Iehova i Stap King na Bosim Ol Man
“Bikpela [Jehova] bai i stap king oltaim oltaim.”—SONG 146:10.
KIRAP long taim bilong Nimrot ol man i bin traim kain kain gavman bilong bosim ol, olsem gavman dikteta, na monaki, na oligaki, na demokratik. Jehova i bin larim ol dispela gavman i kamap, na i olsem em yet i putim ol i stap. Em i As bilong olgeta wok bilong bosim man. (Rom 13:1) Tasol ol gavman ol man i bosim i no kamapim gutpela wok. I no gat wanpela man inap kamapim gutpela gavman inap i stap oltaim na bosim gut ol man. Planti “bikman i wok long daunim ol arapela manmeri na mekim nogut long ol.”—Saveman 8:9.
2 Yumi no ken kirap nogut long dispela, long wanem, ol man bilong graun i no gutpela olgeta. “Mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Olsem na i gat wanpela gavman tasol i wok gut. Em wanem gavman? Em gavman bilong God Jehova tasol. Long tok Grik, kraʹtos i olsem “gavman,” na the·osʹ i olsem “God.” Sapos gavman bilong God Jehova yet i bosim yumi, em gutpela tru, a?—Song 146:10.
3 Jehova i bin bosim ol samting long Iden i go inap long Adam tupela Iv i bikhet long em. (Stat 3:1-6, 23) Long taim bilong Abraham, i olsem Jehova i bin bosim taun Salem, na Melkisedek i bin stap king na pris. (Stat 14:18-20; Hibru 7:1-3) Long hap bilong Sainai long 1500 yia samting paslain long Krais, God Jehova i kirapim namba wan gavman bilong em yet bilong bosim wanpela lain. Dispela gavman i bin kamap olsem wanem, na em i wok olsem wanem?
Gavman Bilong God i Kamap
4 Long yia 1513 paslain long Krais, God i helpim ol Israel long lusim wok kalabus long Isip, na taim ami bilong king bilong Isip i bihainim ol bilong kisim bek ol, God i bagarapim dispela ami long solwara Retsi. Em i bringim ol Israel i kam long maunten Sainai, na ol i kem aninit long en, na God i tokim Moses: “Yupela i lukim pinis ol samting mi bin mekim . . . Mi bin . . . bringim yupela i kam long dispela ples, na nau yupela i stap wantaim mi. Sapos nau yupela i holim strong kontrak bilong mi na bihainim tok bilong mi, orait bai yupela i kamap lain manmeri bilong mi. Olgeta graun na olgeta manmeri i bilong mi, tasol mi bai makim yupela i stap lain manmeri bilong mi stret.” Na ol Israel i tok: “Mipela bai mekim olgeta samting olsem Bikpela i bin tok.” (Kisim Bek 19:4, 5, 8) Em nau, Jehova i wokim kontrak wantaim ol na ol i stap aninit long gavman bilong em.—Lo 26:18, 19.
5 Tasol ol i no inap lukim em, na olsem wanem em i bosim ol? (Kisim Bek 33:20) Em i givim ol lo na lain pris long ol, em rot bilong em long bosim ol. Taim ol i bihainim ol lo na ol i lotuim Bikpela King Jehova olsem em i bin makim long lo bilong em, ol i mekim wok bilong em. Na hetpris i holim “dispela tupela ston bilong kisim save long laik bilong God,” em rot bilong God long stiaim ol long taim bilong hevi. (Kisim Bek 28:29, 30) Na ol i gat ol hetman o elda tu na ol i rot bilong Jehova long helpim ol man long bihainim lo bilong em. Yumi ken stori long sampela elda hia na bai yumi ken save, olsem wanem ol man i mas aninit long lo bilong God.
Ol i Holim Wok Gavman
6 Sampela Israel i gat namba, na em i gutpela wok ol i kisim, tasol ol i mas was gut na bai ol i no hambak o mekim pasin antap na ol i no litimapim nem bilong Jehova. Ol tu i mas save, ‘man i no inap bosim wokabaut bilong em yet na bihainim ol rot em i laikim.’ Lain Israel i stap aninit long gavman bilong God na ol i mas bihainim laik bilong em tasol, na laik bilong ol elda nogat, na taim ol i mekim olsem, ol samting i stap gutpela. Tambu papa bilong Moses, em Jetro, em i tokim Moses long “makim ol man i save stap aninit long God, em ol man yumi inap bilip long ol na i no inap ol man i givim mani long ol bilong pulim ol long mekim pasin i no stret.”—Kisim Bek 18:21.
7 Moses em namba wan bilong kamap wasman aninit long gavman bilong God, na em i mekim gutpela wok. Tru, wanpela taim em i mekim pasin kranki, tasol em i man bilong stap aninit long Jehova. Sapos wanpela hevi i kamap na em i no save long rot bilong stretim, em i save askim Jehova. (Lukim Namba 15:32-36.) Em i bosim planti milion man, tasol em i no hambak long dispela o litimapim nem bilong em, long wanem, “em i man bilong daunim em yet, na i no gat wanpela man long dispela graun i save daunim em yet inap olsem Moses.” (Namba 12:3) Em i no bihainim laik bilong em yet, nogat. Em i tingting tasol long givim biknem long Jehova. (Kisim Bek 32:7-14) Em i gat strongpela bilip, na taim em i no kisim namba yet long bosim lain Israel em “i mekim wankain pasin olsem man i bin lukim God, na em i stap strong tru.” (Hibru 11:27) Moses i save, Jehova i King tru bilong dispela lain. (Song 90:1, 2) Yumi tu i mas bihainim pasin olsem.
8 Tasol wok bilong lukautim ol Israel i go bikpela tru, na Moses wanpela i no inap, olsem na Jehova i putim spirit bilong em long 70 elda moa bilong helpim Moses. (Namba 11:16-25) Bihain olgeta taun i gat sampela elda i stap. (Lukim Lo 19:12; 22:15-18; 25:7-9.) Taim Moses i dai pinis Jehova i makim Josua bilong bosim lain Israel. Em bikpela wok tru, na Jehova i tokim em: “Yu no ken lusim tingting long dispela buk bilong lo. Long san na long nait yu mas skul gut long olgeta lo. Na yu mas was gut na bihainim tru olgeta tok i stap long lo.” (Josua 1:8) Maski Josua i bin holim wok bilong God inap 40 yia pinis, em i mas wok yet long kaunim Lo. Yumi tu i mas stadi long Baibel na bai yumi ken save gut long ol lo bilong Jehova, maski yumi bin stap long tok i tru planti yia o yumi holim planti wok bilong God.—Song 119:111, 112.
9 Bihain long Josua planti hetman i bosim kantri, na sori tumas, planti taim “ol Israel i . . . mekim pasin nogut long ai bilong Bikpela.” (Hetman 2:11) Ol hetman i holim wok, na “long dispela taim, ol Israel i no gat king. Olsem na olgeta man i save mekim ol samting long laik bilong ol yet.” (Hetman 21:25) Ol wan wan i bihainim tingting bilong em yet long wanem kain pasin em bai bihainim o em bai lotuim God olsem wanem. Olsem na bihain planti Israel i popaia na ol i mekim pasin kranki. Ol i lotuim ol god giaman na sampela taim ol i mekim sampela pasin i nogut tru. (Hetman 19:25-30) Tasol sampela i stap gut long Jehova.—Hibru 11:32-38.
10 Samuel em laspela hetman, na long dispela taim bikpela tok i kamap long husat i mas bosim ol. Ol i lukim ol lain birua nabaut ol i gat king bilong bosim ol, na nau ol tu i ting ol i mas i gat king. Ol i no tingim Jehova i stap King bilong ol, na gavman bilong ol em Jehova yet i bosim. Orait, Jehova i tokim Samuel: “Yu no ken ting ol i les long yu na ol i laik rausim yu. Nogat. Ol i no laik mi stap king bilong ol.” (1 Samuel 8:7) Yumi mas tingim gut dispela samting ol i bin mekim, nogut yumi tu i larim ol man bilong graun i paulim tingting bilong yumi na bai yumi no tingting moa long ol samting bilong spirit.—Lukim 1 Korin 2:14-16.
11 Tasol Jehova i harim laik bilong ol Israel na em i makim Sol i stap king bilong ol, na bihain Devit. Tasol em i bosim yet ol, na em i tokim tupela king hia long raitim kopi bilong lo na i bilong ol yet na wan wan i ken kaunim long olgeta de, “bai em i ken aninit long Bikpela na bihainim tru olgeta lo na tok bilong God i stap long dispela buk. Olsem na bai em i no ken litimapim nem bilong em yet na daunim ol arapela.” (Lo 17:19, 20) Jehova i no laik bai ol man i holim namba long gavman bilong em ol i litimapim nem bilong ol. Ol i mas bihainim lo bilong em long olgeta samting ol i mekim.
12 King Devit i gat strongpela bilip, na Jehova i mekim tok promis long em olsem em bai stap tumbuna bilong wanpela lain king i no ken pinis. (2 Samuel 7:16; 1 King 9:5; Song 89:29) Devit i makim gutpela pasin daun yumi ken bihainim. Em i tokim Jehova: “Bikpela, king i amamas long yu givim strong long em. Em i amamas moa yet long yu mekim em i winim pait.” (Song 21:1) Tru, sampela taim em i pundaun na mekim rong, tasol planti taim em i mekim wok long strong bilong Jehova na i no bilong em yet.
Pasin na Tingting Nogut
13 Tasol sampela king bilong lain Israel i no gutpela olsem Moses na Devit. Planti ol i no daun long gavman bilong God. Ol i orait long lotu giaman i stap long Israel. Na sampela gutpela king tu, sampela taim ol i no daun long God. Solomon i olsem. Jehova i givim bikpela save long em na mekim gut long em. (1 King 4:25, 29) Tasol em i sakim lo bilong Jehova na em i maritim planti meri, na em i larim lotu giaman i stap long Israel. Taim em i lapun em i putim bikpela hevi long ol man.—Lo 17:14-17; 1 King 11:1-8; 12:4.
14 Rehoboam em pikinini bilong Solomon, na ol Israel i laik bai em i tekewe hevi bilong ol, tasol em i mekim hatpela pasin moa long ol, olsem na 10-pela lain i lusim em na tupela lain tasol i stap wantaim em. (2 Stori 10:4-17) Jeroboam em namba wan king bilong 10-pela lain. Em i no laik bai lain bilong em i pas gen wantaim tupela lain o stap aninit long gavman bilong Jehova, olsem na em i kirapim ol long lotuim bulmakau, olsem god bilong ol. Dispela i kamapim klia pasin bikhet bilong em, em i no laik i stap aninit long God. (1 King 12:26-30) Inap planti yia King Asa i bin mekim gutpela wok na em i stap gut long Jehova, tasol bihain wanpela profet i givim tok bilong Jehova long em, na em i mekim nogut long dispela profet. (2 Stori 16:7-11) Olsem na maski man i lapun na em i bin mekim wok bilong Jehova inap planti yia pinis, ating sampela taim em tu i mas kisim sampela tok bilong stretim em.
Gavman Bilong God i Pinis
15 Taim Jisas i stap long graun God i bosim yet lain Israel, tasol sori tumas, ol bikman bilong ol i no tingim ol samting bilong spirit. Ol i no gat pasin daun olsem bilong Moses. Jisas i kamapim rong bilong ol na i tok: “Ol i save skulim yupela long lo, olsem Moses i bin mekim. Olsem na olgeta tok ol i givim long yupela, em yupela i mas harim na bihainim. Tasol pasin ol i save mekim, em yupela i no ken bihainim.”—Matyu 23:2, 3.
16 Ol bikman Juda i givim Jisas long Pontius Pailat, em bikpela rong ol i mekim long gavman bilong God. Pailat i skelim pasin bilong Jisas na em i tok, Jisas i no gat rong. Em i sanapim Jisas long ai bilong ol Juda na em i tok: “Lukim king bilong yupela.” Tasol ol i laik bai Jisas i mas i dai, na Pailat i askim ol: “Yupela i laik bai mi nilim king bilong yupela long diwai?” Nau ol i tok: “Mipela i no gat narapela king. Sisar wanpela tasol!” (Jon 19:14, 15) Jisas i bin ‘kam long nem bilong Jehova,’ tasol ol i sakim em na ol i laikim Sisar i stap king bilong ol.—Matyu 21:9.
17 Taim ol i sakim Jisas, i olsem ol i sakim gavman bilong God, long wanem, Jisas i bikpela man bilong wanpela gavman God i laik kamapim bihain. Em i tumbuna pikinini bilong Devit na em i bilong i stap king inap oltaim. (Aisaia 9:6, 7; Luk 1:33; 3:23, 31) Olsem na lain Israel bilong skin i no stap moa olsem lain bilong God.—Rom 9:31-33.
Nupela Gavman Bilong God
18 Tasol dispela i no makim olsem gavman bilong God i no ken bosim graun moa, nogat. Long rot bilong Krais Jisas Jehova i kirapim nupela gavman, em dispela lain Kristen em i makim ol long spirit holi, ol i nupela lain bilong em. (1 Pita 2:9) Ol i “lain Israel tru bilong God,” na ol i “bilong olgeta lain man, . . . na bilong olgeta tok ples, na . . . skin, na . . . kantri.” (Galesia 6:16; KTH 5:9, 10) Ol i stap aninit long ol gavman bilong graun, tasol God yet i bosim ol na ol i memba bilong nupela gavman bilong em. (1 Pita 2:13, 14, 17) Taim gavman i nupela yet ol bikman Juda i subim ol disaipel na bai ol i no ken bihainim tok bilong Jisas, tasol ol disaipel i tok: “Mipela i mas bihainim tok bilong God tasol. Mipela i no ken bihainim tok bilong ol man.”—Aposel 5:29.
19 Tasol dispela nupela gavman i wok olsem wanem? I gat King bilong en, em Krais Jisas, na em i olsem maus bilong Bikpela King Jehova. (Kolosi 1:13) King i stap long heven na em i bosim lain bilong em, maski ol i no inap lukim em. Tok bilong em i stiaim ol, na spirit bilong em i makim ol elda bilong lukautim ol, na long Jerusalem i gat lain wasman bilong bosim ol kongrigesen, na sampela wasman moa i raun, olsem Pol, na Timoti, na Taitus, ol i maus bilong dispela lain. Na i gat lain elda tu bilong lukautim ol wan wan kongrigesen. (Taitus 1:5) Sapos wanpela bikpela tok o hevi i kamap, ol elda i askim lain wasman long Jerusalem o wanpela wasman bilong raun, olsem Pol samting. (Lukim Aposel 15:2; 1 Korin 7:1; 8:1; 12:1.) Na olgeta bilong kongrigesen i mas stap gut long nupela gavman na bihainim ol lo bilong Jehova.—Rom 14:4, 12.
20 Pol i toksave olsem, taim ol aposel i dai pinis, sampela bai lusim bilip na i laik paulim ol Kristen, na tru tumas em i kamap pinis. (2 Tesalonaika 2:3) Bihain planti milion i tok ol i Kristen, na ol i aninit long ol gavman lotu bilong ol yet. Sampela i gat bos na ol narapela i aninit long em, na lain pasto i bosim sampela, na ol wan wan kongrigesen bilong sampela i bosim ol samting bilong ol yet. Tasol Jehova i no as bilong pasin o bilip bilong ol, na em i no stap King bilong ol. Ol i no aninit long em.
21 Baibel i tok, long taim bilong las de ol Kristen tru bai stap narapela na ol Kristen giaman bai stap narapela. (Matyu 13:37-43) Dispela samting i bin kamap long 1919, em taim gavman bilong God i bin kirap gen, na truim bilong tok profet bilong Aisaia 66:8 i kamap. Em i tok: “Ating wanpela kantri inap kamap long wanpela de tasol, a? Ating wanpela bikpela lain manmeri inap kamap wantu tasol, a?” Em inap! Em i bin kamap long 1919. Long 1919 lain Kristen i stap, em dispela “bikpela lain manmeri” na dispela “wanpela kantri,” olsem Aisaia i tok hia. i olsem wanpela kantri i kamap insait long wanpela de tasol! Dispela nupela “kantri” i wok long stretim ol lo bilong en na pasin bilong mekim ol wok na bai i wankain olsem bilong lain Kristen bilong pastaim. (Aisaia 60:17) Tasol long olgeta taim gavman bilong God i bosim dispela lain. Pasin na bilip bilong ol i stret wantaim ol lo bilong Baibel, na long olgeta taim ol i stap aninit long Krais Jisas, em i kamap King pinis.—Song 45:17; 72:1, 2.
22 Olsem wanem long yu? Yu aninit long dispela gavman bilong God? Yu holim sampela wok bilong en? Sapos olsem, yu save bihainim laik bilong God? Yu save wanem ol samting yu mas abrusim? Stadi bilong bihain bai toktok long tupela laspela askim.
Yu Inap Stori?
◻ Gavman bilong God em wanem samting?
◻ Olsem wanem lain Israel i stap aninit long gavman bilong God?
◻ Jehova i mekim wanem na bai ol king i ken save em yet i bosim ol?
◻ Taim ol Kristen i kamap, olsem wanem ol i stap aninit long gavman bilong God? Wanem ol lo bilong ol?
◻ Wanem oganaisesen i bin kamap long taim bilong yumi na God i bosim?
[Askim Bilong Stadi]
1, 2. (a) Olsem wanem ol man i no inap kamapim gutpela gavman? (b) Wanem kain gavman tasol i wok gut?
3. Bipo, wanem sampela taim Jehova i bin bosim ol man?
4. Olsem wanem wanpela gavman bilong God i bin kamap bilong bosim ol Israel?
5. Olsem wanem Jehova i bin stap King na bosim ol Israel?
6. Ol man bilong Israel i bin holim bikpela wok insait long dispela gavman bilong God, bilong wanem ol i mas was gut? Wanem kain man ol inap holim bikpela wok olsem?
7. Wanem gutpela pasin bilong Moses long i stap aninit long Jehova?
8. Jehova i givim wanem tok long Josua? Dispela i mas kirapim yumi long tingim wanem samting?
9. Olsem wanem long ol Israel long taim bilong ol hetman?
10. Wanem senis i bin kamap long gavman bilong ol Israel long taim bilong Samuel? Wanem as na dispela samting i bin kamap?
11. (a) Maski gavman bilong ol i bin senis na ol i stap aninit long ol king, husat i stap bos yet bilong ol? (b) Jehova i tokim ol king long mekim wanem? Bilong wanem ol i mas mekim olsem?
12. Wanem ol gutpela pasin bilong King Devit na yumi save em i stap gut long Jehova?
13, 14. Sampela king i kamap bihain long Devit ol i bin mekim wanem ol pasin nogut?
15. Taim Jisas i stap long graun, wanem rong bilong ol bikman Juda?
16. Olsem wanem yumi save, ol bikman Juda i no bin daun long gavman bilong God?
17. Olsem wanem na lain Israel i no aninit moa long gavman bilong God?
18. Long taim bilong ol aposel God i bin kirapim wanem nupela gavman bilong em? Stori long dispela.
19. Olsem wanem yumi save, gavman bilong God i bin bosim ol Kristen bilong pastaim?
20. Taim ol aposel i dai, olsem wanem long gavman bilong God?
21, 22. (a) Olsem wanem Jehova i bin kirapim gen gavman bilong em long taim bilong las de? (b) Yumi laik save long wanem samting bilong dispela gavman bilong God?
[Piksa long pes 12]
Ol hetman Juda i tokaut long Pontius Pailat olsem Sisar em i king bilong ol; ol i no laikim dispela King Jehova i makim