119:66.
7 Long olgeta oganaisesen, i mas i gat sampela man i bosim o soim rot long en. Ol Witnes Bilong Jehova tu i save mekim olsem, na ol i bihainim pasin bilong bosim oganaisesen olsem aposel Pol i bin makim: “Het bilong olgeta man em Krais, na het bilong meri em man bilong en, na het bilong Krais em God.” (1 Korin 11:3) Olsem na ol man i winim mak bilong i stap elda, ol tasol i save mekim wok elda insait long ol kongrigesen. Tru, Jisas—em “het bilong olgeta man”—em i stap long heven, tasol i gat liklik hap lain bilong ol brata bilong em ol i stap yet long graun, olsem “ol arapela” bilong dispela lain God i bin makim, em ol i wet long go long heven na mekim wok king wantaim Jisas. (KTH 12:17; 20:6) Dispela hap lain i stap yet long graun, olgeta wantaim em dispela “wokboi i gat gutpela tingting.” Ol Kristen i larim dispela “wokboi” i bosim ol, na long dispela pasin ol i kamapim klia olsem ol i daun long Jisas na het bilong Jisas, em Jehova. (Matyu 24:45-47; 25:40) Long dispela rot, ol samting i save wok stret long dispela gavman tiokratik. “God i save mekim stret olgeta wok bilong en. Em i no save mekim ol samting i paul nabaut.”—1 Korin 14:33.
8. Olsem wanem ol elda Kristen i save helpim lo tiokratik?
8 Ol elda Kristen i save helpim dispela lo tiokratik, long wanem, ol i save Jehova bai skelim pasin bilong ol long mekim wok long hap namba ol i holim. (Hibru 13:17) Na taim ol i mas pasim tok long ol samting ol i laik mekim, ol i larim gutpela tingting na save bilong God i stiaim ol—i no tingting na save bilong ol yet. Taim ol i mekim olsem, ol i bihainim pasin bilong Jisas. Em i gat gutpela tingting na save moa yet, winim olgeta man i bin stap long graun. (Matyu 12:42) Tasol em i tokim ol Juda: “Pikinini em i no inap mekim wanpela samting long tingting bilong em yet. Nogat. Em i mekim tasol ol samting em i lukim Papa i mekim.” (Jon 5:19) Na ol elda i gat wankain tingting olsem King Devit. Em i bin holim bikpela namba bilong bosim ol man insait long wanpela gavman tiokratik. Tasol em i laik bihainim pasin bilong Jehova—i no pasin bilong em yet. Em i beten olsem: “Bikpela, yu ken lainim mi long samting yu laik bai mi mekim . . . na yu ken bringim mi long gutpela rot.”—Song 27:11.
9. Ol Kristen i dediket pinis, ol i gat wanem stretpela tingting long narapela narapela samting ol i bilip na wet long en na ol narapela narapela wok insait long oganaisesen tiokratik?
9 Sampela i bin skelim sampela pasin em ol i ting i no stret, olsem ol man tasol i mekim wok bilong bosim kongrigesen, em ol man i bin winim mak bilong mekim dispela wok; na ol i ting i no stret long sampela Kristen tasol inap wet long kisim laip long heven, na ol narapela i wet long kisim laip i stap oltaim long graun. (Song 37:29; Filipai 3:20) Tasol ol Kristen i dediket pinis ol i save, Baibel yet i tokaut long ol dispela pasin. Em ol pasin tiokratik. Ol man i wok long skelim dispela samting, em ol man i no laik daun long ol lo bilong Baibel. Na tu, ol Kristen i save, long ai bilong Jehova ol man na meri wantaim ol inap kisim laip i stap oltaim. (Galesia 3:28) Ol Kristen tru i ting em i nambawan samting tru long ol inap lotuim King bilong heven na graun, na ol i amamas long holim wanem wanem wok Jehova i makim bilong ol. (Song 31:23; 84:10; 1 Korin 12:12, 13, 18) Na laip i stap oltaim oltaim, maski ol i kisim long heven o long Paradais long graun, em i wanpela gutpela samting tru ol inap wet long en.
10. (a) Jonatan i bihainim wanem gutpela tingting? (b) Olsem wanem ol Kristen bilong nau i kamapim wankain tingting olsem bilong Jonatan?
10 Olsem na ol Witnes Bilong Jehova i kain olsem Jonatan, em pikinini bilong King Sol na em i man bilong i stap aninit long God. Sapos Jonatan i stap king, yumi save em bai stap gutpela king tru. Tasol Sol i no stap gut long God, olsem na God i makim Devit long kamap namba 2 king bilong Israel. Orait yu ting Jonatan i bel nogut long dispela? Nogat. Em i kamap gutpela pren tru bilong Devit, na em i lukautim Devit taim Sol i laik bagarapim em. (1 Samuel 18:1; 20:1-42) Na i wankain tu long ol manmeri i wet long kisim laip oltaim long graun—ol i no bel nogut long ol manmeri i wet long kisim laip long heven. Na ol Kristen tru i no bel nogut long ol man i holim namba long bosim kongrigesen long pasin tiokratik, nogat. Ol i ‘tingting long dispela wok ol i save mekim, na ol i belgut tru long ol na laikim ol tru,’ long wanem, ol i pilim tru bikpela wok ol i mekim bilong helpim ol brata sista bilong ol long spirit.—1 Tesalonaika 5:12, 13.
Tingting Tiokratik Long Ol Gavman Bilong Graun
11. Ol Kristen i daun long lo tiokratik ol i ting olsem wanem long ol gavman bilong graun?
11 Sapos ol Witnes Bilong Jehova i stap aninit long gavman tiokratik, olsem gavman bilong God, orait ol i gat wanem tingting long ol gavman bilong graun? Jisas i tok, ol disaipel bilong em “i no bilong dispela graun.” (Jon 17:16) Tasol ol Kristen i save ol i gat dinau long “Sisar,” em ol gavman bilong graun. Jisas i tok: “Samting bilong Sisar, em yupela i mas givim long Sisar. Na samting bilong God, em yupela i mas givim long God.” (Matyu 22:21) Baibel i tokim yumi, olgeta gavman bilong ol man, em “God yet i putim ol na ol i stap.” Jehova, em As bilong olgeta namba na strong bilong bosim man, em i save larim ol gavman i stap, na em i laik bai ol i mekim gutpela pasin long ol lain i stap aninit long ol. Taim ol i mekim olsem, ol i “wokman bilong God.” Ol Kristen i save aninit long gavman i bosim kantri ol i sindaun long en, na bai ‘bel bilong ol’ i no gat tok long ol. (Rom 13:1-7) Tasol sapos gavman i tok long ol i mas mekim wanpela samting i no stret wantaim lo bilong God, Kristen bai “bihainim tok bilong God tasol. [Ol] i no ken bihainim tok bilong ol man.”—Aposel 5:29.
12. Taim ol bikman bilong gavman i mekim nogut long ol Kristen, ol i save bihainim pasin bilong husat?
12 Orait, olsem wanem long taim ol bikman bilong gavman i mekim nogut long ol Kristen tru? Ol i save bihainim pasin bilong ol Kristen bilong pastaim, em ol man i bin mekim nogut tru long ol tasol ol i karim dispela hevi. (Aposel 8:1; 13:50) Ol i save ol dispela hevi bai kamap bilong traim bilip bilong ol, long wanem, Jisas i toksave pinis long ol. (Matyu 5:10-12; Mak 4:17) Tasol ol dispela Kristen bilong pastaim ol i no bekim nogut long ol man i mekim nogut long ol, nogat; na dispela bikpela hevi i no daunim bilip bilong ol. Ol i bihainim pasin bilong Jisas: “Ol i bin tok nogut long em, tasol em i no bekim tok nogut bilong ol. Em i karim pen, tasol em i no tok long bagarapim ol. Nogat. Em i putim em yet long han bilong God, em dispela Jas i save skelim stret olgeta samting.” (1 Pita 2:21-23) Em nau, ol lo Kristen i win na i daunim pasin bilong Satan long kirapim ol man long mekim nogut long ol Kristen.—Rom 12:21.
13. Taim sampela gavman i mekim nogut long ol Witnes Bilong Jehova na sampela ol i wok strong long bagarapim gutnem bilong ol, ol Witnes i mekim wanem?
13 Wankain samting i kamap long taim bilong yumi. Sampela gavman nogut i bin mekim nogut long ol Witnes Bilong Jehova, olsem Jisas i bin tok profet long en. (Matyu 24:9, 13) Long sampela kantri, sampela i save sutim ol tok giaman long ol Witnes Bilong Jehova na ol dispela tok giaman i go nabaut namel long ol man. Ol i mekim olsem bilong subim gavman long daunim ol dispela gutpela Kristen. Tasol maski ol i sutim ol dispela tok nogut long ol, ol Witnes i mekim yet gutpela pasin, na long dispela ol i kamapim klia olsem ol i wokman bilong God. (2 Korin 6:4-8) Taim rot i op, ol i save go long ol ofisa bilong gavman na ol kot bilong kantri bambai ol i ken kamapim long ples klia olsem ol i no gat asua long wanpela rong. Wanem wanem rot i op long ol, ol i save mekim wok long ol kot samting bilong sambai long gutnius. (Filipai 1:7) Orait, taim ol i mekim pinis olgeta samting ol inap mekim na i stret long lo bilong gavman, ol i save putim dispela hevi bilong ol long han bilong Jehova. (Song 5:8-12; Sindaun 20:22) Olsem ol Kristen bilong pastaim i bin mekim, ol tu i no pret long kisim pen long bihainim stretpela pasin sapos ol i mas mekim olsem.—1 Pita 3:14-17; 4:12-14, 16.
Putim Biknem Bilong God i Go Pas
14, 15. (a) Ol man i save helpim lo tiokratik, ol i putim wanem samting i stap namba wan? (b) Long wanem taim Solomon i bin stap olsem gutpela piksa bilong man i gat pasin daun, maski em i gat namba long bosim ol man?
14 Taim Jisas i skulim ol disaipel long beten, namba wan samting em i kolim i olsem: Nem bilong Jehova i mas i stap holi. (Matyu 6:9) Olsem na ol manmeri i stap aninit long lo tiokratik ol i laik givim biknem long God, i no long ol yet. (Song 29:1, 2) Baibel i tokaut olsem, long taim bilong ol aposel dispela i kamap olsem samting bilong pundaunim sampela man em ol i no laik bihainim Jisas, long wanem, “ol i laikim tumas bai ol man i litimapim nem bilong ol.” (Jon 12:42, 43) Tru tumas, man i mas i gat pasin daun bambai em i ken putim Jehova i go pas na em yet i stap nambatu, maski em i ting em i samting tru.
15 Solomon i kamapim klia gutpela tingting bilong em long dispela samting. Ol tok em i bin mekim taim em i laik dediketim naispela haus lotu em i bin wokim, yu ken skelim wantaim tok Nebukatnesar i mekim long ol bikpela haus em i bin wokim. Long pasin hambak moa yet, Nebukatnesar i tok: “Man, Babilon em i bikpela taun na i nambawan tru. Long strong bilong mi yet, mi bin kirapim dispela taun, bilong soim bikpela strong na biknem bilong mi long olgeta lain manmeri.” (Daniel 4:30) Tasol tok bilong Solomon i narapela kain. Long pasin daun em i daunim bikpela wok em i bin mekim long sanapim dispela haus bilong God, na em i tok: “God, ating em i tru, yu laik kam i stap wantaim mipela ol manmeri bilong graun, a? Heven em i bikpela ples tumas, tasol em i no bikpela inap long yu i stap long en. Na olsem wanem bai dispela haus mi wokim bai inap long yu?” (2 Stori 6:14, 15, 18; Song 127:1) Solomon i no litimapim nem bilong em yet, nogat. Em i save em i stap olsem maus tasol bilong Jehova, na em i tok: “Ol man i save litimapim nem bilong ol yet bai i kisim bikpela sem. Ol man i gat gutpela tingting i save daunim ol yet.”—Sindaun 11:2.
16. Ol elda i no litimapim nem bilong ol yet, na olsem wanem dispela i olsem wanpela gutpela blesing tru bilong kongrigesen?
16 Ol elda Kristen tu i save litimapim nem bilong Jehova, i no nem bilong ol yet. Ol i bihainim tok bilong aposel Pita, em i tok: “Sapos wanpela man i wok long helpim ol arapela man, orait em i mas mekim dispela wok long strong God i save givim em. Olsem bai ol man i ken lukim olgeta samting yupela i mekim, na long nem bilong Jisas Krais ol i ken litimapim nem bilong God.” (1 Pita 4:11) Aposel Pol i stori long wok olsem “wasman bilong sios” na em i tok, dispela em i wanpela “gutpela wok”—i no wanpela bikpela wok i gat namba na biknem long en, nogat. (1 Timoti 3:1) Ol elda i kisim dispela wok bambai ol i ken mekim wok bilong helpim ol manmeri bilong kongrigesen, na i no bilong i stap bos bilong ol. Ol i stap tisa na wasman bilong lain bilong God. (Aposel 20:28; Jems 3:1) Ol elda i gat pasin daun na ol i save daunim laik bilong ol yet, ol i wanpela gutpela blesing tru bilong kongrigesen. (1 Pita 5:2, 3) Yes, yumi “mas givim biknem [olsem amamas tru] long ol dispela kain man,” na yumi mas tenkyu long Jehova, em i bin givim planti gutpela elda long yumi bilong sambai long lo tiokratik nau long dispela “taim bilong las de.”—Filipai 2:29; 2 Timoti 3:1.
‘Bihainim Pasin God i Save Mekim’
17. Ol manmeri i stap aninit long lo tiokratik, olsem wanem ol i save bihainim pasin bilong God?
17 Aposel Pol i tok: “God i save laikim yupela tru, na yupela i stap pikinini bilong em. Olsem na yupela i mas bihainim ol pasin em yet i save mekim.” (Efesus 5:1) Ol man i stap aninit long lo tiokratik ol i save wok strong long kamap olsem God, inap long mak ol sinman bilong graun inap winim. Baibel i tok long Jehova olsem: “God . . . i olsem wanpela bikpela strongpela ston i no save senis. Oltaim em i save bihainim tok bilong en na em i no save giaman. Na pasin bilong en i gutpela na stretpela tasol.” (Lo 32:3, 4) Bilong bihainim pasin bilong God long dispela samting, ol Kristen i wok strong long i stap gut long God, na mekim stretpela pasin, na kisim stretpela tingting long wanem pasin em i stret. (Maika 6:8; 1 Tesalonaika 3:6; 1 Jon 3:7) Ol i save abrusim planti samting nau ol man bilong dispela graun i save orait long en, olsem pasin pamuk, mangal, na laikim tumas long kisim mani samting. (Efesus 5:5) Ol wokboi bilong Jehova i save bihainim ol lo bilong God—i no bilong ol man—olsem na oganaisesen bilong em i bihainim pasin tiokratik, na i gat klinpela na gutpela pasin insait long en.
18. Wanem nambawan bikpela pasin bilong God? Ol Kristen i save kamapim dispela pasin olsem wanem?
18 Nambawan bikpela pasin bilong Jehova em pasin bilong laikim tru ol narapela. Aposel Jon i tok: “God yet em i as bilong dispela pasin bilong laikim ol arapela.” (1 Jon 4:8) Gavman tiokratik em gavman God i bosim, olsem na dispela tok “tiokratik” i makim pasin bilong bosim ol man long pasin sori. Jisas i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Nau long dispela taim nogut bilong las de, oganaisesen tiokratik i bin kamapim moa yet pasin bilong laikim tru ol narapela. Long pait nogut i bin kamap long Afrika, em ol i laik bagarapim na pinisim wanpela lain olgeta, ol Witnes Bilong Jehova i bin kamapim pasin sori long olgeta manmeri, maski ol i bilong wanem wanem lain. Na long bikpela pait i bin kamap long kantri bipo ol i kolim Yugoslavia, ol Witnes Bilong Jehova long olgeta hap bilong kantri, ol i helpim ol narapela insait long lain bilong ol, tasol ol narapela lain bilong lotu ol i insait long pasin bilong bagarapim na pinisim ol lain ol i no save laikim. Na namel long ol yet, ol Witnes Bilong Jehova ol i wok strong long bihainim tok bilong Pol, olsem: “Yupela i mas rausim olgeta pasin bilong bel nogut na kros na belhat na bikmaus na tok bilas, na olgeta kain pasin nogut. Yupela i mas mekim gutpela pasin long ol arapela Kristen na givim bel bilong yupela long ol. Yupela i mas lusim sin bilong ol, olsem God i lusim sin bilong yupela long nem bilong Krais.”—Efesus 4:31, 32.
19. Ol manmeri i daun long lo tiokratik, i gat wanem ol gutpela samting bilong ol long nau na long bihain?
19 Ol manmeri i daun long lo tiokratik ol i save kisim gutpela samting tru long en. Ol i save stap bel isi wantaim God na ol wanlain Kristen bilong ol. (Hibru 12:14; Jems 3:17) I stap bilong ol i gat as bilong en. (Saveman 12:13) Ol i stap gutpela long ol samting bilong spirit na ol i gat gutpela samting ol inap wetim i kamap bihain. (Song 59:9) Tru tumas, i stap bilong ol long ol samting bilong spirit long nau i makim gutpela sindaun ol bai kisim taim olgeta lain man i stap aninit long gavman tiokratik. Baibel i tok, long dispela taim “bai i no gat wanpela i mekim nogut long narapela, long wanem, olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.” (Aisaia 11:9) Man! Bai em i gutpela taim tru! Long nau yumi olgeta i mas daun long lo tiokratik na bai yumi ken i stap long dispela Paradais bihain bai kamap.
Yu Inap Stori Long Dispela?
◻ Gavman tiokratik tru em i wanem kain gavman? Lo bilong en i stap we long nau?
◻ Ol man i save mekim wanem na ol i daun long lo tiokratik long i stap bilong ol?
◻ Olgeta manmeri i stap aninit long lo tiokratik ol i save mekim wanem bilong putim biknem bilong God i go pas long biknem bilong ol yet?
◻ Ol man i helpim lo tiokratik ol i save bihainim wanem ol pasin bilong God?
1. Bilong wanem gavman em i wanpela samting em planti man i save tingim?
7. Insait long lo tiokratik, husat ol i holim wok bos long oganaisesen, kirap long namba wan na i go?
[Piksa long pes 17]
Solomon i putim biknem bilong God i go pas long biknem bilong em yet