Yu Tingim?
Olsem wanem? Yu bin amamas long kaunim tok bilong ol nupela Wastaua? Sapos olsem, bai yu amamas long tingim bek ol dispela tok hia:
▫ Bilong wanem tupela Israel bilong lukstil i go stap long haus bilong pamukmeri Rahap?
Tupela Israel bilong lukstil, ol i save bihainim Lo bilong God, olsem na ol i no kam long Rahap bilong mekim pasin nogut. Ating ol i kam long em na ol Jeriko i no ken ting ol i kam bilong lukstil long ples. Na haus bilong em i stap antap long banis na i no hatwok long ranawe i go. Na bikpela samting moa, Jehova i stiaim tupela na ol i kam long haus bilong wanpela sinmeri, long wanem, taim em i harim stori long ol samting Jehova i bin mekim long ol Israel, em i pilim tru na em i tanim bel na lusim pasin nogut.—12/15, pes 24-25.
▫ Belhat i mekim wanem long skin bilong yumi?
Ol saveman i kisim save olsem skin bilong man i save belhat i save kamapim planti homon, em wanpela kain marasin long skin. Sapos man i save belhat planti taim, dispela planti homon i mekim na gutpela gris kolestrol bai go liklik na kolestrol nogut bai kamap planti, na dispela inap kamapim bikpela sik bilong klok.—12/15, pes 32.
▫ Yumi ken mekim wanem na bai yumi inap tilim planti Wastaua na Kirap! moa?
Tingim Wastaua na Kirap! i tupela gutpela samting; mekim liklik tok tasol; redim narapela narapela tok na bai yu inap senisim tok; tingim hamas yu laik tilim.—1/1, pes 24-25.
▫ Bilong wanem Moses em i gutpela piksa bilong yumi ken bihainim?
Moses i bin askim Jehova long soim rot long em long stretim ol samting. Em i no bihainim laik bilong em yet, nogat, em i tingting tasol long givim biknem long Jehova. Em i gat strongpela bilip; oltaim em i tingim Jehova i King tru bilong lain Israel.—1/15, pes 11.
▫ Long wanem ol rot God i win long skulim ol man?
Jehova i win long skulim lain bilong em, long wanem, em i wok long helpim lain bilong em long kisim save long tok i tru. Ol i kisim save long ol samting bilong spirit na i olsem ol i lusim tudak na i kam long lait, na i skulim ol man i gat pasin daun na bai ol i ken lotu long em “long strong bilong Holi Spirit na long pasin i tru.” (Jon 4:24) Ol tok God i skulim ol man long en i helpim ol long sanap strong na winim pasin nogut bilong dispela graun.—2/1, pes 10-12.
▫ Wanem rot i gutpela bilong givim tok bilong stretim man?
Bilong mekim gut dispela wok yumi mas tingim dispela man na mekim gut long em. Tasol taim brata Kristen i givim tok long man bilong stretim em, em i mas mekim long gutpela pasin na givim strongpela tok long pasin isi.—2/1, pes 28.
▫ Olsem wanem Misin Katolik i kisim bilip bilong Asumsio bilong Maria?
Sampela handet yia bihain long dai bilong Jisas ol Kristen i no ting God i bin kisim Maria i go antap long heven. Tasol bihain, taim misin i kisim bilip bilong God Triwan, nau ol i kirap long litimapim nem bilong Maria. Long Novemba 1, 1950, Misin Katolik i kisim dispela bilip na Pop Pius Namba 12 i tok: ‘God i bin tokim mipela long dispela samting.’—Munificentissimus Deus.—2/15, pes 26-27.
▫ Long Jeremaia sapta 24, basket i pulap long gutpela fik na basket i pulap long fik nogut i makim wanem samting?
Ol gutpela fik i bin makim ol Juda i go kalabus long Babilon, na sampela bilong ol i kam bek long Juda. Ol fik nogut i makim King Sedekaia na ol man i stap wantaim em na i bikhet long King Nebukatnesar, maski ol i mekim tok promis long nem bilong Jehova long i stap daun long King Nebukatnesar. Long nau lain remnan bilong Israel bilong spirit i kamapim gutpela kaikai long laip bilong ol tasol ol pris pasto long ol misin i holim nating nem Kristen i kamapim kaikai nogut.—3/1, pes 14-16.
▫ Husat em Ol Man Bilong De 14, na bilong wanem ol Kristen long nau i laik save long ol?
Bihain long taim bilong ol aposel i gat sampela man i bin mekim Kaikai Bilong Bikpela long Nisan 14 long olgeta yia, olsem ol aposel i bin mekim. Ol man i bin kolim ol olsem “Ol Man Bilong De 14.” Yumi laik save long dispela samting long nau, long wanem, dispela i soim yumi, bihain long taim ol aposel i dai pinis, i gat sampela man i bihainim stretpela pasin bilong tingim indai bilong Jisas wanpela taim long yia long Nisan 14.—3/15, pes 4-5.
▫ Wiliam Wiston em i husat?
Em i wanpela saveman tru bilong Inglan long yia 1700 samting, na em i gutpela pren bilong Bikman Aisak Niuton. Wiston i tanim ol tok bilong Nupela Testamen long tok Inglis, na em i tokaut klia olsem bilip bilong God Triwan i no stret. Na Wiston i mekim tok long ol man long ol sta na ol namba. Tasol planti man i tingim Wiston, long wanem, em i bin tanim long tok Inglis ol tok bilong Flavius Josifas, em wanpela saveman Juda.—3/15, pes 26-28.
▫ Olsem wanem God i wokim ol manmeri na ol i kamap olsem em yet? (Stat 1:27)
God i wokim ol manmeri na ol inap kamapim ol gutpela pasin olsem bilong God—God i gat strong, na em i laikim tru ol narapela, na em i mekim stretpela pasin, na savepasin, na ol narapela gutpela pasin.—4/1, pes 25.